ກະສັດສະບັບທີສອງ 18:1-37
18 ໃນປີທີ 3 ທີ່ໂຮເຊຢາ+ລູກຊາຍຂອງເອລາເປັນກະສັດອິດສະຣາເອນ ເຮເຊກີຢາ+ລູກຊາຍຂອງອາຮາດ+ກໍເປັນກະສັດປົກຄອງຢູດາ.
2 ເຮເຊກີຢາເປັນກະສັດຕອນອາຍຸ 25 ປີ ແລະລາວປົກຄອງຢູ່ເມືອງເຢຣູຊາເລັມ 29 ປີ. ແມ່ຂອງລາວຊື່ອາບີ*ເປັນລູກສາວຂອງເຊຄາຣີຢາ.+
3 ເຮເຊກີຢາເຮັດສິ່ງທີ່ພະເຢໂຫວາເບິ່ງວ່າຖືກຕ້ອງສະເໝີ+ຄືກັບດາວິດທີ່ເປັນປູ່ຍ່າຕານາຍຂອງລາວ.+
4 ລາວທຳລາຍບ່ອນນະມັດສະການຕ່າງໆ+ ທຸບເສົາຫີນສັກສິດ ແລະຟັນເສົາໄມ້ສັກສິດ.*+ ລາວຍັງໄດ້ທຸບຮູບງູທອງແດງທີ່ໂມເຊເຮັດ+ ຍ້ອນພວກອິດສະຣາເອນຍັງເຜົາເຄື່ອງບູຊາໃຫ້ຮູບນັ້ນຢູ່ແລະເອີ້ນຮູບນັ້ນວ່າຮູບບູຊາງູທອງແດງ.*
5 ເຮເຊກີຢາວາງໃຈພະເຢໂຫວາ+ພະເຈົ້າຂອງອິດສະຣາເອນ. ທັງກ່ອນໜ້າລາວແລະຫຼັງຈາກລາວບໍ່ມີກະສັດຢູດາຄົນໃດທີ່ເປັນຄືກັບລາວ.
6 ລາວພັກດີຕໍ່ພະເຢໂຫວາ+ ເຊື່ອຟັງເພິ່ນສະເໝີ ແລະເຮັດຕາມຄຳສັ່ງທີ່ພະເຢໂຫວາໃຫ້ກັບໂມເຊ.
7 ພະເຢໂຫວາຢູ່ກັບລາວ ແລະບໍ່ວ່າຈະເຮັດຫຍັງລາວກໍເຮັດຢ່າງຮອບຄອບ. ເຮເຊກີຢາກະບົດຕໍ່ກະສັດອັດຊີເຣຍແລະບໍ່ຍອມຮັບໃຊ້ລາວ.+
8 ເຮເຊກີຢາຕໍ່ສູ້ຊະນະພວກຟີລິດສະຕີນ+ຈົນຮອດເມືອງຄາຊາແລະເຂດທີ່ຢູ່ອ້ອມແອ້ມເມືອງນັ້ນ. ລາວຊະນະທຸກເມືອງທັງເມືອງນ້ອຍໆທີ່ເປັນຫໍຄອຍແລະເມືອງໃຫຍ່ໆທີ່ມີກຳແພງອ້ອມ.*
9 ປີທີ 4 ທີ່ເຮເຊກີຢາເປັນກະສັດປົກຄອງຢູດາ ເປັນປີທີ 7 ທີ່ໂຮເຊຢາ+ລູກຊາຍຂອງເອລາເປັນກະສັດປົກຄອງອິດສະຣາເອນ. ຊັນມັນເນເສກະສັດຂອງອັດຊີເຣຍໄດ້ມາໂຈມຕີຊາມາເຣຍແລະລ້ອມເມືອງໄວ້.+
10 ຫຼັງຈາກລ້ອມເມືອງຊາມາເຣຍ+ເກືອບ 3 ປີ ເຂົາເຈົ້າກໍຍຶດເມືອງນັ້ນໄດ້. ເຫດການນັ້ນເກີດຂຶ້ນໃນປີທີ 6 ທີ່ເຮເຊກີຢາເປັນກະສັດປົກຄອງຢູດາ ແລະເປັນປີທີ 9 ທີ່ໂຮເຊຢາເປັນກະສັດປົກຄອງອິດສະຣາເອນ.
11 ຈາກນັ້ນ ກະສັດອັດຊີເຣຍໄດ້ຈັບພວກອິດສະຣາເອນໄປເປັນຊະເລີຍ+ຢູ່ອັດຊີເຣຍ ແລ້ວໃຫ້ເຂົາເຈົ້າໄປຢູ່ຮາລາກັບຮາໂບທີ່ຢູ່ໃກ້ແມ່ນ້ຳໂກຊານແລະໃນເມືອງຕ່າງໆຂອງພວກເມເດຍ.+
12 ເລື່ອງນີ້ເກີດຂຶ້ນກໍຍ້ອນວ່າພວກອິດສະຣາເອນບໍ່ເຊື່ອຟັງພະເຢໂຫວາພະເຈົ້າຂອງເຂົາເຈົ້າ ບໍ່ເຮັດຕາມສັນຍາທີ່ເຮັດກັບເພິ່ນ ແລະບໍ່ເຮັດຕາມຄຳສັ່ງທຸກຢ່າງທີ່ໂມເຊຜູ້ຮັບໃຊ້ຂອງພະເຢໂຫວາສັ່ງໄວ້.+ ເຂົາເຈົ້າທັງບໍ່ເຊື່ອຟັງແລະບໍ່ເຮັດຕາມ.
13 ໃນປີທີ 14 ທີ່ເຮເຊກີຢາເປັນກະສັດປົກຄອງ ເຊນນາເກຣິບກະສັດຂອງອັດຊີເຣຍ+ໄດ້ມາໂຈມຕີທຸກເມືອງຂອງຢູດາທີ່ມີກຳແພງອ້ອມ ແລະຍຶດເອົາເມືອງເຫຼົ່ານັ້ນໄດ້.+
14 ເຮເຊກີຢາກະສັດຂອງຢູດາຈຶ່ງສົ່ງຄົນໄປບອກກະສັດຂອງອັດຊີເຣຍຢູ່ເມືອງລາກິດວ່າ: “ຂ້ອຍເຮັດຜິດແລ້ວ. ຂໍໃຫ້ເຈົ້າຖອຍກອງທັບອອກໄປ. ເຈົ້າຈະປັບໄໝເທົ່າໃດຂ້ອຍກໍຈະຈ່າຍໃຫ້ຕາມນັ້ນ.” ກະສັດຂອງອັດຊີເຣຍຈຶ່ງປັບໄໝເຮເຊກີຢາກະສັດຂອງຢູດາເປັນເງິນໜັກ 300 ຕະລັນ*ແລະຄຳໜັກ 30 ຕະລັນ.*
15 ເຮເຊກີຢາຈຶ່ງເອົາເງິນທັງໝົດໃນວິຫານຂອງພະເຢໂຫວາແລະໃນຄັງຊັບສິນທີ່ຢູ່ວັງຂອງກະສັດໄປໃຫ້ລາວ.+
16 ຕອນນັ້ນ ເຮເຊກີຢາໄດ້ມ້າງ*ປະຕູກັບຂອບປະຕູວິຫານ+ຂອງພະເຢໂຫວາທີ່ລາວເອົາຄຳໂອບໄວ້+ ແລ້ວເອົາໄປໃຫ້ກະສັດອັດຊີເຣຍ.
17 ຕໍ່ມາ ກະສັດອັດຊີເຣຍໄດ້ສົ່ງຕາຕານ* ຣັບສາຣິດ* ແລະຣັບຊາເຄ* ພ້ອມກັບກອງທັບໃຫຍ່ຈາກເມືອງລາກິດ+ໄປຫາກະສັດເຮເຊກີຢາຢູ່ເມືອງເຢຣູຊາເລັມ.+ ເຂົາເຈົ້າໄປເມືອງເຢຣູຊາເລັມແລະໄປຢືນຢູ່ຮ່ອງນ້ຳຂອງບ່ອນເກັບນ້ຳທາງເທິງເຊິ່ງຢູ່ທາງໄປບ່ອນຊັກເຄື່ອງ.+
18 ເມື່ອເຂົາເຈົ້າເອີ້ນໃຫ້ກະສັດອອກມາ ເອລີຢາກີມ+ຜູ້ເບິ່ງແຍງວັງຂອງກະສັດທີ່ເປັນລູກຊາຍຂອງຮິນກີຢາ ເຊັບນາ+ທີ່ເປັນເລຂາຂອງກະສັດ ແລະໂຢອາຜູ້ຈົດບັນທຶກໃຫ້ກະສັດທີ່ເປັນລູກຊາຍຂອງອາສັບກໍອອກໄປຫາເຂົາເຈົ້າ.
19 ຣັບຊາເຄເວົ້າກັບເຂົາເຈົ້າວ່າ: “ໄປບອກເຮເຊກີຢາແບບນີ້ ‘ກະສັດອັດຊີເຣຍຜູ້ຍິ່ງໃຫຍ່ເວົ້າວ່າ “ອັນໃດເຮັດໃຫ້ພວກເຈົ້າໝັ້ນໃຈຫຼາຍຂະໜາດນີ້?+
20 ພວກເຈົ້າເວົ້າວ່າ ‘ພວກເຮົາມີແຜນການຕໍ່ສູ້ແລະມີກອງທະຫານທີ່ເຂັ້ມແຂງ.’ ແຕ່ພວກເຈົ້າກະໄດ້ແຕ່ເວົ້າຫັ້ນແຫຼະ. ພວກເຈົ້າເພິ່ງໃຜຈຶ່ງກ້າກະບົດຂ້ອຍ?+
21 ພວກເຈົ້າເພິ່ງການຊ່ວຍເຫຼືອຈາກເອຢິບ+ ແຕ່ເຂົາເຈົ້າເປັນຄືກັບໄມ້ອໍ້ທີ່ຫັກແລ້ວ. ຖ້າຜູ້ໃດເອົາໄມ້ອໍ້ນັ້ນມາຄ້ຳ ມັນກໍຈະຫັກຫຼາຍກວ່າເກົ່າແລະແທງມືລາວ. ທຸກຄົນທີ່ເພິ່ງກະສັດເອຢິບ*ກໍຈະຖືກແທງແບບນີ້ແຫຼະ.
22 ແຕ່ຖ້າພວກເຈົ້າບອກວ່າ ‘ພວກເຮົາເພິ່ງພະເຢໂຫວາພະເຈົ້າຂອງພວກເຮົາ.’+ ເພິ່ນຈະບໍ່ຊ່ວຍພວກເຈົ້າດອກ ຍ້ອນເຮເຊກີຢາໄດ້ທຳລາຍບ່ອນນະມັດສະການຕ່າງໆກັບແທ່ນບູຊາຕ່າງໆຂອງພະເຈົ້າອົງນີ້ບໍ່ແມ່ນບໍ+ ແລ້ວລາວກໍບອກຄົນທີ່ຢູ່ຢູດາກັບຢູ່ເຢຣູຊາເລັມວ່າ ‘ພວກເຈົ້າຕ້ອງນະມັດສະການຢູ່ແທ່ນບູຊາໃນເມືອງເຢຣູຊາເລັມເທົ່ານັ້ນ’?”’+
23 ລອງເບິ່ງເບາະວ່າພວກເຈົ້າກັບກະສັດອັດຊີເຣຍເຈົ້ານາຍຂອງຂ້ອຍໃຜຈະຊະນະ? ຖ້າພວກເຈົ້າຊອກຄົນມາຂີ່ໄດ້ ຂ້ອຍຈະເອົາມ້າໃຫ້ພວກເຈົ້າ 2.000 ໂຕເພື່ອມາສູ້ກັນ.+
24 ຖ້າພວກເຈົ້າຍັງເພິ່ງລົດມ້າກັບທະຫານມ້າຂອງເອຢິບ ເຖິງວ່າພວກເຈົ້າຈະຕໍ່ສູ້ກັບຄົນຮັບໃຊ້ທີ່ມີຕຳແໜ່ງຕ່ຳສຸດຂອງເຈົ້ານາຍຂ້ອຍ ຈ້າງພວກເຈົ້າກໍບໍ່ຊະນະດອກ.
25 ພະເຢໂຫວາຕົ໋ວທີ່ອະນຸຍາດໃຫ້ຂ້ອຍມາທຳລາຍເມືອງນີ້! ພະເຢໂຫວາຫັ້ນແຫຼະທີ່ບອກຂ້ອຍວ່າ ‘ໄປທຳລາຍເມືອງນີ້ສະ!’”
26 ເອລີຢາກີມລູກຊາຍຂອງຮິນກີຢາ ເຊັບນາ+ ແລະໂຢອາຈຶ່ງເວົ້າກັບຣັບຊາເຄ+ວ່າ: “ເວົ້າກັບພວກເຮົາທີ່ເປັນຄົນຮັບໃຊ້ຂອງເຈົ້າເປັນພາສາອາຣາເມອິກ+ກໍໄດ້ ພວກເຮົາເຂົ້າໃຈ. ບໍ່ຕ້ອງເວົ້າພາສາຂອງຄົນຢິວ*ກັບພວກເຮົາໃຫ້ຄົນທີ່ຢູ່ເທິງກຳແພງເຂົ້າໃຈນຳ.”+
27 ແຕ່ຣັບຊາເຄເວົ້າກັບເຂົາເຈົ້າວ່າ: “ເຈົ້ານາຍຂອງຂ້ອຍສົ່ງຂ້ອຍໃຫ້ມາເວົ້າກັບພວກເຈົ້າແລະເຈົ້ານາຍຂອງພວກເຈົ້າເທົ່ານັ້ນຫວະ? ພວກເຮົາກໍມາເວົ້າກັບພວກທີ່ຢູ່ເທິງກຳແພງນຳ ເພາະເຂົາເຈົ້າຈະຕ້ອງກິນຂີ້ກິນຍ່ຽວຂອງໂຕເອງຄືກັນກັບພວກເຈົ້າຫັ້ນແຫຼະ.’”
28 ຣັບຊາເຄເວົ້າສຽງດັງເປັນພາສາຂອງຄົນຢິວວ່າ: “ໃຫ້ພວກເຈົ້າຟັງສິ່ງທີ່ກະສັດອັດຊີເຣຍຜູ້ຍິ່ງໃຫຍ່ເວົ້າ.+
29 ກະສັດເວົ້າວ່າ ‘ຢ່າໃຫ້ເຮເຊກີຢາຕົວະພວກເຈົ້າ. ລາວຊ່ວຍພວກເຈົ້າໃຫ້ລອດຈາກຂ້ອຍບໍ່ໄດ້ດອກ.+
30 ຖ້າເຮເຊກີຢາພະຍາຍາມໃຫ້ພວກເຈົ້າໄວ້ໃຈພະເຢໂຫວາໂດຍເວົ້າວ່າ “ພະເຢໂຫວາຈະຊ່ວຍພວກເຮົາແນ່ນອນ. ກະສັດອັດຊີເຣຍຍຶດເມືອງນີ້ບໍ່ໄດ້ດອກ.”+ ພວກເຈົ້າບໍ່ຕ້ອງເຊື່ອລາວ.
31 ບໍ່ຕ້ອງຟັງເຮເຊກີຢາ ເພາະຂ້ອຍກະສັດອັດຊີເຣຍບອກວ່າ “ຍອມແພ້ຂ້ອຍສະ ແລ້ວພວກເຈົ້າທຸກຄົນຈະໄດ້ກິນໝາກລະແຊັງກັບໝາກເດື່ອທີ່ພວກເຈົ້າປູກເອງ ແລະກິນນ້ຳຈາກນ້ຳສ້າງທີ່ພວກເຈົ້າຂຸດເອງ
32 ຈົນກວ່າຂ້ອຍຈະພາພວກເຈົ້າຍ້າຍໄປຢູ່ອີກບ່ອນໜຶ່ງທີ່ຄືກັບບ່ອນທີ່ພວກເຈົ້າຢູ່.+ ບ່ອນນັ້ນຈະມີເຂົ້າ ມີເຫຼົ້າແວງໃໝ່ ມີເຂົ້າຈີ່ ມີສວນໝາກລະແຊັງ ມີຕົ້ນໝາກກອກ ແລະນ້ຳເຜີ້ງ. ຖ້າພວກເຈົ້າເຮັດຕາມທີ່ຂ້ອຍບອກ ພວກເຈົ້າຈະລອດ. ບໍ່ຕ້ອງຟັງເຮເຊກີຢາເພາະລາວຕົວະພວກເຈົ້າວ່າ ‘ພະເຢໂຫວາຈະຊ່ວຍພວກເຮົາ.’
33 ເຄີຍມີພະເຈົ້າຂອງຊາດໃດບໍທີ່ຊ່ວຍຊາດຂອງໂຕເອງໃຫ້ລອດຈາກກະສັດອັດຊີເຣຍໄດ້?
34 ພະເຈົ້າຂອງເມືອງຮາມັດ+ກັບເມືອງອາປາດຢູ່ໃສ? ແລ້ວພະເຈົ້າຂອງເມືອງເສຟາວາຢິມ+ ເມືອງເຮນາ ແລະເມືອງອີວາເດ້ຢູ່ໃສ? ພະເຈົ້າເຫຼົ່ານັ້ນຊ່ວຍເມືອງຊາມາເຣຍໃຫ້ລອດຈາກຂ້ອຍໄດ້ບໍ?+
35 ບໍ່ມີພະເຈົ້າອົງໃດຊ່ວຍເມືອງຂອງໂຕເອງໃຫ້ລອດຈາກຂ້ອຍໄດ້ແມ່ນບໍ? ແລ້ວພະເຢໂຫວາຈະຊ່ວຍເມືອງເຢຣູຊາເລັມໃຫ້ລອດຈາກຂ້ອຍໄດ້ແນວໃດ?”’”+
36 ແຕ່ເຂົາເຈົ້າບໍ່ຕອບຣັບຊາເຄແລະພາກັນມິດຢູ່ ຍ້ອນກະສັດສັ່ງວ່າ: “ບໍ່ຕ້ອງຕອບລາວ.”+
37 ເອລີຢາກີມຜູ້ເບິ່ງແຍງວັງຂອງກະສັດທີ່ເປັນລູກຊາຍຂອງຮິນກີຢາ ເຊັບນາທີ່ເປັນເລຂາຂອງກະສັດ ແລະໂຢອາຜູ້ຈົດບັນທຶກໃຫ້ກະສັດທີ່ເປັນລູກຊາຍຂອງອາສັບກໍກັບໄປຫາເຮເຊກີຢາ. ເຂົາເຈົ້າໄດ້ຈີກເສື້ອຂອງໂຕເອງແລະໄປເລົ່າໃຫ້ກະສັດຟັງວ່າຣັບຊາເຄເວົ້າຫຍັງແດ່.
ຂໍ ຄວາມ ໄຂ ເງື່ອນ
^ ຊື່ຫຍໍ້ຂອງອາບີຢາ
^ ເບິ່ງສ່ວນອະທິບາຍຄຳສັບ
^ ຫຼື “ເນຮຸດສ໌ຕັນ”
^ ໝາຍເຖິງທຸກບ່ອນບໍ່ວ່າຈະມີຄົນໜ້ອຍຫຼືຄົນຫຼາຍ
^ 10.260 ກິໂລກຣາມ. ເບິ່ງພາກຜະໜວກ ຂ14.
^ 1.026 ກິໂລກຣາມ
^ ແປຕາມໂຕວ່າ “ຕັດ”
^ ຫຼື “ຫົວໜ້າກອງທັບສູງສຸດ”
^ ຫຼື “ຫົວໜ້າພວກຂ້າລາຊະການ”
^ ຫຼື “ຫົວໜ້າຄົນເຫຍັ້ນເຄື່ອງດື່ມ”
^ ແປຕາມໂຕວ່າ “ຟາໂຣ”
^ ໝາຍເຖິງພາສາເຮັບເຣີ