ກະສັດສະບັບທີສອງ 6:1-33
6 ລູກຫຼານຂອງພວກຜູ້ພະຍາກອນ*+ເວົ້າກັບເອລີຊາວ່າ: “ບ່ອນທີ່ພວກເຮົາຢູ່ກັບທ່ານມັນແຄບໂພດ.
2 ພວກເຮົາຂໍໄປແມ່ນ້ຳຈໍແດນໄດ້ບໍ່? ພວກເຮົາຈະໄປຕັດຕົ້ນໄມ້ແລະປຸກເຮືອນຢູ່ຫັ້ນ.” ເອລີຊາຕອບວ່າ: “ໄປທະແມ້.”
3 ຄົນໜຶ່ງທີ່ເປັນລູກຫຼານຂອງພວກຜູ້ພະຍາກອນຖາມວ່າ: “ທ່ານຈະໄປກັບພວກເຮົາທີ່ເປັນຜູ້ຮັບໃຊ້ຂອງທ່ານບໍ?” ລາວຕອບວ່າ: “ຂ້ອຍຈະໄປນຳ.”
4 ເອລີຊາກໍໄປນຳເຂົາເຈົ້າ. ເມື່ອໄປຮອດແມ່ນ້ຳຈໍແດນ ເຂົາເຈົ້າກໍພາກັນຕັດຕົ້ນໄມ້.
5 ຕອນທີ່ຜູ້ໜຶ່ງກຳລັງຕັດຕົ້ນໄມ້ ຂວານໄດ້ຫຼຸດອອກຈາກດ້າມແລະຕົກລົງນ້ຳ ລາວຈຶ່ງຮ້ອງຂຶ້ນວ່າ: “ທ່ານເອີ້ຍ ຕາຍຄັກໆ! ຂວານນີ້ແຮ່ງຢືມເຂົາເຈົ້າມາ!”
6 ຄົນຂອງພະເຈົ້າທ່ຽງແທ້ຖາມວ່າ: “ມັນຕົກລົງບ່ອນໃດ?” ລາວກໍຊີ້ໃຫ້ເບິ່ງ. ເອລີຊາຈຶ່ງຕັດງ່າໄມ້ມາງ່າໜຶ່ງແລະໂຍນລົງໄປບ່ອນນັ້ນ ແລ້ວຂວານກໍຟູຂຶ້ນມາ.
7 ເອລີຊາບອກວ່າ: “ຈັບເອົາແມ້.” ລາວກໍເດ່ມືໄປຈັບເອົາ.
8 ຕໍ່ມາ ກະສັດຊີເຣຍໄດ້ເຮັດສົງຄາມກັບພວກອິດສະຣາເອນ.+ ລາວປຶກສາກັບຄົນຂອງລາວແລະບອກເຂົາເຈົ້າວ່າລາວຈະໄປຕັ້ງຄ້າຍກັບເຂົາເຈົ້າຢູ່ໃສ.
9 ເອລີຊາຄົນຂອງພະເຈົ້າທ່ຽງແທ້+ໃຫ້ຄົນໄປບອກກະສັດອິດສະຣາເອນວ່າ: “ທ່ານຢ່າກາຍໄປບ່ອນນັ້ນ ເພາະວ່າພວກຊີເຣຍຈະມາໂຈມຕີທ່ານຢູ່ຫັ້ນ.”
10 ກະສັດອິດສະຣາເອນຈຶ່ງສົ່ງຂ່າວໄປບອກຄົນຂອງລາວທີ່ຢູ່ບ່ອນທີ່ເອລີຊາຄົນຂອງພະເຈົ້າທ່ຽງແທ້ໄດ້ເວົ້າເຖິງ. ເອລີຊາໄດ້ເຕືອນແບບນີ້ຫຼາຍໆເທື່ອ* ກະສັດຈຶ່ງບໍ່ໄປບ່ອນເຫຼົ່ານັ້ນ.+
11 ກະສັດຊີເຣຍໃຈຮ້າຍຫຼາຍແລະເອີ້ນຄົນຂອງລາວມາຖາມວ່າ: “ບອກມາດຸ ໃຜເປັນສາຍສືບໃຫ້ກະສັດອິດສະຣາເອນ!”
12 ມີຜູ້ໜຶ່ງຕອບກະສັດວ່າ: “ກະສັດ ບໍ່ມີໃຜກ້າເຮັດດອກ! ຜູ້ພະຍາກອນເອລີຊາໃນອິດສະຣາເອນພຸ້ນເອົາສິ່ງທີ່ທ່ານເວົ້າຢູ່ຫ້ອງນອນໄປບອກກະສັດອິດສະຣາເອນ.”+
13 ກະສັດຊີເຣຍຈຶ່ງບອກວ່າ: “ໄປຊອກເບິ່ງດຸວ່າລາວຢູ່ໃສ. ຂ້ອຍຈະໃຫ້ຄົນໄປຈັບລາວ.” ຕໍ່ມາ ມີຄົນມາບອກກະສັດວ່າເອລີຊາຢູ່ເມືອງໂດທານ.+
14 ກະສັດຈຶ່ງຟ້າວສົ່ງມ້າກັບລົດຮົບແລະທະຫານກອງທັບໃຫຍ່ໄປບ່ອນນັ້ນ. ເຂົາເຈົ້າໄປຕອນກາງຄືນແລະລ້ອມເມືອງໄວ້.
15 ເມື່ອຄົນຮັບໃຊ້ຂອງເອລີຊາຕື່ນແຕ່ເຊົ້າໆແລະອອກໄປນອກເຮືອນ ລາວກໍເຫັນທະຫານກອງທັບໃຫຍ່ກັບມ້າແລະລົດຮົບລ້ອມເມືອງໄວ້. ລາວຈຶ່ງຟ້າວໄປບອກເອລີຊາວ່າ: “ນາຍເອີ້ຍ ຕາຍຄັກໆ! ເຮົາຊິເຮັດແນວໃດ?”
16 ແຕ່ເອລີຊາບອກວ່າ: “ບໍ່ຕ້ອງຢ້ານ!+ ຝ່າຍພວກເຮົາມີຫຼາຍກວ່າເຂົາເຈົ້າ.”+
17 ແລ້ວເອລີຊາກໍອະທິດຖານວ່າ: “ພະເຢໂຫວາ ຂໍພະອົງເຮັດໃຫ້ລາວເຫັນ.”*+ ທັນໃດນັ້ນ ພະເຢໂຫວາກໍເຮັດໃຫ້ຄົນຮັບໃຊ້ເຫັນ ແລະລາວກໍເຫັນມ້າກັບລົດຮົບທີ່ເປັນຄືກັບແປວໄຟ+ຢູ່ເຕັມພູອ້ອມເອລີຊາໄວ້.+
18 ເມື່ອພວກຊີເຣຍຈະມາຈັບເອລີຊາ ເອລີຊາອະທິດຖານຫາພະເຢໂຫວາວ່າ: “ຂໍພະອົງເຮັດໃຫ້ພວກນີ້*ຕາບອດ.”*+ ແລ້ວເພິ່ນກໍເຮັດໃຫ້ເຂົາເຈົ້າຕາບອດຕາມທີ່ເອລີຊາຂໍ.
19 ເອລີຊາບອກເຂົາເຈົ້າວ່າ: “ພວກເຈົ້າມາຜິດທາງແລ້ວ ບໍ່ແມ່ນເມືອງນີ້. ນຳຂ້ອຍມາ ຂ້ອຍຈະພາພວກເຈົ້າໄປຫາຜູ້ທີ່ພວກເຈົ້າກຳລັງຊອກຫາ.” ແຕ່ລາວພາເຂົາເຈົ້າໄປເມືອງຊາມາເຣຍ.+
20 ເມື່ອໄປຮອດເມືອງຊາມາເຣຍ ເອລີຊາກໍອະທິດຖານວ່າ: “ພະເຢໂຫວາ ຂໍພະອົງເຮັດໃຫ້ເຂົາເຈົ້າເຫັນຮຸ່ງ.”* ແລ້ວພະເຢໂຫວາກໍເຮັດໃຫ້ເຂົາເຈົ້າເຫັນຮຸ່ງ ເຂົາເຈົ້າຈຶ່ງຮູ້ວ່າໂຕເອງຢູ່ເມືອງຊາມາເຣຍ.
21 ເມື່ອກະສັດອິດສະຣາເອນເຫັນເຂົາເຈົ້າ ລາວຈຶ່ງຖາມເອລີຊາວ່າ: “ເຈົ້າຊິໃຫ້ຂ້ອຍຂ້າພວກນີ້ເລີຍບໍ?”
22 ແຕ່ເອລີຊາຕອບວ່າ: “ບໍ່ຕ້ອງຂ້າເຂົາເຈົ້າ. ທ່ານຈະຂ້າຊະເລີຍທີ່ຈັບມາໄດ້ໃນການຕໍ່ສູ້ບໍ? ເອົາເຂົ້າເອົານ້ຳມາໃຫ້ເຂົາເຈົ້າກິນ+ ແລະສົ່ງເຂົາເຈົ້າກັບໄປຫາເຈົ້ານາຍຂອງເຂົາເຈົ້າ.”
23 ກະສັດຈຶ່ງຈັດງານລ້ຽງໃຫຍ່ໃຫ້ພວກຊີເຣຍ. ຫຼັງຈາກກິນລ້ຽງແລ້ວ ກະສັດກໍສົ່ງເຂົາເຈົ້າກັບໄປຫາເຈົ້ານາຍຂອງເຂົາເຈົ້າ. ພວກກຸ່ມໂຈນຊີເຣຍ+ບໍ່ໄດ້ເຂົ້າມາປຸ້ນໃນອິດສະຣາເອນອີກເລີຍ.
24 ຫຼັງຈາກນັ້ນ ເບັນຮາດັດກະສັດຂອງຊີເຣຍໄດ້ລວບລວມກອງທັບທັງໝົດຂອງລາວ ແລ້ວໄປລ້ອມເມືອງຊາມາເຣຍ.+
25 ເມືອງຊາມາເຣຍຈຶ່ງມີຄວາມອຶດຢາກໜັກຫຼາຍ.+ ເຂົາເຈົ້າລ້ອມເມືອງນີ້ດົນຫຼາຍຈົນຫົວລາ+ຫົວໜຶ່ງຂຶ້ນລາຄາເປັນເງິນໜັກຮອດ 80 ເຊເກນ* ແລະຂີ້ນົກເຂົາ 1 ສ່ວນ 4 ຂາບ* ຂຶ້ນລາຄາເປັນເງິນໜັກຮອດ 5 ເຊເກນ.*
26 ຕອນທີ່ກະສັດອິດສະຣາເອນຍ່າງຢູ່ເທິງກຳແພງເມືອງ ມີຜູ້ຍິງຄົນໜຶ່ງເອີ້ນໃສ່ລາວວ່າ: “ກະສັດຜູ້ເປັນນາຍຂອງຂ້ອຍ ຊ່ວຍຂ້ອຍແດ່!”
27 ກະສັດຕອບວ່າ: “ຖ້າພະເຢໂຫວາບໍ່ຊ່ວຍເຈົ້າ ຂ້ອຍຊິຊ່ວຍເຈົ້າໄດ້ບໍ? ເຈົ້າຄິດວ່າຂ້ອຍຊິມີຂອງກິນ ເຫຼົ້າແວງ ຫຼືນ້ຳມັນໝາກກອກໃຫ້ເຈົ້າບໍ?”
28 ກະສັດຖາມລາວວ່າ: “ເຈົ້າມີເລື່ອງຫຍັງ?” ລາວຕອບວ່າ: “ຜູ້ຍິງຄົນນີ້ບອກໃຫ້ຂ້າລູກຂ້ອຍກິນກ່ອນ ແລ້ວມື້ອື່ນຈຶ່ງຂ້າລູກຂອງລາວກິນ.+
29 ພວກເຮົາຈຶ່ງເອົາລູກຊາຍຂ້ອຍມາຕົ້ມກິນ.+ ມື້ຕໍ່ມາ ຂ້ອຍບອກລາວວ່າ ‘ເອົາລູກຊາຍເຈົ້າມາຂ້າກິນແມ້’ ແຕ່ລາວພັດເອົາລູກໄປເຊື່ອງໄວ້.”
30 ເມື່ອກະສັດໄດ້ຍິນແນວນັ້ນ ລາວກໍຈີກເສື້ອຂອງໂຕເອງ.+ ຕອນທີ່ລາວຍ່າງຢູ່ເທິງກຳແພງເມືອງ ປະຊາຊົນກໍເຫັນວ່າລາວນຸ່ງຜ້າເນື້ອຫຍາບຢູ່ທາງໃນ.*
31 ລາວເວົ້າວ່າ: “ຂໍໃຫ້ພະເຈົ້າລົງໂທດຂ້ອຍໜັກໆໂລດ ຖ້າເອລີຊາລູກຊາຍຂອງຊາຟາດບໍ່ຖືກຕັດຫົວໃນມື້ນີ້!”+
32 ຕອນທີ່ເອລີຊາກຳລັງນັ່ງຢູ່ໃນເຮືອນຂອງລາວກັບພວກຜູ້ນຳ ກະສັດໄດ້ສົ່ງຜູ້ຊາຍຄົນໜຶ່ງໄປຫາເອລີຊາກ່ອນ ແລ້ວກະສັດກໍມານຳຫຼັງ. ແຕ່ຕອນທີ່ຄົນຂອງກະສັດຍັງມາບໍ່ຮອດ ເອລີຊາເວົ້າກັບພວກຜູ້ນຳວ່າ: “ລູກຄາຕະກອນ+ໄດ້ສົ່ງຄົນມາຕັດຫົວຂ້ອຍ. ເບິ່ງດີໆເດີ້ ຖ້າລາວມາຮອດໃຫ້ພວກເຈົ້າປິດປະຕູແລ້ວດັນໄວ້ ຢ່າໃຫ້ລາວເຂົ້າມາ. ເຈົ້ານາຍຂອງລາວກຳລັງນຳມາ.”
33 ເອລີຊາເວົ້າຍັງບໍ່ທັນສຸດຄວາມ ຜູ້ຊາຍຄົນນັ້ນກໍມາຮອດ. ແລ້ວກະສັດກໍມາຮອດແລະເວົ້າວ່າ: “ພະເຢໂຫວາເຮັດໃຫ້ເກີດຄວາມຈິບຫາຍນີ້. ເປັນຫຍັງຂ້ອຍຕ້ອງຖ້າໃຫ້ພະເຢໂຫວາຊ່ວຍ?”
ຂໍ
^ ແປຕາມໂຕວ່າ “ພວກລູກຊາຍຂອງພວກຜູ້ພະຍາກອນ.” ອາດໝາຍເຖິງໂຮງຮຽນສອນຜູ້ພະຍາກອນ ຫຼືສະມາຄົມຂອງພວກຜູ້ພະຍາກອນ.
^ ຫຼື “ຫຼາຍກວ່າເທື່ອໜຶ່ງຫຼືສອງເທື່ອ”
^ ແປຕາມໂຕວ່າ “ເປີດຕາລາວ”
^ ເປັນໄປໄດ້ທີ່ເຂົາເຈົ້າບໍ່ໄດ້ຕາບອດແທ້ໆ ແຕ່ອາດໝາຍຄວາມວ່າພະເຈົ້າເຮັດໃຫ້ເຂົາເຈົ້າບໍ່ເຂົ້າໃຈໃນສິ່ງທີ່ໂຕເອງເຫັນ
^ ແປຕາມໂຕວ່າ “ຊາດນີ້”
^ ແປຕາມໂຕວ່າ “ເປີດຕາເຂົາເຈົ້າ”
^ 912 ກຣາມ. ເບິ່ງພາກຜະໜວກ ຂ14.
^ 57 ກຣາມ
^ 0,3 ລິດ. ເບິ່ງພາກຜະໜວກ ຂ14.
^ ຫຼື “ກ້ອງເສື້ອຕິດກັບຜິວໜັງຂອງລາວ”
