ຈົດໝາຍສະບັບທີສອງເຖິງຄລິດສະຕຽນໃນເມືອງເທຊະໂລນິກ 2:1-17
2 ພີ່ນ້ອງເອີ້ຍ ໃນເລື່ອງການມາ*ຂອງພະເຢຊູຄລິດຜູ້ເປັນນາຍຂອງພວກເຮົາ+ແລະເລື່ອງການລວບລວມພວກເຮົາໃຫ້ໄປຢູ່ກັບເພິ່ນນັ້ນ+ ພວກເຮົາຂໍພວກເຈົ້າ
2 ຢ່າໃຫ້ຜູ້ໃດປ່ຽນຄວາມຄິດຂອງພວກເຈົ້າທີ່ມັນຖືກຢູ່ແລ້ວ ແລະຢ່າສັບສົນຖ້າມີຄົນບອກວ່າວັນຂອງພະເຢໂຫວາ*+ມາຮອດແລ້ວ. ບໍ່ຕ້ອງອຸກໃຈ ເຖິງເຂົາເຈົ້າຈະເວົ້າວ່າຂ່າວສານນັ້ນມາຈາກພະເຈົ້າ+ ຫຼືອ່ານຈາກຈົດໝາຍທີ່ເຂົາເຈົ້າອ້າງວ່າມາຈາກພວກເຮົາ.
3 ຢ່າໃຫ້ຜູ້ໃດຫຼອກລວງພວກເຈົ້າໄດ້ ຍ້ອນວ່າກ່ອນຈະຮອດມື້ນັ້ນ ຕ້ອງມີການທໍລະຍົດ*+ເກີດຂຶ້ນ ແລະຜູ້ທີ່ຝ່າຝືນກົດໝາຍຂອງພະເຈົ້າ+ຈະຕ້ອງຖືກເປີດເຜີຍໂຕ. ລາວຖືກຕັດສິນແລ້ວວ່າຈະຕ້ອງຖືກທຳລາຍ.+
4 ລາວເປັນຜູ້ຕໍ່ຕ້ານ. ລາວຍົກໂຕເອງໃຫ້ເໜືອກວ່າທຸກຄົນທີ່ຄົນມັກເອີ້ນວ່າ “ພະເຈົ້າ” ແລະເໜືອກວ່າສິ່ງທີ່ຄົນຂາບໄຫວ້ບູຊາ. ລາວນັ່ງຢູ່ວິຫານຂອງພະເຈົ້າແລະສະແດງໂຕວ່າເປັນພະເຈົ້າອົງໜຶ່ງ.
5 ຈື່ບໍ່ໄດ້ບໍວ່າຂ້ອຍເຄີຍບອກພວກເຈົ້າເລື່ອງນີ້ແລ້ວຕອນທີ່ຂ້ອຍຢູ່ນຳພວກເຈົ້າ?
6 ພວກເຈົ້າກໍຮູ້ແລ້ວວ່າຜູ້ໃດຂັດຂວາງລາວໄວ້ ເພື່ອລາວຈະບໍ່ຖືກເປີດເຜີຍໂຕກ່ອນເວລາ.
7 ທີ່ຈິງ ລາວຝ່າຝືນກົດໝາຍຂອງພະເຈົ້າຢູ່ແລ້ວ+ ແຕ່ເຮັດແບບລັບໆຈົນກວ່າຜູ້ທີ່ຂັດຂວາງນັ້ນຈະໄປ.
8 ແລ້ວຜູ້ຝ່າຝືນກົດໝາຍກໍຈະຖືກເປີດເຜີຍໂຕ. ພະເຢຊູຜູ້ເປັນນາຍຈະທຳລາຍລາວດ້ວຍພະລັງທີ່ອອກມາຈາກປາກຂອງເພິ່ນ+ຕອນທີ່ເພິ່ນສະແດງໃຫ້ເຫັນ+ວ່າເພິ່ນໄດ້ກັບມາ*ແລ້ວ.
