ກະສັດສະບັບທີສອງ 23:1-37
23 ກະສັດໂຢສີຢາຈຶ່ງໃຫ້ຄົນໄປເອີ້ນພວກຜູ້ນຳທຸກຄົນໃນຢູດາແລະໃນເຢຣູຊາເລັມໃຫ້ມາລວມກັນ.+
2 ແລ້ວກະສັດກໍໄປວິຫານຂອງພະເຢໂຫວາພ້ອມກັບປະຊາຊົນທຸກຄົນຕັ້ງແຕ່ເດັກນ້ອຍຈົນຮອດຜູ້ໃຫຍ່ທີ່ມາຈາກຢູດາແລະເຢຣູຊາເລັມ ລວມທັງພວກປະໂລຫິດແລະພວກຜູ້ພະຍາກອນ. ລາວອ່ານທຸກສິ່ງທີ່ຢູ່ໃນປຶ້ມ+ບັນທຶກຂໍ້ສັນຍາ+ທີ່ເຫັນໃນວິຫານຂອງພະເຢໂຫວາໃຫ້ທຸກຄົນຟັງ.+
3 ກະສັດຢືນຢູ່ຂ້າງເສົາແລະສັນຍາ*ກັບພະເຢໂຫວາວ່າ ລາວຈະເຊື່ອຟັງພະເຢໂຫວາ+ແລະເຮັດຕາມຄຳສັ່ງ ຂໍ້ເຕືອນໃຈ ແລະກົດໝາຍຂອງເພິ່ນດ້ວຍສຸດຫົວໃຈສຸດຊີວິດໂດຍເຮັດຕາມທຸກສິ່ງທີ່ຂຽນໄວ້ໃນປຶ້ມບັນທຶກຂໍ້ສັນຍານັ້ນ. ທຸກຄົນທີ່ຢູ່ຫັ້ນກໍສັນຍາຄືກັນ.+
4 ແລ້ວກະສັດໄດ້ສັ່ງປະໂລຫິດໃຫຍ່ຮິນກີຢາ+ ປະໂລຫິດຄົນອື່ນໆ ແລະພວກຄົນຍາມປະຕູໃຫ້ເອົາເຄື່ອງໃຊ້ທຸກຢ່າງທີ່ໃຊ້ສຳລັບນະມັດສະການພະບາອານ ນະມັດສະການເສົາໄມ້ສັກສິດ*+ ແລະນະມັດສະການດວງດາວຕ່າງໆອອກໄປຈາກວິຫານຂອງພະເຢໂຫວາ. ຈາກນັ້ນ ກະສັດໄດ້ເອົາເຄື່ອງທັງໝົດນີ້ອອກໄປນອກເມືອງເຢຣູຊາເລັມແລະເຜົາຢູ່ຮ່ອມພູກິດໂຣນ. ແລ້ວລາວກໍເອົາຂີ້ເທົ່າໄປເມືອງເບເທນ.+
5 ລາວໄດ້ໄລ່ພວກປະໂລຫິດຂອງພະເຈົ້າປອມໜີ ເຊິ່ງກະສັດຢູດາອົງກ່ອນໆໄດ້ແຕ່ງຕັ້ງໃຫ້ເຜົາເຄື່ອງບູຊາຢູ່ບ່ອນນະມັດສະການໃນເມືອງຕ່າງໆຂອງຢູດາແລະຢູ່ອ້ອມແອ້ມເມືອງເຢຣູຊາເລັມ. ລາວຍັງໄດ້ໄລ່ພວກທີ່ເຜົາເຄື່ອງບູຊາໃຫ້ພະບາອານ ດວງຕາເວັນ ດວງເດືອນ ກຸ່ມດາວລາສີ ແລະດວງດາວຕ່າງໆ.+
6 ລາວເອົາເສົາໄມ້ສັກສິດ+ທີ່ຢູ່ວິຫານຂອງພະເຢໂຫວາອອກໄປນອກເມືອງເຢຣູຊາເລັມ ໄປເຜົາ+ຢູ່ຮ່ອມພູກິດໂຣນ ແລ້ວທຸບໃຫ້ມຸ່ນ ແລະເອົາໄປຖິ້ມຢູ່ບ່ອນຝັງສົບຂອງປະຊາຊົນ.+
7 ລາວຍັງໄດ້ທຳລາຍບ່ອນຢູ່ຂອງພວກຜູ້ຊາຍຂາຍໂຕທີ່ຢູ່ວິຫານ*+ຂອງພະເຢໂຫວາ ເຊິ່ງເປັນບ່ອນທີ່ພວກຜູ້ຍິງໃຊ້ເພື່ອຕ່ຳຜ້າເຮັດເຕັ້ນສຳລັບນະມັດສະການເສົາໄມ້ສັກສິດ.
8 ລາວໄລ່ພວກປະໂລຫິດທຸກຄົນອອກຈາກເມືອງຕ່າງໆຂອງຢູດາ. ຕັ້ງແຕ່ເມືອງເຄບາ+ຈົນຮອດເມືອງເບເອເຊບາ+ ລາວເຮັດໃຫ້ບ່ອນນະມັດສະການທີ່ພວກປະໂລຫິດເຫຼົ່ານັ້ນເຄີຍເຜົາເຄື່ອງບູຊາໃຊ້ບໍ່ໄດ້ອີກຕໍ່ໄປ. ລາວຍັງໄດ້ທຳລາຍບ່ອນນະມັດສະການຕ່າງໆທີ່ຢູ່ປະຕູທາງເຂົ້າຂອງໂຢຊວຍທີ່ເປັນເຈົ້າເມືອງ. ເມື່ອຍ່າງເຂົ້າປະຕູເມືອງມາ ບ່ອນນະມັດສະການເຫຼົ່ານີ້ຢູ່ເບື້ອງຊ້າຍ.
9 ພວກປະໂລຫິດຂອງບ່ອນນະມັດສະການຕ່າງໆບໍ່ໄດ້ຮັບອະນຸຍາດໃຫ້ເຮັດວຽກຮັບໃຊ້ຢູ່ແທ່ນບູຊາຂອງພະເຢໂຫວາໃນເມືອງເຢຣູຊາເລັມ+ ແຕ່ເຂົາເຈົ້າໄດ້ຮັບອະນຸຍາດໃຫ້ກິນເຂົ້າຈີ່ບໍ່ມີເຊື້ອກັບພີ່ນ້ອງຂອງເຂົາເຈົ້າ.
10 ລາວເຮັດໃຫ້ໂຕເຟັດ*+ທີ່ຢູ່ຮ່ອມພູຮິນໂນມ*+ໃຊ້ບໍ່ໄດ້ອີກຕໍ່ໄປເພື່ອບໍ່ໃຫ້ໃຜເອົາລູກຊາຍຫຼືລູກສາວໄປເຜົາໃຫ້ພະໂມເລັກຢູ່ຫັ້ນ.+
11 ລາວຫ້າມບໍ່ໃຫ້ເອົາຝູງມ້າທີ່ກະສັດຂອງຢູດາອົງກ່ອນໆອຸທິດໃຫ້ດວງຕາເວັນຍ່າງຜ່ານທາງບ່ອນກິນເຂົ້າ*ທີ່ເປັນຂອງນາທານເມເລັກທີ່ເປັນຂ້າລາຊະການເພື່ອເຂົ້າໄປໃນວິຫານຂອງພະເຢໂຫວາ. ລາວໄດ້ເຜົາລົດມ້າທີ່ອຸທິດໃຫ້ດວງຕາເວັນ.+
12 ກະສັດໂຢສີຢາໄດ້ທຳລາຍແທ່ນບູຊາຕ່າງໆທີ່ກະສັດຂອງຢູດາອົງກ່ອນໆສ້າງໄວ້ຢູ່ເທິງດາດຟ້າ+ທີ່ຢູ່ທາງເທິງຫ້ອງຂອງອາຮາດ* ແລະລາວຍັງໄດ້ທຳລາຍແທ່ນບູຊາທີ່ມານາເຊສ້າງໄວ້ຢູ່ 2 ເດີ່ນໃນວິຫານຂອງພະເຢໂຫວາ.+ ລາວທຸບແທ່ນບູຊາເຫຼົ່ານັ້ນຈົນມຸ່ນແລ້ວເອົາໄປຖິ້ມຢູ່ຮ່ອມພູກິດໂຣນ.
