ຊາມູເອນສະບັບທີໜຶ່ງ 7:1-17
7 ພວກກີຣິອາດເຢອາຣີມຈຶ່ງລົງມາເອົາຫີບສັນຍາຂອງພະເຢໂຫວາໄປໄວ້ເຮືອນຂອງອາບີນາດາບ+ທີ່ຢູ່ເທິງໂນນພູ ແລະເຂົາເຈົ້າໃຫ້ເອເລອາຊາລູກຊາຍຂອງອາບີນາດາບເຝົ້າຫີບສັນຍາຂອງພະເຢໂຫວາ.
2 ເວລາຜ່ານໄປ 20 ປີ ນັບຕັ້ງແຕ່ມື້ທີ່ຫີບສັນຍາມາຮອດເມືອງກີຣິອາດເຢອາຣີມ ພວກອິດສະຣາເອນທຸກຄົນເລີ່ມຮ້ອງຂໍໃຫ້ພະເຢໂຫວາຊ່ວຍ.+
3 ຊາມູເອນເວົ້າກັບພວກອິດສະຣາເອນວ່າ: “ຖ້າພວກເຈົ້າກັບມາຫາພະເຢໂຫວາດ້ວຍຄວາມເຕັມໃຈ+ ຖິ້ມຮູບພະຂອງຄົນຕ່າງຊາດ+ແລະຮູບພະອັດຊະໂຕເຣດ*+ທີ່ຢູ່ນຳພວກເຈົ້າ ແລະຮັບໃຊ້ພະເຢໂຫວາຜູ້ດຽວດ້ວຍສຸດຫົວໃຈ+ ເພິ່ນຈະຊ່ວຍພວກເຈົ້າໃຫ້ລອດຈາກພວກຟີລິດສະຕີນ.”+
4 ດັ່ງນັ້ນ ພວກອິດສະຣາເອນຈຶ່ງທຳລາຍຮູບພະບາອານກັບຮູບພະອັດຊະໂຕເຣດແລະນະມັດສະການພະເຢໂຫວາພຽງຜູ້ດຽວ.+
5 ແລ້ວຊາມູເອນກໍບອກວ່າ: “ໃຫ້ພວກອິດສະຣາເອນທຸກຄົນໄປເມືອງມິດຊະປາ+ ແລະຂ້ອຍຈະອະທິດຖານຫາພະເຢໂຫວາເພື່ອພວກເຈົ້າ.”+
6 ເຂົາເຈົ້າຈຶ່ງໄປເມືອງມິດຊະປາແລະໄດ້ຕັກນ້ຳມາຖອກຢູ່ຕໍ່ໜ້າພະເຢໂຫວາ ແລະໃນມື້ນັ້ນເຂົາເຈົ້າໄດ້ອົດເຂົ້າ.+ ເຂົາເຈົ້າເວົ້າວ່າ: “ພວກເຮົາໄດ້ເຮັດຜິດຕໍ່ພະເຢໂຫວາ.”+ ຊາມູເອນເລີ່ມເປັນຜູ້ຕັດສິນ+ຂອງພວກອິດສະຣາເອນຢູ່ເມືອງມິດຊະປາ.
7 ເມື່ອພວກຟີລິດສະຕີນຮູ້ວ່າພວກອິດສະຣາເອນໄປລວມກັນຢູ່ເມືອງມິດຊະປາ ພວກເຈົ້າເມືອງຂອງຟີລິດສະຕີນ+ຈຶ່ງຂຶ້ນໄປຕໍ່ສູ້ພວກອິດສະຣາເອນ. ເມື່ອພວກອິດສະຣາເອນໄດ້ຍິນເລື່ອງນີ້ ເຂົາເຈົ້າກໍຢ້ານພວກຟີລິດສະຕີນ.
8 ພວກອິດສະຣາເອນຈຶ່ງບອກຊາມູເອນວ່າ: “ຢ່າເຊົາອ້ອນວອນພະເຢໂຫວາສຳລັບພວກເຮົາເພື່ອຊ່ວຍພວກເຮົາ+ໃຫ້ລອດຈາກພວກຟີລິດສະຕີນ.”
9 ຊາມູເອນໄດ້ເອົາແກະນ້ອຍເປັນໂຕໄປເຜົາເປັນເຄື່ອງບູຊາ+ໃຫ້ພະເຢໂຫວາ. ຈາກນັ້ນ ຊາມູເອນກໍອະທິດຖານຂໍໃຫ້ພະເຢໂຫວາຊ່ວຍພວກອິດສະຣາເອນ ແລະພະເຢໂຫວາຕອບຄຳອ້ອນວອນຂອງລາວ.+
10 ຕອນທີ່ຊາມູເອນກຳລັງເຜົາເຄື່ອງບູຊາ ພວກຟີລິດສະຕີນໄດ້ຍົກກອງທັບມາຕໍ່ສູ້ພວກອິດສະຣາເອນ. ໃນມື້ນັ້ນ ພະເຢໂຫວາໄດ້ເຮັດໃຫ້ມີຟ້າຮ້ອງສຽງດັງໆ.+ ພວກຟີລິດສະຕີນຢ້ານຫຼາຍຈົນບໍ່ຮູ້ແນວຊິເຮັດ+ ພວກອິດສະຣາເອນຈຶ່ງຕໍ່ສູ້ຊະນະເຂົາເຈົ້າ.
11 ພວກອິດສະຣາເອນກໍອອກຈາກເມືອງມິດຊະປາ ແລະໄລ່ຂ້າພວກຟີລິດສະຕີນໄປຈົນຮອດທາງໃຕ້ຂອງເມືອງເບັດຄາ.
12 ຊາມູເອນໄດ້ເອົາຫີນກ້ອນໜຶ່ງ+ໄປວາງໄວ້ລະຫວ່າງເມືອງມິດຊະປາແລະເມືອງເຢຊານາ ແລະຕັ້ງຊື່ບ່ອນນັ້ນວ່າເອເບັນເອເຊ* ແລ້ວລາວກໍເວົ້າວ່າ: “ພະເຢໂຫວາຊ່ວຍພວກເຮົາຈົນຮອດຕອນນີ້.”+
13 ຍ້ອນແນວນັ້ນພວກຟີລິດສະຕີນຈຶ່ງບໍ່ຊະນະ ແລະເຂົາເຈົ້າກໍບໍ່ໄດ້ເຂົ້າມາໃນເຂດຂອງພວກອິດສະຣາເອນອີກເລີຍ.+ ຕອນທີ່ຊາມູເອນມີຊີວິດຢູ່ ພະເຢໂຫວາບໍ່ຍອມໃຫ້ພວກຟີລິດສະຕີນມາໂຈມຕີອິດສະຣາເອນ.+
14 ນອກຈາກນັ້ນ ເມືອງຕ່າງໆທີ່ພວກຟີລິດສະຕີນໄດ້ຍຶດໄປ ເຂົາເຈົ້າກໍສົ່ງຄືນໃຫ້ພວກອິດສະຣາເອນຕັ້ງແຕ່ເມືອງເອັກໂຣນຈົນຮອດເມືອງກັດ. ພວກອິດສະຣາເອນຈຶ່ງໄດ້ເຂດຂອງໂຕເອງຄືນມາຈາກພວກຟີລິດສະຕີນ
ແລະຍັງມີຄວາມສະຫງົບສຸກລະຫວ່າງພວກອິດສະຣາເອນກັບພວກອາໂມນຳອີກ.+
15 ຊາມູເອນໄດ້ເປັນຜູ້ຕັດສິນຂອງພວກອິດສະຣາເອນຕະຫຼອດຊີວິດຂອງລາວ.+
16 ໃນແຕ່ລະປີ ລາວໄດ້ໄປເມືອງເບເທນ+ ເມືອງກິນການ+ ແລະເມືອງມິດຊະປາ+ເພື່ອຕັດສິນຄະດີຂອງພວກອິດສະຣາເອນ.
17 ແຕ່ລາວຈະກັບໄປເມືອງຣາມາ+ ເພາະເຮືອນຂອງລາວຢູ່ຫັ້ນ. ຢູ່ເມືອງຣາມາ ລາວຍັງໄດ້ຕັດສິນຄະດີຂອງພວກອິດສະຣາເອນ. ລາວໄດ້ສ້າງແທ່ນບູຊາໃຫ້ພະເຢໂຫວາຢູ່ຫັ້ນ.+
