ກະສັດສະບັບທີສອງ 17:1-41
17 ໃນປີທີ 12 ທີ່ກະສັດອາຮາດປົກຄອງຢູດາ ໂຮເຊຢາ+ລູກຊາຍຂອງເອລາກໍເປັນກະສັດອິດສະຣາເອນຢູ່ເມືອງຊາມາເຣຍ. ລາວປົກຄອງ 9 ປີ.
2 ລາວເຮັດສິ່ງທີ່ພະເຢໂຫວາເບິ່ງວ່າຊົ່ວ ແຕ່ກໍບໍ່ຊົ່ວສ່ຳກັບກະສັດອິດສະຣາເອນອົງອື່ນໆທີ່ປົກຄອງກ່ອນລາວ.
3 ຊັນມັນເນເສກະສັດຂອງອັດຊີເຣຍໄດ້ມາໂຈມຕີອິດສະຣາເອນ+ ໂຮເຊຢາຈຶ່ງຮັບໃຊ້ລາວແລະເລີ່ມເສຍສ່ວຍໃຫ້ລາວ.+
4 ແຕ່ກະສັດອັດຊີເຣຍຮູ້ວ່າໂຮເຊຢາວາງແຜນຈະກະບົດ ເພາະໂຮເຊຢາສົ່ງຄົນໄປຫາໂສກະສັດຂອງເອຢິບ+ ແລະລາວບໍ່ໄດ້ເສຍສ່ວຍໃຫ້ກະສັດອັດຊີເຣຍຄືກັບທຸກໆປີ. ກະສັດອັດຊີເຣຍຈຶ່ງຂັງລາວໄວ້ໃນຄຸກແລະລ່າມໂສ້ໄວ້.
5 ກະສັດອັດຊີເຣຍຍົກກອງທັບໄປບຸກທົ່ວອິດສະຣາເອນ ແລະລ້ອມເມືອງຊາມາເຣຍໄວ້ 3 ປີ.
6 ໃນປີທີ 9 ທີ່ໂຮເຊຢາປົກຄອງ ກະສັດອັດຊີເຣຍຍຶດເມືອງຊາມາເຣຍໄດ້+ ແລ້ວລາວກໍຈັບພວກອິດສະຣາເອນໄປເປັນຊະເລີຍ+ຢູ່ອັດຊີເຣຍ. ຈາກນັ້ນກໍໃຫ້ເຂົາເຈົ້າໄປຢູ່ຮາລາກັບຮາໂບທີ່ຢູ່ໃກ້ແມ່ນ້ຳໂກຊານ+ ແລະໃນເມືອງຕ່າງໆຂອງພວກເມເດຍ.+
7 ເລື່ອງນີ້ເກີດຂຶ້ນກໍຍ້ອນວ່າພວກອິດສະຣາເອນເຮັດຜິດຕໍ່ພະເຢໂຫວາພະເຈົ້າຂອງເຂົາເຈົ້າຜູ້ທີ່ພາເຂົາເຈົ້າອອກມາຈາກເອຢິບແລະປົດປ່ອຍເຂົາເຈົ້າຈາກການເປັນທາດຂອງຟາໂຣ.*+ ເຂົາເຈົ້ານະມັດສະການ*ພະເຈົ້າອື່ນ.+
8 ເຂົາເຈົ້າເຮັດຕາມທຳນຽມຂອງຊາດຕ່າງໆທີ່ພະເຢໂຫວາໄດ້ໄລ່ໜີໄປຈາກພວກອິດສະຣາເອນ ແລະເຮັດຕາມທຳນຽມທີ່ກະສັດອິດສະຣາເອນອົງອື່ນໆໄດ້ຕັ້ງຂຶ້ນ.
9 ພວກອິດສະຣາເອນເຮັດສິ່ງທີ່ພະເຢໂຫວາພະເຈົ້າຂອງເຂົາເຈົ້າເບິ່ງວ່າບໍ່ຖືກຕ້ອງ. ເຂົາເຈົ້າຍັງໄດ້ສ້າງບ່ອນນະມັດສະການຕ່າງໆໃນທຸກເມືອງທີ່ເຂົາເຈົ້າຢູ່+ ຕັ້ງແຕ່ເມືອງນ້ອຍໆທີ່ເປັນຫໍຄອຍຈົນຮອດເມືອງໃຫຍ່ໆທີ່ມີກຳແພງອ້ອມ.
