ຂ່າວຄາວສະບັບທີສອງ 35:1-27
35 ໃນວັນທີ 14 ຂອງເດືອນທີ 1+ ໂຢສີຢາໄດ້ຈັດການສະຫຼອງປັດສະຄາ+ໃຫ້ພະເຢໂຫວາໃນເມືອງເຢຣູຊາເລັມ. ເຂົາເຈົ້າໄດ້ຂ້າສັດສຳລັບປັດສະຄາ.+
2 ໂຢສີຢາໃຫ້ພວກປະໂລຫິດກັບມາເຮັດໜ້າທີ່ຂອງໂຕເອງແລະກະຕຸ້ນເຂົາເຈົ້າໃຫ້ເຮັດວຽກຮັບໃຊ້ຢູ່ວິຫານຂອງພະເຢໂຫວາ.+
3 ຈາກນັ້ນ ໂຢສີຢາບອກພວກເລວີທີ່ເປັນຄົນບໍລິສຸດສຳລັບພະເຢໂຫວາແລະເປັນຜູ້ສອນພວກອິດສະຣາເອນ+ວ່າ: “ເອົາຫີບສັນຍາທີ່ບໍລິສຸດໄປໄວ້ໃນວິຫານທີ່ໂຊໂລໂມນລູກຊາຍຂອງດາວິດກະສັດຂອງອິດສະຣາເອນໄດ້ສ້າງ.+ ພວກເຈົ້າບໍ່ຕ້ອງຫາມຫີບນັ້ນອີກແລ້ວ.+ ຕອນນີ້ໃຫ້ພວກເຈົ້າຮັບໃຊ້ພະເຢໂຫວາພະເຈົ້າຂອງພວກເຈົ້າແລະຮັບໃຊ້ພວກອິດສະຣາເອນປະຊາຊົນຂອງເພິ່ນ.
4 ໃຫ້ພວກເຈົ້າກຽມໂຕເພື່ອເຮັດໜ້າທີ່ຕາມຈຸ້ມເຈື້ອຂອງໂຕເອງຄືກັບທີ່ດາວິດ+ກະສັດຂອງອິດສະຣາເອນແລະໂຊໂລໂມນ+ລູກຊາຍຂອງລາວໄດ້ຂຽນໄວ້.
5 ໃຫ້ພວກເຈົ້າໄປຢືນຢູ່ບ່ອນບໍລິສຸດຕາມຈຸ້ມເຈື້ອຂອງໂຕເອງ ແລະໃນແຕ່ລະກຸ່ມໃຫ້ມີຄອບຄົວຄົນເລວີຊ່ວຍເຂົາເຈົ້າ.
6 ໃຫ້ພວກເຈົ້າຂ້າສັດເພື່ອໃຊ້ເປັນເຄື່ອງບູຊາສຳລັບປັດສະຄາ+ ເຮັດໃຫ້ໂຕເອງສະອາດ* ແລະໃຫ້ພວກເຈົ້າກຽມພ້ອມເພື່ອຊ່ວຍພີ່ນ້ອງຂອງພວກເຈົ້າໃຫ້ເຮັດຕາມທີ່ພະເຢໂຫວາສັ່ງໄວ້ຜ່ານທາງໂມເຊ.”
7 ໂຢສີຢາໄດ້ເອົາແກະນ້ອຍໂຕຜູ້ກັບແບ້ນ້ອຍໂຕຜູ້ 30.000 ໂຕໃຫ້ປະຊາຊົນທີ່ຢູ່ຫັ້ນເພື່ອໃຊ້ເປັນເຄື່ອງບູຊາສຳລັບປັດສະຄາ ແລະລາວຍັງໄດ້ເອົາງົວໃຫ້ເຂົາເຈົ້າອີກ 3.000 ໂຕ. ທັງໝົດນີ້ມາຈາກຝູງສັດຂອງກະສັດ.+
8 ພວກເຈົ້ານາຍຍັງໄດ້ບໍລິຈາກສິ່ງທີ່ຈະໃຊ້ເປັນເຄື່ອງບູຊາທີ່ໃຫ້ດ້ວຍຄວາມສະໝັກໃຈໃຫ້ປະຊາຊົນ ພວກປະໂລຫິດ ແລະພວກເລວີ. ຮິນກີຢາ+ ເຊຄາຣີຢາ ແລະເຢຮີເອນທີ່ເປັນຜູ້ເບິ່ງແຍງວິຫານຂອງພະເຈົ້າທ່ຽງແທ້ໄດ້ເອົາສັດ 2.600 ໂຕໃຫ້ພວກປະໂລຫິດເພື່ອໃຊ້ເປັນເຄື່ອງບູຊາສຳລັບປັດສະຄາແລະຍັງໄດ້ເອົາງົວໃຫ້ເຂົາເຈົ້າອີກ 300 ໂຕ.
9 ໂກນານີຢາກັບພວກນ້ອງຊາຍຂອງລາວທີ່ຊື່ເຊມາຢາ ເນທາເນນ ລວມທັງຮາຊາບີຢາ ເຢອີເອນ ແລະໂຢຊາບັດທີ່ເປັນຫົວໜ້າຂອງຄົນເລວີໄດ້ເອົາສັດ 5.000 ໂຕເພື່ອໃຊ້ເປັນເຄື່ອງບູຊາສຳລັບປັດສະຄາໃຫ້ພວກເລວີແລະຍັງໄດ້ເອົາງົວໃຫ້ເຂົາເຈົ້າອີກ 500 ໂຕ.
10 ເມື່ອກຽມທຸກຢ່າງແລ້ວໆ ພວກປະໂລຫິດກໍຢືນຢູ່ບ່ອນຂອງເຂົາເຈົ້າແລະພວກເລວີກໍຢືນຢູ່ກຸ່ມຂອງໂຕເອງ+ຕາມທີ່ກະສັດສັ່ງ.
11 ເຂົາເຈົ້າຂ້າສັດເພື່ອໃຊ້ເປັນເຄື່ອງບູຊາສຳລັບປັດສະຄາ+ ແລ້ວພວກປະໂລຫິດໄດ້ເອົາເລືອດຂອງສັດຈາກເຂົາເຈົ້າໄປຊິດໃສ່ແທ່ນບູຊາ+ ສ່ວນພວກເລວີກໍລອກໜັງສັດ.+
12 ຈາກນັ້ນ ພວກເລວີໄດ້ກຽມເຄື່ອງບູຊາເຜົາເພື່ອຢາຍໃຫ້ປະຊາຊົນຕາມຈຸ້ມເຈື້ອຂອງເຂົາເຈົ້າ. ແລ້ວປະຊາຊົນກໍເອົາເຄື່ອງບູຊານັ້ນໄປໃຫ້ປະໂລຫິດເພື່ອເຜົາໃຫ້ພະເຢໂຫວາຕາມທີ່ຂຽນໄວ້ໃນກົດໝາຍຂອງໂມເຊ. ເຂົາເຈົ້າເຮັດແບບດຽວກັນກັບງົວທັງໝົດ.
13 ເຂົາເຈົ້າເອົາເຄື່ອງບູຊາສຳລັບປັດສະຄາໄປປີ້ງຕາມທີ່ຂຽນໄວ້ໃນກົດໝາຍ+ ແລະເອົາເຄື່ອງບູຊາທີ່ບໍລິສຸດໄປຕົ້ມໃນໝໍ້ແລະໝໍ້ຂາງ. ຈາກນັ້ນ ເຂົາເຈົ້າກໍຟ້າວເອົາໄປຢາຍໃຫ້ປະຊາຊົນ.
14 ສຸດທ້າຍ ພວກເລວີກໍກຽມສັດສຳລັບໂຕເອງແລະສຳລັບພວກປະໂລຫິດເພື່ອເຜົາເປັນເຄື່ອງບູຊາແລະເພື່ອກິນ. ພວກເລວີເຮັດແບບນີ້ກໍຍ້ອນວ່າພວກປະໂລຫິດທີ່ເປັນລູກຫຼານຂອງອາໂຣນຕ້ອງເຜົາເຄື່ອງບູຊາກັບນ້ຳມັນຈົນຮອດຄ່ຳ.
15 ພວກນັກຮ້ອງທີ່ເປັນລູກຫຼານຂອງອາສັບ+ກໍຢືນຢູ່ບ່ອນຂອງໂຕເອງຕາມທີ່ດາວິດ+ ອາສັບ+ ເຮມານ ແລະເຢດູທູນ+ທີ່ເປັນຜູ້ພະຍາກອນໃຫ້ກະສັດ*ໄດ້ສັ່ງໄວ້. ຄົນຍາມປະຕູກໍຢືນຢູ່ຕາມປະຕູຕ່າງໆ.+ ເຂົາເຈົ້າບໍ່ຕ້ອງປະວຽກຂອງໂຕເອງ ເພາະວ່າພວກເລວີທີ່ເປັນພີ່ນ້ອງຂອງເຂົາເຈົ້າໄດ້ກຽມສຳລັບເຂົາເຈົ້າແລ້ວ.
16 ໃນມື້ນັ້ນ ເຂົາເຈົ້າໄດ້ສະຫຼອງປັດສະຄາໃຫ້ພະເຢໂຫວາ+ ແລະເຜົາເຄື່ອງບູຊາເຜົາຢູ່ແທ່ນບູຊາຂອງພະເຢໂຫວາຕາມທີ່ກະສັດໂຢສີຢາສັ່ງ.+
17 ໃນຕອນນັ້ນ ພວກອິດສະຣາເອນທີ່ລວມກັນຢູ່ເມືອງເຢຣູຊາເລັມໄດ້ສະຫຼອງປັດສະຄາ. ຫຼັງຈາກນັ້ນ ເຂົາເຈົ້າກໍສະຫຼອງເທດສະການກິນເຂົ້າຈີ່ບໍ່ມີເຊື້ອອີກ 7 ມື້.+
18 ນັບຕັ້ງແຕ່ສະໄໝຂອງຜູ້ພະຍາກອນຊາມູເອນກໍບໍ່ເຄີຍມີການສະຫຼອງການປັດສະຄາແບບນີ້ໃນອິດສະຣາເອນເລີຍ. ບໍ່ມີກະສັດອິດສະຣາເອນອົງໃດທີ່ຈັດການສະຫຼອງປັດສະຄານຳກັນກັບພວກປະໂລຫິດ ພວກເລວີ ພວກຢູດາ ພວກອິດສະຣາເອນທີ່ມາເມືອງເຢຣູຊາເລັມແລະຄົນໃນເມືອງເຢຣູຊາເລັມຄືກັບທີ່ໂຢສີຢາໄດ້ເຮັດ.+
19 ການສະຫຼອງປັດສະຄາເທື່ອນີ້ຈັດໃນປີທີ 18 ທີ່ໂຢສີຢາປົກຄອງ.
20 ຫຼັງຈາກສະຫຼອງປັດສະຄາແລ້ວໆ ໂຢສີຢາກໍແປງວິຫານ. ເມື່ອແປງວິຫານແລ້ວໆ ເນໂກ+ກະສັດຂອງເອຢິບໄດ້ມາຕໍ່ສູ້ຢູ່ເມືອງກາເກມິດໃກ້ກັບແມ່ນ້ຳເອິຟາຣາດ. ໂຢສີຢາຈຶ່ງອອກໄປຕໍ່ສູ້ກັບລາວ.+
21 ກະສັດເນໂກຈຶ່ງໃຫ້ຄົນໄປບອກໂຢສີຢາວ່າ: “ກະສັດຢູດາ ເປັນຫຍັງເຈົ້າຈຶ່ງມາຕໍ່ສູ້ຂ້ອຍ? ຂ້ອຍບໍ່ໄດ້ມາຕໍ່ສູ້ເຈົ້າ ແຕ່ຂ້ອຍກຳລັງຈະໄປຕໍ່ສູ້ກັບປະເທດອື່ນ. ພະເຈົ້າບອກໃຫ້ຂ້ອຍຟ້າວໄປ. ເຈົ້າຢ່າມາຂັດຂວາງພະເຈົ້າ ຍ້ອນວ່າເພິ່ນຢູ່ນຳຂ້ອຍ. ຄັນບໍ່ຊັ້ນ ເພິ່ນຈະທຳລາຍເຈົ້າ.”
22 ໂຢສີຢາບໍ່ຍອມກັບເມືອ ແຕ່ລາວປອມໂຕໄປ+ຕໍ່ສູ້ກັບເນໂກ. ລາວບໍ່ຟັງສິ່ງທີ່ເນໂກເວົ້າເຊິ່ງມາຈາກພະເຈົ້າ. ໂຢສີຢາໄປຕໍ່ສູ້ຢູ່ທົ່ງພຽງເມກິດໂດ.+
23 ພວກທະຫານຍິງທະນູຖືກກະສັດໂຢສີຢາ. ລາວຈຶ່ງບອກພວກທະຫານຂອງລາວວ່າ: “ຂ້ອຍບາດເຈັບໜັກຫຼາຍ ພາຂ້ອຍອອກໄປຈາກບ່ອນນີ້.”
24 ພວກທະຫານຈຶ່ງພາໂຢສີຢາລົງຈາກລົດຮົບຄັນທີ່ລາວຢູ່ ແລ້ວພາໄປຂຶ້ນລົດຮົບອີກຄັນໜຶ່ງເພື່ອພາລາວກັບເມືອເມືອງເຢຣູຊາເລັມ. ຕໍ່ມາໂຢສີຢາກໍຕາຍ ແລະເຂົາເຈົ້າຝັງລາວໄວ້ກັບປູ່ຍ່າຕານາຍຂອງລາວ.+ ຄົນຢູດາແລະຄົນໃນເມືອງເຢຣູຊາເລັມໄດ້ໄວ້ທຸກໃຫ້ລາວ.
25 ເຢເຣມີຢາ+ຮ້ອງເພງໄວ້ທຸກໃຫ້ໂຢສີຢາ ແລະພວກນັກຮ້ອງທຸກຄົນທັງຜູ້ຊາຍຜູ້ຍິງ+ກໍຮ້ອງເພງໄວ້ທຸກໃຫ້ໂຢສີຢາຈົນຮອດທຸກມື້ນີ້. ມີຄຳສັ່ງໃຫ້ຮ້ອງເພງເຫຼົ່ານີ້ໃນອິດສະຣາເອນ ແລະເພງເຫຼົ່ານີ້ກໍຖືກເອົາມາໃສ່ໄວ້ໃນປຶ້ມເພງໄວ້ທຸກ.
26 ເລື່ອງຕ່າງໆຂອງໂຢສີຢາ ສິ່ງທີ່ລາວເຮັດດ້ວຍຄວາມຮັກທີ່ໝັ້ນຄົງ ສິ່ງທີ່ລາວເຮັດຕາມທີ່ຂຽນໄວ້ໃນກົດໝາຍຂອງພະເຢໂຫວາ
27 ແລະສິ່ງອື່ນໆທັງໝົດທີ່ລາວເຮັດຕັ້ງແຕ່ຕົ້ນຈົນຈົບກໍຂຽນໄວ້ໃນປຶ້ມຂອງພວກກະສັດອິດສະຣາເອນແລະພວກກະສັດຢູດາ.+
ຂໍ ຄວາມ ໄຂ ເງື່ອນ
^ ໝາຍເຖິງເຮັດໃຫ້ພະເຈົ້າຍອມຮັບ ແລະບໍ່ໄດ້ໝາຍເຖິງສະອາດໂດຍການອາບນ້ຳ
^ ແປຕາມໂຕວ່າ “ຜູ້ອະທິບາຍນິມິດໃຫ້ກະສັດ”