ຊາມູເອນສະບັບທີສອງ 9:1-13
-
ດາວິດເຮັດດີຕໍ່ເມຟີໂບເຊັດ (1-13)
9 ດາວິດຖາມວ່າ: “ໃນຄອບຄົວຂອງຊາອູນຍັງມີໃຜເຫຼືອຢູ່ບໍທີ່ຂ້ອຍຈະເຮັດດີ*ຕໍ່ລາວໄດ້ຕາມທີ່ຂ້ອຍເຄີຍສັນຍາໄວ້ກັບໂຢນາທານ?”+
2 ຕອນນັ້ນມີຜູ້ຊາຍຄົນໜຶ່ງຊື່ຊີບາ+ທີ່ເຄີຍເປັນຄົນຮັບໃຊ້ຂອງຄອບຄົວຊາອູນ. ເຂົາເຈົ້າໄດ້ເອີ້ນຊີບາມາຫາກະສັດດາວິດ ແລະກະສັດຖາມລາວວ່າ: “ເຈົ້າແມ່ນຊີບາບໍ?” ລາວຕອບວ່າ: “ແມ່ນແລ້ວ. ຂ້ອຍແມ່ນຄົນຮັບໃຊ້ຂອງທ່ານ.”
3 ກະສັດຖາມລາວຕໍ່ອີກວ່າ: “ໃນຄອບຄົວຂອງຊາອູນຍັງມີໃຜເຫຼືອຢູ່ບໍທີ່ຂ້ອຍຈະເຮັດດີຕໍ່ລາວຄືກັບທີ່ພະເຈົ້າໄດ້ເຮັດ?” ຊີບາຕອບກະສັດວ່າ: “ຍັງເຫຼືອລູກຊາຍຄົນໜຶ່ງຂອງໂຢນາທານທີ່ຕີນເປັນລ່ອຍທັງສອງເບື້ອງ.”+
4 ກະສັດຈຶ່ງຖາມວ່າ: “ລາວຢູ່ໃສ?” ຊີບາຕອບວ່າ: “ລາວຢູ່ເຮືອນຂອງມາກີ+ລູກຊາຍຂອງອຳມີເອນໃນເມືອງໂລເດບາ.”
5 ກະສັດດາວິດຈຶ່ງຟ້າວສົ່ງຄົນໃຫ້ໄປພາລາວມາທັນທີຈາກເຮືອນຂອງມາກີລູກຊາຍຂອງອຳມີເອນໃນເມືອງໂລເດບາ.
6 ເມື່ອເມຟີໂບເຊັດລູກຊາຍຂອງໂຢນາທານຫຼານຂອງຊາອູນມາຮອດ ລາວກໍຟ້າວໝູບໜ້າລົງເພື່ອສະແດງຄວາມນັບຖືຕໍ່ດາວິດ. ດາວິດເວົ້າວ່າ: “ເມຟີໂບເຊັດ.” ລາວຕອບວ່າ: “ຄົນຮັບໃຊ້ຂອງທ່ານຢູ່ນີ້.”
7 ດາວິດບອກລາວວ່າ: “ບໍ່ຕ້ອງຢ້ານ. ຂ້ອຍຈະເຮັດດີ+ຕໍ່ເຈົ້າຍ້ອນໂຢນາທານພໍ່ຂອງເຈົ້າ. ດິນທັງໝົດທີ່ເປັນຂອງຊາອູນປູ່ຂອງເຈົ້າ ຂ້ອຍຈະສົ່ງຄືນໃຫ້ເຈົ້າ ແລະເຈົ້າຈະນັ່ງກິນເຂົ້ານຳຂ້ອຍທຸກໆມື້.”+
8 ເມຟີໂບເຊັດຈຶ່ງໝູບໜ້າລົງເພື່ອສະແດງຄວາມນັບຖືແລະເວົ້າວ່າ: “ຂ້ອຍເປັນຄືກັບໝາໂຕໜຶ່ງທີ່ຕາຍແລ້ວ.+ ເປັນຫຍັງທ່ານຈຶ່ງຢາກສະແດງຄວາມຮັກຕໍ່ຂ້ອຍຫຼາຍປານນີ້?”
9 ແລ້ວກະສັດດາວິດກໍໃຫ້ຄົນໄປເອີ້ນຊີບາຄົນຮັບໃຊ້ຂອງຊາອູນມາຫາ ແລະບອກຊີບາວ່າ: “ທຸກສິ່ງທຸກຢ່າງທີ່ເຄີຍເປັນຂອງຊາອູນແລະຄອບຄົວຂອງລາວ ຂ້ອຍຈະຍົກໃຫ້ເມຟີໂບເຊັດທັງໝົດເພາະລາວເປັນຫຼານຊາຍຂອງນາຍເຈົ້າ.+
10 ເຈົ້າກັບພວກລູກຊາຍແລະຄົນຮັບໃຊ້ຂອງເຈົ້າຈະເຮັດໄຮ່ເຮັດນາແລະປູກພືດຜັກຢູ່ໃນດິນຂອງເມຟີໂບເຊັດເພື່ອໃຫ້ຄົນໃນຄອບຄົວຂອງລາວກິນ. ແຕ່ເມຟີໂບເຊັດຫຼານຊາຍຂອງນາຍເຈົ້າຈະນັ່ງກິນເຂົ້ານຳຂ້ອຍທຸກໆມື້.”+
ຊີບາມີລູກຊາຍ 15 ຄົນແລະຄົນຮັບໃຊ້ 20 ຄົນ.+
11 ຊີບາເວົ້າກັບກະສັດວ່າ: “ຂ້ອຍຈະເຮັດທຸກສິ່ງຕາມທີ່ກະສັດສັ່ງ.” ນັບຕັ້ງແຕ່ມື້ນັ້ນ ເມຟີໂບເຊັດຈຶ່ງນັ່ງກິນເຂົ້ານຳກະສັດດາວິດທຸກໆມື້ຄືກັບເປັນລູກຊາຍຜູ້ໜຶ່ງຂອງລາວ.
12 ເມຟີໂບເຊັດມີລູກຊາຍທີ່ຍັງນ້ອຍຜູ້ໜຶ່ງຊື່ມິກາ+ ແລະທຸກຄົນໃນຄອບຄົວຂອງຊີບາໄດ້ມາເປັນຄົນຮັບໃຊ້ຂອງເມຟີໂບເຊັດ.
13 ເມຟີໂບເຊັດໄດ້ຍ້າຍມາຢູ່ເມືອງເຢຣູຊາເລັມແລະນັ່ງກິນເຂົ້ານຳກະສັດທຸກໆມື້.+ ເມຟີໂບເຊັດຕີນເປັນລ່ອຍທັງສອງເບື້ອງ.+
ຂໍ ຄວາມ ໄຂ ເງື່ອນ
^ ຫຼື “ສະແດງຄວາມຮັກທີ່ໝັ້ນຄົງ”