ຈົດໝາຍສະບັບທຳອິດຂອງເປໂຕ 1:1-25
1 ຂ້ອຍເປໂຕທີ່ເປັນອັກຄະສາວົກ*+ຂອງພະເຢຊູຄລິດຂຽນຫາຄົນທີ່ອາໄສຢູ່ຊົ່ວຄາວໃນໂລກທີ່ກະຈັດກະຈາຍຢູ່ໃນແຂວງປົນໂຕ ແຂວງຄາລາເຕຍ ແຂວງກາປາໂດເກຍ+ ແຂວງອາຊີ* ແລະແຂວງບີທີເນຍ.
2 ພະເຈົ້າພໍ່ທີ່ຢູ່ໃນສະຫວັນໄດ້ເລືອກພວກເຈົ້າຕາມທີ່ເພິ່ນຕັ້ງໃຈໄວ້.+ ເພິ່ນໃຊ້ພະລັງຂອງເພິ່ນເພື່ອແຍກພວກເຈົ້າໄວ້ຕ່າງຫາກ.+ ເພິ່ນເຮັດແນວນີ້ກໍເພື່ອພວກເຈົ້າຈະເຊື່ອຟັງເພິ່ນ ແລະເພື່ອຈະເຮັດໃຫ້ພວກເຈົ້າສະອາດດ້ວຍເລືອດຂອງພະເຢຊູຄລິດ.+
ຂ້ອຍອະທິດຖານຂໍໃຫ້ພະເຈົ້າອວຍພອນພວກເຈົ້າຫຼາຍໆແລະຊ່ວຍພວກເຈົ້າໃຫ້ມີສັນຕິສຸກ.
3 ຂໍໃຫ້ພະເຈົ້າພໍ່ຂອງພະເຢຊູຄລິດຜູ້ເປັນນາຍຂອງພວກເຮົາໄດ້ຮັບການສັນລະເສີນ. ເພິ່ນອີ່ຕົນພວກເຮົາຫຼາຍແລະໃຫ້ພວກເຮົາເກີດໃໝ່+ເພື່ອພວກເຮົາຈະມີຄວາມຫວັງທີ່ແນ່ນອນ.+ ພວກເຮົາມີຄວາມຫວັງນີ້ກໍຍ້ອນພະເຢຊູຄລິດຖືກປຸກໃຫ້ຄືນມາຈາກຕາຍແລ້ວ.+
4 ພະເຈົ້າເອົາມໍລະດົກ*ທີ່ຖືກທຳລາຍບໍ່ໄດ້ໃຫ້ພວກເຈົ້າ.+ ເພິ່ນເອົາມໍລະດົກນັ້ນໄວ້ໃຫ້ພວກເຈົ້າຢູ່ໃນສະຫວັນ.+
5 ພະເຈົ້າໃຊ້ລິດເດດຂອງເພິ່ນປົກປ້ອງພວກເຈົ້າໂດຍທາງຄວາມເຊື່ອ ເພື່ອພວກເຈົ້າຈະລອດໃນຕອນສຸດທ້າຍ.
6 ເລື່ອງນີ້ເຮັດໃຫ້ພວກເຈົ້າມີຄວາມສຸກຫຼາຍ ເຖິງວ່າພວກເຈົ້າຍັງຕ້ອງທຸກໃຈໄລຍະໜຶ່ງຍ້ອນເຈິຄວາມຍາກລຳບາກ.+
7 ເລື່ອງນີ້ເປັນການທົດສອບຄວາມເຊື່ອຂອງພວກເຈົ້າ.+ ຄວາມເຊື່ອທີ່ຜ່ານການທົດສອບແລ້ວມີຄ່າຫຼາຍກວ່າຄຳ ຍ້ອນຄຳທີ່ຜ່ານການທົດສອບ*ດ້ວຍໄຟກໍຍັງເສົ້າໝອງໄດ້ ແຕ່ຄວາມເຊື່ອແບບນີ້ຈະເຮັດໃຫ້ພວກເຈົ້າໄດ້ຮັບຄຳສັນລະເສີນ ກຽດຕິຍົດ ແລະການຍົກຍ້ອງຕອນທີ່ພະເຢຊູຄລິດມາ.+
8 ເຖິງວ່າພວກເຈົ້າບໍ່ເຄີຍເຫັນພະຄລິດ ແຕ່ກໍຮັກເພິ່ນ ແລະເຖິງວ່າຕອນນີ້ພວກເຈົ້າຍັງບໍ່ເຫັນເພິ່ນ ແຕ່ກໍສະແດງຄວາມເຊື່ອໃນເພິ່ນແລະມີຄວາມສຸກຫຼາຍຈົນອະທິບາຍເປັນຄຳເວົ້າບໍ່ໄດ້.
