ຈົດໝາຍສະບັບທີສອງເຖິງຄລິດສະຕຽນໃນເມືອງໂກຣິນໂທ 9:1-15
9 ຂ້ອຍບໍ່ຈຳເປັນຕ້ອງຂຽນຫາພວກເຈົ້າເລື່ອງການຊ່ວຍເຫຼືອ*ພວກຜູ້ບໍລິສຸດ+
2 ຍ້ອນຂ້ອຍຮູ້ວ່າພວກເຈົ້າຢາກຊ່ວຍຢູ່ແລ້ວ ແລະຂ້ອຍອວດເລື່ອງນີ້ກັບພີ່ນ້ອງຄົນມາເກໂດເນຍວ່າ ພວກເຈົ້າທີ່ຢູ່ແຂວງອະຂາຢາພ້ອມຈະຊ່ວຍເຫຼືອມາໄດ້ປີໜຶ່ງແລ້ວ ແລະຄວາມກະຕືລືລົ້ນຂອງພວກເຈົ້າກໍກະຕຸ້ນເຂົາເຈົ້າສ່ວນຫຼາຍໃຫ້ເຮັດແບບດຽວກັນ.
3 ຂ້ອຍໃຫ້ພີ່ນ້ອງເຫຼົ່ານີ້ໄປຫາພວກເຈົ້າເພື່ອເຮັດໃຫ້ເລື່ອງທີ່ຂ້ອຍອວດກ່ຽວກັບພວກເຈົ້ານັ້ນເປັນຄວາມຈິງ ແລະເພື່ອໃຫ້ພວກເຈົ້າພ້ອມທີ່ຈະຊ່ວຍເຫຼືອຄືກັບທີ່ຂ້ອຍເຄີຍເວົ້າແລ້ວ.
4 ແຕ່ຖ້າພີ່ນ້ອງຄົນມາເກໂດເນຍໄປກັບຂ້ອຍແລະເຫັນວ່າພວກເຈົ້າບໍ່ພ້ອມ ບໍ່ແມ່ນແຕ່ພວກເຈົ້າເທົ່ານັ້ນທີ່ຈະຂາຍໜ້າ ພວກເຮົາກໍຄືຊິຂາຍໜ້າຄືກັນທີ່ເຄີຍໝັ້ນໃຈໃນໂຕພວກເຈົ້າ.
5 ດັ່ງນັ້ນ ຂ້ອຍເຫັນວ່າຄວນຈະໃຫ້ພີ່ນ້ອງເຫຼົ່ານີ້ໄປຫາພວກເຈົ້າກ່ອນເພື່ອຊ່ວຍກຽມເຄື່ອງບໍລິຈາກທີ່ພວກເຈົ້າສັນຍາໄວ້ໃຫ້ພ້ອມ. ເຄື່ອງບໍລິຈາກນັ້ນຈະໄດ້ມາຈາກການໃຫ້ຢ່າງໃຈກວ້າງ ບໍ່ແມ່ນຝືນໃຈໃຫ້.
