ຊາມູເອນສະບັບທີໜຶ່ງ 3:1-21
-
ຊາມູເອນໄດ້ເປັນຜູ້ພະຍາກອນ (1-21)
3 ຊາມູເອນຮັບໃຊ້+ພະເຢໂຫວາໂດຍມີເອລີເປັນຜູ້ເບິ່ງແຍງ. ໃນຕອນນັ້ນ ດົນໆຈຶ່ງມີຂ່າວສານຫຼືນິມິດ+ຈາກພະເຢໂຫວາ.
2 ມື້ໜຶ່ງ ເອລີກຳລັງນອນຢູ່ໃນຫ້ອງ ຕອນນັ້ນຕາຂອງລາວກໍມົວແລະເບິ່ງບໍ່ເຫັນຮຸ່ງປານໃດ.+
3 ຕະກຽງຂອງພະເຈົ້າ+ຍັງໄຕ້ຢູ່ ແລະຊາມູເອນກຳລັງນອນຢູ່ໃນເຕັ້ນສັກສິດ*+ຂອງພະເຢໂຫວາເຊິ່ງຫີບສັນຍາຂອງພະເຈົ້າກໍຢູ່ຫັ້ນ.
4 ພະເຢໂຫວາໄດ້ເອີ້ນຊາມູເອນ. ລາວຕອບວ່າ: “ຫຼານຢູ່ນີ້.”
5 ແລ້ວລາວກໍແລ່ນໄປຫາເອລີແລະເວົ້າວ່າ: “ລຸງເອີ້ນຫຼານບໍ?” ແຕ່ເອລີບອກວ່າ: “ບໍ່ ລຸງບໍ່ໄດ້ເອີ້ນ. ກັບໄປນອນສະ.” ຊາມູເອນກໍກັບໄປນອນ.
6 ແລ້ວພະເຢໂຫວາກໍເອີ້ນອີກວ່າ: “ຊາມູເອນ!” ຊາມູເອນກໍລຸກຂຶ້ນໄປຫາເອລີແລະເວົ້າວ່າ: “ລຸງເອີ້ນຫຼານບໍ?” ແຕ່ເອລີເວົ້າວ່າ: “ບໍ່ ລຸງບໍ່ໄດ້ເອີ້ນ. ກັບໄປນອນສະ.”
7 (ຕອນນັ້ນຊາມູເອນຍັງບໍ່ທັນຮູ້ຈັກພະເຢໂຫວາດີ ແລະຍັງບໍ່ເຄີຍໄດ້ຮັບຂ່າວສານຈາກພະເຢໂຫວາ.)+
8 ພະເຢໂຫວາໄດ້ເອີ້ນລາວອີກເປັນເທື່ອທີ 3 ວ່າ: “ຊາມູເອນ!” ແລ້ວລາວກໍລຸກຂຶ້ນໄປຫາເອລີແລະເວົ້າວ່າ: “ລຸງເອີ້ນຫຼານບໍ?”
ບັດນີ້ ເອລີຮູ້ແລ້ວວ່າພະເຢໂຫວາເປັນຜູ້ເອີ້ນຊາມູເອນ.
9 ເອລີຈຶ່ງບອກຊາມູເອນວ່າ: “ກັບໄປນອນສະ. ຖ້າເພິ່ນເອີ້ນຫຼານອີກກໍໃຫ້ຕອບວ່າ ‘ພະເຢໂຫວາບອກລູກໂລດ ຜູ້ຮັບໃຊ້ຂອງພະອົງກຳລັງຟັງຢູ່.’” ແລ້ວຊາມູເອນກໍກັບໄປນອນ.
10 ພະເຢໂຫວາໄດ້ເອີ້ນຊາມູເອນຄືເກົ່າອີກວ່າ: “ຊາມູເອນ! ຊາມູເອນ!” ລາວກໍຕອບວ່າ: “ບອກລູກໂລດ ຜູ້ຮັບໃຊ້ຂອງພະອົງກຳລັງຟັງຢູ່.”
11 ພະເຢໂຫວາເວົ້າກັບຊາມູເອນວ່າ: “ເຮົາຈະເຮັດບາງສິ່ງບາງຢ່າງໃນອິດສະຣາເອນ ແລະຄົນທີ່ໄດ້ຍິນເລື່ອງນີ້ຈະຕ້ອງຕົກໃຈຫຼາຍ.+
12 ໃນມື້ນັ້ນເຮົາຈະຈັດການກັບຄອບຄົວຂອງເອລີຕາມທີ່ເຮົາໄດ້ເວົ້າໄວ້ທັງໝົດ.+
13 ເຈົ້າຕ້ອງບອກລາວວ່າເຮົາຈະລົງໂທດຄອບຄົວຂອງລາວຕະຫຼອດໄປ ຍ້ອນລາວຮູ້ຢູ່ແລ້ວ+ວ່າລູກຊາຍຂອງລາວເຮັດຊົ່ວເຊິ່ງເປັນການປ້ອຍດ່າເຮົາ+ ແຕ່ລາວພັດບໍ່ຍອມລົງໂທດເຂົາເຈົ້າ.+
14 ເຮົາຈຶ່ງສັນຍາວ່າຈະບໍ່ມີເຄື່ອງບູຊາຊະນິດໃດສາມາດລົບລ້າງຄວາມຜິດທີ່ຄອບຄົວຂອງເອລີເຮັດ.”+
15 ຊາມູເອນກໍກັບໄປນອນຈົນຮອດຕອນເຊົ້າ. ຫຼັງຈາກນັ້ນ ລາວກໍເປີດທາງເຂົ້າເຕັ້ນສັກສິດຂອງພະເຢໂຫວາ ແຕ່ລາວບໍ່ກ້າບອກເອລີວ່າພະເຈົ້າເວົ້າຫຍັງກັບລາວ.
16 ເອລີເອີ້ນຫາຊາມູເອນວ່າ: “ຊາມູເອນເອີ້ຍ!” ລາວຕອບວ່າ: “ຫຼານຢູ່ນີ້.”
17 ເອລີຖາມວ່າ: “ເພິ່ນບອກຫຍັງຫຼານ? ບໍ່ຕ້ອງປິດບັງລຸງເດີ້. ຖ້າຫຼານເລົ່າບໍ່ໝົດ ຂໍໃຫ້ພະເຈົ້າລົງໂທດຫຼານ.”
18 ຊາມູເອນກໍເລົ່າທຸກຢ່າງໃຫ້ເອລີຟັງ. ລາວບໍ່ໄດ້ປິດບັງຫຍັງເລີຍ. ເອລີຈຶ່ງເວົ້າວ່າ: “ຖ້າພະເຢໂຫວາເວົ້າແບບນີ້ແລ້ວ ຂໍໃຫ້ເພິ່ນເຮັດຕາມທີ່ເພິ່ນຕ້ອງການ.”
19 ຊາມູເອນໃຫຍ່ຂຶ້ນ ແລະພະເຢໂຫວາໄດ້ອວຍພອນລາວ.+ ທຸກເລື່ອງທີ່ເພິ່ນບອກຊາມູເອນກໍເກີດຂຶ້ນແທ້.
20 ພວກອິດສະຣາເອນຕັ້ງແຕ່ເມືອງດານຈົນຮອດເມືອງເບເອເຊບາກໍຮູ້ວ່າຊາມູເອນເປັນຜູ້ພະຍາກອນຂອງພະເຢໂຫວາ.
21 ພະເຢໂຫວາມາເມືອງຊີໂລເລື້ອຍໆໂດຍທາງນິມິດ. ພະເຢໂຫວາໃຫ້ຊາມູເອນຮູ້ວ່າເພິ່ນຕ້ອງການເຮັດຫຍັງຢູ່ເມືອງຊີໂລ ພະເຢໂຫວາຈຶ່ງສົ່ງຂ່າວມາໃຫ້ລາວ.+
ຂໍ ຄວາມ ໄຂ ເງື່ອນ
^ ແປຕາມໂຕວ່າ “ວິຫານ”