ຊາມູເອນສະບັບທີສອງ 10:1-19
-
ຕໍ່ສູ້ຊະນະພວກອຳໂມນແລະພວກຊີເຣຍ (1-19)
10 ຕໍ່ມາ ກະສັດຂອງອຳໂມນ+ກໍຕາຍ ແລະຮານຸນລູກຊາຍຂອງລາວໄດ້ເປັນກະສັດແທນ.+
2 ເມື່ອດາວິດຮູ້ເລື່ອງນີ້ ລາວກໍເວົ້າວ່າ: “ຂ້ອຍຢາກເຮັດດີ*ຕໍ່ຮານຸນຄືກັບທີ່ນາຮາດພໍ່ຂອງລາວໄດ້ເຮັດດີຕໍ່ຂ້ອຍ.” ດາວິດຈຶ່ງສົ່ງຄົນໄປຫາຮານຸນເພື່ອສະແດງຄວາມເສຍໃຈທີ່ພໍ່ຂອງລາວຕາຍ. ແຕ່ເມື່ອຄົນຂອງດາວິດໄປຮອດແຜ່ນດິນຂອງພວກອຳໂມນ
3 ພວກເຈົ້ານາຍຂອງຄົນອຳໂມນເວົ້າກັບຮານຸນວ່າ: “ທ່ານຄິດວ່າດາວິດໃຫ້ກຽດພໍ່ທ່ານໂດຍສົ່ງຄົນມາສະແດງຄວາມເສຍໃຈນຳທ່ານບໍ? ດາວິດສົ່ງຄົນມາສອດແນມເພື່ອຈະຮູ້ການເຄື່ອນໄຫວຂອງທ່ານແລະເພື່ອຈະໂຈມຕີເມືອງນີ້ຫັ້ນຕິ.”
4 ຮານຸນຈຶ່ງຈັບຄົນຂອງດາວິດໄປແຖໜວດແຖເຄົາອອກເຄິ່ງໜຶ່ງ+ ແລະຕັດເຄື່ອງນຸ່ງຂອງເຂົາເຈົ້າຈົນຮອດແອວໃຫ້ເຫັນກົ້ນ ແລ້ວໃຫ້ເຂົາເຈົ້າກັບເມືອ.
5 ເມື່ອດາວິດຮູ້ເລື່ອງນີ້ ລາວຈຶ່ງສົ່ງຄົນໄປຫາເຂົາເຈົ້າທັນທີຍ້ອນເຂົາເຈົ້າອາຍຫຼາຍ. ກະສັດດາວິດບອກວ່າ: “ໃຫ້ຢູ່ເມືອງເຢຣິໂກ+ຈົນໜວດຈົນເຄົາປົ່ງ ແລ້ວຈຶ່ງກັບມາ.”
6 ເມື່ອພວກອຳໂມນຮູ້ວ່າດາວິດຊັງເຂົາເຈົ້າແລ້ວ ເຂົາເຈົ້າຈຶ່ງສົ່ງຄົນໄປຈ້າງທະຫານຊີເຣຍ 20.000 ຄົນຈາກເມືອງເບັດເຣໂຮບ+ແລະຈາກໂຊບາ+ ແລະຈ້າງກະສັດຂອງມາອາກາ+ກັບທະຫານຂອງລາວ 1.000 ຄົນ ແລະຈ້າງທະຫານຈາກເມືອງອິດສະໂຕບ*ອີກ 12.000 ຄົນ.+
7 ເມື່ອດາວິດຮູ້ເລື່ອງນີ້ ລາວກໍສົ່ງໂຢອາບແລະກອງທັບທັງໝົດພ້ອມທັງທະຫານທີ່ເກັ່ງທີ່ສຸດໄປ.+
8 ພວກອຳໂມນຕັ້ງກອງທັບຢູ່ທາງເຂົ້າປະຕູເມືອງຂອງເຂົາເຈົ້າ ສ່ວນພວກຊີເຣຍຈາກໂຊບາແລະເມືອງເຣໂຮບພ້ອມທັງພວກທະຫານຈາກອິດສະໂຕບແລະມາອາກາກໍໄປຕັ້ງກອງທັບຢູ່ທົ່ງຫຍ້າ.
9 ເມື່ອໂຢອາບເຫັນວ່າກອງທັບຂອງພວກສັດຕູກຳລັງຫຍັບໃກ້ເຂົ້າມາທັງທາງໜ້າແລະທາງຫຼັງ ລາວຈຶ່ງເລືອກເອົາກອງທະຫານອິດສະຣາເອນທີ່ເກັ່ງທີ່ສຸດຈຳນວນໜຶ່ງອອກໄປຕໍ່ສູ້ກັບພວກຊີເຣຍ.+
10 ສ່ວນພວກທະຫານທີ່ເຫຼືອ ໂຢອາບໃຫ້ອາບີຊາຍ+ອ້າຍຂອງລາວເປັນຜູ້ພາອອກໄປຕໍ່ສູ້ກັບພວກອຳໂມນ.+
11 ໂຢອາບບອກວ່າ: “ຖ້າຂ້ອຍສູ້ພວກຊີເຣຍບໍ່ໄຫວ ໃຫ້ເຈົ້າມາຊ່ວຍຂ້ອຍ. ແຕ່ຖ້າເຈົ້າສູ້ພວກອຳໂມນບໍ່ໄຫວ ຂ້ອຍຈະໄປຊ່ວຍເຈົ້າ.
12 ພວກເຮົາຕ້ອງເຂັ້ມແຂງແລະກ້າຫານ+ເພື່ອປະຊາຊົນຂອງພວກເຮົາແລະເພື່ອເມືອງຕ່າງໆຂອງພະເຈົ້າຂອງພວກເຮົາ. ແລ້ວພະເຢໂຫວາຈະເຮັດສ່ວນຂອງເພິ່ນ.”+
13 ຈາກນັ້ນ ໂຢອາບກັບຄົນຂອງລາວກໍໄປຕໍ່ສູ້ກັບພວກຊີເຣຍ. ພວກຊີເຣຍສູ້ບໍ່ໄດ້ຈຶ່ງພາກັນແຕກໜີ.+
14 ເມື່ອພວກອຳໂມນເຫັນວ່າພວກຊີເຣຍແລ່ນໜີ ເຂົາເຈົ້າກໍແລ່ນໜີຈາກອາບີຊາຍແລະເຂົ້າໄປໃນເມືອງຂອງໂຕເອງ. ແລ້ວໂຢອາບກໍເຊົາຕໍ່ສູ້ກັບພວກອຳໂມນແລະກັບເມືອເມືອງເຢຣູຊາເລັມ.
15 ເມື່ອພວກຊີເຣຍເຫັນວ່າພວກອິດສະຣາເອນຊະນະ ເຂົາເຈົ້າຈຶ່ງຈັດກອງທະຫານໃໝ່.+
16 ຮາດາເດເຊ+ສົ່ງຄົນໄປເອີ້ນພວກທະຫານຊີເຣຍທີ່ຢູ່ແຖວແມ່ນ້ຳ*+ ແລ້ວພວກນັ້ນກໍມາເຮລາມ. ໂຊບາກ*ຫົວໜ້າກອງທັບຂອງຮາດາເດເຊເປັນຜູ້ພາກອງທັບນັ້ນມາ.
17 ເມື່ອມີຄົນໄປບອກດາວິດ ລາວກໍຟ້າວລວບລວມທະຫານອິດສະຣາເອນທັງໝົດແລ້ວຂ້າມແມ່ນ້ຳຈໍແດນໄປເຮລາມ. ຈາກນັ້ນ ພວກຊີເຣຍກໍຍົກກອງທັບມາຕໍ່ສູ້ກັບດາວິດ.+
18 ແຕ່ພວກຊີເຣຍບໍ່ຊະນະພວກອິດສະຣາເອນ ເຂົາເຈົ້າຈຶ່ງໜີໄປ. ດາວິດຂ້າຄົນຂັບລົດຮົບ 700 ຄົນກັບທະຫານມ້າຂອງພວກຊີເຣຍ 40.000 ຄົນ ແລະລາວຍັງໄດ້ຂ້າໂຊບາກຫົວໜ້າກອງທັບຂອງເຂົາເຈົ້າຕາຍ.+
19 ເມື່ອກະສັດທຸກອົງທີ່ຂຶ້ນກັບຮາດາເດເຊເຫັນວ່າພວກອິດສະຣາເອນຊະນະແລ້ວ ເຂົາເຈົ້າຈຶ່ງຟ້າວເຮັດສັນຍາຂໍສະຫງົບເສິກກັບພວກອິດສະຣາເອນແລະຍອມເປັນຫົວເມືອງຂຶ້ນ.+ ຫຼັງຈາກນັ້ນ ພວກຊີເຣຍກໍບໍ່ກ້າກັບມາຊ່ວຍພວກອຳໂມນອີກເລີຍ.