ກະສັດສະບັບທີສອງ 15:1-38
15 ໃນປີທີ 27 ທີ່ເຢໂຣໂບອາມ*ເປັນກະສັດປົກຄອງອິດສະຣາເອນ ອາຊາຣີຢາ*+ລູກຊາຍຂອງອາມາຊີຢາ+ກໍເປັນກະສັດປົກຄອງຢູດາ.+
2 ອາຊາຣີຢາເປັນກະສັດຕອນອາຍຸ 16 ປີ ແລະລາວປົກຄອງຢູ່ເມືອງເຢຣູຊາເລັມ 52 ປີ. ແມ່ຂອງລາວຊື່ເຢໂກລີຢາເປັນຄົນເຢຣູຊາເລັມ.
3 ລາວເຮັດສິ່ງທີ່ພະເຢໂຫວາເບິ່ງວ່າຖືກຕ້ອງຄືກັບອາມາຊີຢາພໍ່ຂອງລາວ.+
4 ແຕ່ລາວບໍ່ໄດ້ທຳລາຍບ່ອນນະມັດສະການພະເຈົ້າປອມ+ ແລະປະຊາຊົນຍັງໄປເຜົາເຄື່ອງບູຊາໃຫ້ພະເຈົ້າຂອງເຂົາເຈົ້າຢູ່ບ່ອນນະມັດສະການເຫຼົ່ານັ້ນ.+
5 ພະເຢໂຫວາເຮັດໃຫ້ກະສັດອາຊາຣີຢາເປັນຂີ້ທູດ+ຈົນຮອດມື້ຕາຍ. ລາວໄດ້ແຍກໄປຢູ່ເຮືອນອີກຫຼັງໜຶ່ງຕ່າງຫາກ.+ ຕອນນັ້ນ ໂຢທາມ+ລູກຊາຍຂອງລາວເປັນຜູ້ເບິ່ງແຍງວັງແທນລາວແລະຕັດສິນຄະດີຕ່າງໆໃຫ້ປະຊາຊົນ.+
6 ເລື່ອງຕ່າງໆຂອງອາຊາຣີຢາ+ແລະທຸກສິ່ງທີ່ລາວເຮັດກໍຂຽນໄວ້ໃນປຶ້ມປະຫວັດຂອງພວກກະສັດຢູດາ.
7 ເມື່ອອາຊາຣີຢາຕາຍ+ ເຂົາເຈົ້າໄດ້ຝັງລາວໄວ້ກັບປູ່ຍ່າຕານາຍຂອງລາວຢູ່ເມືອງຂອງດາວິດ. ໂຢທາມລູກຊາຍຂອງລາວກໍເປັນກະສັດແທນ.
8 ໃນປີທີ 38 ທີ່ອາຊາຣີຢາ+ເປັນກະສັດປົກຄອງຢູດາ ເຊຄາຣີຢາ+ລູກຊາຍຂອງເຢໂຣໂບອາມກໍເປັນກະສັດປົກຄອງອິດສະຣາເອນຢູ່ເມືອງຊາມາເຣຍ. ລາວປົກຄອງ 6 ເດືອນ.
9 ລາວເຮັດສິ່ງທີ່ພະເຢໂຫວາເບິ່ງວ່າຊົ່ວຄືກັບທີ່ປູ່ຍ່າຕານາຍຂອງລາວໄດ້ເຮັດ. ລາວບໍ່ເຊົາເຮັດຜິດຄືກັບເຢໂຣໂບອາມລູກຊາຍຂອງເນບັດທີ່ເປັນຕົ້ນເຫດພາໃຫ້ພວກອິດສະຣາເອນເຮັດຜິດ.+
10 ຕໍ່ມາ ຊາລຶມລູກຊາຍຂອງຢາເບັດໄດ້ວາງແຜນຂ້າເຊຄາຣີຢາ. ລາວຂ້າເຊຄາຣີຢາ+ຢູ່ເມືອງອິບເລອາມ +ແລ້ວລາວກໍເປັນກະສັດແທນ.
11 ເລື່ອງຕ່າງໆຂອງເຊຄາຣີຢາກໍຂຽນໄວ້ໃນປຶ້ມປະຫວັດຂອງພວກກະສັດອິດສະຣາເອນ.