9 ຄວາມເຊື່ອນັ້ນຈະເຮັດໃຫ້ພວກເຈົ້າໄດ້ຮັບລາງວັນເຊິ່ງກໍຄືຄວາມລອດ.+
10 ມີຜູ້ພະຍາກອນບາງຄົນພະຍາຍາມຄົ້ນຄວ້າເລື່ອງຄວາມລອດນີ້ຢ່າງລະອຽດ. ເຂົາເຈົ້າເຄີຍບອກລ່ວງໜ້າເລື່ອງຄວາມກະລຸນາທີ່ຍິ່ງໃຫຍ່ທີ່ພວກເຈົ້າໄດ້ຮັບ.+
11 ພະເຈົ້າໃຊ້ພະລັງຂອງເພິ່ນເພື່ອບອກເຂົາເຈົ້າວ່າພະຄລິດຈະຖືກທໍລະມານ+ ແລ້ວຈາກນັ້ນເພິ່ນຈະໄດ້ຮັບກຽດ. ຍ້ອນແນວນີ້ ເຂົາເຈົ້າຈຶ່ງພະຍາຍາມຄົ້ນຄວ້າວ່າຈະເກີດຫຍັງຂຶ້ນກັບພະຄລິດແລະຈະເກີດຂຶ້ນຕອນໃດ.+
12 ພະເຈົ້າຊ່ວຍເຂົາເຈົ້າໃຫ້ຮູ້ວ່າວຽກຮັບໃຊ້ທີ່ເຂົາເຈົ້າເຮັດນັ້ນບໍ່ແມ່ນເພື່ອໂຕເອງ ແຕ່ເພື່ອພວກເຈົ້າ. ຕອນນີ້ ພວກເຈົ້າໄດ້ຮູ້ເລື່ອງເຫຼົ່ານີ້ແລ້ວຈາກຄົນທີ່ມາປະກາດຂ່າວດີໃຫ້ພວກເຈົ້າຟັງໂດຍທາງພະລັງບໍລິສຸດທີ່ມາຈາກສະຫວັນ.+ ແມ່ນແຕ່ພວກທູດສະຫວັນກໍຍັງສົນໃຈຢາກຮູ້ເລື່ອງເຫຼົ່ານີ້.
13 ດັ່ງນັ້ນ ພວກເຈົ້າຕ້ອງກຽມຈິດໃຈໄວ້ໃຫ້ພ້ອມທີ່ຈະເຮັດວຽກໜັກ+ ມີສະຕິຢູ່ສະເໝີ+ ແລະລໍຖ້າທີ່ຈະໄດ້ຮັບຄວາມກະລຸນາທີ່ຍິ່ງໃຫຍ່ດ້ວຍຄວາມໝັ້ນໃຈເຊິ່ງພວກເຈົ້າຈະໄດ້ຮັບຕອນທີ່ພະເຢຊູຄລິດຈະມາສະແດງລິດເດດຂອງເພິ່ນ.
14 ໃນຖານະລູກທີ່ເຊື່ອຟັງ ໃຫ້ພວກເຈົ້າເຊົາເຮັດຕາມຄວາມຕ້ອງການທີ່ເຄີຍມີຕອນທີ່ຍັງບໍ່ຮູ້ເລື່ອງພະເຈົ້າ.
15 ແຕ່ໃຫ້ເປັນຄົນບໍລິສຸດໃນທຸກສິ່ງທີ່ພວກເຈົ້າເຮັດຄືກັບພະເຈົ້າອົງບໍລິສຸດຜູ້ທີ່ໄດ້ເລືອກພວກເຈົ້າ+
16 ຍ້ອນພະຄຳພີບອກວ່າ: “ພວກເຈົ້າຕ້ອງເປັນຄົນບໍລິສຸດ ເພາະເຮົາເປັນພະເຈົ້າທີ່ບໍລິສຸດ.”+
17 ຖ້າພວກເຈົ້າເອີ້ນພະເຈົ້າວ່າພໍ່ຕອນທີ່ຍັງອາໄສຢູ່ຊົ່ວຄາວໃນໂລກນີ້+ ທຸກສິ່ງທີ່ພວກເຈົ້າເຮັດກໍຕ້ອງສະແດງວ່າພວກເຈົ້າຢ້ານຢຳເພິ່ນ+ ຍ້ອນເພິ່ນຕັດສິນແຕ່ລະຄົນແບບບໍ່ລຳອຽງຕາມສິ່ງທີ່ເຂົາເຈົ້າເຮັດ.