9 ຍ້ອນຊາຕານ ຈຶ່ງມີຜູ້ຝ່າຝືນກົດໝາຍຂອງພະເຈົ້າ.+ ລາວເຮັດສິ່ງທີ່ເປັນຕາງຶດຫຼາຍຢ່າງ ລວມທັງການອັດສະຈັນແລະປາຕິຫານແບບຂີ້ຕົວະ.+
10 ລາວໃຊ້ຊີວິດແບບບໍ່ຖືກຕ້ອງໃນທຸກທາງເພື່ອຫຼອກລວງ+ຄົນທີ່ບໍ່ຮັກຄວາມຈິງເຊິ່ງກຳລັງຈະຖືກທຳລາຍ. ຄົນເຫຼົ່ານີ້ຄືຊິລອດຖ້າເຂົາເຈົ້າຮັກຄວາມຈິງ.
11 ເມື່ອເຂົາເຈົ້າບໍ່ຮັກຄວາມຈິງ ພະເຈົ້າຈຶ່ງປ່ອຍໃຫ້ເຂົາເຈົ້າຖືກຊັກຈູງໃຫ້ເຊື່ອເລື່ອງຂີ້ຕົວະຫຼອກລວງ.+
12 ເພິ່ນເຮັດແບບນີ້ເພື່ອເຂົາເຈົ້າຈະໄດ້ຖືກຕັດສິນລົງໂທດ ຍ້ອນເຂົາເຈົ້າບໍ່ເຊື່ອຄວາມຈິງແລະມັກແນວບໍ່ຖືກຕ້ອງ.
13 ພີ່ນ້ອງເອີ້ຍ ພະເຢໂຫວາ*ຮັກພວກເຈົ້າ ແລະພວກເຮົາຕ້ອງຂອບໃຈພະເຈົ້າເລື່ອງພວກເຈົ້າສະເໝີ. ເພິ່ນເລືອກພວກເຈົ້າຕັ້ງແຕ່ທຳອິດ+ເພື່ອໃຫ້ໄດ້ຮັບຄວາມລອດ. ເພິ່ນໃຊ້ພະລັງຂອງເພິ່ນເຮັດໃຫ້ພວກເຈົ້າບໍລິສຸດ*+ຍ້ອນພວກເຈົ້າເຊື່ອໃນຄວາມຈິງ.
14 ພະເຈົ້າເລືອກພວກເຈົ້າໃຫ້ໄດ້ຮັບຄວາມລອດໂດຍທາງຂ່າວດີທີ່ພວກເຮົາປະກາດ ເພື່ອພວກເຈົ້າຈະໄດ້ຮັບກຽດຄືກັບພະເຢຊູຄລິດຜູ້ເປັນນາຍຂອງພວກເຮົາ.+
15 ພີ່ນ້ອງເອີ້ຍ ໃຫ້ຢືນຢັດໃນຄວາມເຊື່ອ+ແລະຍຶດໝັ້ນກັບທຳນຽມທີ່ຮຽນຈາກພວກເຮົາ+ ບໍ່ວ່າໂດຍທາງຄຳເວົ້າຫຼືທາງຈົດໝາຍ.
16 ພະເຈົ້າຜູ້ເປັນພໍ່ຂອງພວກເຮົາຮັກທຸກຄົນ.+ ເພິ່ນໃຫ້ກຳລັງໃຈທີ່ບໍ່ມີມື້ໝົດແລະຄວາມຫວັງທີ່ດີແທ້ໆ+ກັບພວກເຮົາຍ້ອນເພິ່ນມີຄວາມກະລຸນາທີ່ຍິ່ງໃຫຍ່. ຂໍໃຫ້ເພິ່ນກັບພະເຢຊູຄລິດຜູ້ເປັນນາຍຂອງພວກເຮົາ
17 ໃຫ້ກຳລັງໃຈແລະຊ່ວຍພວກເຈົ້າໃຫ້ຢືນຢັດໃນການເວົ້າດີແລະເຮັດດີສະເໝີ.
ຂໍ
^ ເບິ່ງສ່ວນອະທິບາຍຄຳສັບ
^ ເບິ່ງພາກຜະໜວກ ກ5
^ ໝາຍເຖິງການທໍລະຍົດພະເຈົ້າ
^ ເບິ່ງຄຳວ່າ “ການມາ” ໃນສ່ວນອະທິບາຍຄຳສັບ
^ ເບິ່ງພາກຜະໜວກ ກ5
^ ຫຼື “ເຮັດໃຫ້ພວກເຈົ້າຖືກແຍກໄວ້ໃຫ້ເປັນຄົນຂອງພະເຈົ້າ”
