ຈົດໝາຍສະບັບທຳອິດເຖິງຄລິດສະຕຽນໃນເມືອງເທຊະໂລນິກ 3:1-13
3 ເມື່ອພວກເຮົາລໍຖ້າຟັງຂ່າວຂອງພວກເຈົ້າຕໍ່ໄປບໍ່ໄຫວ ພວກເຮົາຈຶ່ງຕັດສິນໃຈວ່າຈະຢູ່ເມືອງອາແຖນ+
2 ແລະສົ່ງຕີໂມທຽວ+ພີ່ນ້ອງຂອງພວກເຮົາໄປຫາພວກເຈົ້າ. ລາວເປັນຜູ້ຮັບໃຊ້ຂອງພະເຈົ້າ*ທີ່ປະກາດຂ່າວດີເລື່ອງພະຄລິດ. ລາວຈະຊ່ວຍພວກເຈົ້າໃຫ້ເຂັ້ມແຂງແລະມີກຳລັງໃຈ ເພື່ອເຮັດໃຫ້ພວກເຈົ້າມີຄວາມເຊື່ອທີ່ໝັ້ນຄົງ
3 ແລະບໍ່ຫວັ່ນໄຫວເມື່ອເຈິຄວາມຍາກລຳບາກ. ພວກເຈົ້າກໍຮູ້ວ່າສິ່ງເຫຼົ່ານີ້ຈະຕ້ອງເກີດຂຶ້ນກັບພວກເຮົາ.+
4 ຕອນທີ່ພວກເຮົາຢູ່ກັບພວກເຈົ້າ ພວກເຮົາເຄີຍບອກວ່າພວກເຮົາຈະຕ້ອງເຈິຄວາມທຸກລຳບາກ ແລ້ວກໍເປັນແນວນັ້ນແທ້ໆແບບທີ່ພວກເຈົ້າຮູ້.+
5 ດັ່ງນັ້ນ ເມື່ອຂ້ອຍລໍຖ້າຕໍ່ໄປບໍ່ໄຫວ ຂ້ອຍຈຶ່ງສົ່ງຕີໂມທຽວໄປເພື່ອຈະຮູ້ວ່າຄວາມເຊື່ອຂອງພວກເຈົ້າເປັນແນວໃດ+ ຍ້ອນຢ້ານວ່າມານຮ້າຍ+ຈະລໍ້ລວງພວກເຈົ້າ ແລ້ວວຽກທີ່ພວກເຮົາທຸ່ມເທເຮັດຈະເສຍແຮງໄປລ້າໆ.
6 ແຕ່ຕີໂມທຽວຫາກໍກັບມາ+ບອກຂ່າວດີກ່ຽວກັບຄວາມເຊື່ອແລະຄວາມຮັກຂອງພວກເຈົ້າ. ລາວບອກວ່າພວກເຈົ້າຍັງຄິດຮອດພວກເຮົາສະເໝີແລະຢາກເຈິພວກເຮົາຄືກັບທີ່ພວກເຮົາຢາກເຈິພວກເຈົ້າ.
7 ພີ່ນ້ອງເອີ້ຍ ເມື່ອຮູ້ວ່າພວກເຈົ້າຮັກສາຄວາມເຊື່ອໄວ້ ພວກເຮົາກໍໄດ້ກຳລັງໃຈໃນຕອນທີ່ຕ້ອງອົດທົນກັບຄວາມທຸກແລະເຈິກັບຄວາມຍາກລຳບາກ.+
8 ພວກເຮົາມີກຳລັງຫຼາຍ ເມື່ອຮູ້ວ່າພວກເຈົ້າຍັງຢືນຢັດຢູ່ຝ່າຍຜູ້ເປັນນາຍ.
9 ພວກເຮົາບໍ່ຮູ້ຊິຂອບໃຈພະເຈົ້າແນວໃດ ຍ້ອນພວກເຈົ້າເຮັດໃຫ້ພວກເຮົາມີຄວາມສຸກຫຼາຍ.
10 ພວກເຮົາອະທິດຖານອ້ອນວອນຫຼາຍເປັນພິເສດທັງເວັນທັງຄືນ ເພື່ອຈະໄດ້ເຈິພວກເຈົ້າແລະຕື່ມສິ່ງທີ່ພວກເຈົ້າຍັງຂາດຢູ່ ເພື່ອຄວາມເຊື່ອຂອງພວກເຈົ້າຈະໝັ້ນຄົງຂຶ້ນ.+
11 ຂໍໃຫ້ພະເຈົ້າຜູ້ເປັນພໍ່ຂອງພວກເຮົາແລະພະເຢຊູຜູ້ເປັນນາຍຂອງພວກເຮົາເປີດໂອກາດໃຫ້ພວກເຮົາໄດ້ໄປຫາພວກເຈົ້າ.
12 ຂໍໃຫ້ຜູ້ເປັນນາຍຊ່ວຍພວກເຈົ້າໃຫ້ມີຄວາມຮັກຫຼາຍຂຶ້ນຕໍ່ກັນແລະຕໍ່ທຸກຄົນຈົນສຸດຫົວໃຈຄືກັບທີ່ພວກເຮົາຮັກພວກເຈົ້າ.+
13 ເມື່ອເປັນແນວນັ້ນ ພະເຢຊູຈະເຮັດໃຫ້ໃຈພວກເຈົ້າໝັ້ນຄົງແລະບໍລິສຸດບໍ່ມີບ່ອນຕິຕໍ່ໜ້າພະເຈົ້າຜູ້ເປັນພໍ່ຂອງພວກເຮົາ+ ຕອນທີ່ພະເຢຊູຜູ້ເປັນນາຍຂອງພວກເຮົາກັບມາ*+ພ້ອມກັບຜູ້ບໍລິສຸດທຸກຄົນຂອງເພິ່ນ.
ຂໍ ຄວາມ ໄຂ ເງື່ອນ
^ ຫຼືອາດແປວ່າ “ໝູ່ທີ່ເຮັດວຽກຮ່ວມກັບພະເຈົ້າ”
^ ເບິ່ງຄຳວ່າ “ການມາ” ໃນສ່ວນອະທິບາຍຄຳສັບ