ບົດທີ 15

ພະເຢຊູແມ່ນໃຜ?

ເປີດ

ພະເຢຊູແມ່ນໃຜ?

ພະເຢຊູເປັນຄົນທີ່ມີຊື່ສຽງຫຼາຍ. ຄົນສ່ວນຫຼາຍຮູ້ຈັກຊື່ຂອງເພິ່ນ ແຕ່ເຂົາເຈົ້າເກືອບຈະບໍ່ຮູ້ຫຍັງເລີຍກ່ຽວກັບໂຕເພິ່ນ. ແລ້ວຄຳພີໄບເບິນເວົ້າເຖິງພະເຢຊູວ່າແນວໃດແດ່?

1. ພະເຢຊູແມ່ນໃຜ?

ຕອນທຳອິດພະເຢຊູຢູ່ເທິງສະຫວັນ. ເພິ່ນເປັນທູດສະຫວັນທີ່ມີອຳນາດຫຼາຍ ພະເຢໂຫວາສ້າງເພິ່ນກ່ອນສິ່ງອື່ນໆທັງໝົດ. ເພິ່ນເລີຍຖືກເອີ້ນວ່າ “ຜູ້ທຳອິດທີ່ຖືກສ້າງກ່ອນທຸກສິ່ງ.” (ໂກໂລຊາຍ 1:15) ຄຳພີໄບເບິນເອີ້ນພະເຢຊູວ່າ “ລູກຄົນດຽວ” ຂອງພະເຈົ້າ ຍ້ອນເພິ່ນເປັນຜູ້ດຽວທີ່ພະເຢໂຫວາສ້າງດ້ວຍໂຕເອງ. (ໂຢຮັນ 3:16) ພະເຢຊູເຮັດວຽກໃກ້ຊິດກັບພະເຢໂຫວາພໍ່ຂອງເພິ່ນຕອນທີ່ເພິ່ນຊ່ວຍພໍ່ສ້າງສິ່ງອື່ນໆທັງໝົດ. (ອ່ານສຸພາສິດ 8:30) ພະເຢຊູມີຄວາມສຸກທີ່ໄດ້ໃກ້ຊິດກັບພະເຢໂຫວາສະເໝີ. ເພິ່ນເປັນຜູ້ເວົ້າແທນພະເຈົ້າ ຫຼື “ໂຄສົກ” ທີ່ຄອຍບອກຂ່າວສານແລະຄຳສັ່ງຕ່າງໆຂອງພະເຈົ້ານຳ.—ໂຢຮັນ 1:14

2. ເປັນຫຍັງພະເຢຊູມາເທິງໂລກ?

ປະມານ 2.000 ປີກ່ອນ ພະເຢໂຫວາໃຫ້ພະເຢຊູມາເກີດເປັນມະນຸດ. ພະເຢໂຫວາໃຊ້ພະລັງບໍລິສຸດຂອງເພິ່ນເຮັດການອັດສະຈັນເພື່ອຍ້າຍຊີວິດຂອງພະເຢຊູໃຫ້ມາຢູ່ໃນທ້ອງຂອງສາວບໍລິສຸດທີ່ຊື່ມາຣີ. (ອ່ານລູກາ 1:34, 35) ພະເຢຊູມາເກີດເທິງໂລກເພື່ອເປັນເມຊີອາ ຫຼືພະຄລິດຕາມທີ່ພະເຈົ້າສັນຍາ ແລະເພິ່ນມາເພື່ອຊ່ວຍຊີວິດມະນຸດ. a ຄຳພະຍາກອນທຸກຂໍ້ໃນຄຳພີໄບເບິນເລື່ອງເມຊີອາເກີດຂຶ້ນແທ້ກັບພະເຢຊູ ນີ້ຈຶ່ງເຮັດໃຫ້ຜູ້ຄົນຮູ້ວ່າເພິ່ນເປັນ “ພະຄລິດ ລູກຂອງພະເຈົ້າຜູ້ມີຊີວິດຢູ່.”—ມັດທາຍ 16:16

3. ຕອນນີ້ພະເຢຊູຢູ່ໃສ?

ຫຼັງຈາກທີ່ພະເຢຊູຕາຍ ພະເຈົ້າກໍເຮັດໃຫ້ເພິ່ນຟື້ນຄືນມາເປັນທູດສະຫວັນ. ແລະເມື່ອເພິ່ນກັບໄປສະຫວັນ ‘ພະເຈົ້າກໍຍົກຖານະເພິ່ນໃຫ້ສູງຂຶ້ນ.’ (ຟີລິບປອຍ 2:9) ຕອນນີ້ພະເຢຊູເປັນທູດສະຫວັນທີ່ມີອຳນາດຫຼາຍ ແລະມີພຽງແຕ່ພະເຢໂຫວາເທົ່ານັ້ນທີ່ມີອຳນາດຫຼາຍກວ່າເພິ່ນ.

ຮຽນຮູ້ຫຼາຍຂຶ້ນ

ເຮົາຈະມາເບິ່ງກ່ຽວກັບພະເຢຊູຫຼາຍຂຶ້ນແລະເບິ່ງວ່າເປັນຫຍັງຈຶ່ງສຳຄັນຫຼາຍທີ່ຈະຮຽນຮູ້ກ່ຽວກັບເພິ່ນ.

