ຈົດໝາຍສະບັບທີສອງເຖິງຄລິດສະຕຽນໃນເມືອງໂກຣິນໂທ 13:1-14
13 ນີ້ເປັນເທື່ອທີ 3 ແລ້ວທີ່ຂ້ອຍຕັ້ງໃຈຈະໄປຫາພວກເຈົ້າ. “ທຸກເລື່ອງທີ່ລົມກັນຕ້ອງມີພະຍານ 2 ຫຼື 3 ຄົນຢືນຢັນ.”+
2 ເຖິງວ່າຂ້ອຍຈະບໍ່ໄດ້ຢູ່ນຳພວກເຈົ້າຕອນນີ້ ແຕ່ຂໍໃຫ້ຟັງຂ້ອຍຄືກັບວ່າຂ້ອຍໄດ້ມາຢູ່ກັບພວກເຈົ້າເປັນເທື່ອທີ 2. ຂ້ອຍເຕືອນຄົນທີ່ເຄີຍເຮັດຜິດແລະຄົນອື່ນໆໄວ້ແລ້ວ ແລະຂ້ອຍຂໍເຕືອນອີກເທື່ອໜຶ່ງວ່າຂ້ອຍຈະບໍ່ຍົກເວັ້ນຄົນທີ່ເຮັດຜິດເລີຍ.
3 ພວກເຈົ້າຈະໄດ້ເຫັນຫຼັກຖານວ່າສິ່ງທີ່ຂ້ອຍເວົ້າມາຈາກພະຄລິດແທ້ໆ. ເມື່ອປະຕິບັດກັບພວກເຈົ້າ ເພິ່ນບໍ່ອ່ອນແອ ແຕ່ເພິ່ນເຂັ້ມແຂງ.
4 ແມ່ນຢູ່ວ່າພະຄລິດຖືກປະຫານເທິງເສົາໃນສະພາບທີ່ອ່ອນແອ ແຕ່ຕອນນີ້ເພິ່ນມີຊີວິດຢູ່ຍ້ອນລິດເດດຂອງພະເຈົ້າ.+ ຕອນນີ້ ພວກເຮົາກໍຢູ່ໃນສະພາບທີ່ອ່ອນແອຄືກັບທີ່ເພິ່ນເຄີຍເປັນ ແຕ່ພວກເຮົາຈະມີຊີວິດຢູ່ກັບເພິ່ນ+ຍ້ອນລິດເດດຂອງພະເຈົ້າທີ່ຢູ່ໃນໂຕພວກເຈົ້າ.+
5 ໃຫ້ພວກເຈົ້າກວດເບິ່ງໂຕເອງຢູ່ສະເໝີວ່າຍັງໃຊ້ຊີວິດຕາມຄວາມເຊື່ອຂອງຄລິດສະຕຽນຢູ່ບໍ. ໃຫ້ກວດເບິ່ງໂຕເອງຢູ່ເລື້ອຍໆເພື່ອຈະຮູ້ວ່າພວກເຈົ້າເປັນຄົນແນວໃດແທ້ໆ.+ ພວກເຈົ້າບໍ່ຮູ້ບໍວ່າພະເຢຊູຄລິດເປັນອັນໜຶ່ງອັນດຽວກັບພວກເຈົ້າ? ຖ້າເພິ່ນບໍ່ໄດ້ເປັນອັນໜຶ່ງອັນດຽວກັບພວກເຈົ້າກໍໝາຍຄວາມວ່າພະເຈົ້າບໍ່ຍອມຮັບພວກເຈົ້າ.
6 ແຕ່ຂ້ອຍຫວັງວ່າພວກເຈົ້າຈະເຊື່ອວ່າພະເຈົ້າຍອມຮັບພວກເຮົາ.
7 ພວກເຮົາອະທິດຖານຕໍ່ພະເຈົ້າຂໍຢ່າໃຫ້ພວກເຈົ້າເຮັດຫຍັງຜິດ. ບໍ່ແມ່ນເພື່ອໃຫ້ຄົນອື່ນຍອມຮັບພວກເຮົາ ແຕ່ເພື່ອໃຫ້ພວກເຈົ້າເຮັດຄວາມດີ ເຖິງວ່າຄົນອື່ນຈະບໍ່ຍອມຮັບພວກເຮົາກໍບໍ່ເປັນຫຍັງ.
8 ພວກເຮົາບໍ່ມີທາງຂັດຂວາງຄວາມຈິງໄດ້ ມີແຕ່ຈະເຮັດເພື່ອຄວາມຈິງ.
9 ພວກເຮົາດີໃຈຖ້າພວກເຈົ້າຈະເຂັ້ມແຂງ ແຕ່ພວກເຮົາອ່ອນແອ. ພວກເຮົາຈຶ່ງອະທິດຖານຂໍໃຫ້ພວກເຈົ້າປັບຄວາມຄິດຂອງພວກເຈົ້າໃໝ່.
10 ດັ່ງນັ້ນ ຂ້ອຍຂຽນເລື່ອງທັງໝົດນີ້ຕອນທີ່ບໍ່ຢູ່ກັບພວກເຈົ້າ ເພື່ອຂ້ອຍຈະບໍ່ຕ້ອງໃຊ້ມາດຕະການເຂັ້ມງວດຕອນທີ່ຂ້ອຍໄປຫາພວກເຈົ້າ ຍ້ອນຜູ້ເປັນນາຍໃຫ້ອຳນາດຂ້ອຍ+ເພື່ອເສີມສ້າງພວກເຈົ້າ ບໍ່ແມ່ນເພື່ອທຳລາຍ.
11 ສຸດທ້າຍນີ້ ພີ່ນ້ອງເອີ້ຍ ຂໍໃຫ້ຊົມຊື່ນຍິນດີສະເໝີ ປັບຄວາມຄິດຂອງພວກເຈົ້າໃໝ່ ມີກຳລັງໃຈ+ ຄິດໃຫ້ສອດຄ່ອງກັນ+ ແລະໃຊ້ຊີວິດຢ່າງສະຫງົບສຸກຕໍ່ໆໄປ.+ ແລ້ວພະເຈົ້າຜູ້ມີຄວາມຮັກແລະເປັນຜູ້ໃຫ້ສັນຕິສຸກ+ຈະຢູ່ກັບພວກເຈົ້າ.
12 ຂໍໃຫ້ຈູບທັກທາຍກັນແບບພີ່ນ້ອງ.
13 ຜູ້ບໍລິສຸດທຸກຄົນຝາກຄວາມຄິດຮອດໄປເຖິງພວກເຈົ້າ.
14 ຂໍໃຫ້ພວກເຈົ້າໄດ້ຮັບຄວາມຮັກຈາກພະເຈົ້າແລະໄດ້ຮັບຄວາມກະລຸນາທີ່ຍິ່ງໃຫຍ່ຈາກພະເຢຊູຄລິດຜູ້ເປັນນາຍຂອງພວກເຮົາ ແລະຂໍໃຫ້ພະລັງບໍລິສຸດທີ່ພວກເຮົາໄດ້ຮັບຮ່ວມກັນຢູ່ກັບພວກເຈົ້າທຸກຄົນ.
