ຊາມູເອນສະບັບທີສອງ 4:1-12
4 ເມື່ອອິດໂບເຊດ+ລູກຊາຍຂອງຊາອູນໄດ້ຍິນວ່າອັບເນຖືກຂ້າຕາຍຢູ່ເມືອງເຮັບໂຣນ+ ລາວກໍເສຍໃຈຫຼາຍ ແລະພວກອິດສະຣາເອນທຸກຄົນກໍເສຍໃຈຄືກັນ.
2 ອິດໂບເຊດລູກຊາຍຂອງຊາອູນມີຫົວໜ້າກຸ່ມໂຈນ 2 ຄົນ. ຜູ້ໜຶ່ງຊື່ບາອານ້າແລະອີກຜູ້ໜຶ່ງຊື່ເຣກາບ. ເຂົາເຈົ້າເປັນລູກຂອງຣິມໂມນຄົນເບເອໂຣດໃນຕະກູນເບັນຢາມິນ. (ເມືອງເບເອໂຣດ+ເຄີຍເປັນສ່ວນໜຶ່ງຂອງຕະກູນເບັນຢາມິນ.
3 ແຕ່ຄົນເບເອໂຣດໜີໄປກິດຕາຢິມ+ແລະຢູ່ຫັ້ນຈົນຮອດທຸກມື້ນີ້.)
4 ໂຢນາທານ+ລູກຊາຍຂອງຊາອູນມີລູກຊາຍຜູ້ໜຶ່ງຊື່ເມຟີໂບເຊັດ.+ ຕີນລາວເປັນລ່ອຍ.+ ຕອນເມຟີໂບເຊັດອາຍຸ 5 ປີ ມີຂ່າວຈາກເມືອງເຢດຊະເຣເອນ+ວ່າຊາອູນກັບໂຢນາທານຕາຍແລ້ວ. ເອື້ອຍລ້ຽງຂອງເມຟີໂບເຊັດຕົກໃຈຫຼາຍຈຶ່ງຟ້າວອູ້ມລາວແລ່ນໜີແລະເຮັດລາວຫຼຸດມື ເມຟີໂບເຊັດກໍເລີຍເປັນລ່ອຍ.
5 ເຣກາບແລະບາອານ້າລູກຊາຍຂອງຣິມໂມນຄົນເບເອໂຣດໄດ້ໄປວັງຂອງອິດໂບເຊດຕອນທີ່ອາກາດຮ້ອນຫຼາຍ ແລະອິດໂບເຊດກຳລັງນອນສວາຍຢູ່.
6 ເຣກາບແລະບາອານ້າ+ເຂົ້າໄປໃນວັງ ເຮັດທຳທ່າວ່າຈະໄປເອົາເຂົ້າວີດ* ແຕ່ເຂົາເຈົ້າພັດໄປແທງທ້ອງຂອງອິດໂບເຊດ ແລ້ວກໍໜີໄປ.
7 ຕອນທີ່ເຂົາເຈົ້າເຂົ້າໄປໃນວັງ ອິດໂບເຊດກຳລັງນອນຢູ່ເທິງຕຽງໃນຫ້ອງນອນຂອງລາວ. ເຂົາເຈົ້າຂ້າອິດໂບເຊດແລ້ວຕັດເອົາຫົວລາວໄປ. ເຂົາເຈົ້າຍ່າງໝົດຄືນຕາມທາງໄປອາຣາບາ.
8 ເຂົາເຈົ້າເອົາຫົວຂອງອິດໂບເຊດ+ໄປໃຫ້ກະສັດດາວິດຢູ່ເມືອງເຮັບໂຣນແລະເວົ້າວ່າ: “ນີ້ແມ່ນຫົວຂອງອິດໂບເຊດລູກຊາຍຂອງຊາອູນທີ່ເຄີຍເປັນສັດຕູ+ໄລ່ລ່າຂ້າທ່ານ.+ ມື້ນີ້ພະເຢໂຫວາໄດ້ແກ້ແຄ້ນຊາອູນແລະລູກຫຼານຂອງລາວໃຫ້ກະສັດຜູ້ເປັນນາຍຂອງຂ້ອຍແລ້ວ.”
9 ແຕ່ດາວິດຕອບເຣກາບແລະບາອານ້າລູກຊາຍຂອງຣິມໂມນຄົນເບເອໂຣດວ່າ: “ຂ້ອຍຂໍສາບານຕໍ່ໜ້າພະເຢໂຫວາພະເຈົ້າຜູ້ມີຊີວິດຢູ່ ຜູ້ທີ່ໄດ້ຊ່ວຍ*ຂ້ອຍໃຫ້ພົ້ນຈາກຄວາມລຳບາກທັງໝົດ+ວ່າ
10 ຕອນທີ່ມີຄົນມາບອກຂ້ອຍວ່າ ‘ຊາອູນຕາຍແລ້ວ’+ ລາວຄິດວ່າກຳລັງເອົາຂ່າວດີມາບອກຂ້ອຍ ແຕ່ຂ້ອຍໄດ້ຈັບລາວແລະຂ້າລາວ+ຢູ່ເມືອງຊິກລັກ. ນີ້ແມ່ນລາງວັນທີ່ຂ້ອຍໃຫ້ຜູ້ສົ່ງຂ່າວຄົນນັ້ນ!
11 ພວກຄົນຊົ່ວທີ່ເຂົ້າໄປຂ້າຄົນດີຢູ່ເທິງຕຽງນອນໃນເຮືອນຂອງລາວກໍແຮ່ງຕ້ອງຖືກໂທດໜັກກວ່ານັ້ນອີກ. ຂ້ອຍຄວນລົງໂທດພວກເຈົ້າທີ່ຂ້າອິດໂບເຊດ.+ ພວກເຈົ້າສົມຄວນຕາຍ.”
12 ແລ້ວດາວິດກໍສັ່ງໃຫ້ຄົນຂອງລາວຂ້າເຣກາບແລະບາອານ້າ.+ ເຂົາເຈົ້າຕັດມືຕັດຕີນຂອງ 2 ຄົນນັ້ນແລ້ວເອົາໄປຫ້ອຍໄວ້+ຢູ່ທາງຂ້າງສະນ້ຳໃນເມືອງເຮັບໂຣນ. ແຕ່ເຂົາເຈົ້າເອົາຫົວຂອງອິດໂບເຊດໄປຝັງຢູ່ໃນບ່ອນຝັງສົບຂອງອັບເນໃນເມືອງເຮັບໂຣນ.
