ຈົດໝາຍສະບັບທີສອງເຖິງຄລິດສະຕຽນໃນເມືອງເທຊະໂລນິກ 1:1-12
1 ຂ້ອຍໂປໂລກັບຊີລາວານ*ແລະຕີໂມທຽວ+ຂຽນຫາປະຊາຄົມຢູ່ເມືອງເທຊະໂລນິກທີ່ເປັນອັນໜຶ່ງອັນດຽວກັບພະເຈົ້າຜູ້ເປັນພໍ່ຂອງພວກເຮົາແລະກັບພະເຢຊູຄລິດຜູ້ເປັນນາຍ.
2 ຂໍໃຫ້ພວກເຈົ້າໄດ້ຮັບຄວາມກະລຸນາທີ່ຍິ່ງໃຫຍ່ແລະສັນຕິສຸກຈາກພະເຈົ້າຜູ້ເປັນພໍ່ແລະຈາກພະເຢຊູຄລິດຜູ້ເປັນນາຍ.
3 ພີ່ນ້ອງເອີ້ຍ ພວກເຮົາຕ້ອງຂອບໃຈພະເຈົ້າເລື່ອງພວກເຈົ້າສະເໝີ ຍ້ອນພວກເຈົ້າມີຄວາມເຊື່ອຫຼາຍຂຶ້ນ ແລະພວກເຈົ້າທຸກຄົນຮັກກັນຫຼາຍຂຶ້ນ.+
4 ພວກເຮົາອວດເລື່ອງຂອງພວກເຈົ້າ+ກັບປະຊາຄົມຕ່າງໆຂອງພະເຈົ້າດ້ວຍຄວາມພູມໃຈ ຍ້ອນພວກເຈົ້າສະແດງຄວາມອົດທົນແລະຄວາມເຊື່ອໃນໄລຍະທີ່ຖືກຂົ່ມເຫງທຸກຮູບແບບ. ພວກເຈົ້າຍັງອົດທົນກັບຄວາມຍາກລຳບາກທີ່ພວກເຈົ້າເຈິໃນຕອນນີ້.+
5 ທັງໝົດນີ້ສະແດງວ່າພະເຈົ້າຕັດສິນຢ່າງຍຸຕິທຳ. ເພິ່ນຖືວ່າພວກເຈົ້າເໝາະສົມກັບການປົກຄອງຂອງເພິ່ນ ແລະພວກເຈົ້າຍອມທົນທຸກຢູ່ກໍຍ້ອນເຫດຜົນນີ້ແຫຼະ.+
6 ທີ່ຈິງ ຖືກແລ້ວທີ່ພະເຈົ້າຈະເອົາຄວາມທຸກລຳບາກໄປຕອບແທນຄົນທີ່ເຮັດໃຫ້ພວກເຈົ້າທຸກລຳບາກ.+
7 ສ່ວນພວກເຈົ້າທີ່ທົນທຸກລຳບາກຢູ່ຕອນນີ້ຈະບໍ່ຕ້ອງທຸກລຳບາກອີກ. ພວກເຮົາກັບພວກເຈົ້າຈະບໍ່ຕ້ອງເຈິຄວາມທຸກແບບນີ້ຕອນທີ່ພະເຢຊູຜູ້ເປັນນາຍ+ມາຈາກສະຫວັນໃນແປວໄຟພ້ອມກັບພວກທູດສະຫວັນທີ່ມີລິດເດດ.+ ເພິ່ນຈະສະແດງລິດເດດຂອງເພິ່ນ
8 ແລະຈະລົງໂທດຄົນທີ່ບໍ່ຮູ້ຈັກພະເຈົ້າແລະຄົນທີ່ບໍ່ເຊື່ອຟັງຂ່າວດີເລື່ອງພະເຢຊູຜູ້ເປັນນາຍຂອງພວກເຮົາ.+
9 ຜູ້ເປັນນາຍຂອງພວກເຮົາຈະຕັດສິນລົງໂທດຄົນເຫຼົ່ານັ້ນໃຫ້ຈິບຫາຍຕະຫຼອດໄປ+ ແລະເຂົາເຈົ້າຈະບໍ່ໄດ້ເຫັນລິດເດດທີ່ຍິ່ງໃຫຍ່ຂອງເພິ່ນອີກ.
10 ຕອນທີ່ເພິ່ນມາຮັບກຽດຮ່ວມກັບພວກຜູ້ບໍລິສຸດຂອງເພິ່ນ ມື້ນັ້ນທຸກຄົນທີ່ສະແດງຄວາມເຊື່ອຈະເບິ່ງເພິ່ນດ້ວຍຄວາມຮູ້ສຶກງຶດງໍ້. ພວກເຈົ້າກໍລວມຢູ່ໃນກຸ່ມນັ້ນ ຍ້ອນພວກເຈົ້າເຊື່ອສິ່ງທີ່ພວກເຮົາປະກາດ.
11 ຍ້ອນແນວນີ້ ພວກເຮົາຈຶ່ງອະທິດຖານເພື່ອພວກເຈົ້າສະເໝີ. ຂໍໃຫ້ພະເຈົ້າຂອງພວກເຮົາຖືວ່າພວກເຈົ້າເໝາະສົມກັບທີ່ເພິ່ນໄດ້ເລືອກແລ້ວ.+ ຂໍໃຫ້ເພິ່ນເຮັດສິ່ງດີໆທຸກຢ່າງທີ່ເພິ່ນພໍໃຈໃຫ້ສຳເລັດດ້ວຍລິດເດດຂອງເພິ່ນ ແລະຂໍໃຫ້ເພິ່ນຊ່ວຍໃຫ້ວຽກທີ່ພວກເຈົ້າເຮັດດ້ວຍຄວາມເຊື່ອນັ້ນສຳເລັດ.
12 ພວກເຮົາອະທິດຖານແບບນີ້ເພື່ອຊື່ຂອງພະເຢຊູຜູ້ເປັນນາຍຂອງພວກເຮົາຈະໄດ້ຮັບກຽດຍ້ອນພວກເຈົ້າ ແລ້ວພວກເຈົ້າກໍຈະໄດ້ຮັບກຽດຍ້ອນເພິ່ນ. ທັງໝົດນີ້ແມ່ນຄວາມກະລຸນາທີ່ຍິ່ງໃຫຍ່ຂອງພະເຈົ້າຂອງພວກເຮົາແລະຂອງພະເຢຊູຄລິດຜູ້ເປັນນາຍ.
ຂໍ
^ ນີ້ແມ່ນອີກຊື່ໜຶ່ງຂອງຊີລາ