12 ເລື່ອງນີ້ເປັນໄປຕາມທີ່ພະເຢໂຫວາໄດ້ເວົ້າກັບເຢຮູວ່າ: “ລູກຫຼານຂອງເຈົ້າ 4 ລຸ້ນ+ຈະໄດ້ນັ່ງເທິງບັນລັງອິດສະຣາເອນ.”+ ແລ້ວກໍເປັນແບບນັ້ນແທ້ໆ.
13 ໃນປີທີ 39 ທີ່ອຸດຊີຢາ+ເປັນກະສັດປົກຄອງຢູດາ ຊາລຶມລູກຊາຍຂອງຢາເບັດກໍເປັນກະສັດປົກຄອງອິດສະຣາເອນ. ລາວປົກຄອງຢູ່ຊາມາເຣຍ 1 ເດືອນເຕັມ.
14 ເມນາເຮມລູກຊາຍຂອງກາດີໄດ້ອອກຈາກເມືອງຕີຣະຊາ+ໄປເມືອງຊາມາເຣຍ. ລາວຂ້າຊາລຶມ+ລູກຊາຍຂອງຢາເບັດຢູ່ເມືອງຊາມາເຣຍ ແລະລາວກໍເປັນກະສັດແທນ.
15 ເລື່ອງຕ່າງໆຂອງຊາລຶມແລະແຜນການຊົ່ວຮ້າຍຂອງລາວກໍຂຽນໄວ້ໃນປຶ້ມປະຫວັດຂອງພວກກະສັດອິດສະຣາເອນ.
16 ແລ້ວເມນາເຮມກໍອອກຈາກເມືອງຕີຣະຊາໄປໂຈມຕີເມືອງຕິບສາ. ລາວຂ້າທຸກຄົນໃນເມືອງຕິບສາແລະຄົນທີ່ຢູ່ໃກ້ເມືອງນັ້ນ ຍ້ອນເຂົາເຈົ້າບໍ່ເປີດປະຕູເມືອງໃຫ້ລາວ. ລາວທຳລາຍເມືອງນີ້ແລະປາດທ້ອງພວກຜູ້ຍິງທີ່ຖືພາ.
17 ໃນປີທີ 39 ທີ່ອາຊາຣີຢາເປັນກະສັດປົກຄອງຢູດາ ເມນາເຮມລູກຊາຍຂອງກາດີກໍເປັນກະສັດປົກຄອງອິດສະຣາເອນ. ລາວປົກຄອງຢູ່ຊາມາເຣຍ 10 ປີ.
18 ຕະຫຼອດຊີວິດຂອງເມນາເຮມ ລາວເຮັດສິ່ງທີ່ພະເຢໂຫວາເບິ່ງວ່າຊົ່ວ. ລາວບໍ່ເຊົາເຮັດຜິດຄືກັບເຢໂຣໂບອາມລູກຊາຍຂອງເນບັດທີ່ເປັນຕົ້ນເຫດພາໃຫ້ພວກອິດສະຣາເອນເຮັດຜິດ.+
19 ປູນ+ກະສັດຂອງອັດຊີເຣຍໄດ້ມາໂຈມຕີອິດສະຣາເອນ. ເມນາເຮມຈຶ່ງເອົາເງິນ 1.000 ຕະລັນ*ໃຫ້ກະສັດປູນເພື່ອໃຫ້ລາວຖອຍກອງທັບອອກໄປແລະເພື່ອສະໜັບສະໜູນກອງທັບຂອງເມນາເຮມ.+
20 ເມນາເຮມໄດ້ຮຽກຮ້ອງເອົາເງິນຈາກຄົນສຳຄັນທີ່ເປັນຄົນຮັ່ງ+ໃນອິດສະຣາເອນຜູ້ລະ 50 ເຊເກນ* ເພື່ອຈະມີເງິນໄປໃຫ້ກະສັດອັດຊີເຣຍ. ເມື່ອເມນາເຮມເອົາເງິນໄປໃຫ້ ກະສັດອັດຊີເຣຍກໍຖອຍກອງທັບອອກໄປຈາກອິດສະຣາເອນ.
