ຊາມູເອນສະບັບທີສອງ 20:1-26
20 ມີຜູ້ຊາຍຄົນໜຶ່ງມາກໍ່ຄວາມວຸ່ນວາຍ. ລາວຊື່ເຊບາ+ເປັນລູກຊາຍຂອງບິກຣີຄົນເບັນຢາມິນ. ລາວເປົ່າແກເຂົາສັດ+ແລະປະກາດວ່າ: “ພວກເຮົາບໍ່ໄດ້ມີສ່ວນກ່ຽວຂ້ອງຫຍັງກັບດາວິດ ແລະພວກເຮົາຈະບໍ່ໄດ້ຮັບມໍລະດົກຫຍັງຈາກລູກຊາຍຂອງເຢຊີ.+ ພວກອິດສະຣາເອນທຸກຄົນ ໃຫ້ພວກເຮົາກັບໄປນະມັດສະການພະຂອງພວກເຮົາ!”
2 ພວກອິດສະຣາເອນທຸກຄົນຈຶ່ງເຊົາຕິດຕາມດາວິດ ແລ້ວໄປຕິດຕາມເຊບາລູກຊາຍຂອງບິກຣີ+ແທນ. ແຕ່ພວກຢູດາທີ່ຢູ່ແຖວແມ່ນ້ຳຈໍແດນຈົນຮອດເມືອງເຢຣູຊາເລັມຍັງໃຫ້ດາວິດເປັນກະສັດຂອງເຂົາເຈົ້າ.+
3 ເມື່ອດາວິດກັບມາວັງຂອງລາວທີ່ຢູ່ເມືອງເຢຣູຊາເລັມ+ ລາວໄດ້ເອົາເມຍນ້ອຍ* 10 ຄົນທີ່ລາວປະໄວ້ໃຫ້ເຝົ້າວັງ+ຍ້າຍໄປຢູ່ເຮືອນອີກຫຼັງໜຶ່ງ ແລ້ວໃຫ້ທະຫານໄປຍາມເຮືອນນັ້ນໄວ້. ລາວສົ່ງຂອງຢູ່ຂອງກິນໄປໃຫ້ ແຕ່ບໍ່ໄດ້ນອນນຳເຂົາເຈົ້າ.+ ພວກເມຍນ້ອຍຖືກກັກໄວ້ໃນເຮືອນນັ້ນຈົນຮອດມື້ຕາຍ. ເຂົາເຈົ້າໃຊ້ຊີວິດຄືກັບແມ່ໝ້າຍທັງໆທີ່ຜົວຍັງບໍ່ຕາຍ.
4 ແລ້ວກະສັດກໍສັ່ງອາມາສາ+ວ່າ: “ໃຫ້ເອີ້ນພວກທະຫານຢູດາມາລວມກັນຢູ່ນີ້ພາຍໃນ 3 ມື້ ແລ້ວເຈົ້າກໍມານຳ.”
5 ອາມາສາຈຶ່ງໄປເອີ້ນພວກທະຫານຢູດາມາລວມກັນ. ແຕ່ລາວບໍ່ໄດ້ມາຕາມເວລາທີ່ກະສັດກຳນົດໄວ້.
6 ດາວິດຈຶ່ງບອກອາບີຊາຍ+ວ່າ: “ເຊບາ+ລູກຊາຍຂອງບິກຣີອາດເຮັດໃຫ້ເຮົາເດືອດຮ້ອນຫຼາຍກວ່າອັບຊາໂລມອີກ.+ ໃຫ້ເຈົ້າເອົາທະຫານຂອງຂ້ອຍໄປໄລ່ລ່າເຊບາ ເພາະຂ້ອຍບໍ່ຢາກໃຫ້ລາວໜີເຂົ້າໄປໃນເມືອງທີ່ມີກຳແພງ ແລ້ວພວກເຮົາຊິຈັບລາວບໍ່ໄດ້.”
7 ພວກທະຫານຂອງໂຢອາບ+ ພວກເກເຣັດ ພວກເປເລດ+ ແລະພວກທະຫານທີ່ເກັ່ງໆທຸກຄົນຈຶ່ງອອກຈາກເຢຣູຊາເລັມໄປໄລ່ລ່າເຊບາລູກຊາຍຂອງບິກຣີ.
8 ເມື່ອເຂົາເຈົ້າຢູ່ໃກ້ແຖວໂງ່ນຫີນໃຫຍ່ໃນກິເບໂອນ+ ອາມາສາ+ກໍມາເຈິເຂົາເຈົ້າຢູ່ຫັ້ນ. ໂຢອາບໃສ່ຊຸດຮົບແລະເອົາດາບໃສ່ຝັກຫ້ອຍໄວ້ຢູ່ແອວ. ເມື່ອລາວຍ່າງໄປຫາອາມາສາ ລາວກໍເຮັດດາບຕົກ.
9 ໂຢອາບເວົ້າກັບອາມາສາວ່າ: “ເຈົ້າເປັນແນວໃດ?” ແລ້ວໂຢອາບກໍເດ່ມືເບື້ອງຂວາໄປຈັບໜວດຂອງອາມາສາແລະເຮັດທຳທ່າຄືຊິຈູບລາວ.
10 ໂຢອາບຈັບດາບຢູ່ ແຕ່ອາມາສາບໍ່ໄດ້ລະວັງໂຕ. ແລ້ວໂຢອາບກໍເອົາດາບແທງທ້ອງອາມາສາເຂົ້າບັກເລິກໆ+ຈົນໄສ້ລາວໂລ່ອອກມາກອງຢູ່ພື້ນ. ໂຢອາບແທງແຕ່ເທື່ອດຽວອາມາສາກໍຕາຍ. ຈາກນັ້ນ ໂຢອາບແລະອາບີຊາຍອ້າຍຂອງລາວກໍໄປໄລ່ລ່າເຊບາລູກຊາຍຂອງບິກຣີຕໍ່.
11 ທະຫານຜູ້ໜຶ່ງຂອງໂຢອາບໄດ້ໄປຢືນຢູ່ທາງຂ້າງອາມາສາແລະເວົ້າວ່າ: “ຜູ້ທີ່ຢູ່ຝ່າຍໂຢອາບແລະດາວິດ ໃຫ້ນຳໂຢອາບໄປ!”
12 ອາມາສານອນຟູມຢູ່ກອງເລືອດຂອງໂຕເອງຢູ່ກາງທາງ. ເມື່ອທະຫານຄົນນັ້ນເຫັນວ່າທຸກຄົນໄດ້ຢຸດແລະແນມເບິ່ງ ລາວຈຶ່ງເອົາສົບຂອງອາມາສາໄປໄວ້ຢູ່ທົ່ງຫຍ້າ ແລ້ວເອົາຜ້າປົກໄວ້ເພື່ອໃຫ້ຄົນເຊົາແນມເບິ່ງ.
13 ຫຼັງຈາກທະຫານຄົນນັ້ນເອົາສົບອອກຈາກຫົນທາງແລ້ວ ທະຫານທຸກຄົນກໍນຳໂຢອາບໄປໄລ່ລ່າເຊບາ+ລູກຊາຍຂອງບິກຣີ.
14 ເຊບາແລ່ນໜີຜ່ານເຂດແດນຂອງທຸກຕະກູນຂອງອິດສະຣາເອນເພື່ອໄປເມືອງອາເບັນໃນເບັດມາອະກາ.+ ພວກບິກຣີໄດ້ມາລວມກັນ ແລ້ວກໍເຂົ້າໄປເມືອງນັ້ນນຳຫຼັງເຊບາ.
15 ໂຢອາບແລະທະຫານຂອງລາວໄດ້ລ້ອມເມືອງອາເບັນໃນເບັດມາອະກາເພື່ອຈັບເຊບາ. ເຂົາເຈົ້າເອົາດິນມາກອງກັນໃຫ້ເປັນໂນນຈຸກຳແພງເມືອງເພື່ອຈະໂຈມຕີເມືອງໄດ້. ພວກທະຫານຂອງໂຢອາບຍັງໄດ້ຂຸດດິນຢູ່ກ້ອງກຳແພງນຳເພື່ອຈະໃຫ້ກຳແພງລົ້ມລົງ.
16 ມີຜູ້ຍິງທີ່ສະຫຼາດຄົນໜຶ່ງໄປຢືນຢູ່ເທິງກຳແພງເມືອງແລະຮ້ອງໃສ່ພວກທະຫານວ່າ: “ພວກເຈົ້າ ພວກເຈົ້າ ຟັງເດີ້! ໄປບອກໂຢອາບມາຫາຂ້ອຍໄດ້ບໍ່? ຂ້ອຍຢາກລົມກັບລາວ.”