6 ຄືກັບທີ່ພວກເຈົ້າຮູ້ ຄົນທີ່ຫວ່ານໜ້ອຍຈະເກັບກ່ຽວໄດ້ໜ້ອຍ ສ່ວນຄົນທີ່ຫວ່ານຫຼາຍກໍຈະເກັບກ່ຽວໄດ້ຫຼາຍ.+
7 ໃຫ້ແຕ່ລະຄົນເຮັດຕາມທີ່ຕັ້ງໃຈໄວ້ ບໍ່ແມ່ນເຮັດແບບບໍ່ເຕັມໃຈຫຼືຝືນໃຈ+ ຍ້ອນພະເຈົ້າຮັກຄົນທີ່ມີຄວາມສຸກໃນການໃຫ້.+
8 ພະເຈົ້າສະແດງຄວາມກະລຸນາທີ່ຍິ່ງໃຫຍ່ຕໍ່ພວກເຈົ້າໄດ້ສະເໝີ. ພວກເຈົ້າຈະບໍ່ຂາດເຂີນຫຍັງເລີຍ ແລະຈະມີຢ່າງເຫຼືອເຟືອເພື່ອພວກເຈົ້າຈະເຮັດວຽກທີ່ດີທຸກຢ່າງໄດ້.+
9 (ຄືກັບທີ່ຂຽນໄວ້ໃນພະຄຳພີວ່າ: “ລາວແຈກຢາຍສິ່ງທີ່ລາວມີຢ່າງເອື້ອເຟື້ອ. ລາວເອົາສິ່ງຕ່າງໆໃຫ້ຄົນທຸກ. ສິ່ງທີ່ຖືກຕ້ອງທີ່ລາວເຮັດຈະບໍ່ມີວັນຖືກລືມ.”+
10 ພະເຈົ້າທີ່ໃຫ້ເມັດພືດກັບຄົນຫວ່ານແລະໃຫ້ອາຫານກັບຄົນກິນຢ່າງເຫຼືອເຟືອນັ້ນຈະໃຫ້ເມັດພືດກັບພວກເຈົ້າໄປຫວ່ານ. ເພິ່ນຈະໃຫ້ຢ່າງເຫຼືອເຟືອແລະຈະເຮັດໃຫ້ພວກເຈົ້າເກັບກ່ຽວຜົນຂອງຄວາມດີຫຼາຍຂຶ້ນເລື້ອຍໆ.)
11 ພະເຈົ້າອວຍພອນພວກເຈົ້າໃຫ້ມີທຸກຢ່າງເພື່ອພວກເຈົ້າຈະໃຫ້ຄົນອື່ນຢ່າງໃຈກວ້າງ ແລ້ວຄົນຈະຂອບໃຈພະເຈົ້າຍ້ອນສິ່ງຂອງທີ່ພວກເຈົ້າໃຫ້ຜ່ານທາງພວກເຮົາ.
12 ວຽກຮັບໃຊ້ເພື່ອຊ່ວຍເຫຼືອຄົນອື່ນແບບນີ້ ບໍ່ແມ່ນເພື່ອຈັດຫາສິ່ງຂອງໃຫ້ພວກຜູ້ບໍລິສຸດທີ່ຂາດເຂີນເທົ່ານັ້ນ+ ແຕ່ວຽກນີ້ຈະເຮັດໃຫ້ຫຼາຍຄົນຂອບໃຈພະເຈົ້າຫຼາຍຂຶ້ນ.
13 ການຊ່ວຍເຫຼືອບັນເທົາທຸກໃນເທື່ອນີ້ສະແດງໃຫ້ເຫັນນ້ຳໃຈຂອງພວກເຈົ້າແລະເຮັດໃຫ້ພວກຜູ້ບໍລິສຸດຍ້ອງຍໍສັນລະເສີນພະເຈົ້າ ຍ້ອນເຂົາເຈົ້າເຫັນວ່າພວກເຈົ້າເຮັດຕາມຂ່າວດີເລື່ອງພະຄລິດທີ່ພວກເຈົ້າສອນ ແລະພວກເຈົ້າບໍລິຈາກສິ່ງຂອງໃຫ້ເຂົາເຈົ້າແລະຄົນອື່ນໆຢ່າງໃຈກວ້າງ.+
14 ເຂົາເຈົ້າຈະອະທິດຖານອ້ອນວອນເພື່ອພວກເຈົ້າດ້ວຍຄວາມຮັກແລະຄວາມຄິດຮອດ ຍ້ອນພະເຈົ້າສະແດງຄວາມກະລຸນາທີ່ຍິ່ງໃຫຍ່ຕໍ່ພວກເຈົ້າຢ່າງລົ້ນເຫຼືອ.
15 ຂໍໃຫ້ພວກເຮົາຂອບໃຈພະເຈົ້າສຳລັບຂອງຂວັນທີ່ດີເລີດເກີນຈະພັນລະນາໄດ້.
ຂໍ
^ ຫຼື “ການຮັບໃຊ້”
