ກະສັດສະບັບທີສອງ 9:1-37
9 ຜູ້ພະຍາກອນເອລີຊາໄດ້ເອີ້ນລູກຫຼານຄົນໜຶ່ງຂອງພວກຜູ້ພະຍາກອນ*ມາຫາແລະບອກລາວວ່າ: “ມ້ວນເຄື່ອງນຸ່ງເຈົ້າຂຶ້ນເໜັບໄວ້ຢູ່ແອວ ແລ້ວຟ້າວເອົານ້ຳມັນຂວດນີ້ໄປເມືອງຣາໂມດກິລຽດ.+
2 ເມື່ອໄປຮອດຫັ້ນ ໃຫ້ເຈົ້າຊອກຫາເຢຮູ+ລູກຊາຍຂອງເຢໂຮຊາຟັດທີ່ເປັນຫຼານຂອງນິມຊີ ແລ້ວພາລາວເຂົ້າໄປຫ້ອງທາງໃນຄົນດຽວ. ຢ່າໃຫ້ພວກຫົວໜ້າກອງທັບຄົນອື່ນເຂົ້າໄປນຳ.
3 ເອົານ້ຳມັນຂວດນີ້ເທໃສ່ຫົວລາວແລ້ວເວົ້າວ່າ ‘ພະເຢໂຫວາບອກວ່າ “ເຮົາເລືອກເຈົ້າເປັນກະສັດປົກຄອງອິດສະຣາເອນ.”’+ ຫຼັງຈາກນັ້ນ ໃຫ້ເຈົ້າຟ້າວໜີອອກມາຈາກຫ້ອງນັ້ນໄວໆ.”
4 ລູກຫຼານຂອງຜູ້ພະຍາກອນຈຶ່ງໄປເມືອງຣາໂມດກິລຽດ.
5 ຕອນທີ່ລາວໄປຮອດ ພວກຫົວໜ້າກອງທັບນັ່ງຢູ່ຫັ້ນນຳກັນ. ລາວບອກວ່າ: “ຂ້ອຍມີຂ່າວມາບອກຫົວໜ້າກອງທັບ.” ເຢຮູຖາມວ່າ: “ຫົວໜ້າກອງທັບຜູ້ໃດ?” ລາວຕອບວ່າ: “ເຈົ້າຫັ້ນແຫຼະ.”
6 ເຢຮູຈຶ່ງລຸກຂຶ້ນແລະເຂົ້າໄປໃນເຮືອນ. ລູກຫຼານຂອງຜູ້ພະຍາກອນກໍເທນ້ຳມັນໃສ່ຫົວລາວແລະບອກວ່າ: “ພະເຢໂຫວາພະເຈົ້າຂອງອິດສະຣາເອນບອກວ່າ ‘ເຮົາເລືອກເຈົ້າໃຫ້ເປັນກະສັດປົກຄອງອິດສະຣາເອນປະຊາຊົນຂອງພະເຢໂຫວາ.+
7 ເຈົ້າຕ້ອງກວາດລ້າງຄອບຄົວຂອງອາຮາບເຈົ້ານາຍຂອງເຈົ້າ ເພາະເຮົາເຢໂຫວາຈະແກ້ແຄ້ນແທນຜູ້ພະຍາກອນຂອງເຮົາ ແລະແກ້ແຄ້ນແທນຜູ້ຮັບໃຊ້ຂອງເຮົາທຸກຄົນທີ່ຕາຍຍ້ອນຖືກເຢເຊເບນຂ້າ.+
8 ທຸກຄົນໃນຄອບຄົວຂອງອາຮາບຈະຕ້ອງຕາຍ. ເຮົາຈະເຮັດໃຫ້ຜູ້ຊາຍ*ທຸກຄົນໃນຕະກູນຂອງອາຮາບດັບສູນ ເຖິງວ່າຈະເປັນຄົນທີ່ຕ່ຳຕ້ອຍທີ່ສຸດໃນອິດສະຣາເອນ.+
9 ເຮົາຈະທຳລາຍຕະກູນຂອງອາຮາບຄືກັບທີ່ໄດ້ທຳລາຍຕະກູນຂອງເຢໂຣໂບອາມ+ລູກຊາຍຂອງເນບັດ ແລະຕະກູນຂອງບາອາຊາ+ລູກຊາຍຂອງອາຮີຢາ.
10 ສ່ວນເຢເຊເບນຈະຖືກຝູງໝາຫຸ້ມກັດກິນຢູ່ດິນຕອນໜຶ່ງໃນເມືອງເຢດຊະເຣເອນ+ແລະຈະບໍ່ມີໃຜຝັງລາວ.’” ເມື່ອເວົ້າຈົບ ລາວກໍໜີອອກໄປຈາກຫ້ອງນັ້ນ.+
11 ເມື່ອເຢຮູກັບໄປຫາພວກຫົວໜ້າກອງທັບ ເຂົາເຈົ້າຖາມລາວວ່າ: “ມີຫຍັງບໍ່? ຄົນຜີບ້າຜູ້ນີ້ມາຫາເຈົ້າເຮັດຫຍັງ?” ລາວຕອບວ່າ: “ພວກເຈົ້າກໍຮູ້ວ່າລາວຜີບ້າ. ລາວກໍເວົ້າຕາມພາສາຜີບ້າຂອງລາວຫັ້ນແຫຼະ.”
12 ແຕ່ເຂົາເຈົ້າເວົ້າວ່າ: “ບໍ່ເຊື່ອດອກ. ບອກພວກເຮົາດຸວ່າລາວເວົ້າຫຍັງ.” ເຢຮູຈຶ່ງບອກວ່າ: “ລາວເວົ້າວ່າ ພະເຢໂຫວາບອກວ່າ ‘ເຮົາເລືອກເຈົ້າເປັນກະສັດປົກຄອງອິດສະຣາເອນ.’”+
13 ເມື່ອໄດ້ຍິນແບບນັ້ນ ເຂົາເຈົ້າກໍຟ້າວແກ້ເສື້ອຄຸມຂອງໂຕເອງໄປປູໃສ່ຂັ້ນໄດ+ ແລ້ວໃຫ້ເຢຮູຂຶ້ນໄປຢືນຢູ່ຫັ້ນ. ເຂົາເຈົ້າເປົ່າແກເຂົາສັດແລະຮ້ອງວ່າ: “ເຢຮູເປັນກະສັດແລ້ວ.”+
14 ຈາກນັ້ນ ເຢຮູ+ລູກຊາຍຂອງເຢໂຮຊາຟັດທີ່ເປັນຫຼານຂອງນິມຊີກໍວາງແຜນຂ້າເຢໂຮຣາມ.
ກ່ອນໜ້ານັ້ນ ເຢໂຮຣາມກັບກອງທັບທັງໝົດໄດ້ໄປປົກປ້ອງເມືອງຣາໂມດກິລຽດ+ເພື່ອບໍ່ໃຫ້ຮາຊາເອນ+ກະສັດຂອງຊີເຣຍໂຈມຕີ.
15 ຕໍ່ມາ ກະສັດເຢໂຮຣາມໄດ້ກັບໄປເມືອງເຢດຊະເຣເອນ+ເພື່ອປົວບາດທີ່ຖືກພວກຊີເຣຍຍິງທະນູໃສ່ຕອນທີ່ຕໍ່ສູ້ກັບຮາຊາເອນກະສັດຂອງຊີເຣຍ.+
ເຢຮູເວົ້າວ່າ: “ຖ້າພວກເຈົ້າຢູ່ຝ່າຍຂ້ອຍກໍຢ່າໃຫ້ໃຜອອກຈາກເມືອງໄປບອກເລື່ອງນີ້ຢູ່ເມືອງເຢດຊະເຣເອນ.”
16 ແລ້ວເຢຮູກໍຂີ່ລົດມ້າໄປເມືອງເຢດຊະເຣເອນ ຍ້ອນເຢໂຮຣາມນອນເຈັບຢູ່ຫັ້ນ. ອາຮາຊີຢາກະສັດຂອງຢູດາກໍຢູ່ຫັ້ນຄືກັນເພາະລາວໄປຢາມເຢໂຮຣາມ.
17 ເມື່ອຄົນຍາມທີ່ຢືນຢູ່ປ້ອມເມືອງເຢດຊະເຣເອນເຫັນເຢຮູກັບຄົນຂອງລາວກຸ່ມໃຫຍ່ກຳລັງມາ ຄົນຍາມຈຶ່ງຟ້າວໄປບອກວ່າ: “ຂ້ອຍເຫັນຄົນກຸ່ມໜຶ່ງກຳລັງມາ.” ເຢໂຮຣາມຈຶ່ງສັ່ງລາວວ່າ: “ສົ່ງທະຫານມ້າຜູ້ໜຶ່ງອອກໄປຖາມເຂົາເຈົ້າວ່າ ‘ພວກເຈົ້າມານີ້ມີຈຸດປະສົງດີບໍ່?”
18 ທະຫານມ້າກໍໄປຫາເຢຮູແລະຖາມລາວວ່າ: “ເຈົ້າມານີ້ມີຈຸດປະສົງດີບໍ່?” ເຢຮູຕອບວ່າ: “ບໍ່ແມ່ນເລື່ອງຂອງເຈົ້າ. ຢ່າມາຂວາງທາງຂ້ອຍ. ໄປຢູ່ທາງຫຼັງພຸ້ນແລະນຳມາ.”
ຄົນຍາມຈຶ່ງໄປບອກກະສັດວ່າ: “ທະຫານຜູ້ນັ້ນໄປຫາເຂົາເຈົ້າແລ້ວ ແຕ່ລາວບໍ່ໄດ້ກັບມາ.”
19 ກະສັດຈຶ່ງສົ່ງທະຫານມ້າອີກຜູ້ໜຶ່ງໄປຖາມເຂົາເຈົ້າວ່າ: “ເຈົ້າມານີ້ມີຈຸດປະສົງດີບໍ່?” ເຢຮູຕອບວ່າ: “ບໍ່ແມ່ນເລື່ອງຂອງເຈົ້າ. ຢ່າມາຂວາງທາງຂ້ອຍ. ໄປຢູ່ທາງຫຼັງພຸ້ນແລະນຳມາ.”
20 ຄົນຍາມຈຶ່ງໄປບອກກະສັດວ່າ: “ທະຫານອີກຜູ້ໜຶ່ງໄປຫາເຂົາເຈົ້າແລ້ວ ແຕ່ລາວກໍບໍ່ໄດ້ກັບມາ. ຄົນທີ່ຂັບລົດມ້າຂັບແບບໃຈຮ້າຍຄືກັບເຢຮູຫຼານຊາຍ*ຂອງນິມຊີ.”
21 ເຢໂຮຣາມຈຶ່ງບອກວ່າ: “ກຽມລົດມ້າ!” ເຂົາເຈົ້າຈຶ່ງກຽມລົດມ້າຄັນໜຶ່ງໃຫ້ເຢໂຮຣາມກະສັດຂອງອິດສະຣາເອນ ແລະອີກຄັນໜຶ່ງໃຫ້ອາຮາຊີຢາ+ກະສັດຂອງຢູດາ. ແລ້ວທັງສອງກໍຂີ່ລົດມ້າອອກໄປແລະເຈິກັບເຢຮູຢູ່ດິນຂອງນາໂບດ+ຄົນເຢດຊະເຣເອນ.
22 ເມື່ອເຢໂຮຣາມເຫັນເຢຮູກໍຖາມວ່າ: “ເຢຮູ ເຈົ້າມານີ້ມີຈຸດປະສົງດີບໍ່?” ເຢຮູຕອບວ່າ: “ຊິໃຫ້ຂ້ອຍມາດີໄດ້ແນວໃດ? ເຢເຊເບນ+ແມ່ຂອງເຈົ້າຍັງເຮັດໂຕຄືກັບແມ່ຈ້າງ*ແລະໃຊ້ຄາຖາອາຄົມຫຼາຍຢ່າງ.”+
23 ເຢໂຮຣາມຈຶ່ງຟ້າວລ້ຽວລົດມ້າໜີ ແລະຮ້ອງບອກອາຮາຊີຢາວ່າ: “ອາຮາຊີຢາ ເຮົາຖືກຕົວະແລ້ວ!”
24 ເຢຮູຈັບເອົາທະນູມາ ແລ້ວຍິງຖືກກາງຫຼັງຂອງເຢໂຮຣາມ. ລູກທະນູໄດ້ແທງຊອດຫົວໃຈ ແລ້ວລາວກໍຕາຍຄາລົດມ້າ.
25 ເຢຮູຈຶ່ງບອກບິດການທີ່ເປັນຫົວໜ້າທະຫານຂອງລາວວ່າ: “ຈັບລາວໂຍນຖິ້ມຢູ່ດິນຂອງນາໂບດຄົນເຢດຊະເຣເອນ.+ ຈື່ໄດ້ບໍ່ຕອນທີ່ເຮົາຂີ່ລົດມ້ານຳຫຼັງອາຮາບພໍ່ຂອງລາວ ພະເຢໂຫວາໄດ້ປະກາດຄຳຕັດສິນລົງໂທດອາຮາບວ່າ+
26 ພະເຢໂຫວາບອກວ່າ ‘“ມື້ວານນີ້ເຮົາເຫັນເລືອດຂອງນາໂບດ+ກັບພວກລູກຊາຍຂອງລາວ.” ພະເຢໂຫວາບອກອີກວ່າ “ເຮົາຈະໃຫ້ເຈົ້າຊົດໄຊ້ຄວາມຜິດທີ່ເຈົ້າໄດ້ເຮັດ+ຢູ່ດິນຕອນນີ້.”’ ໄປຈັບລາວມາໂຍນຖິ້ມຢູ່ດິນຕອນນີ້ຕາມທີ່ພະເຢໂຫວາບອກ.”+
27 ເມື່ອອາຮາຊີຢາ+ກະສັດຂອງຢູດາເຫັນແບບນັ້ນ ລາວກໍໜີໄປທາງບ້ານສວນ. (ຕໍ່ມາ ເຢຮູໄດ້ໄລ່ນຳລາວໄປແລະບອກວ່າ: “ຂ້າລາວ!” ແລ້ວເຂົາເຈົ້າກໍເອົາດາບຟັນລາວຄາລົດມ້າຕອນທີ່ລາວກຳລັງໜີໄປກູເຣທີ່ຢູ່ໃກ້ເມືອງອິບເລອາມ.+ ແຕ່ອາຮາຊີຢາໜີຕໍ່ໄປໄດ້ຈົນຮອດເມືອງເມກິດໂດແລະຕາຍຢູ່ຫັ້ນ.
28 ຄົນຂອງອາຮາຊີຢາຈຶ່ງເອົາສົບຂອງອາຮາຊີຢາໃສ່ລົດມ້າໄປເມືອງເຢຣູຊາເລັມແລະຝັງລາວໄວ້ກັບປູ່ຍ່າຕານາຍຂອງລາວຢູ່ເມືອງຂອງດາວິດ.+
29 ໃນປີທີ 11 ທີ່ເຢໂຮຣາມລູກຊາຍຂອງອາຮາບເປັນກະສັດປົກຄອງອິດສະຣາເອນ ອາຮາຊີຢາ+ກໍເປັນກະສັດປົກຄອງຢູດາ.)
30 ເມື່ອເຢເຊເບນ+ຮູ້ວ່າເຢຮູມາເມືອງເຢດຊະເຣເອນ+ ລາວຈຶ່ງທາຕາດຳໆ ເຮັດຊົງຜົມງາມໆ ແລະແນມລົງມາຈາກປ່ອງຢ້ຽມ.
31 ເມື່ອເຢຮູເຂົ້າປະຕູເມືອງມາ ເຢເຊເບນກໍເວົ້າວ່າ: “ເຈົ້າຈື່ໄດ້ບໍ່ ຊິມຣີທີ່ຂ້ານາຍຂອງໂຕເອງສຸດທ້າຍເປັນແນວໃດ?”+
32 ເຢຮູແນມຂຶ້ນໄປທາງປ່ອງຢ້ຽມແລະຖາມວ່າ: “ມີໃຜແດ່ຢູ່ຝ່າຍຂ້ອຍ? ມີໃຜແດ່?”+ ທັນໃດນັ້ນ ຂ້າລາຊະການສອງສາມຄົນກໍແນມລົງມາເບິ່ງລາວ.
33 ເຢຮູບອກເຂົາເຈົ້າວ່າ: “ຈັບມັນໂຍນລົງມາ!” ເຂົາເຈົ້າກໍຈັບເຢເຊເບນໂຍນລົງມາ. ເລືອດຂອງລາວຟົ້ງໃສ່ກຳແພງແລະໃສ່ມ້າ ແລ້ວເຢຮູກໍບັງຄັບມ້າຂອງລາວໃຫ້ຢຽບເຢເຊເບນ.
34 ຫຼັງຈາກນັ້ນ ເຢຮູກໍເຂົ້າໄປກິນແລະດື່ມ ແລ້ວບອກວ່າ: “ເອົາຜູ້ຍິງຄົນນີ້ທີ່ຖືກສາບແຊ່ງໄປຝັງ ຍ້ອນວ່າລາວເປັນລູກສາວຂອງກະສັດ.”+
35 ຕອນທີ່ເຂົາເຈົ້າຈະເອົາເຢເຊເບນໄປຝັງກໍເຫັນແຕ່ກະໂຫຼກຫົວກັບມືແລະຕີນເທົ່ານັ້ນ.+
36 ເມື່ອເຂົາເຈົ້າກັບມາບອກເຢຮູ ລາວກໍເວົ້າວ່າ: “ເລື່ອງນີ້ເປັນໄປຕາມທີ່ພະເຢໂຫວາໄດ້ບອກ+ເອລີຢາຄົນຕີຊະເບຜູ້ຮັບໃຊ້ຂອງເພິ່ນທີ່ວ່າ ‘ເຢເຊເບນຈະຖືກຝູງໝາຫຸ້ມກັດກິນຢູ່ດິນຕອນໜຶ່ງໃນເມືອງເຢດຊະເຣເອນ.+
37 ສົບຂອງລາວຈະເປັນຄືຂີ້ສັດຢູ່ດິນຕອນໜຶ່ງໃນເມືອງເຢດຊະເຣເອນ ເພື່ອຈະບໍ່ມີໃຜຈື່ໄດ້ວ່າ “ນັ້ນແມ່ນເຢເຊເບນ.”’”
ຂໍ
^ ແປຕາມໂຕວ່າ “ພວກລູກຊາຍຂອງພວກຜູ້ພະຍາກອນ.” ອາດໝາຍເຖິງໂຮງຮຽນສອນຜູ້ພະຍາກອນ ຫຼືສະມາຄົມຂອງພວກຜູ້ພະຍາກອນ.
^ ແປຕາມໂຕວ່າ “ຄົນທີ່ຍ່ຽວໃສ່ກຳແພງ.” ເປັນສຳນວນພາສາເຮັບເຣີໝາຍເຖິງຜູ້ຊາຍແລະໃຊ້ໃນແບບດູຖູກ.
^ ແປຕາມໂຕວ່າ “ລູກຊາຍ”
^ ຫຼື “ຂາບໄຫວ້ຮູບບູຊາ”