13 ກະສັດໂຢສີຢາເຮັດໃຫ້ບ່ອນນະມັດສະການຕ່າງໆທີ່ຢູ່ເນີນທາງທິດໃຕ້ຂອງພູໝາກກອກ*ເຊິ່ງຢູ່ຕໍ່ໜ້າເມືອງເຢຣູຊາເລັມໃຊ້ບໍ່ໄດ້ອີກຕໍ່ໄປ. ໂຊໂລໂມນກະສັດຂອງອິດສະຣາເອນໄດ້ສ້າງບ່ອນນະມັດສະການເຫຼົ່ານີ້ໃຫ້ພະເຈົ້າທີ່ເປັນຕາຂີ້ດຽດຊື່ອັດຊະໂຕເຣດ*ຂອງພວກຊີໂດນ ພະເຈົ້າທີ່ເປັນຕາຂີ້ດຽດຊື່ເຄມົດຂອງພວກໂມອາບ ແລະພະເຈົ້າທີ່ເປັນຕາຂີ້ດຽດຊື່ມີເລກອມ+ຂອງພວກອຳໂມນ.+
14 ກະສັດໂຢສີຢາທຸບເສົາຫີນສັກສິດຈົນແຕກແລະໄດ້ຟັນເສົາໄມ້ສັກສິດ+ ແລ້ວເອົາກະດູກຄົນໄປຖິ້ມໃສ່ບ່ອນເຫຼົ່ານັ້ນ.
15 ລາວຍັງໄດ້ທຳລາຍແທ່ນບູຊາຢູ່ເມືອງເບເທນແລະບ່ອນນະມັດສະການທີ່ເຢໂຣໂບອາມລູກຊາຍຂອງເນບັດສ້າງໄວ້ເຊິ່ງເປັນຕົ້ນເຫດພາໃຫ້ພວກອິດສະຣາເອນເຮັດຜິດ.+ ຫຼັງຈາກທຳລາຍແທ່ນບູຊາແລະບ່ອນນະມັດສະການ ລາວກໍຈູດບ່ອນນະມັດສະການນັ້ນ ແລ້ວເຮັດໃຫ້ມຸ່ນແລະຈູດເສົາໄມ້ສັກສິດ.+
16 ເມື່ອໂຢສີຢາເຫັນບ່ອນຝັງສົບຢູ່ເທິງພູ ລາວກໍໃຫ້ຄົນເອົາກະດູກຢູ່ຫັ້ນໄປເຜົາຢູ່ເທິງແທ່ນບູຊາເພື່ອໃຫ້ແທ່ນບູຊານັ້ນໃຊ້ບໍ່ໄດ້ອີກ. ເລື່ອງນີ້ເປັນໄປຕາມທີ່ພະເຢໂຫວາໄດ້ເວົ້າຜ່ານທາງຜູ້ພະຍາກອນຂອງເພິ່ນ.+
17 ແລ້ວກະສັດໂຢສີຢາກໍຖາມວ່າ: “ນັ້ນແມ່ນບ່ອນຝັງສົບຂອງໃຜ?” ຄົນຢູ່ເມືອງນັ້ນບອກລາວວ່າ: “ເປັນບ່ອນຝັງສົບຄົນຂອງພະເຈົ້າທ່ຽງແທ້ທີ່ມາຈາກຢູດາ+ ລາວເຄີຍພະຍາກອນກ່ຽວກັບສິ່ງທີ່ທ່ານໄດ້ເຮັດກັບແທ່ນບູຊາຢູ່ເມືອງເບເທນ.”
18 ໂຢສີຢາຈຶ່ງບອກວ່າ: “ບໍ່ຕ້ອງເຮັດຫຍັງກັບກະດູກຂອງລາວ. ໃຫ້ປະໄວ້ແບບນັ້ນ.” ເຂົາເຈົ້າຈຶ່ງບໍ່ເຮັດຫຍັງກັບກະດູກນັ້ນ ແລະກະດູກຂອງຜູ້ພະຍາກອນທີ່ມາຈາກເມືອງຊາມາເຣຍເຂົາເຈົ້າກໍບໍ່ໄດ້ເຮັດຫຍັງຄືກັນ.+
19 ໂຢສີຢາຍັງໄດ້ທຳລາຍວິຫານທັງໝົດຢູ່ບ່ອນນະມັດສະການໃນເມືອງຕ່າງໆຂອງຊາມາເຣຍ+ທີ່ກະສັດອິດສະຣາເອນອົງກ່ອນໆໄດ້ສ້າງໄວ້ ເຊິ່ງເຮັດໃຫ້ພະເຈົ້າໃຈຮ້າຍ. ລາວເຮັດທຸກຢ່າງກັບວິຫານເຫຼົ່ານັ້ນຄືກັບທີ່ໄດ້ເຮັດຢູ່ເມືອງເບເທນ.+
20 ລາວຂ້າປະໂລຫິດທຸກຄົນຂອງບ່ອນນະມັດສະການເຫຼົ່ານັ້ນເທິງແທ່ນບູຊາ ແລະເຜົາກະດູກຄົນຢູ່ເທິງແທ່ນນັ້ນຄືກັນ.+ ຫຼັງຈາກນັ້ນ ລາວກໍກັບເມືອເມືອງເຢຣູຊາເລັມ.
21 ແລ້ວກະສັດກໍສັ່ງປະຊາຊົນທຸກຄົນວ່າ: “ໃຫ້ສະຫຼອງປັດສະຄາ+ໃຫ້ພະເຢໂຫວາພະເຈົ້າຂອງພວກເຈົ້າຕາມທີ່ຂຽນໄວ້ໃນປຶ້ມບັນທຶກຂໍ້ສັນຍານີ້.”+
22 ໃນສະໄໝພວກຜູ້ຕັດສິນຂອງອິດສະຣາເອນແລະໃນສະໄໝຂອງພວກກະສັດອິດສະຣາເອນກັບພວກກະສັດຢູດາບໍ່ເຄີຍມີການສະຫຼອງປັດສະຄາໃຫຍ່ແບບນີ້.+
23 ແຕ່ໃນປີທີ 18 ທີ່ກະສັດໂຢສີຢາປົກຄອງໄດ້ມີການສະຫຼອງປັດສະຄາໃຫຍ່ນີ້ໃຫ້ພະເຢໂຫວາຢູ່ເມືອງເຢຣູຊາເລັມ.
24 ໂຢສີຢາໄດ້ກຳຈັດພວກໝໍຜີ ພວກໝໍດູ+ ຮູບພະເທຣາຟີມ*+ ຮູບບູຊາຕ່າງໆທີ່ເປັນຕາຂີ້ດຽດ* ແລະທຸກສິ່ງທີ່ພະເຈົ້າຂີ້ດຽດໃນຢູດາແລະໃນເຢຣູຊາເລັມເພື່ອເຮັດຕາມສິ່ງທີ່ຂຽນໄວ້ໃນປຶ້ມກົດໝາຍ+ທີ່ປະໂລຫິດຮິນກີຢາເຫັນໃນວິຫານຂອງພະເຢໂຫວາ.+
25 ບໍ່ມີກະສັດອົງໃດເປັນຄືກັບລາວ ບໍ່ວ່າຈະກ່ອນຫຼືຫຼັງລາວ ເພາະວ່າລາວກັບມາຫາພະເຢໂຫວາແລະຮັບໃຊ້ເພິ່ນດ້ວຍສຸດຫົວໃຈ+ ສຸດຊີວິດ ສຸດກຳລັງ ແລະເຮັດຕາມກົດໝາຍຂອງໂມເຊທຸກຂໍ້.
26 ແຕ່ຍ້ອນມານາເຊເຮັດຫຼາຍສິ່ງທີ່ເຮັດໃຫ້ພະເຢໂຫວາໃຈຮ້າຍຫຼາຍ ເພິ່ນຈຶ່ງຍັງໃຈຮ້າຍໃຫ້ຢູດາຢູ່.+
27 ພະເຢໂຫວາບອກວ່າ: “ເຮົາຈະກຳຈັດພວກຢູດາອອກໄປຈາກຕໍ່ໜ້າເຮົາ+ຄືກັບທີ່ເຮົາໄດ້ກຳຈັດພວກອິດສະຣາເອນ.+ ເຮົາຈະຖິ້ມເມືອງເຢຣູຊາເລັມທີ່ເຮົາໄດ້ເລືອກໄວ້ແລະຖິ້ມວິຫານທີ່ເຮົາເຄີຍເວົ້າວ່າ ‘ຊື່ຂອງເຮົາຈະຢູ່ບ່ອນນີ້ຕະຫຼອດໄປ.’”+
28 ເລື່ອງຕ່າງໆຂອງໂຢສີຢາແລະທຸກສິ່ງທີ່ລາວເຮັດກໍຂຽນໄວ້ໃນປຶ້ມປະຫວັດຂອງພວກກະສັດຢູດາ.
29 ມີມື້ໜຶ່ງ ຕອນທີ່ຟາໂຣເນໂກກະສັດຂອງເອຢິບໄປຫາກະສັດອັດຊີເຣຍຢູ່ແມ່ນ້ຳເອິຟາຣາດ ກະສັດໂຢສີຢາໄດ້ໄປຕໍ່ສູ້ກັບເນໂກ. ເມື່ອເນໂກເຫັນລາວ ເນໂກກໍຂ້າລາວຢູ່ເມກິດໂດ.+
30 ແລ້ວຄົນຮັບໃຊ້ຂອງໂຢສີຢາໄດ້ເອົາສົບລາວຢູ່ເມກິດໂດໃສ່ລົດມ້າກັບມາເມືອງເຢຣູຊາເລັມ ແລະຝັງໄວ້ຢູ່ບ່ອນຝັງສົບຂອງລາວ. ຈາກນັ້ນ ປະຊາຊົນກໍເອົານ້ຳມັນເທໃສ່ຫົວເຢໂຮອາຮາດລູກຊາຍຂອງໂຢສີຢາ ແລະແຕ່ງຕັ້ງລາວໃຫ້ເປັນກະສັດແທນພໍ່.+
31 ເຢໂຮອາຮາດ+ເປັນກະສັດຕອນອາຍຸ 23 ປີ ແລະລາວປົກຄອງຢູ່ເມືອງເຢຣູຊາເລັມ 3 ເດືອນ. ແມ່ຂອງລາວຊື່ຮາມຸຕານ+ເປັນລູກສາວຂອງເຢເຣມີຢາຄົນເມືອງລິບນາ.
32 ລາວເລີ່ມເຮັດສິ່ງທີ່ພະເຢໂຫວາເບິ່ງວ່າຊົ່ວຄືກັບປູ່ຍ່າຕານາຍຂອງລາວໄດ້ເຮັດ.+
33 ເນໂກ+ໄດ້ຈັບເຢໂຮອາຮາດໄປຂັງໄວ້ໃນຄຸກຢູ່ເມືອງຣິບລາ+ໃນເຂດຮາມັດເພື່ອບໍ່ໃຫ້ລາວປົກຄອງຢູ່ເມືອງເຢຣູຊາເລັມ. ແລ້ວເນໂກໄດ້ປັບໄໝຢູດາເປັນເງິນໜັກ 100 ຕະລັນ* ແລະຄຳໜັກ 1 ຕະລັນ.*+
34 ຈາກນັ້ນ ເນໂກກໍຕັ້ງເອລີຢາກີມລູກຊາຍຂອງໂຢສີຢາເປັນກະສັດແທນພໍ່ ແລະປ່ຽນຊື່ລາວເປັນເຢໂຮຢາກີມ. ແຕ່ເນໂກໄດ້ຈັບເຢໂຮອາຮາດໄປເອຢິບ+ ແລ້ວເຢໂຮອາຮາດກໍຕາຍຢູ່ຫັ້ນ.+
35 ເຢໂຮຢາກີມໄດ້ເອົາເງິນກັບຄຳໃຫ້ເນໂກ ແຕ່ລາວຕ້ອງເກັບພາສີຈາກປະຊາຊົນເພື່ອໃຫ້ໄດ້ເງິນຕາມທີ່ເນໂກຮຽກຮ້ອງ. ເຢໂຮຢາກີມກຳນົດວ່າປະຊາຊົນແຕ່ລະຄົນຕ້ອງເອົາເງິນກັບຄຳໃຫ້ຫຼາຍສ່ຳໃດເພື່ອຈະພໍສົ່ງໄປໃຫ້ເນໂກ.
36 ເຢໂຮຢາກີມ+ເປັນກະສັດຕອນອາຍຸ 25 ປີ ແລະລາວປົກຄອງຢູ່ເມືອງເຢຣູຊາເລັມ 11 ປີ.+ ແມ່ຂອງລາວຊື່ເຊບີດາເປັນລູກສາວຂອງເປດາຢາຄົນຣູມາ.
37 ລາວເຮັດສິ່ງທີ່ພະເຢໂຫວາເບິ່ງວ່າຊົ່ວ+ຄືກັບປູ່ຍ່າຕານາຍຂອງລາວ.+
ຂໍ
^ ຫຼື “ສັນຍາສິ່ງທີ່ຄົນອື່ນເຄີຍສັນຍາແລ້ວໃຫ້ກັບມາມີຜົນບັງຄັບໃຊ້ອີກ”
^ ເບິ່ງສ່ວນອະທິບາຍຄຳສັບ
^ ຄົນທີ່ຂາຍໂຕເພື່ອພິທີທາງສາສະໜາ
^ ສະຖານທີ່ຢູ່ນອກເມືອງເຢຣູຊາເລັມເຊິ່ງພວກອິດສະຣາເອນທີ່ປ່ຽນໄປນັບຖືພະເຈົ້າປອມເຜົາລູກໂຕເອງເປັນເຄື່ອງບູຊາ
^ ແປຕາມໂຕວ່າ “ຮ່ອມພູຂອງລູກຊາຍຮິນໂນມ.” ເບິ່ງຄຳວ່າ “ເກເຮັນນາ” ໃນສ່ວນອະທິບາຍຄຳສັບ.
^ ບ່ອນກິນເຂົ້ານີ້ຢູ່ໃນສາລາໃຫຍ່ໆທີ່ມີເສົາຫຼາຍໆ
^ ໝາຍເຖິງຫ້ອງທາງເທິງຂອງອາຮາດ
^ ຫຼື “ພູແຫ່ງການທຳລາຍ.” ໝາຍເຖິງພູໝາກກອກ ໂດຍສະເພາະເບື້ອງທາງໃຕ້ສຸດເຊິ່ງຍັງມີອີກຊື່ໜຶ່ງວ່າພູຂອງຄວາມໃຈຮ້າຍ.
^ ເບິ່ງສ່ວນອະທິບາຍຄຳສັບ
^ ຄຳນີ້ໃນພາສາເຮັບເຣີອາດກ່ຽວຂ້ອງກັບຄຳວ່າ “ຂີ້ສັດ” ແລະໃຊ້ໃນລັກສະນະດູຖູກ
^ ຫຼື “ຮູບພະປະຈຳເຮືອນ; ຮູບປັ້ນ”
^ 34,2 ກິໂລກຣາມ
^ 3.420 ກິໂລກຣາມ. ເບິ່ງພາກຜະໜວກ ຂ14.
