ກະສັດສະບັບທີສອງ 12:1-21
12 ໃນປີທີ 7 ທີ່ເຢຮູ+ເປັນກະສັດປົກຄອງ ເຢໂຮອາດ+ກໍເປັນກະສັດ. ລາວປົກຄອງຢູ່ເມືອງເຢຣູຊາເລັມ 40 ປີ. ແມ່ຂອງລາວຊື່ຊີບີຢາຄົນເບເອເຊບາ.+
2 ເຢໂຮອາດເຮັດສິ່ງທີ່ພະເຢໂຫວາເບິ່ງວ່າຖືກຕ້ອງຕະຫຼອດໄລຍະທີ່ປະໂລຫິດເຢໂຮຢາດາເປັນທີ່ປຶກສາໃຫ້ລາວ.
3 ແຕ່ລາວບໍ່ໄດ້ທຳລາຍບ່ອນນະມັດສະການພະເຈົ້າປອມ+ແລະປະຊາຊົນຍັງໄປເຜົາເຄື່ອງບູຊາໃຫ້ພະເຈົ້າຂອງເຂົາເຈົ້າຢູ່ບ່ອນນະມັດສະການເຫຼົ່ານັ້ນ.
4 ເຢໂຮອາດເວົ້າກັບພວກປະໂລຫິດວ່າ: “ໃຫ້ລວບລວມເງິນທັງໝົດທີ່ປະຊາຊົນເອົາມາໃຫ້ຢູ່ວິຫານຂອງພະເຢໂຫວາ+ ເຊິ່ງແມ່ນເງິນພາສີ+ ເງິນຄ່າສາບານ ແລະເງິນທີ່ປະຊາຊົນບໍລິຈາກໃຫ້ວິຫານຂອງພະເຢໂຫວາດ້ວຍຄວາມສະໝັກໃຈ.+
5 ພວກປະໂລຫິດຈະເປັນຜູ້ເກັບເງິນຈາກຄົນທີ່ເອົາມາໃຫ້* ແລະໃຊ້ເງິນນັ້ນເພື່ອແປງວິຫານບ່ອນທີ່ເພ.”+
6 ແຕ່ຈົນຮອດປີທີ 23 ທີ່ກະສັດເຢໂຮອາດປົກຄອງ ພວກປະໂລຫິດກໍຍັງບໍ່ໄດ້ເອົາເງິນນັ້ນໄປແປງວິຫານ.+
7 ກະສັດເຢໂຮອາດຈຶ່ງເອີ້ນປະໂລຫິດເຢໂຮຢາດາ+ແລະປະໂລຫິດຄົນອື່ນໆມາຖາມວ່າ: “ເປັນຫຍັງພວກເຈົ້າຍັງບໍ່ແປງວິຫານປານນີ້? ຖ້າບໍ່ເອົາເງິນໄປແປງວິຫານກໍບໍ່ຕ້ອງເກັບເງິນອີກ.”+
8 ພວກປະໂລຫິດຈຶ່ງເຫັນດີວ່າຈະບໍ່ເກັບເງິນນຳປະຊາຊົນແລ້ວ ແລະຈະບໍ່ຮັບຜິດຊອບໃນການແປງວິຫານ.
9 ປະໂລຫິດເຢໂຮຢາດາໄດ້ເອົາກ່ອງມາອັນໜຶ່ງ.+ ລາວເຈາະຮູຢູ່ຝາກ່ອງ ແລ້ວເອົາໄປວາງໄວ້ຂ້າງແທ່ນບູຊາຢູ່ທາງເບື້ອງຂວາບ່ອນທີ່ຄົນເຂົ້າໄປໃນວິຫານຂອງພະເຢໂຫວາ. ພວກປະໂລຫິດທີ່ຍາມປະຕູຈະເອົາເງິນທັງໝົດທີ່ປະຊາຊົນເອົາມາໃຫ້ຢູ່ວິຫານຂອງພະເຢໂຫວາໃສ່ໃນກ່ອງນັ້ນ.+
10 ເມື່ອເງິນຢູ່ກ່ອງມີຫຼາຍແລ້ວ ເລຂາຂອງກະສັດແລະປະໂລຫິດໃຫຍ່ຈະມາເອົາເງິນ*ແລະນັບເງິນທີ່ປະຊາຊົນເອົາມາໃຫ້ຢູ່ວິຫານຂອງພະເຢໂຫວາ.+
11 ເຂົາເຈົ້າຈະເອົາເງິນທີ່ນັບແລ້ວໄປໃຫ້ພວກທີ່ຮັບຜິດຊອບເບິ່ງແຍງວຽກແປງວິຫານຂອງພະເຢໂຫວາ. ແລ້ວຄົນເຫຼົ່ານັ້ນຈະເອົາເງິນໄປຈ່າຍໃຫ້ພວກຊ່າງໄມ້ແລະຊ່າງກໍ່ທີ່ແປງວິຫານຂອງພະເຢໂຫວາ+
12 ແລະຈ່າຍໃຫ້ຊ່າງກໍ່ຫີນກັບຊ່າງຕັດຫີນນຳ. ເຂົາເຈົ້າຍັງເອົາເງິນນັ້ນໄປຊື້ໄມ້ກັບຫີນທີ່ຕັດເປັນກ້ອນແລ້ວເພື່ອແປງວິຫານຂອງພະເຢໂຫວາບ່ອນທີ່ເພ ແລະຍັງໃຊ້ເງິນນັ້ນສຳລັບຄ່າໃຊ້ຈ່າຍອື່ນໆໃນການແປງວິຫານ.
