ຊາມູເອນສະບັບທີໜຶ່ງ 29:1-11
-
ພວກຟີລິດສະຕີນບໍ່ເຊື່ອໃຈດາວິດ (1-11)
29 ພວກຟີລິດສະຕີນ+ໄດ້ລວບລວມທະຫານທັງໝົດຢູ່ເມືອງອາເຟັກ ແລະພວກອິດສະຣາເອນຕັ້ງຄ້າຍຢູ່ໃກ້ໆນ້ຳພຸໃນເມືອງເຢດຊະເຣເອນ.+
2 ພວກເຈົ້າເມືອງຂອງຟີລິດສະຕີນມາພ້ອມກັບພວກທະຫານກອງຮ້ອຍແລະກອງພັນ. ດາວິດກັບພວກທະຫານຂອງລາວແລະອາກີເຊກໍຍົກກອງທັບນຳຫຼັງມາ.+
3 ແຕ່ພວກເຈົ້າເມືອງຂອງຟີລິດສະຕີນຖາມວ່າ: “ພວກເຮັບເຣີມາເຮັດຫຍັງຢູ່ນີ້?” ອາກີເຊຕອບວ່າ: “ນີ້ແມ່ນດາວິດຜູ້ຮັບໃຊ້ຂອງຊາອູນກະສັດອິດສະຣາເອນ ລາວຢູ່ກັບຂ້ອຍໄດ້ປີປາຍແລ້ວ.+ ຕັ້ງແຕ່ລາວໜີມາຢູ່ນຳຂ້ອຍ ຂ້ອຍບໍ່ເຄີຍເຫັນລາວເຮັດຫຍັງຜິດຈັກເທື່ອ.”
4 ແຕ່ພວກເຈົ້າເມືອງຂອງຟີລິດສະຕີນບໍ່ພໍໃຈອາກີເຊແລະບອກວ່າ: “ໃຫ້ລາວກັບເມືອສະ.+ ໃຫ້ລາວກັບເມືອບ່ອນທີ່ທ່ານໃຫ້ລາວຢູ່. ບໍ່ຕ້ອງໃຫ້ລາວໄປຕໍ່ສູ້ນຳພວກເຮົາ ຢ້ານວ່າລາວຈະຫັກຫຼັງແລ້ວມາຕໍ່ສູ້ພວກເຮົາແທນ.+ ຄິດເບິ່ງແມ້ ເຈົ້ານາຍຂອງດາວິດຈະດີໃຈຫຼາຍສ່ຳໃດ ຖ້າລາວເອົາຫົວຂອງທະຫານພວກເຮົາໄປໃຫ້ເຈົ້ານາຍລາວ.
5 ແມ່ນດາວິດຜູ້ນີ້ຕົ໋ວທີ່ເຂົາເຈົ້າເຕັ້ນແລະຮ້ອງເພງຍ້ອງຍໍວ່າ
‘ຊາອູນຂ້າສັດຕູໄດ້ເປັນພັນໆແຕ່ດາວິດຂ້າສັດຕູໄດ້ເປັນໝື່ນໆ.’”+
6 ອາກີເຊ+ຈຶ່ງເອີ້ນດາວິດມາແລະບອກວ່າ: “ຂ້ອຍຂໍສາບານຕໍ່ໜ້າພະເຢໂຫວາພະເຈົ້າຜູ້ມີຊີວິດຢູ່ວ່າ ເຈົ້າເປັນຄົນສັດຊື່ແລະຂ້ອຍຢາກໃຫ້ເຈົ້າໄປຕໍ່ສູ້ນຳພວກເຮົາ+ ເພາະຂ້ອຍບໍ່ເຄີຍເຫັນເຈົ້າເຮັດຫຍັງຜິດເລີຍຕັ້ງແຕ່ເຈົ້າມາຢູ່ນຳຂ້ອຍ.+ ແຕ່ພວກເຈົ້າເມືອງບໍ່ເຊື່ອໃຈເຈົ້າ.+
7 ໃຫ້ເຈົ້າກັບເມືອກ່ອນ ແລະຢ່າເຮັດໃຫ້ພວກເຈົ້າເມືອງຂອງຟີລິດສະຕີນໃຈຮ້າຍ.”
8 ແຕ່ດາວິດຖາມອາກີເຊວ່າ: “ຂ້ອຍເຮັດຫຍັງຜິດບໍ? ຂ້ອຍບໍ່ໄດ້ເຮັດຫຍັງຜິດຕົ໋ວຕັ້ງແຕ່ມື້ທີ່ຂ້ອຍມາຢູ່ນຳທ່ານ. ເປັນຫຍັງຈຶ່ງບໍ່ໃຫ້ຂ້ອຍໄປຕໍ່ສູ້ກັບພວກສັດຕູນຳທ່ານ?”
9 ອາກີເຊຕອບດາວິດວ່າ: “ຂ້ອຍເຊື່ອວ່າເຈົ້າເປັນຄົນດີຄືກັບທູດສະຫວັນຂອງພະເຈົ້າ.+ ແຕ່ພວກເຈົ້າເມືອງຂອງຟີລິດສະຕີນບອກວ່າ ບໍ່ໃຫ້ເຈົ້າໄປຕໍ່ສູ້ນຳພວກເຮົາ.
10 ມື້ອື່ນໃຫ້ເຈົ້າກັບພວກທະຫານຂອງເຈົ້າຕື່ນແຕ່ເຊົ້າໆ ເມື່ອແຈ້ງແລ້ວກໍໃຫ້ກັບເມືອ.”
11 ດາວິດກັບພວກທະຫານກໍຕື່ນແຕ່ເຊົ້າແລະກັບເມືອເຂດຂອງຟີລິດສະຕີນ ສ່ວນພວກຟີລິດສະຕີນກໍໄປເມືອງເຢດຊະເຣເອນ.+