ຈົດໝາຍສະບັບທຳອິດຂອງໂຢຮັນ 1:1-10
1 ພວກເຮົາຂຽນຫາພວກເຈົ້າເລື່ອງຜູ້ນັ້ນທີ່ຢູ່ຕັ້ງແຕ່ຕອນທຳອິດ. ພວກເຮົາໄດ້ຍິນເພິ່ນ ໄດ້ເຫັນເພິ່ນດ້ວຍຕາໂຕເອງ ໄດ້ເບິ່ງສິ່ງທີ່ເພິ່ນເຮັດ ແລະໄດ້ສຳຜັດເພິ່ນກັບມື. ເພິ່ນມີຖ້ອຍຄຳທີ່ໃຫ້ຊີວິດ.+
2 (ພວກເຮົາໄດ້ຮູ້ຈັກແລະເຂົ້າໃຈເລື່ອງຊີວິດຕະຫຼອດໄປ+ທີ່ມາຈາກພະເຈົ້າຜູ້ເປັນພໍ່ ແລະພວກເຮົາກຳລັງປະກາດ+ເລື່ອງນີ້ໃຫ້ພວກເຈົ້າຮູ້.)
3 ພວກເຮົາໄດ້ບອກສິ່ງທີ່ພວກເຮົາເຫັນແລະໄດ້ຍິນກ່ຽວກັບຜູ້ນັ້ນໃຫ້ພວກເຈົ້າຮູ້+ ເພື່ອພວກເຈົ້າຈະເປັນອັນໜຶ່ງອັນດຽວກັບພວກເຮົາຄືກັບທີ່ພວກເຮົາເປັນອັນໜຶ່ງອັນດຽວກັບພະເຈົ້າຜູ້ເປັນພໍ່ແລະພະເຢຊູຄລິດທີ່ເປັນລູກຂອງເພິ່ນ.+
4 ພວກເຮົາຂຽນເລື່ອງນີ້ເພື່ອພວກເຮົາທຸກຄົນຈະມີຄວາມສຸກຢ່າງເຕັມທີ.
5 ເລື່ອງທີ່ພວກເຮົາໄດ້ຍິນຈາກພະຄລິດແລະກຳລັງບອກພວກເຈົ້າໃຫ້ຮູ້ແມ່ນ ພະເຈົ້າເປັນຄວາມສະຫວ່າງ+ແລະບໍ່ມີຄວາມມືດໃນເພິ່ນເລີຍ.
6 ຖ້າພວກເຮົາບອກວ່າ “ພວກເຮົາເປັນອັນໜຶ່ງອັນດຽວກັບເພິ່ນ” ແຕ່ຍັງຍ່າງຢູ່ໃນຄວາມມືດ ພວກເຮົາກໍເວົ້າຕົວະແລະບໍ່ໄດ້ເຮັດຕາມຄວາມຈິງ.+
7 ແຕ່ຖ້າພວກເຮົາຍ່າງຢູ່ໃນຄວາມສະຫວ່າງຄືກັບທີ່ເພິ່ນຢູ່ໃນຄວາມສະຫວ່າງ ພວກເຮົາທຸກຄົນກໍເປັນອັນໜຶ່ງອັນດຽວກັນ ແລະເລືອດຂອງພະເຢຊູລູກຂອງເພິ່ນຈະລົບລ້າງບາບທັງໝົດຂອງພວກເຮົາ.+
8 ຖ້າພວກເຮົາບອກວ່າ “ພວກເຮົາບໍ່ມີບາບ” ພວກເຮົາກໍຕົວະໂຕເອງ+ແລະບໍ່ໄດ້ເຊື່ອຄວາມຈິງ.
9 ຖ້າພວກເຮົາສາລະພາບຄວາມຜິດ ພະເຈົ້າຈະຍົກໂທດໃຫ້ພວກເຮົາແລະລົບລ້າງຄວາມຊົ່ວທັງໝົດທີ່ພວກເຮົາເຄີຍເຮັດຍ້ອນເພິ່ນສັດຊື່ແລະຍຸຕິທຳ.+
10 ຖ້າພວກເຮົາເວົ້າວ່າ “ພວກເຮົາບໍ່ໄດ້ເຮັດຜິດ” ກໍສ່ຳກັບພວກເຮົາກ່າວຫາວ່າພະເຈົ້າເວົ້າຕົວະ ແລະພວກເຮົາບໍ່ເຊື່ອຄຳເວົ້າຂອງເພິ່ນ.