18 ພວກເຈົ້າກໍຮູ້ວ່າພວກເຈົ້າຖືກປົດປ່ອຍໃຫ້ເປັນອິດສະຫຼະຈາກຮູບແບບຊີວິດທີ່ບໍ່ມີປະໂຫຍດເຊິ່ງສືບທອດກັນມາຈາກປູ່ຍ່າຕານາຍ. ພວກເຈົ້າບໍ່ໄດ້ຖືກປົດປ່ອຍດ້ວຍສິ່ງທີ່ເນົ່າເປື່ອຍຜຸພັງໄດ້ເຊັ່ນເງິນຫຼືຄຳ+
19 ແຕ່ຖືກປົດປ່ອຍດ້ວຍເລືອດທີ່ມີຄ່າຫຼາຍ+ຂອງພະຄລິດ+ເຊິ່ງເປັນຄືກັບເລືອດຂອງແກະນ້ອຍທີ່ສົມບູນດີແລະບໍ່ມີຕຳໜິ.+
20 ເພິ່ນຖືກເລືອກໄວ້ແລ້ວຕັ້ງແຕ່ກ່ອນຈະມີໂລກນີ້*+ ແຕ່ພະເຈົ້າໃຫ້ເພິ່ນມາໃນຕອນທ້າຍຂອງຍຸກນີ້ເພື່ອປະໂຫຍດຂອງພວກເຈົ້າ.+
21 ເພິ່ນຊ່ວຍພວກເຈົ້າໃຫ້ເຊື່ອໃນພະເຈົ້າ+ຜູ້ທີ່ປຸກເພິ່ນໃຫ້ຄືນມາຈາກຕາຍ+ແລະໃຫ້ກຽດເພິ່ນ.+ ພວກເຮົາຈຶ່ງມີຄວາມເຊື່ອແລະມີຄວາມຫວັງໃນພະເຈົ້າ.
22 ຕອນນີ້ພວກເຈົ້າເຮັດໃຫ້ຊີວິດສະອາດແລ້ວໂດຍເຊື່ອຟັງຄວາມຈິງແລະມີຄວາມຮັກຢ່າງຈິງໃຈແບບພີ່ນ້ອງ+ ຂໍໃຫ້ພວກເຈົ້າຮັກກັນດ້ວຍສຸດຫົວໃຈ.+
23 ພວກເຈົ້າເກີດໃໝ່+ ແຕ່ບໍ່ໄດ້ເກີດຈາກແນວພັນທີ່ຕາຍໄດ້ ພວກເຈົ້າເກີດຈາກແນວພັນທີ່ຕາຍບໍ່ໄດ້*+ ແລະເກີດຍ້ອນຄຳເວົ້າຂອງພະເຈົ້າຜູ້ມີຊີວິດຢູ່ຕະຫຼອດໄປ.+
24 ຄືກັບທີ່ພະຄຳພີບອກວ່າ “ມະນຸດເປັນຄືກັບຫຍ້າແລະຄວາມງາມຂອງເຂົາເຈົ້າເປັນຄືກັບດອກໄມ້ທີ່ຢູ່ທົ່ງຫຍ້າ. ຫຍ້າຫ່ຽວແຫ້ງແລະດອກໄມ້ກໍຫຼົ່ນ
25 ແຕ່ຄຳເວົ້າຂອງພະເຢໂຫວາ*ຈະຢູ່ຕະຫຼອດໄປ.”+ “ຄຳເວົ້າ” ນີ້ກໍແມ່ນຂ່າວດີທີ່ມີຄົນປະກາດໃຫ້ພວກເຈົ້າຟັງ.+
ຂໍ
^ ແຂວງໜຶ່ງຂອງຈັກກະວັດໂຣມ
^ ໃນພາສາກຣີກຄຳນີ້ແປວ່າ “ຜູ້ທີ່ຖືກສົ່ງອອກໄປ”
^ ຫຼື “ຊີວິດ”
^ ຫຼື “ການເຮັດໃຫ້ບໍລິສຸດ”
^ ໝາຍເຖິງຕັ້ງແຕ່ກ່ອນອາດາມກັບເອວາມີລູກ
^ ໝາຍເຖິງພະລັງຂອງພະເຈົ້າ
^ ເບິ່ງພາກຜະໜວກ ກ5