10 ເຂົາເຈົ້າຕັ້ງເສົາຫີນສັກສິດແລະເສົາໄມ້ສັກສິດ*+ຢູ່ໂນນພູທຸກບ່ອນແລະຢູ່ກ້ອງຕົ້ນໄມ້ໃຫຍ່ທຸກຕົ້ນ.+
11 ເຂົາເຈົ້າເຜົາເຄື່ອງບູຊາຢູ່ບ່ອນນະມັດສະການທຸກບ່ອນຄືກັບຊາດຕ່າງໆທີ່ພະເຢໂຫວາໄດ້ໄລ່ໜີໄປຈາກພວກອິດສະຣາເອນ.+ ເຂົາເຈົ້າບໍ່ເຊົາເຮັດຊົ່ວ ພະເຢໂຫວາຈຶ່ງໃຈຮ້າຍໃຫ້ເຂົາເຈົ້າຫຼາຍ.
12 ເຂົາເຈົ້ານະມັດສະການຮູບບູຊາຕ່າງໆທີ່ພະເຢໂຫວາຂີ້ດຽດ*+ ທັງໆທີ່ເພິ່ນເຄີຍສັ່ງໄວ້ວ່າ: “ພວກເຈົ້າຢ່ານະມັດສະການສິ່ງເຫຼົ່ານີ້.”+
13 ພະເຢໂຫວາໃຊ້ຜູ້ພະຍາກອນແລະຜູ້ເຫັນນິມິດທຸກຄົນຂອງເພິ່ນໃຫ້ເຕືອນພວກອິດສະຣາເອນກັບພວກຢູດາຕະຫຼອດ+ວ່າ: “ໃຫ້ພວກເຈົ້າເຊົາເຮັດຊົ່ວ!+ ພວກເຈົ້າຕ້ອງເຮັດຕາມຄຳສັ່ງ ຂໍ້ຮຽກຮ້ອງ ແລະກົດໝາຍທັງໝົດທີ່ເຮົາໄດ້ໃຫ້ປູ່ຍ່າຕານາຍຂອງພວກເຈົ້າແລະທີ່ເຮົາໄດ້ສັ່ງພວກເຈົ້າຜ່ານທາງພວກຜູ້ພະຍາກອນທີ່ເປັນຜູ້ຮັບໃຊ້ຂອງເຮົາ.”
14 ແຕ່ເຂົາເຈົ້າກໍບໍ່ຟັງແລະຫົວແຂງຄືກັບປູ່ຍ່າຕານາຍຂອງເຂົາເຈົ້າທີ່ບໍ່ເຊື່ອໃນພະເຢໂຫວາພະເຈົ້າ.+
15 ເຂົາເຈົ້າບໍ່ເຮັດຕາມກົດໝາຍ ບໍ່ເຮັດຕາມສັນຍາ+ທີ່ພະເຈົ້າໄດ້ເຮັດກັບປູ່ຍ່າຕານາຍຂອງເຂົາເຈົ້າ ແລະບໍ່ຟັງຄຳເຕືອນກ່ຽວກັບສິ່ງທີ່ບໍ່ດີຕ່າງໆ.+ ເຂົາເຈົ້ານະມັດສະການຮູບບູຊາທີ່ບໍ່ມີຄ່າ+ແລະເຮັດໃຫ້ໂຕເອງບໍ່ມີຄ່າຄືກັນ.+ ເຂົາເຈົ້າຮຽນແບບຊາດຕ່າງໆທີ່ຢູ່ອ້ອມແອ້ມທັງໆທີ່ພະເຢໂຫວາສັ່ງວ່າ: “ຢ່າຮຽນແບບພວກນັ້ນ.”+
16 ເຂົາເຈົ້າບໍ່ເຮັດຕາມຄຳສັ່ງທຸກຢ່າງຂອງພະເຢໂຫວາພະເຈົ້າຂອງເຂົາເຈົ້າ. ເຂົາເຈົ້າເອົາເຫຼັກມາຫຼໍ່ເຮັດງົວນ້ອຍ 2 ໂຕ+ ເຮັດເສົາໄມ້ສັກສິດ+ ຂາບໄຫວ້ດວງດາວຕ່າງໆທີ່ຢູ່ເທິງຟ້າ+ ແລະນະມັດສະການພະບາອານ.+
17 ນອກຈາກນັ້ນ ເຂົາເຈົ້າຍັງໄດ້ເຜົາລູກຊາຍແລະລູກສາວ+ ທຳນາຍອະນາຄົດ+ແລະເບິ່ງດວງ. ເຂົາເຈົ້າຕັ້ງໃຈ*ເຮັດສິ່ງທີ່ພະເຢໂຫວາເບິ່ງວ່າຊົ່ວເພື່ອເຮັດໃຫ້ເພິ່ນໃຈຮ້າຍ.
18 ພະເຢໂຫວາໃຈຮ້າຍໃຫ້ພວກອິດສະຣາເອນຫຼາຍ ເພິ່ນຈຶ່ງກຳຈັດເຂົາເຈົ້າອອກໄປຈາກຕໍ່ໜ້າເພິ່ນ.+ ເພິ່ນບໍ່ໃຫ້ໃຜເຫຼືອຢູ່ໃນແຜ່ນດິນນັ້ນ ຍົກເວັ້ນຕະກູນຢູດາຕະກູນດຽວ.
19 ແມ່ນແຕ່ຕະກູນຢູດາກໍບໍ່ໄດ້ເຮັດຕາມຄຳສັ່ງຂອງພະເຢໂຫວາພະເຈົ້າຂອງເຂົາເຈົ້າ.+ ເຂົາເຈົ້າເຮັດຕາມທຳນຽມຂອງພວກອິດສະຣາເອນ.+
20 ພະເຢໂຫວາຈຶ່ງປະຖິ້ມພວກລູກຫຼານອິດສະຣາເອນທັງໝົດ. ເພິ່ນເຮັດໃຫ້ເຂົາເຈົ້າຂາຍໜ້າ ຍອມໃຫ້ເຂົາເຈົ້າຖືກປຸ້ນ ແລະໃນທີ່ສຸດເພິ່ນກໍໄລ່ເຂົາເຈົ້າໜີ.
21 ເພິ່ນຕັດພວກອິດສະຣາເອນອອກຈາກຕະກູນຂອງດາວິດ ແລ້ວເຂົາເຈົ້າກໍຕັ້ງເຢໂຣໂບອາມລູກຊາຍຂອງເນບັດເປັນກະສັດ.+ ແຕ່ເຢໂຣໂບອາມເຮັດໃຫ້ພວກອິດສະຣາເອນບໍ່ເຊື່ອຟັງພະເຢໂຫວາ ແລະລາວເປັນຕົ້ນເຫດພາໃຫ້ເຂົາເຈົ້າເຮັດຜິດຮ້າຍແຮງ.
22 ພວກອິດສະຣາເອນເຮັດຜິດຄືກັບເຢໂຣໂບອາມທຸກຢ່າງ.+ ເຂົາເຈົ້າບໍ່ເຊົາເຮັດຜິດ.
23 ໃນທີ່ສຸດ ພະເຢໂຫວາຈຶ່ງກຳຈັດພວກອິດສະຣາເອນອອກໄປຈາກຕໍ່ໜ້າເພິ່ນ ຄືກັບທີ່ເພິ່ນໄດ້ບອກໄວ້ຜ່ານທາງຜູ້ພະຍາກອນທຸກຄົນທີ່ເປັນຜູ້ຮັບໃຊ້ຂອງເພິ່ນ.+ ພວກອິດສະຣາເອນຈຶ່ງຖືກຈັບໄປເປັນຊະເລີຍຢູ່ອັດຊີເຣຍ+ແລະຢູ່ຫັ້ນຈົນຮອດທຸກມື້ນີ້.
24 ແລ້ວກະສັດອັດຊີເຣຍກໍເອົາຄົນຈາກເມືອງບາບີໂລນ ກຸທາ ອາວາ ຮາມັດ ແລະເສຟາວາຢິມ+ມາຢູ່ຕາມເມືອງຕ່າງໆຂອງຊາມາເຣຍແທນພວກອິດສະຣາເອນ. ເຂົາເຈົ້າຈຶ່ງຍຶດເອົາເຂດຊາມາເຣຍແລະຢູ່ຕາມເມືອງຕ່າງໆຂອງເຂດຊາມາເຣຍ.
25 ຕອນທຳອິດທີ່ຍ້າຍມາຢູ່ຫັ້ນ ເຂົາເຈົ້າບໍ່ໄດ້ນະມັດສະການ*ພະເຢໂຫວາ ພະເຢໂຫວາຈຶ່ງໃຫ້ໂຕສິງມາ+ກັດບາງຄົນຕາຍ.
26 ມີຄົນໄປບອກກະສັດອັດຊີເຣຍວ່າ: “ພວກຊາດຕ່າງໆທີ່ກະສັດໃຫ້ໄປຢູ່ຕາມເມືອງຕ່າງໆຂອງເຂດຊາມາເຣຍບໍ່ຮູ້ຈັກສາສະໜາ*ແລະພະເຈົ້າຂອງແຜ່ນດິນນັ້ນ. ເພິ່ນຈຶ່ງໃຫ້ໂຕສິງມາກັດເຂົາເຈົ້າຕາຍ ຍ້ອນບໍ່ມີໃຜຮູ້ຈັກສາສະໜາແລະພະເຈົ້າຂອງແຜ່ນດິນນັ້ນ.”
27 ກະສັດອັດຊີເຣຍຈຶ່ງສັ່ງວ່າ: “ໃຫ້ສົ່ງປະໂລຫິດຜູ້ໜຶ່ງທີ່ພວກເຈົ້າຈັບມາເປັນຊະເລີຍຈາກບ່ອນນັ້ນໃຫ້ກັບຄືນໄປຢູ່ຫັ້ນ ເພື່ອສອນປະຊາຊົນໃຫ້ຮູ້ຈັກສາສະໜາແລະພະເຈົ້າຂອງແຜ່ນດິນນັ້ນ.”
28 ປະໂລຫິດຄົນໜຶ່ງທີ່ຖືກຈັບມາເປັນຊະເລີຍຈາກເຂດຊາມາເຣຍຈຶ່ງຖືກສົ່ງກັບໄປຢູ່ເມືອງເບເທນ+ ແລະລາວໄດ້ເລີ່ມສອນເຂົາເຈົ້າໃຫ້ນະມັດສະການ*ພະເຢໂຫວາ.+
29 ແຕ່ຄົນຈາກຊາດຕ່າງໆທີ່ຍ້າຍມາໄດ້ເຮັດຮູບພະຕ່າງໆທີ່ເຂົາເຈົ້າເຄີຍນະມັດສະການແລະເອົາໄປໄວ້ຢູ່ວິຫານຕ່າງໆທີ່ພວກຊາມາເຣຍໄດ້ສ້າງໄວ້. ແຕ່ລະຊາດໄດ້ເຮັດແບບນີ້ໃນເມືອງທີ່ເຂົາເຈົ້າຢູ່.
30 ພວກບາບີໂລນໄດ້ເຮັດຮູບພະສຸກໂກເບໂນດ ພວກກຸທາໄດ້ເຮັດຮູບພະເນການ ພວກຮາມັດ+ໄດ້ເຮັດຮູບພະອາຊີມາ
31 ພວກອາວາໄດ້ເຮັດຮູບພະນິບຮັດແລະຮູບພະຕາຕັກ. ພວກເສຟາວາຢິມໄດ້ເຜົາລູກຊາຍຂອງໂຕເອງເປັນເຄື່ອງບູຊາໃຫ້ຮູບພະອັດຣຳເມເລັກແລະຮູບພະອານຳເມເລັກທີ່ເປັນພະເຈົ້າຂອງເຂົາເຈົ້າ.+
32 ເຖິງວ່າຈະນະມັດສະການພະເຢໂຫວາ ແຕ່ເຂົາເຈົ້າກໍຍັງແຕ່ງຕັ້ງຄົນຂອງໂຕເອງໃຫ້ເປັນປະໂລຫິດຢູ່ບ່ອນນະມັດສະການຕ່າງໆ. ປະໂລຫິດເຫຼົ່ານີ້ເປັນຜູ້ເຮັດພິທີໃຫ້ເຂົາເຈົ້າຢູ່ວິຫານແລະບ່ອນນະມັດສະການຕ່າງໆ.+
33 ເຂົາເຈົ້ານະມັດສະການພະເຢໂຫວາ ແຕ່ກໍນະມັດສະການພະເຈົ້າຂອງໂຕເອງແລະນັບຖືສາສະໜາຂອງຊາດໂຕເອງຄືກັບກ່ອນທີ່ເຂົາເຈົ້າຈະຖືກຈັບມາເປັນຊະເລີຍ.+