4. ພະເຢຊູບໍ່ໄດ້ເປັນພະເຈົ້າ

ຄຳພີໄບເບິນສອນວ່າ ເຖິງພະເຢຊູຈະເປັນທູດສະຫວັນທີ່ມີອຳນາດຫຼາຍ ແຕ່ເພິ່ນກໍຍອມຢູ່ໃຕ້ອຳນາດພະເຢໂຫວາພໍ່ຂອງເພິ່ນ. ເປັນຫຍັງເຮົາຈຶ່ງເວົ້າແບບນັ້ນ? ເປີດວິດີໂອແລ້ວເບິ່ງວ່າຄຳພີໄບເບິນສອນຫຍັງທີ່ຊ່ວຍເຮົາໃຫ້ຮູ້ວ່າພະເຢຊູບໍ່ໄດ້ເປັນພະເຈົ້າຜູ້ມີພະລັງອຳນາດສູງສຸດ.

ວິດີໂອ: ພະເຢຊູເປັນພະເຈົ້າບໍ? (3:22)

ຂໍ້ຄຳພີຕໍ່ໄປນີ້ຈະຊ່ວຍເຮົາໃຫ້ຮູ້ວ່າພະເຢຊູກັບພະເຢໂຫວາກ່ຽວຂ້ອງກັນແນວໃດ. ອ່ານຂໍ້ຄຳພີແຕ່ລະຂໍ້ ແລ້ວລົມກັນກ່ຽວກັບຄຳຖາມຕໍ່ໄປນີ້:

ອ່ານລູກາ 1:30-32

ຈາກຄຳເວົ້າຂອງທູດສະຫວັນ ເປັນຫຍັງເຮົາຮູ້ວ່າພະເຢຊູບໍ່ແມ່ນ “ພະເຈົ້າອົງສູງສຸດ”?

ອ່ານມັດທາຍ 3:16, 17

ຕອນທີ່ພະເຢຊູຮັບບັບເຕມາ ມີສຽງຈາກຟ້າເວົ້າວ່າແນວໃດ?
ເຈົ້າຄິດວ່ານັ້ນເປັນສຽງຂອງໃຜ?

ອ່ານໂຢຮັນ 14:28

ເຈົ້າຄິດວ່າລະຫວ່າງພໍ່ກັບລູກ ໃຜມີອາຍຸແລະອຳນາດຫຼາຍກວ່າກັນ?
ພະເຢຊູເອີ້ນພະເຢໂຫວາວ່າພໍ່ ເລື່ອງນີ້ເຮັດໃຫ້ເຮົາຮູ້ຫຍັງແດ່?

ອ່ານໂຢຮັນ 12:49

ພະເຢຊູບອກວ່າເພິ່ນກັບພໍ່ຂອງເພິ່ນເປັນຄົນດຽວກັນບໍ? ແລ້ວເຈົ້າເດ ຄິດແນວໃດ?

5. ອັນໃດເຮັດໃຫ້ເຮົາຮູ້ວ່າພະເຢຊູເປັນເມຊີອາ?

ໃນຄຳພີໄບເບິນມີຄຳພະຍາກອນຫຼາຍຂໍ້ທີ່ເວົ້າເຖິງເມຊີອາເຊິ່ງເປັນຄົນທີ່ພະເຈົ້າເລືອກໃຫ້ຊ່ວຍຊີວິດມະນຸດ ຄຳພະຍາກອນເຫຼົ່ານີ້ຊ່ວຍໃຫ້ຜູ້ຄົນຮູ້ວ່າໃຜແມ່ນເມຊີອາແທ້ໆ. ເປີດວິດີໂອແລ້ວເບິ່ງຄຳພະຍາກອນບາງເລື່ອງທີ່ເກີດຂຶ້ນແທ້ກັບພະເຢຊູຕອນທີ່ເພິ່ນຢູ່ເທິງໂລກ.

ວິດີໂອ: ຄຳພະຍາກອນທີ່ເກີດຂຶ້ນແທ້ກັບພະເຢຊູ (3:03)

ອ່ານຄຳພະຍາກອນໃນຄຳພີໄບເບິນ ແລ້ວລົມກັນກ່ຽວກັບຄຳຖາມຕໍ່ໄປນີ້:

ອ່ານມີເກ 5:2 ເພື່ອເບິ່ງວ່າເມຊີອາຈະເກີດຢູ່ໃສ. b

ຄຳພະຍາກອນນີ້ເກີດຂຶ້ນແທ້ກັບພະເຢຊູບໍ?—ມັດທາຍ 2:1

ອ່ານຄຳເພງ 34:20 ແລະຊາກາລີ 12:10 ເພື່ອເບິ່ງວ່າຄຳພະຍາກອນບອກແນວໃດແດ່ກ່ຽວກັບການຕາຍຂອງເມຊີອາ.

ຄຳພະຍາກອນເຫຼົ່ານີ້ເກີດຂຶ້ນແທ້ບໍ?—ໂຢຮັນ 19:33-37
ເຈົ້າຄິດວ່າເປັນໄປໄດ້ບໍທີ່ພະເຢຊູຈະຄວບຄຸມທຸກເລື່ອງໃນຊີວິດຂອງເພິ່ນໃຫ້ກົງກັບຄຳພະຍາກອນ?
ຕາມທີ່ລົມກັນມາ ຄຳພະຍາກອນເຫຼົ່ານີ້ເຮັດໃຫ້ຮູ້ວ່າພະເຢຊູແມ່ນໃຜ?

6. ເມື່ອເຮົາຮຽນຮູ້ເລື່ອງພະເຢຊູເຮົາຈະໄດ້ປະໂຫຍດຫຍັງ?

ຄຳພີໄບເບິນບອກວ່າສຳຄັນຫຼາຍທີ່ຈະຮຽນຮູ້ເລື່ອງພະເຢຊູແລະຮຽນຮູ້ວ່າພະເຈົ້າຢາກໃຫ້ເພິ່ນເຮັດຫຍັງ. ອ່ານໂຢຮັນ 14:6 ແລະ 17:3 ແລ້ວລົມກັນກ່ຽວກັບຄຳຖາມຕໍ່ໄປນີ້: