ຊາມູເອນສະບັບທີໜຶ່ງ 31:1-13
-
ຊາອູນກັບລູກຊາຍ 3 ຄົນຂອງລາວຕາຍ (1-13)
31 ມີມື້ໜຶ່ງພວກຟີລິດສະຕີນມາຕໍ່ສູ້ກັບພວກອິດສະຣາເອນ.+ ພວກທະຫານອິດສະຣາເອນຕໍ່ສູ້ບໍ່ໄຫວຈຶ່ງໜີ ແລະມີຫຼາຍຄົນຖືກຂ້າຢູ່ເທິງພູກິນໂບອາ.+
2 ພວກທະຫານຟີລິດສະຕີນໄລ່ທັນຊາອູນກັບພວກລູກຊາຍ ແລ້ວໄດ້ຂ້າໂຢນາທານ+ ອາບີນາດາບ ແລະມັນກີຊົວທີ່ເປັນລູກຊາຍຂອງຊາອູນ.+
3 ເຂົາເຈົ້າຕໍ່ສູ້ກັບຊາອູນຢ່າງດຸເດືອດ. ເມື່ອພວກທະຫານຍິງທະນູເຫັນຊາອູນ ເຂົາເຈົ້າກໍຍິງທະນູໃສ່ລາວຈົນເຈັບໜັກ.+
4 ຊາອູນເວົ້າກັບຜູ້ທີ່ຖືອາວຸດໃຫ້ລາວວ່າ: “ເອົາດາບຂອງເຈົ້າມາແທງຂ້ອຍໃຫ້ຕາຍເພື່ອບໍ່ໃຫ້ພວກທີ່ນັບຖືພະເຈົ້າປອມ*+ເຮັດກັບຂ້ອຍແບບໂຫດໆແລ້ວກໍຂ້າຂ້ອຍ.” ແຕ່ທະຫານຜູ້ນັ້ນບໍ່ຍອມເຮັດຍ້ອນຢ້ານຫຼາຍ ຊາອູນຈຶ່ງຖອດດາບຂອງໂຕເອງອອກມາແລ້ວຂ້າໂຕຕາຍ.+
5 ເມື່ອຜູ້ຖືອາວຸດເຫັນວ່າຊາອູນຕາຍແລ້ວ+ ລາວກໍຖອດດາບອອກມາແລ້ວຂ້າໂຕຕາຍຄືກັນ.
6 ໃນມື້ນັ້ນ ຊາອູນ ລູກຊາຍ 3 ຄົນຂອງລາວ ຜູ້ຖືອາວຸດໃຫ້ຊາອູນແລະທະຫານທຸກຄົນຂອງລາວໄດ້ຕາຍ.+
7 ເມື່ອພວກອິດສະຣາເອນທີ່ຢູ່ແຖວຮ່ອມພູເຢດຊະເຣເອນແລະແຖວແມ່ນ້ຳຈໍແດນຮູ້ວ່າທະຫານອິດສະຣາເອນໄດ້ໜີໄປ ແລະຊາອູນກັບພວກລູກຊາຍກໍຕາຍແລ້ວ ເຂົາເຈົ້າຈຶ່ງປະຖິ້ມເຮືອນຊານແລະກໍໜີໄປຄືກັນ+ ແລ້ວພວກຟີລິດສະຕີນກໍເຂົ້າມາຍຶດເອົາເມືອງຂອງເຂົາເຈົ້າ.
8 ມື້ຕໍ່ມາ ເມື່ອພວກຟີລິດສະຕີນມາປົດເອົາເຄື່ອງຈາກສົບຄົນຕາຍ ເຂົາເຈົ້າກໍເຫັນວ່າຊາອູນກັບລູກຊາຍ 3 ຄົນຕາຍຢູ່ເທິງພູກິນໂບອາ.+
9 ເຂົາເຈົ້າຈຶ່ງຕັດຫົວຊາອູນ ແກ້ເອົາຊຸດຮົບກັບອາວຸດຂອງລາວ ແລ້ວສົ່ງຂ່າວໄປທົ່ວແຜ່ນດິນຟີລິດສະຕີນ+ແລະໃຫ້ປະກາດຢູ່ວິຫານຂອງພະເຈົ້າປອມ+ເພື່ອໃຫ້ທຸກຄົນຮູ້.
10 ຈາກນັ້ນ ພວກຟີລິດສະຕີນກໍເອົາຊຸດຮົບກັບອາວຸດຂອງຊາອູນໄປໄວ້ໃນວິຫານຮູບພະອັດຊະໂຕເຣດ* ແລະເອົາເຊືອກມັດສົບລາວແລ້ວຫ້ອຍໄວ້ຢູ່ກຳແພງເມືອງເບັດຊານ.+
11 ເມື່ອຄົນໃນເມືອງຢາເບັດກິລຽດ+ໄດ້ຍິນສິ່ງທີ່ພວກຟີລິດສະຕີນເຮັດກັບຊາອູນ
12 ພວກທະຫານທຸກຄົນຈາກເມືອງນັ້ນກໍເດີນທາງໝົດຄືນເພື່ອໄປເອົາສົບຊາອູນກັບພວກລູກຊາຍລົງມາຈາກກຳແພງເມືອງເບັດຊານ. ແລ້ວເຂົາເຈົ້າກໍກັບມາເມືອງຢາເບັດແລະເຜົາສົບຢູ່ຫັ້ນ.
13 ຈາກນັ້ນ ເຂົາເຈົ້າກໍເອົາກະດູກ+ຂອງຊາອູນກັບພວກລູກຊາຍໄປຝັງຢູ່ກ້ອງຕົ້ນທາມາຣິກ*ໃນເມືອງຢາເບັດ+ ແລະພາກັນອົດເຂົ້າ 7 ມື້.