21 ເລື່ອງຕ່າງໆຂອງເມນາເຮມ+ແລະທຸກສິ່ງທີ່ລາວເຮັດກໍຂຽນໄວ້ໃນປຶ້ມປະຫວັດຂອງພວກກະສັດອິດສະຣາເອນ.
22 ເມື່ອເມນາເຮມຕາຍ ເປກາຮີຢາລູກຊາຍຂອງລາວກໍເປັນກະສັດແທນ.
23 ໃນປີທີ 50 ທີ່ອາຊາຣີຢາເປັນກະສັດປົກຄອງຢູດາ ເປກາຮີຢາລູກຊາຍຂອງເມນາເຮມກໍເປັນກະສັດປົກຄອງອິດສະຣາເອນຢູ່ເມືອງຊາມາເຣຍ. ລາວປົກຄອງ 2 ປີ.
24 ເປກາຮີຢາເຮັດສິ່ງທີ່ພະເຢໂຫວາເບິ່ງວ່າຊົ່ວ. ລາວບໍ່ເຊົາເຮັດຜິດຄືກັບກັບເຢໂຣໂບອາມລູກຊາຍຂອງເນບັດທີ່ເປັນຕົ້ນເຫດພາໃຫ້ພວກອິດສະຣາເອນເຮັດຜິດ.+
25 ເປກາ+ລູກຊາຍຂອງເຣມາລີຢາທີ່ເປັນຫົວໜ້າທະຫານຂອງເປກາຮີຢາໄດ້ວາງແຜນຂ້າເປກາຮີຢາ ອາໂກບ ແລະອາຣີເຢ.* ເປກາຂ້າເປກາຮີຢາຕາຍຢູ່ເມືອງຊາມາເຣຍໃນປ້ອມທີ່ຢູ່ໃນວັງຂອງກະສັດ. ມີຄົນກິລຽດ 50 ຄົນທີ່ຢູ່ຝ່າຍເປກາ. ຫຼັງຈາກເປກາຂ້າເປກາຮີຢາຕາຍແລ້ວ ລາວກໍເປັນກະສັດແທນ.
26 ເລື່ອງຕ່າງໆຂອງເປກາຮີຢາແລະທຸກສິ່ງທີ່ລາວເຮັດກໍຂຽນໄວ້ໃນປຶ້ມປະຫວັດຂອງພວກກະສັດອິດສະຣາເອນ.
27 ໃນປີທີ 52 ທີ່ອາຊາຣີຢາເປັນກະສັດປົກຄອງຢູດາ ເປກາ+ລູກຊາຍຂອງເຣມາລີຢາກໍເປັນກະສັດປົກຄອງອິດສະຣາເອນຢູ່ເມືອງຊາມາເຣຍ. ລາວປົກຄອງ 20 ປີ.
28 ເປກາເຮັດສິ່ງທີ່ພະເຢໂຫວາເບິ່ງວ່າຊົ່ວ. ລາວບໍ່ເຊົາເຮັດຜິດຄືກັບເຢໂຣໂບອາມລູກຊາຍຂອງເນບັດທີ່ເປັນຕົ້ນເຫດພາໃຫ້ພວກອິດສະຣາເອນເຮັດຜິດ.+
29 ຕອນທີ່ເປກາເປັນກະສັດປົກຄອງອິດສະຣາເອນ ຕິກລາດປີເລເຊ+ກະສັດຂອງອັດຊີເຣຍໄດ້ມາໂຈມຕີແລະຍຶດເອົາເມືອງອີໂຢນ ເມືອງອາເບັນເບັດມາອະກາ+ ເມືອງຢາໂນອາ ເມືອງເກເດັດ+ ເມືອງຮາໂສ ເມືອງກິລຽດ+ ລວມທັງຄາລີເລເຊິ່ງເປັນເຂດຂອງຕະກູນນັບທາລີ+ ແລະລາວໄດ້ຈັບເອົາຄົນໃນເມືອງເຫຼົ່ານີ້ໄປເປັນຊະເລີຍຢູ່ອັດຊີເຣຍ.+
30 ໂຮເຊຢາ+ລູກຊາຍຂອງເອລາໄດ້ວາງແຜນຂ້າເປກາລູກຊາຍຂອງເຣມາລີຢາ. ລາວຂ້າເປກາຕາຍ ແລ້ວກໍເປັນກະສັດແທນ. ເປກາເປັນກະສັດປົກຄອງໃນປີທີ 20 ທີ່ໂຢທາມ+ລູກຊາຍຂອງອຸດຊີຢາເປັນກະສັດປົກຄອງຢູດາ.*
31 ເລື່ອງຕ່າງໆຂອງເປກາແລະທຸກສິ່ງທີ່ລາວເຮັດກໍຂຽນໄວ້ໃນປຶ້ມປະຫວັດຂອງພວກກະສັດອິດສະຣາເອນ.
