ກະສັດສະບັບທີສອງ 1:1-18
-
ເອລີຢາບອກລ່ວງໜ້າວ່າອາຮາຊີຢາຈະຕາຍ (1-18)
1 ຫຼັງຈາກອາຮາບຕາຍແລ້ວ ພວກໂມອາບ+ໄດ້ກະບົດຕໍ່ພວກອິດສະຣາເອນ.
2 ມີມື້ໜຶ່ງ ຕອນທີ່ອາຮາຊີຢາຢູ່ວັງຂອງລາວໃນເມືອງຊາມາເຣຍ ລາວໄດ້ຢຽບຕານ່າງໄມ້ໂດກທີ່ຢູ່ເທິງດາດຟ້າແລ້ວຫຼຸລົງມາແລະເຈັບໜັກຫຼາຍ. ລາວຈຶ່ງບອກພວກຄົນສົ່ງຂ່າວວ່າ: “ໄປຖາມພະບາອານເຊບູນຂອງເມືອງເອັກໂຣນ+ດຸວ່າຂ້ອຍຈະເຊົາບໍ່.”+
3 ແຕ່ທູດສະຫວັນຂອງພະເຢໂຫວາໄດ້ບອກເອລີຢາ*+ຄົນຕີຊະເບວ່າ: “ໄປຫາພວກຄົນສົ່ງຂ່າວຂອງກະສັດຊາມາເຣຍແລະຖາມເຂົາເຈົ້າວ່າ ‘ຢູ່ອິດສະຣາເອນບໍ່ມີພະເຈົ້າບໍ ເຈົ້າຈຶ່ງໄປຖາມພະບາອານເຊບູນຂອງເມືອງເອັກໂຣນ?’”+
4 ຍ້ອນແນວນີ້ພະເຢໂຫວາຈຶ່ງບອກວ່າ: “ເຈົ້າຈະລຸກໄປໃສບໍ່ໄດ້. ເຈົ້າຈະນອນຕາຍຄາຕຽງ.” ແລ້ວເອລີຢາກໍເຮັດຕາມທີ່ພະເຈົ້າບອກ.
5 ເມື່ອເຂົາເຈົ້າກັບມາຫາກະສັດອາຮາຊີຢາ ລາວກໍຖາມທັນທີວ່າ: “ພວກເຈົ້າກັບມາເຮັດຫຍັງ?”
6 ເຂົາເຈົ້າຕອບວ່າ: “ມີຜູ້ຊາຍຄົນໜຶ່ງມາຫາພວກເຮົາ ແລະບອກພວກເຮົາໃຫ້ກັບໄປບອກກະສັດວ່າ ‘ພະເຢໂຫວາເວົ້າວ່າ ຢູ່ອິດສະຣາເອນບໍ່ມີພະເຈົ້າບໍ ເຈົ້າຈຶ່ງໄປຖາມພະບາອານເຊບູນຂອງເມືອງເອັກໂຣນ? ຍ້ອນແນວນີ້ເຈົ້າຈະລຸກໄປໃສບໍ່ໄດ້ ເຈົ້າຈະນອນຕາຍຄາຕຽງ.’”+
7 ອາຮາຊີຢາຈຶ່ງຖາມວ່າ: “ຜູ້ຊາຍທີ່ມາເວົ້າກັບພວກເຈົ້າມີລັກສະນະແນວໃດ?”
8 ເຂົາເຈົ້າຕອບວ່າ: “ລາວນຸ່ງເຄື່ອງທີ່ເປັນຂົນສັດ+ແລະໃສ່ສາຍແອວໜັງ.”+ ອາຮາຊີຢາຈຶ່ງເວົ້າຂຶ້ນມາທັນທີວ່າ: “ລາວແມ່ນເອລີຢາຄົນຕີຊະເບ.”
9 ກະສັດອາຮາຊີຢາຈຶ່ງສົ່ງຫົວໜ້າທະຫານກັບກອງທະຫານ 50 ຄົນຂອງລາວໄປຈັບເອລີຢາ. ຕອນທີ່ຫົວໜ້າທະຫານໄປຫາເອລີຢາ ເອລີຢານັ່ງຢູ່ເທິງຈອມພູ. ຫົວໜ້າທະຫານບອກລາວວ່າ: “ຄົນຂອງພະເຈົ້າທ່ຽງແທ້+ ກະສັດສັ່ງໃຫ້ເຈົ້າລົງມາ.”