17 ແລ້ວໂຢອາບກໍມາຫາຜູ້ຍິງຄົນນັ້ນ. ລາວຖາມວ່າ: “ເຈົ້າແມ່ນໂຢອາບບໍ?” ໂຢອາບຕອບວ່າ: “ແມ່ນແລ້ວ.” ຜູ້ຍິງຄົນນັ້ນເວົ້າກັບໂຢອາບວ່າ: “ຂໍໃຫ້ທ່ານຟັງສິ່ງທີ່ຂ້ອຍຈະເວົ້າ.” ໂຢອາບບອກວ່າ: “ເວົ້າແມ້.”
18 ຜູ້ຍິງຄົນນັ້ນເວົ້າວ່າ: “ແຕ່ກີ້ມີຄຳເວົ້າທີ່ວ່າ ‘ຖ້າມີເລື່ອງຫຍັງກໍໃຫ້ໄປຖາມຢູ່ເມືອງອາເບັນ’ ແລ້ວຈະແກ້ໄຂໄດ້.
19 ຂ້ອຍເປັນຕົວແທນຂອງຄົນໃນເມືອງນີ້ທີ່ຮັກຄວາມສະຫງົບແລະສັດຊື່ຕໍ່ກະສັດຂອງອິດສະຣາເອນ. ເຈົ້າກຳລັງພະຍາຍາມທຳລາຍເມືອງໜຶ່ງທີ່ສຳຄັນໃນອິດສະຣາເອນ. ເປັນຫຍັງເຈົ້າຢາກທຳລາຍເມືອງ*ທີ່ເປັນຂອງພະເຢໂຫວາ?”+
20 ໂຢອາບຕອບວ່າ: “ຂ້ອຍບໍ່ຢາກທຳລາຍເມືອງນີ້ດອກ.
21 ຂ້ອຍເຮັດແບບນີ້ກໍຍ້ອນວ່າຜູ້ຊາຍຄົນໜຶ່ງຊື່ເຊບາ+ລູກຊາຍຂອງບິກຣີຈາກແຖວພູໃນເຂດເອຟຣາຢິມ+ໄດ້ກະບົດຕໍ່ກະສັດດາວິດແລະໜີມາລີ້ຢູ່ນີ້. ຖ້າເຈົ້າມອບລາວໃຫ້ຂ້ອຍ ຂ້ອຍຈະຖອຍອອກຈາກເມືອງນີ້.” ຜູ້ຍິງຄົນນັ້ນບອກໂຢອາບວ່າ: “ກະໄດ້. ພວກເຮົາຈະໂຍນຫົວລາວຂ້າມກຳແພງໄປໃຫ້ເຈົ້າ!”
22 ຜູ້ຍິງທີ່ສະຫຼາດຄົນນັ້ນໄປບອກຄົນໃນເມືອງທັນທີ. ເຂົາເຈົ້າໄດ້ຕັດຫົວເຊບາລູກຊາຍຂອງບິກຣີແລ້ວໂຍນຂ້າມກຳແພງໄປໃຫ້ໂຢອາບ. ໂຢອາບຈຶ່ງເປົ່າແກເຂົາສັດ ແລ້ວພວກທະຫານກໍຖອຍອອກຈາກເມືອງແລະກັບເມືອເຮືອນຂອງໂຕເອງ.+ ສ່ວນໂຢອາບກໍກັບໄປຫາກະສັດຢູ່ເມືອງເຢຣູຊາເລັມ.
23 ໂຢອາບໄດ້ເປັນຫົວໜ້າກອງທັບທັງໝົດຂອງອິດສະຣາເອນ.+ ເບນາຢາ+ລູກຊາຍຂອງເຢໂຮຢາດາ+ເປັນຫົວໜ້າພວກເກເຣັດແລະພວກເປເລດ.*+
24 ອາໂດຣາມ+ເປັນຫົວໜ້າພວກກຳມະກອນ. ເຢໂຮຊາຟັດ+ລູກຊາຍຂອງອາຮີລຸດເປັນຜູ້ຈົດບັນທຶກໃຫ້ກະສັດ.
25 ເຊວາເປັນເລຂາຂອງກະສັດ. ຊາໂດກ+ກັບອາບີອາທາ+ເປັນປະໂລຫິດ
26 ແລະອີຣາຄົນຢາອີເປັນຫົວໜ້າລະດັບສູງຂອງດາວິດ.
ຂໍ ຄວາມ ໄຂ ເງື່ອນ
^ ເບິ່ງສ່ວນອະທິບາຍຄຳສັບ
^ ແປຕາມໂຕວ່າ “ມໍລະດົກ”
^ ໝາຍເຖິງທະຫານປ້ອງກັນໂຕດາວິດ