32 ໃນປີທີ 2 ທີ່ເປກາລູກຊາຍຂອງເຣມາລີຢາເປັນກະສັດປົກຄອງອິດສະຣາເອນ ໂຢທາມ+ລູກຊາຍຂອງອຸດຊີຢາ+ກໍເປັນກະສັດປົກຄອງຢູດາ.
33 ໂຢທາມເປັນກະສັດຕອນອາຍຸ 25 ປີ ແລະລາວປົກຄອງຢູ່ເມືອງເຢຣູຊາເລັມ 16 ປີ. ແມ່ຂອງລາວຊື່ເຢຣຸຊາເປັນລູກສາວຂອງຊາໂດກ.+
34 ລາວເຮັດສິ່ງທີ່ພະເຢໂຫວາເບິ່ງວ່າຖືກຕ້ອງຄືກັບອຸດຊີຢາພໍ່ຂອງລາວ.+
35 ແຕ່ລາວບໍ່ໄດ້ທຳລາຍບ່ອນນະມັດສະການພະເຈົ້າປອມ ແລະປະຊາຊົນຍັງໄປເຜົາເຄື່ອງບູຊາໃຫ້ພະເຈົ້າຂອງເຂົາເຈົ້າຢູ່ບ່ອນນະມັດສະການເຫຼົ່ານັ້ນ.+ ລາວສ້າງປະຕູໜຶ່ງຢູ່ວິຫານຂອງພະເຢໂຫວາຊື່ວ່າປະຕູທາງເທິງ.+
36 ເລື່ອງຕ່າງໆຂອງໂຢທາມແລະທຸກສິ່ງທີ່ລາວເຮັດກໍຂຽນໄວ້ໃນປຶ້ມປະຫວັດຂອງພວກກະສັດຢູດາ.
37 ຕອນນັ້ນ ພະເຢໂຫວາເຮັດໃຫ້ເຣຊິນກະສັດຂອງຊີເຣຍກັບເປກາ+ລູກຊາຍຂອງເຣມາລີຢາເລີ່ມມາໂຈມຕີຢູດາ.+
38 ເມື່ອໂຢທາມຕາຍ ເຂົາເຈົ້າໄດ້ຝັງລາວໄວ້ກັບປູ່ຍ່າຕານາຍຂອງລາວຢູ່ເມືອງຂອງດາວິດທີ່ເປັນປູ່ຍ່າຕານາຍຂອງລາວ. ອາຮາດລູກຊາຍຂອງລາວກໍເປັນກະສັດແທນ.
ຂໍ ຄວາມ ໄຂ ເງື່ອນ
^ ແປວ່າ “ພະເຢໂຫວາຊ່ວຍ.” ລາວມີອີກຊື່ໜຶ່ງວ່າອຸດຊີຢາ.
^ ໝາຍເຖິງເຢໂຣໂບອາມທີ 2
^ 34.200 ກິໂລກຣາມ. ເບິ່ງພາກຜະໜວກ ຂ14.
^ 570 ກຣາມ. ເບິ່ງພາກຜະໜວກ ຂ14.
^ ຫຼືອາດແປວ່າ “ເປກາລູກຊາຍຂອງເຣມາລີຢາໄດ້ວາງແຜນກັບອາໂກບແລະອາຣີເຢເພື່ອຂ້າເປກາຮີຢາ”
^ ເບິ່ງຄືວ່າແມ່ນ 20 ປີຫຼັງຈາກໂຢທາມໄດ້ເປັນກະສັດ