ບົດທີ 18

ຄລິດສະຕຽນແທ້ຕ້ອງເປັນແນວໃດ?

ເປີດ

ຫຼາຍລ້ານຄົນອ້າງວ່າໂຕເອງເປັນຄລິດສະຕຽນ. ແຕ່ຄລິດສະຕຽນແຕ່ລະກຸ່ມພັດມີຄວາມເຊື່ອແລະຄຳສອນທີ່ແຕກຕ່າງກັນ. ແລ້ວຄລິດສະຕຽນແທ້ຕ້ອງເປັນແນວໃດ?

1. ຄລິດສະຕຽນໝາຍເຖິງຫຍັງ?

ຄລິດສະຕຽນໝາຍເຖິງ ຄົນທີ່ເປັນລູກສິດ ຫຼືຄົນທີ່ຕິດຕາມພະເຢຊູຄລິດ. (ອ່ານກິດຈະການ 11:26) ຄົນທີ່ເປັນລູກສິດຂອງພະເຢຊູຕ້ອງເຮັດຫຍັງ? ພະເຢຊູບອກວ່າ: “ຖ້າພວກເຈົ້າເຮັດຕາມທີ່ຂ້ອຍສອນສະເໝີ ພວກເຈົ້າກໍເປັນລູກສິດຂອງຂ້ອຍແທ້ໆ.” (ໂຢຮັນ 8:31) ນີ້ໝາຍຄວາມວ່າຄົນທີ່ເປັນຄລິດສະຕຽນແທ້ຈະເຊື່ອຟັງສິ່ງທີ່ພະເຢຊູສອນ. ທຸກເທື່ອທີ່ພະເຢຊູສອນ ເພິ່ນຈະສອນສິ່ງທີ່ມາຈາກຄຳພີໄບເບິນ ຄລິດສະຕຽນແທ້ກໍຈະສອນຈາກຄຳພີໄບເບິນຄືກັນ.—ອ່ານລູກາ 24:27

2. ຄລິດສະຕຽນແທ້ເຮັດຫຍັງທີ່ສະແດງວ່າເຂົາເຈົ້າຮັກກັນ?

ພະເຢຊູບອກລູກສິດຂອງເພິ່ນວ່າ: “ໃຫ້ພວກເຈົ້າຮັກກັນຄືກັບທີ່ຂ້ອຍຮັກພວກເຈົ້າ.” (ໂຢຮັນ 15:12) ພະເຢຊູໃຫ້ເວລາກັບພວກລູກສິດ ໃຫ້ກຳລັງໃຈເຂົາເຈົ້າ ແລະຄອຍຊ່ວຍເຫຼືອເຂົາເຈົ້າ. ເພິ່ນເຖິງຂັ້ນຍອມຕາຍເພື່ອເຂົາເຈົ້າດ້ວຍຊ້ຳ. ນີ້ເຮັດໃຫ້ເຫັນວ່າພະເຢຊູຮັກລູກສິດຂອງເພິ່ນຫຼາຍແທ້ໆ. (1 ໂຢຮັນ 3:16) ຄືກັບທີ່ພະເຢຊູໄດ້ເຮັດ ຄລິດສະຕຽນແທ້ຈະບໍ່ພຽງແຕ່ເວົ້າວ່າຮັກກັນເທົ່ານັ້ນ ແຕ່ສິ່ງທີ່ເຂົາເຈົ້າເຮັດຈະສະແດງໃຫ້ເຫັນວ່າເຂົາເຈົ້າຮັກກັນແທ້ໆ.

3. ຄລິດສະຕຽນແທ້ເຮັດວຽກທີ່ສຳຄັນຫຍັງ?

ພະເຢຊູໃຫ້ລູກສິດຂອງເພິ່ນເຮັດວຽກທີ່ສຳຄັນ. ‘ເພິ່ນສົ່ງພວກເຂົາອອກໄປປະກາດເລື່ອງການປົກຄອງຂອງພະເຈົ້າ.’ (ລູກາ 9:2) ຄລິດສະຕຽນລຸ້ນທຳອິດບໍ່ໄດ້ປະກາດແລະສອນພຽງແຕ່ໃນບ່ອນປະຊຸມຂອງໂຕເອງເທົ່ານັ້ນ ແຕ່ໄປປະກາດແລະສອນໃນບ່ອນສາທາລະນະແລະໄປຕາມເຮືອນນຳ. (ອ່ານກິດຈະການ 5:42; 17:17) ໃນທຸກມື້ນີ້ ຄລິດສະຕຽນກໍໄປປະກາດແລະສອນຄຳພີໄບເບິນໃນທຸກບ່ອນທີ່ພົບຜູ້ຄົນ. ເຂົາເຈົ້າຍິນດີໃຊ້ເວລາແລະກຳລັງເພື່ອປະກາດແລະສອນເລື່ອງທີ່ເຮັດໃຫ້ມີຄວາມຫວັງແລະກຳລັງໃຈຈາກຄຳພີໄບເບິນ ທີ່ເຮັດແບບນັ້ນ ກໍຍ້ອນເຂົາເຈົ້າຮັກຄົນອື່ນ.—ມາຣະໂກ 12:31

ຮຽນຮູ້ຫຼາຍຂຶ້ນ

ຄລິດສະຕຽນແທ້ຕ່າງຈາກຄົນທີ່ບໍ່ໄດ້ເຮັດຕາມຕົວຢ່າງແລະຄຳສອນຂອງພະເຢຊູແນວໃດ.

4. ຄລິດສະຕຽນແທ້ຄົ້ນຫາຄວາມຈິງໃນຄຳພີໄບເບິນ

ຄລິດສະຕຽນລຸ້ນທຳອິດໃຫ້ຄວາມສຳຄັນກັບຄຳສອນຂອງພະເຈົ້າ.

ບາງຄົນທີ່ອ້າງວ່າໂຕເອງເປັນຄລິດສະຕຽນຄິດວ່າບໍ່ສຳຄັນທີ່ຈະເຂົ້າໃຈຄວາມຈິງໃນຄຳພີໄບເບິນ. ເປີດວິດີໂອ ແລ້ວລົມກັນກ່ຽວຄຳຖາມຕໍ່ໄປນີ້:

ວິດີໂອ: ຄລິດຕະຈັກຕ່າງໆເລີ່ມສອນຜິດໆແນວໃດ (5:11)

ຄລິດຕະຈັກຕ່າງໆເຮັດຫຍັງແດ່ເພື່ອເຮັດໃຫ້ຄົນທົ່ວໄປບໍ່ໄດ້ຮຽນສິ່ງທີ່ພະເຢຊູສອນແທ້ໆ?

ພະເຢຊູສອນຄວາມຈິງທີ່ມາຈາກຄຳພີໄບເບິນ. ອ່ານໂຢຮັນ 18:37 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຈາກຂໍ້ຄຳພີນີ້ ຄລິດສະຕຽນ “ທີ່ຕິດຕາມຄວາມຈິງ” ຕ້ອງເຮັດຫຍັງ?

5. ຄລິດສະຕຽນແທ້ປະກາດຄວາມຈິງຈາກຄຳພີໄບເບິນ

ຄລິດສະຕຽນລຸ້ນທຳອິດປະກາດແລະສອນເລື່ອງພະເຈົ້າ.

ກ່ອນທີ່ພະເຢຊູຈະກັບໄປສະຫວັນ ເພິ່ນສັ່ງໃຫ້ລູກສິດເຮັດວຽກສຳຄັນເຊິ່ງເຮັດຢູ່ຈົນຮອດທຸກມື້ນີ້. ອ່ານມັດທາຍ 28:19, 20 ແລະກິດຈະການ 1:8 ແລ້ວລົມກັນກ່ຽວກັບຄຳຖາມຕໍ່ໄປນີ້: