ຂ່າວຄາວສະບັບທີສອງ 32:1-33
32 ຫຼັງຈາກເຮເຊກີຢາເຮັດສິ່ງເຫຼົ່ານັ້ນຢ່າງສັດຊື່+ ເຊນນາເກຣິບກະສັດຂອງອັດຊີເຣຍກໍມາບຸກໂຈມຕີຢູດາ. ລາວລ້ອມເມືອງຕ່າງໆທີ່ມີກຳແພງອ້ອມເພື່ອຈະທຳລາຍກຳແພງແລະຍຶດເອົາເມືອງເຫຼົ່ານັ້ນ.+
2 ເມື່ອເຮເຊກີຢາເຫັນວ່າເຊນນາເກຣິບມາແລ້ວ ແລະຕັ້ງໃຈທີ່ຈະໂຈມຕີເມືອງເຢຣູຊາເລັມ
3 ລາວຈຶ່ງປຶກສາກັບພວກເຈົ້ານາຍແລະພວກທະຫານຂອງລາວ. ເຮເຊກີຢາຕັດສິນໃຈວ່າຈະອັດຮູນ້ຳທີ່ຢູ່ນອກເມືອງ+ ແລ້ວເຂົາເຈົ້າກໍເຫັນດີກັບການຕັດສິນໃຈນັ້ນ.
4 ມີຫຼາຍຄົນຊ່ວຍກັນອັດຮູນ້ຳແລະຕັນນ້ຳຫ້ວຍທຸກບ່ອນທີ່ໄຫຼອ້ອມເມືອງ. ເຂົາເຈົ້າພາກັນເວົ້າວ່າ: “ຕອນທີ່ກະສັດອັດຊີເຣຍມາ ເຮົາຊິບໍ່ໃຫ້ເຂົາເຈົ້າມີນ້ຳໃຊ້.”
5 ນອກຈາກນັ້ນ ເຮເຊກີຢາໄດ້ແປງກຳແພງທຸກບ່ອນທີ່ເພ ສ້າງປ້ອມໄວ້ເທິງກຳແພງນັ້ນ ແລະສ້າງກຳແພງອີກຊັ້ນໜຶ່ງຢູ່ທາງນອກ. ລາວຍັງໄດ້ແປງໂນນ*+ຢູ່ເມືອງຂອງດາວິດແລະໄດ້ເຮັດອາວຸດກັບໂລ້ຈຳນວນຫຼາຍ.
6 ເຮເຊກີຢາໄດ້ແຕ່ງຕັ້ງພວກຫົວໜ້າກອງທັບໃຫ້ນຳພາປະຊາຊົນໃນການປົກປ້ອງເມືອງ. ລາວໃຫ້ທຸກຄົນມາລວມກັນຢູ່ເດີ່ນທີ່ຢູ່ປະຕູເມືອງແລະເວົ້າໃຫ້ກຳລັງໃຈເຂົາເຈົ້າວ່າ:
7 “ພວກເຈົ້າຕ້ອງກ້າຫານແລະເຂັ້ມແຂງ. ບໍ່ຕ້ອງຢ້ານກະສັດອັດຊີເຣຍ+ແລະກອງທັບໃຫຍ່ຂອງລາວ ເພາະຜູ້ທີ່ຢູ່ຝ່າຍພວກເຮົາມີຫຼາຍກວ່າຜູ້ທີ່ຢູ່ຝ່າຍລາວ.+
8 ລາວມີແຕ່ກຳລັງຂອງມະນຸດ ແຕ່ເຮົາມີພະເຢໂຫວາພະເຈົ້າຂອງພວກເຮົາ. ເພິ່ນຈະຕໍ່ສູ້ແທນພວກເຮົາ.”+ ສິ່ງທີ່ເຮເຊກີຢາກະສັດຂອງຢູດາເວົ້າເຮັດໃຫ້ປະຊາຊົນໄດ້ກຳລັງໃຈຫຼາຍ.+
9 ຕອນທີ່ເຊນນາເກຣິບກະສັດຂອງອັດຊີເຣຍກັບກອງທັບໃຫຍ່ຂອງລາວຢູ່ເມືອງລາກິດ+ ເຊນນາເກຣິບໄດ້ສົ່ງຄົນມາເມືອງເຢຣູຊາເລັມເພື່ອເວົ້າກັບເຮເຊກີຢາກະສັດຂອງຢູດາແລະພວກຢູດາທີ່ຢູ່ເມືອງເຢຣູຊາເລັມ+ວ່າ:
10 “ເຊນນາເກຣິບກະສັດຂອງອັດຊີເຣຍເວົ້າວ່າ ‘ເປັນຫຍັງພວກເຈົ້າຍັງຢູ່ໃນເມືອງເຢຣູຊາເລັມທັງໆທີ່ພວກເຮົາລ້ອມເມືອງນີ້ແລ້ວ? ພວກເຈົ້າຄິດວ່າໃຜຈະມາຊ່ວຍພວກເຈົ້າ?+
11 ຢ່າໃຫ້ເຮເຊກີຢາຕົວະພວກເຈົ້າວ່າ ພະເຢໂຫວາພະເຈົ້າຂອງພວກເຈົ້າຈະຊ່ວຍພວກເຈົ້າໃຫ້ລອດຈາກກະສັດອັດຊີເຣຍ+ ແລະຢ່າໃຫ້ລາວເຮັດໃຫ້ພວກເຈົ້າອົດເຂົ້າອົດນ້ຳຕາຍ.