34 ຈົນຮອດທຸກມື້ນີ້ ເຂົາເຈົ້າກໍຍັງນັບຖືສາສະໜາຂອງໂຕເອງ. ບໍ່ມີໃຜນະມັດສະການພະເຢໂຫວາແລະບໍ່ມີໃຜເຮັດຕາມຂໍ້ຮຽກຮ້ອງ ການຕັດສິນ ກົດໝາຍ ແລະຄຳສັ່ງທີ່ພະເຢໂຫວາໃຫ້ກັບລູກຫຼານຂອງຢາໂຄບຜູ້ທີ່ເພິ່ນປ່ຽນຊື່ໃຫ້ເປັນອິດສະຣາເອນ.+
35 ຕອນທີ່ພະເຢໂຫວາເຮັດສັນຍາກັບພວກອິດສະຣາເອນ+ ເພິ່ນສັ່ງເຂົາເຈົ້າວ່າ: “ຢ່ານະມັດສະການແລະຢ່າຂາບໄຫວ້ພະເຈົ້າອື່ນ. ຢ່າຮັບໃຊ້ຫຼືເຜົາເຄື່ອງບູຊາໃຫ້ພະເຈົ້າເຫຼົ່ານັ້ນ.+
36 ເຮົາແມ່ນເຢໂຫວາຜູ້ທີ່ພາພວກເຈົ້າອອກມາຈາກເອຢິບດ້ວຍອຳນາດແລະລິດເດດທີ່ຍິ່ງໃຫຍ່.+ ເຮົາເປັນຜູ້ທີ່ພວກເຈົ້າຄວນນະມັດສະການ+ ຂາບໄຫວ້ ແລະເຜົາເຄື່ອງບູຊາໃຫ້.
37 ພວກເຈົ້າຕ້ອງເຮັດຕາມຢ່າງເຄັ່ງຄັດໃນຂໍ້ກຳນົດ ການຕັດສິນ ກົດໝາຍ ແລະຄຳສັ່ງທີ່ເຮົາຂຽນໃຫ້ພວກເຈົ້າ+ ແລະຢ່ານະມັດສະການພະເຈົ້າອື່ນ.
38 ພວກເຈົ້າຢ່າລືມຄຳສັນຍາທີ່ເຮົາເຮັດກັບພວກເຈົ້າ+ແລະຢ່ານະມັດສະການພະເຈົ້າອື່ນ.
39 ແຕ່ໃຫ້ນະມັດສະການພະເຢໂຫວາພະເຈົ້າຂອງພວກເຈົ້າ ຍ້ອນເຮົາຈະເປັນຜູ້ທີ່ຊ່ວຍພວກເຈົ້າໃຫ້ລອດຈາກພວກສັດຕູທັງໝົດ.”
40 ແຕ່ຄົນຈາກຊາດຕ່າງໆທີ່ຍ້າຍມາຢູ່ເຂດຊາມາເຣຍບໍ່ເຊື່ອຟັງແລະຍັງນັບຖືສາສະໜາເກົ່າຂອງໂຕເອງຢູ່.+
41 ເຂົາເຈົ້ານະມັດສະການພະເຢໂຫວາ+ ແຕ່ກໍນະມັດສະການຮູບພະຂອງເຂົາເຈົ້ານຳ. ລູກຫຼານຂອງເຂົາເຈົ້າກໍເຮັດຕາມທີ່ປູ່ຍ່າຕານາຍພາເຮັດຈົນຮອດທຸກມື້ນີ້.
ຂໍ
^ ນີ້ແມ່ນຕຳແໜ່ງກະສັດຂອງເອຢິບ
^ ແປຕາມໂຕວ່າ “ຢ້ານຢຳ”
^ ເບິ່ງສ່ວນອະທິບາຍຄຳສັບ
^ ຄຳນີ້ໃນພາສາເຮັບເຣີອາດກ່ຽວຂ້ອງກັບຄຳວ່າ “ຂີ້ສັດ” ແລະໃຊ້ໃນລັກສະນະດູຖູກ
^ ແປຕາມໂຕວ່າ “ຂາຍໂຕເອງ”
^ ແປຕາມໂຕວ່າ “ຢ້ານຢຳ”
^ ຫຼື “ທຳນຽມຂອງສາສະໜາ”
^ ແປຕາມໂຕວ່າ “ຢ້ານຢຳ”