13 ແຕ່ເຂົາເຈົ້າບໍ່ໄດ້ເອົາເງິນທີ່ປະຊາຊົນເອົາມາໃຫ້ຢູ່ວິຫານຂອງພະເຢໂຫວາໄປເຮັດອ່າງເງິນ ມີດຕັດສຳລັບຕັດໄສ້ຕະກຽງ ຖ້ວຍ ແກ+ ຫຼືເຄື່ອງໃຊ້ທີ່ເປັນເງິນເປັນຄຳສຳລັບວິຫານຂອງພະເຢໂຫວາ.+
14 ເຂົາເຈົ້າເອົາເງິນນັ້ນໃຫ້ພວກທີ່ຮັບຜິດຊອບເບິ່ງແຍງວຽກເພື່ອໃຊ້ໃນການແປງວິຫານຂອງພະເຢໂຫວາເທົ່ານັ້ນ.
15 ພວກທີ່ເບິ່ງແຍງວຽກຈ່າຍເງິນນັ້ນໃຫ້ຄົນທີ່ເຮັດວຽກໂດຍບໍ່ໄດ້ຈົດການໃຊ້ຈ່າຍເພາະວ່າເຂົາເຈົ້າເຊື່ອໃຈໄດ້.+
16 ແຕ່ເງິນທີ່ປະຊາຊົນເອົາມາໃຫ້ເພື່ອເປັນເຄື່ອງບູຊາໄຖ່ຄວາມຜິດ+ແລະເຄື່ອງບູຊາໄຖ່ບາບ ເຂົາເຈົ້າບໍ່ໄດ້ເອົາໄປໃຊ້ເພື່ອແປງວິຫານຂອງພະເຢໂຫວາ. ເງິນສ່ວນນັ້ນເປັນຂອງພວກປະໂລຫິດ.+
17 ຮາຊາເອນ+ກະສັດຂອງຊີເຣຍໄປໂຈມຕີເມືອງກັດ+ແລະຍຶດເມືອງນັ້ນໄດ້. ຈາກນັ້ນ ລາວກໍຕັດສິນໃຈວ່າຈະໄປໂຈມຕີເມືອງເຢຣູຊາເລັມ.+
18 ເຢໂຮອາດກະສັດຂອງຢູດາຈຶ່ງກຽມເງິນກັບຄຳສົ່ງໄປໃຫ້ຮາຊາເອນກະສັດຂອງຊີເຣຍ. ສິ່ງເຫຼົ່ານີ້ໄດ້ມາຈາກເງິນທີ່ປະຊາຊົນເອົາມາໃຫ້ຢູ່ວິຫານໃນສະໄໝຂອງລາວແລະໃນສະໄໝຂອງກະສັດເຢໂຮຊາຟັດ ເຢໂຮຣາມ ແລະອາຮາຊີຢາທີ່ເຂົາເຈົ້າແຍກໄວ້ຕ່າງຫາກ. ລາວຍັງໄດ້ເອົາຄຳທັງໝົດໃນຄັງຊັບສິນຢູ່ວິຫານຂອງພະເຢໂຫວາແລະໃນຄັງຊັບສິນທີ່ຢູ່ໃນວັງຂອງກະສັດສົ່ງໄປໃຫ້ຮາຊາເອນກະສັດຂອງຊີເຣຍ.+ ເມື່ອຮາຊາເອນໄດ້ຮັບສິ່ງເຫຼົ່ານີ້ແລ້ວ ລາວກໍຖອຍກອງທັບອອກຈາກເມືອງເຢຣູຊາເລັມ.
19 ເລື່ອງຕ່າງໆຂອງເຢໂຮອາດແລະທຸກສິ່ງທີ່ລາວເຮັດກໍຂຽນໄວ້ໃນປຶ້ມປະຫວັດຂອງພວກກະສັດຢູດາ.
20 ຄົນທີ່ຮັບໃຊ້ເຢໂຮອາດໄດ້ວາງແຜນຂ້າລາວ.+ ລາວຖືກຂ້າຢູ່ປ້ອມຫຼັງໜຶ່ງທີ່ຕັ້ງຢູ່ໂນນ*+ທາງໄປສິນລາ.
21 ພວກຄົນຮັບໃຊ້ທີ່ຂ້າລາວແມ່ນໂຢຊາກາລູກຊາຍຂອງຊິເມອາດ ແລະເຢໂຮຊາບັດລູກຊາຍຂອງໂຊເມເລ.+ ເຂົາເຈົ້າຝັງເຢໂຮອາດໄວ້ກັບປູ່ຍ່າຕານາຍຂອງລາວຢູ່ເມືອງຂອງດາວິດ. ອາມາຊີຢາລູກຊາຍຂອງລາວກໍເປັນກະສັດແທນ.+
ຂໍ
^ ຫຼື “ຄົນທີ່ເຂົາເຈົ້າຮູ້ຈັກ”
^ ຫຼື “ເອົາໃສ່ໄວ້ໃນຖົງ.” ແປຕາມໂຕວ່າ “ມັດ.”
^ ຫຼື “ຢູ່ເບັດມິໂລ”