12 ເຮເຊກີຢານິຕົ໋ວທີ່ທຳລາຍບ່ອນນະມັດສະການຕ່າງໆ+ແລະແທ່ນບູຊາຕ່າງໆ+ຂອງພະເຈົ້າຂອງພວກເຈົ້າ ແລ້ວລາວກໍບອກຄົນທີ່ຢູ່ຢູດາກັບເຢຣູຊາເລັມວ່າ ພວກເຈົ້າຕ້ອງນະມັດສະການແລະເຜົາເຄື່ອງບູຊາຢູ່ບ່ອນດຽວເທົ່ານັ້ນ.+
13 ພວກເຈົ້າກໍຮູ້ຕົ໋ວວ່າຂ້ອຍກັບປູ່ຍ່າຕານາຍຂອງຂ້ອຍເຮັດຫຍັງແດ່ກັບຊາດຕ່າງໆ.+ ພະເຈົ້າຂອງຊາດເຫຼົ່ານັ້ນຊ່ວຍຊາດຂອງໂຕເອງໃຫ້ລອດຈາກຂ້ອຍກະບໍ່ໄດ້.+
14 ປູ່ຍ່າຕານາຍຂອງຂ້ອຍເຄີຍທຳລາຍຫຼາຍປະເທດ ແລະພະເຈົ້າຂອງຊາດເຫຼົ່ານັ້ນກໍຊ່ວຍຊາດຂອງໂຕເອງໃຫ້ລອດຈາກມືຂອງຂ້ອຍບໍ່ໄດ້ຊ້ຳ ແລ້ວພວກເຈົ້າຍັງຄິດວ່າພະເຈົ້າຂອງພວກເຈົ້າຈະຊ່ວຍພວກເຈົ້າໃຫ້ລອດຈາກຂ້ອຍໄດ້ຫວະ?+
15 ຢ່າໃຫ້ເຮເຊກີຢາຕົວະພວກເຈົ້າ.+ ບໍ່ຕ້ອງເຊື່ອລາວ ຍ້ອນວ່າບໍ່ມີພະເຈົ້າຂອງຊາດໃດສາມາດຊ່ວຍຄົນຂອງໂຕເອງໃຫ້ລອດຈາກຂ້ອຍແລະປູ່ຍ່າຕານາຍຂອງຂ້ອຍໄດ້. ພະເຈົ້າຂອງພວກເຈົ້າກໍຊ່ວຍພວກເຈົ້າໃຫ້ລອດຈາກຂ້ອຍບໍ່ໄດ້ດອກ!’”+
16 ຄົນຂອງເຊນນາເກຣິບໄດ້ເວົ້າໃສ່ພະເຢໂຫວາພະເຈົ້າທ່ຽງແທ້ແລະເຮເຊກີຢາທີ່ເປັນຜູ້ຮັບໃຊ້ຂອງເພິ່ນຕື່ມອີກ.
17 ເຊນນາເກຣິບຍັງໄດ້ສົ່ງຈົດໝາຍ+ມາດູຖູກພະເຢໂຫວາພະເຈົ້າຂອງອິດສະຣາເອນ+ວ່າ: “ຂະໜາດພະເຈົ້າຂອງຊາດຕ່າງໆຍັງຊ່ວຍຄົນຂອງໂຕເອງບໍ່ໄດ້+ ແລ້ວພະເຈົ້າຂອງເຮເຊກີຢາຈະຊ່ວຍຄົນຂອງໂຕເອງໄດ້ຫວະ!”
18 ເຂົາເຈົ້າເວົ້າສຽງດັງໆເປັນພາສາຂອງຄົນຢິວ*ໃຫ້ພວກທະຫານເຢຣູຊາເລັມທີ່ຢູ່ເທິງກຳແພງໄດ້ຍິນເພື່ອໃຫ້ພວກທະຫານຢ້ານແລະຈະຍຶດເອົາເມືອງໄດ້.+
19 ເຂົາເຈົ້າໄດ້ເຍາະເຍີ້ຍພະເຈົ້າຂອງເມືອງເຢຣູຊາເລັມຄືກັບທີ່ໄດ້ເຍາະເຍີ້ຍພະເຈົ້າຂອງຊາດຕ່າງໆທີ່ມະນຸດເຮັດຂຶ້ນມາ.
20 ກະສັດເຮເຊກີຢາແລະຜູ້ພະຍາກອນເອຊາຢາ+ລູກຊາຍຂອງອາມອດໄດ້ອະທິດຖານບໍ່ຢຸດບໍ່ເຊົາກ່ຽວກັບເລື່ອງນີ້ເພື່ອຂໍໃຫ້ພະເຈົ້າທີ່ຢູ່ໃນສະຫວັນຊ່ວຍ.+
21 ພະເຢໂຫວາຈຶ່ງສົ່ງທູດສະຫວັນອົງໜຶ່ງມາຂ້າພວກທະຫານທີ່ເກັ່ງໆ+ ພວກຫົວໜ້າ ແລະພວກຫົວໜ້າກອງທັບທີ່ຢູ່ຄ້າຍຂອງກະສັດອັດຊີເຣຍຕາຍຈົນໝົດ. ກະສັດອັດຊີເຣຍກັບເມືອປະເທດຂອງໂຕເອງດ້ວຍຄວາມອັບອາຍ. ຕໍ່ມາ ຕອນທີ່ລາວເຂົ້າໄປໃນວິຫານຂອງພະເຈົ້າຂອງລາວ ພວກລູກຊາຍຂອງລາວກໍໄດ້ເອົາດາບຂ້າລາວຕາຍ.+
22 ພະເຢໂຫວາໄດ້ຊ່ວຍເຮເຊກີຢາແລະຄົນໃນເມືອງເຢຣູຊາເລັມໃຫ້ລອດຈາກເຊນນາເກຣິບກະສັດຂອງອັດຊີເຣຍແລະລອດຈາກຊາດອື່ນໆ. ເພິ່ນໄດ້ໃຫ້ເຂົາເຈົ້າມີຄວາມສະຫງົບສຸກທົ່ວປະເທດ.
23 ມີຄົນຈຳນວນຫຼາຍໄດ້ເອົາເຄື່ອງຂອງມາໃຫ້ພະເຢໂຫວາຢູ່ເມືອງເຢຣູຊາເລັມແລະໄດ້ເອົາແນວດີໆມາໃຫ້ເຮເຊກີຢາກະສັດຂອງຢູດາ.+ ເຮເຊກີຢາໄດ້ຮັບຄວາມນັບຖືຫຼາຍຈາກຊາດຕ່າງໆ.
24 ຕອນທີ່ເຮເຊກີຢາບໍ່ສະບາຍແຮງແລະໃກ້ຊິຕາຍ ລາວໄດ້ອະທິດຖານຫາພະເຢໂຫວາ+ ແລ້ວເພິ່ນກໍຕອບຄຳອະທິດຖານຂອງລາວແລະເຮັດສິ່ງທີ່ຢືນຢັນຄຳຕອບນັ້ນ.+
25 ແຕ່ເຮເຊກີຢາບໍ່ໄດ້ສຳນຶກບຸນຄຸນໃນສິ່ງດີໆທີ່ລາວໄດ້ຮັບ. ລາວກາຍເປັນຄົນຍິ່ງຈອງຫອງ ພະເຈົ້າຈຶ່ງໃຈຮ້າຍໃຫ້ເຮເຊກີຢາ ຄົນຢູດາ ແລະຄົນໃນເມືອງເຢຣູຊາເລັມ.
26 ຕໍ່ມາ ເຮເຊກີຢາກັບຄົນໃນເມືອງເຢຣູຊາເລັມໄດ້ຖ່ອມໂຕແລະເຊົາຍິ່ງຈອງຫອງ+ ພະເຢໂຫວາຈຶ່ງບໍ່ໄດ້ລົງໂທດເຂົາເຈົ້າໃນສະໄໝຂອງເຮເຊກີຢາ.+
27 ເຮເຊກີຢາມີຊື່ສຽງແລະຮັ່ງຫຼາຍ.+ ລາວສ້າງບ່ອນມ້ຽນ+ເງິນມ້ຽນຄຳ ບ່ອນມ້ຽນຫີນທີ່ມີຄ່າ ນ້ຳມັນຫອມ ໂລ້ ແລະສິ່ງທີ່ມີຄ່າອື່ນໆອີກຫຼາຍຢ່າງ.
28 ລາວເຮັດບ່ອນມ້ຽນເຂົ້າ ບ່ອນມ້ຽນເຫຼົ້າແວງໃໝ່ ແລະບ່ອນມ້ຽນນ້ຳມັນໝາກກອກ. ລາວເຮັດຄອກສຳລັບແກະແລະສັດອື່ນໆ.
29 ລາວຍັງໄດ້ສ້າງເມືອງຕ່າງໆສຳລັບໂຕເອງ. ລາວມີຝູງງົວ ຝູງແກະ ແລະຝູງແບ້ບັກຫຼາຍໆ. ພະເຈົ້າເຮັດໃຫ້ລາວມີຊັບສິນເງິນຄຳຫຼາຍແທ້ຫຼາຍວ່າ.
30 ເຮເຊກີຢາອັດຮູນ້ຳ+ທາງເທິງຂອງຫ້ວຍກີໂຮນ+ ແລະເຮັດທາງນ້ຳເພື່ອໃຫ້ນ້ຳໄຫຼໄປທາງທິດຕາເວັນຕົກເຂົ້າໄປໃນເມືອງຂອງດາວິດ.+ ເຮເຊກີຢາເຮັດຫຍັງກໍສຳເລັດ.
31 ແຕ່ຕອນທີ່ຕົວແທນຂອງພວກເຈົ້ານາຍຈາກບາບີໂລນມາຖາມສິ່ງທີ່ຢືນຢັນຄຳຕອບຂອງພະເຈົ້າ+ທີ່ເກີດຂຶ້ນໃນຢູດາ+ ພະເຈົ້າທ່ຽງແທ້ໄດ້ປ່ອຍໃຫ້ເຮເຊກີຢາຕັດສິນໃຈເອົາເອງວ່າຈະເຮັດແນວໃດ ຍ້ອນເພິ່ນຢາກທົດລອງເຮເຊກີຢາ+ເພື່ອຈະຮູ້ວ່າຫົວໃຈລາວເປັນແນວໃດແທ້ໆ.+
32 ເລື່ອງຕ່າງໆຂອງເຮເຊກີຢາແລະສິ່ງທີ່ລາວເຮັດດ້ວຍຄວາມຮັກທີ່ໝັ້ນຄົງ+ກໍຂຽນໄວ້ໃນບັນທຶກນິມິດ*ຂອງເອຊາຢາ+ລູກຊາຍຂອງອາມອດເຊິ່ງຢູ່ໃນປຶ້ມຂອງພວກກະສັດຢູດາແລະພວກກະສັດອິດສະຣາເອນ.+
33 ເມື່ອເຮເຊກີຢາຕາຍ ເຂົາເຈົ້າຝັງລາວໄວ້ຢູ່ເນີນທີ່ຝັງພວກລູກຫຼານຂອງດາວິດ.+ ຄົນຢູດາແລະຄົນໃນເມືອງເຢຣູຊາເລັມໄດ້ຈັດງານສົບໃຫ້ລາວແບບມີກຽດ. ມານາເຊລູກຊາຍຂອງລາວກໍເປັນກະສັດແທນ.
ຂໍ ຄວາມ ໄຂ ເງື່ອນ
^ ພາສາເຮັບເຣີແມ່ນມິໂລ. ອາດສ້າງໂນນນີ້ເພື່ອປົກປ້ອງເມືອງ.
^ ໝາຍເຖິງພາສາເຮັບເຣີ
^ ເບິ່ງສ່ວນອະທິບາຍຄຳສັບ