ບົດທີ 07

ພະເຢໂຫວາເປັນພະເຈົ້າແບບໃດ?

ເປີດ

ເຈົ້າຄິດວ່າພະເຢໂຫວາເປັນພະເຈົ້າແບບໃດ? ເພິ່ນສູງສົ່ງຈົນເຮົາບໍ່ມີທາງຈະສະໜິດກັບເພິ່ນໄດ້ບໍ? ຫຼືເຈົ້າຄິດວ່າເພິ່ນເປັນພະເຈົ້າທີ່ມີພະລັງແຕ່ບໍ່ມີຄວາມຮູ້ສຶກ? ພະເຢໂຫວາເປັນແບບໃດແທ້ໆ? ພະເຢໂຫວາບອກໂດຍທາງຄຳພີໄບເບິນວ່າເພິ່ນມີຄຸນລັກສະນະແບບໃດແດ່ ແລະຍັງບອກໃຫ້ຮູ້ອີກວ່າເພິ່ນເປັນຫ່ວງເຮົາ.

1. ເປັນຫຍັງເຮົາເບິ່ງບໍ່ເຫັນພະເຈົ້າ?

“ພະເຈົ້າເປັນຜູ້ທີ່ມະນຸດເບິ່ງບໍ່ເຫັນ.” (ໂຢຮັນ 4:24) ພະເຢໂຫວາບໍ່ໄດ້ມີຮ່າງກາຍແບບດຽວກັບມະນຸດ. ເພິ່ນມີຮ່າງກາຍສຳລັບສະຫວັນ ເຮົາກໍເລີຍເບິ່ງບໍ່ເຫັນເພິ່ນ.

2. ພະເຢໂຫວາມີຄຸນລັກສະນະຫຍັງແດ່?

ເຖິງວ່າເຮົາຈະເບິ່ງບໍ່ເຫັນພະເຢໂຫວາ ແຕ່ຖ້າເຮົາຮູ້ຈັກເພິ່ນເຮົາກໍຈະຮັກເພິ່ນ. ຄຳພີໄບເບິນບອກວ່າ: “ພະເຢໂຫວາຮັກຄວາມຍຸຕິທຳ ແລະເພິ່ນຈະບໍ່ປະຖິ້ມຄົນທີ່ພັກດີຕໍ່ເພິ່ນ.” (ຄຳເພງ 37:28, ລ.ມ.) ເພິ່ນຍັງ “ເມດຕາແລະມີຄວາມເຫັນອົກເຫັນໃຈແທ້ໆ” ໂດຍສະເພາະຕໍ່ຄົນທີ່ເຈິກັບຄວາມທຸກ. (ຢາໂກໂບ 5:11) “ພະເຢໂຫວາຢູ່ໃກ້ຄົນທີ່ຫົວໃຈແຕກສະຫຼາຍ ເພິ່ນຄອຍຊ່ວຍຄົນທີ່ທໍ້ໃຈ.” (ຄຳເພງ 34:18, ລ.ມ., ໄຂເງື່ອນ) ແລະເຈົ້າຮູ້ບໍວ່າສິ່ງທີ່ເຮົາເຮັດສົ່ງຜົນຕໍ່ຄວາມຮູ້ສຶກຂອງພະເຢໂຫວານຳ? ຖ້າເຮົາເຮັດສິ່ງທີ່ບໍ່ດີພະເຢໂຫວາກໍຈະຮູ້ສຶກຜິດຫວັງແລະເສຍໃຈ. (ຄຳເພງ 78:40, 41) ແຕ່ຖ້າເຮົາເຮັດສິ່ງທີ່ດີເພິ່ນກໍຈະດີໃຈ.—ອ່ານສຸພາສິດ 27:11

3. ພະເຢໂຫວາສະແດງໃຫ້ເຫັນແນວໃດວ່າເພິ່ນຮັກເຮົາ?

ຄຸນລັກສະນະເດັ່ນທີ່ສຸດຂອງພະເຢໂຫວາແມ່ນຄວາມຮັກ. ທີ່ຈິງ “ພະເຈົ້າເປັນຄວາມຮັກ.” (1 ໂຢຮັນ 4:8) ເຮົາຮູ້ວ່າພະເຢໂຫວາຮັກເຮົາຍ້ອນເພິ່ນບອກໄວ້ໃນຄຳພີໄບເບິນ ແລະຖ້າເຮົາເບິ່ງສິ່ງຕ່າງໆໃນທຳມະຊາດທີ່ເພິ່ນສ້າງໄວ້ເຮົາກໍຈະເຫັນວ່າເພິ່ນຮັກເຮົາແທ້ໆ. (ອ່ານກິດຈະການ 14:17) ລອງຄິດເບິ່ງວ່າໂຕເຮົາສາມາດເຮັດຫຍັງໄດ້ແດ່. ເພິ່ນສ້າງເຮົາໃຫ້ແນມເຫັນສີສັນທີ່ສົດໃສ ໄດ້ຍິນສຽງເພງມ່ວນໆ ແລະໄດ້ຮູ້ລົດຊາດອາຫານທີ່ແຊບໆ. ເພິ່ນຢາກໃຫ້ເຮົາມີຊີວິດທີ່ມີຄວາມສຸກ.

