ຈົດໝາຍຈາກຄະນະກຳມະການປົກຄອງ
“ທ່ານທັງຫຼາຍຕ້ອງເປັນຄູສອນ” (ເຫບ. 5:12) ຂໍໃຫ້ຄິດເບິ່ງ! ວ່າພະເຢໂຫວາຄູທີ່ດີທີ່ສຸດໃນເອກະພົບເຊີນເຮົາໃຫ້ສອນຄົນກ່ຽວກັບເລື່ອງພະອົງ! ວຽກມອບໝາຍທີ່ຈະສອນຄວາມຈິງກ່ຽວກັບພະເຢໂຫວາໃຫ້ກັບຄົນໃນຄອບຄົວ ໃນປະຊາຄົມ ຫຼືໃນເຂດປະກາດ ເປັນສິດທິພິເສດທີ່ມີຄ່າແລະເປັນໜ້າທີ່ຮັບຜິດຊອບທີ່ສຳຄັນຫຼາຍ. ເຮົາຈະເຮັດວຽກນີ້ໃຫ້ສຳເລັດໄດ້ແນວໃດ?
ເຮົາພົບຄຳຕອບໄດ້ຈາກຖ້ອຍຄຳຂອງອັກຄະສາວົກໂປໂລທີ່ຂຽນເຖິງຕີໂມເຕທີ່ວ່າ: “ຈົ່ງຕັ້ງໃຈໃສ່ໃນການອ່ານໜັງສື ໃນການເຕືອນສະຕິ ແລະໃນການສັ່ງສອນ . . . ເຫດວ່າເມື່ອກະທຳຢ່າງນັ້ນທ່ານຈະຊ່ອຍຕົວເອງໃຫ້ພົ້ນແລະຄົນທັງຫຼາຍທີ່ຟັງທ່ານດ້ວຍ.” (1 ຕີໂມ. 4:13, 16) ເຈົ້າມີຂ່າວສານທີ່ຊ່ວຍຊີວິດທີ່ຈະແບ່ງປັນໃຫ້ກັບຄົນອື່ນ. ດັ່ງນັ້ນ ຈຶ່ງຈຳເປັນທີ່ຈະຕ້ອງພັດທະນາການອ່ານແລະການສອນຂອງເຈົ້າ. ຈຸນລະສານນີ້ອອກແບບມາເພື່ອຊ່ວຍເຈົ້າ. ຂໍໃຫ້ເຮົາເບິ່ງສັນຍະລັກຂອງປຶ້ມຫົວນີ້:
ຂໍ້ພະຄຳພີທີ່ຍົກມາໃນແຕ່ລະໜ້າເປັນຫຼັກການໃນຄຳພີໄບເບິນເຊິ່ງກ່ຽວຂ້ອງກັບບົດຮຽນ ຫຼືເປັນຕົວຢ່າງຂອງວິທີທີ່ຈະນຳສິ່ງທີ່ໄດ້ຮຽນໄປໃຊ້.
ພະເຢໂຫວາເປັນ “ຄູອົງຍິ່ງໃຫຍ່.” (ເອຊາ. 30:20, ລ.ມ.) ຈຸນລະສານນີ້ຈະຊ່ວຍເຈົ້າໃຫ້ປັບປຸງຄວາມສາມາດເພື່ອຈະເປັນຜູ້ອ່ານແລະຜູ້ສອນທີ່ດີ ແຕ່ຢ່າລືມວ່າຂ່າວສານຂອງເຮົາມາຈາກພະເຢໂຫວາແລະພະອົງເປັນຜູ້ທີ່ຊັກນຳຜູ້ຄົນເຂົ້າມາ (ໂຢ. 6:44) ດັ່ງນັ້ນ ຂໍໃຫ້ອະທິດຖານຂໍພະລັງບໍລິສຸດຢູ່ເລື້ອຍໆ. ໃຊ້ຄຳພີໄບເບິນສະເໝີ. ດຶງຄວາມສົນໃຈມາທີ່ພະເຢໂຫວາບໍ່ແມ່ນຕົວເອງ. ຈົ່ງພະຍາຍາມຊ່ວຍຜູ້ທີ່ເຈົ້າສອນໃຫ້ຮັກພະເຢໂຫວາຈາກຫົວໃຈຂອງເຂົາແທ້ໆ.
ເຈົ້າໄດ້ຮັບເຊີນໃຫ້ສອນຂ່າວສານທີ່ສຳຄັນທີ່ສຸດທີ່ມະນຸດເຄີຍໄດ້ຮັບ. ເຮົາໝັ້ນໃຈວ່າຖ້າເຈົ້າ “ໝາຍເພິ່ງກຳລັງທີ່ມາຈາກພະເຈົ້າ” ເຈົ້າຈະເຮັດວຽກນີ້ໄດ້ສຳເລັດຢ່າງແນ່ນອນ.—1 ເປ. 4:11, ລ.ມ.
ເພື່ອນຮ່ວມວຽກໃນການສອນຂອງເຈົ້າ
ຄະນະກຳມະການປົກຄອງຂອງພະຍານພະເຢໂຫວາ