10 ແຕ່ເອລີຢາເວົ້າກັບລາວວ່າ: “ຖ້າຂ້ອຍເປັນຄົນຂອງພະເຈົ້າທ່ຽງແທ້ ຂໍໃຫ້ໄຟຕົກລົງມາຈາກຟ້າ+ແລະເຜົາເຈົ້າກັບກອງທະຫານ 50 ຄົນຂອງເຈົ້າ.” ແລ້ວໄຟກໍຕົກລົງມາຈາກຟ້າ ແລະເຜົາຫົວໜ້າທະຫານກັບກອງທະຫານ 50 ຄົນຂອງລາວ.
11 ກະສັດກໍສົ່ງຫົວໜ້າທະຫານອີກຜູ້ໜຶ່ງກັບກອງທະຫານ 50 ຄົນຂອງລາວໄປອີກ. ຫົວໜ້າທະຫານກໍໄປແລະບອກເອລີຢາວ່າ: “ຄົນຂອງພະເຈົ້າທ່ຽງແທ້ ກະສັດສັ່ງໃຫ້ເຈົ້າລົງມາດຽວນີ້.”
12 ແຕ່ເອລີຢາເວົ້າກັບລາວວ່າ: “ຖ້າຂ້ອຍເປັນຄົນຂອງພະເຈົ້າທ່ຽງແທ້ ຂໍໃຫ້ໄຟຕົກລົງມາຈາກຟ້າແລະເຜົາເຈົ້າກັບກອງທະຫານ 50 ຄົນຂອງເຈົ້າ.” ແລ້ວໄຟກໍຕົກລົງມາຈາກຟ້າ ແລະເຜົາຫົວໜ້າທະຫານກັບກອງທະຫານ 50 ຄົນຂອງລາວ.
13 ກະສັດຈຶ່ງສົ່ງຫົວໜ້າທະຫານຜູ້ທີ 3 ກັບກອງທະຫານ 50 ຄົນຂອງລາວໄປອີກ. ຫົວໜ້າທະຫານຜູ້ທີ 3 ກໍໄປ ແຕ່ລາວໄດ້ຄູ້ເຂົ່າລົງຕໍ່ໜ້າເອລີຢາແລະຂໍຮ້ອງວ່າ: “ຄົນຂອງພະເຈົ້າທ່ຽງແທ້ ຂໍຢ່າຂ້າຂ້ອຍກັບ 50 ຄົນນີ້ທີ່ເປັນຜູ້ຮັບໃຊ້ຂອງທ່ານ.
14 ໄຟທີ່ຕົກລົງມາຈາກຟ້າໄດ້ເຜົາຫົວໜ້າທະຫານ 2 ຄົນກັບກອງທະຫານຂອງເຂົາເຈົ້າຕາຍໝົດແລ້ວ ແຕ່ເທື່ອນີ້ຂໍທ່ານຢ່າຂ້າຂ້ອຍ.”
15 ທູດສະຫວັນຂອງພະເຢໂຫວາບອກເອລີຢາວ່າ: “ບໍ່ຕ້ອງຢ້ານລາວ. ໄປນຳລາວໂລດ.” ເອລີຢາຈຶ່ງໄປຫາກະສັດນຳຫົວໜ້າທະຫານຄົນນັ້ນ.
16 ເອລີຢາເວົ້າກັບກະສັດວ່າ: “ພະເຢໂຫວາເວົ້າວ່າ ‘ຢູ່ອິດສະຣາເອນບໍ່ມີພະເຈົ້າບໍ ເຈົ້າຈຶ່ງໃຫ້ຄົນໄປຖາມພະບາອານເຊບູນຂອງເມືອງເອັກໂຣນ?+ ເປັນຫຍັງເຈົ້າຈຶ່ງບໍ່ຖາມພະເຈົ້າຂອງອິດສະຣາເອນ?+ ຍ້ອນແນວນີ້ແຫຼະເຈົ້າຈະລຸກໄປໃສບໍ່ໄດ້ ເຈົ້າຈະນອນຕາຍຄາຕຽງ.’”
17 ແລ້ວອາຮາຊີຢາກໍຕາຍຄືກັບທີ່ພະເຢໂຫວາເວົ້າຜ່ານທາງເອລີຢາ. ຍ້ອນອາຮາຊີຢາບໍ່ມີລູກຊາຍ ເຢໂຮຣາມ*+ຈຶ່ງເປັນກະສັດແທນ. ລາວເປັນກະສັດໃນປີທີ 2 ທີ່ເຢໂຮຣາມ+ລູກຊາຍຂອງເຢໂຮຊາຟັດເປັນກະສັດປົກຄອງຢູດາ.
18 ເລື່ອງຕ່າງໆຂອງອາຮາຊີຢາ+ແລະທຸກສິ່ງທີ່ລາວເຮັດກໍຂຽນໄວ້ໃນປຶ້ມປະຫວັດຂອງພວກກະສັດອິດສະຣາເອນ.