ຮຽນຮູ້ຫຼາຍຂຶ້ນ

ພະເຢໂຫວາເຮັດສິ່ງຕ່າງໆທີ່ເປັນຕາງຶດໄດ້ແນວໃດ. ແລ້ວເພິ່ນເຮັດໃຫ້ເຮົາເຫັນຄຸນລັກສະນະທີ່ດີເລີດຂອງເພິ່ນໂດຍວິທີໃດ.

4. ພະລັງບໍລິສຸດແມ່ນພະລັງທີ່ພະເຈົ້າໃຊ້ເຮັດສິ່ງຕ່າງໆ

ປົກກະຕິແລ້ວມະນຸດຈະໃຊ້ມືເຮັດວຽກ ແຕ່ພະເຢໂຫວາໃຊ້ພະລັງບໍລິສຸດ. ບາງຄົນຄິດວ່າ ພະລັງບໍລິສຸດເປັນບຸກຄົນ ແຕ່ຄຳພີໄບເບິນບອກວ່າພະລັງບໍລິສຸດແມ່ນພະລັງທີ່ພະເຢໂຫວາໃຊ້ເຮັດສິ່ງຕ່າງໆ. ອ່ານລູກາ 11:13 ແລະກິດຈະການ 2:17 ແລ້ວລົມກັນກ່ຽວກັບຄຳຖາມຕໍ່ໄປນີ້:

ພະເຈົ້າຈະ “ໃຫ້” ພະລັງບໍລິສຸດຂອງເພິ່ນກັບຄົນທີ່ຂໍ. ຄັນຊັ້ນເຈົ້າຄິດວ່າພະລັງບໍລິສຸດເປັນບຸກຄົນ ຫຼືເປັນພະລັງຂອງພະເຈົ້າ? ເປັນຫຍັງເຈົ້າຈຶ່ງຄິດແນວນັ້ນ?

ພະເຢໂຫວາໃຊ້ພະລັງບໍລິສຸດເຮັດຫຼາຍສິ່ງທີ່ເປັນຕາງຶດ. ອ່ານຄຳເພງ 33:6 ແລະ 2 ເປໂຕ 1:20, 21 ແລ້ວລົມກັນກ່ຽວກັບຄຳຖາມຕໍ່ໄປນີ້:

ພະເຢໂຫວາໃຊ້ພະລັງບໍລິສຸດຂອງເພິ່ນເຮັດຫຍັງແດ່?

5. ພະເຢໂຫວາມີຄຸນລັກສະນະທີ່ໜ້າປະທັບໃຈ

ເຖິງວ່າໂມເຊຈະນັບຖືພະເຈົ້າມາດົນຫຼາຍປີແລ້ວ ແຕ່ລາວກໍຍັງຢາກຮູ້ຈັກເພິ່ນຫຼາຍຂຶ້ນ. ລາວຈຶ່ງເວົ້າກັບເພິ່ນວ່າ “ຂໍໃຫ້ຂ້ອຍຮູ້ຈັກແນວທາງຂອງພະອົງ ຂ້ອຍຈະໄດ້ຮູ້ຈັກພະອົງ.” (ອົບພະຍົບ 33:13, ລ.ມ.) ພະເຢໂຫວາຈຶ່ງບອກໂມເຊໃຫ້ຮູ້ວ່າເພິ່ນມີຄຸນລັກສະນະຫຍັງແດ່. ອ່ານອົບພະຍົບ 34:4-6 ແລ້ວລົມກັນກ່ຽວກັບຄຳຖາມຕໍ່ໄປນີ້:

ພະເຢໂຫວາບອກໂມເຊວ່າເພິ່ນມີຄຸນລັກສະນະຫຍັງແດ່?
ຄຸນລັກສະນະຫຍັງແດ່ຂອງພະເຢໂຫວາທີ່ເຈົ້າມັກຫຼາຍທີ່ສຸດ?

6. ພະເຢໂຫວາເປັນຫ່ວງເຮົາ

ຄົນເຮັບເຣີເຊິ່ງເປັນປະຊາຊົນຂອງພະເຈົ້າເຄີຍເປັນທາດໃນເອຢິບ. ພະເຢໂຫວາຮູ້ສຶກແນວໃດເມື່ອເຫັນເຂົາເຈົ້າເຈິກັບຄວາມທຸກ? ເປີດຟາຍສຽງແລະເບິ່ງຄຳພີໄບເບິນໄປນຳ ຫຼືອ່ານອົບພະຍົບ 3:1-10. ແລ້ວລົມກັນກ່ຽວກັບຄຳຖາມຕໍ່ໄປນີ້: