ບົດທີ 27

ການເສຍຊີວິດຂອງພະເຢຊູຊ່ວຍເຮົາໃຫ້ລອດແນວໃດ?

ເປີດ

ອາດາມກັບເອວາມະນຸດຄູ່ທຳອິດບໍ່ເຊື່ອຟັງພະເຈົ້າ ນີ້ເລີຍເຮັດໃຫ້ພວກເຮົາຕ້ອງເປັນຄົນບາບ ຕ້ອງເຈິກັບຄວາມທຸກ ແລະຕ້ອງຕາຍ. a ແຕ່ເຮົາຍັງບໍ່ໝົດຫວັງຍ້ອນພະເຢໂຫວາສົ່ງພະເຢຊູຄລິດລູກຊາຍຂອງເພິ່ນລົງມາເທິງໂລກເພື່ອຊ່ວຍໃຫ້ເຮົາພົ້ນຈາກບາບແລະຄວາມຕາຍ. ຄຳພີໄບເບິນບອກວ່າ ພະເຢຊູສະລະຊີວິດມະນຸດສົມບູນແບບຂອງເພິ່ນເພື່ອເປັນຄ່າໄຖ່ໃຫ້ພວກເຮົາ. (ອ່ານມັດທາຍ 20:28) ຄ່າໄຖ່ແມ່ນຫຍັງ? ຄ່າໄຖ່ແມ່ນສິ່ງທີ່ຈ່າຍເພື່ອໄຖ່ຄົນຫຼືສິ່ງຂອງກັບຄືນມາ. ແທ້ໆແລ້ວພະເຢຊູມີໂອກາດທີ່ຈະມີຊີວິດຢູ່ຕະຫຼອດໄປໄດ້ເທິງໂລກນີ້ເພາະເພິ່ນເປັນມະນຸດທີ່ສົມບູນແບບ ແຕ່ເພິ່ນເຕັມໃຈສະລະຊີວິດເພື່ອໃຫ້ພວກເຮົາທຸກຄົນມີໂອກາດທີ່ຈະໄດ້ຮັບທຸກສິ່ງທຸກຢ່າງທີ່ອາດາມກັບເອວາເຮັດໃຫ້ສູນເສຍໄປກັບຄືນມາ. ພະເຢຊູເຮັດໃຫ້ເຫັນວ່າເພິ່ນກັບພະເຢໂຫວາຮັກພວກເຮົາຫຼາຍ. ບົດນີ້ຈະຊ່ວຍໃຫ້ເຮົາຮູ້ສຶກຂອບໃຈຫຼາຍຂຶ້ນທີ່ພະເຢຊູສະລະຊີວິດເພື່ອເຮົາ.

1. ການເສຍຊີວິດຂອງພະເຢຊູມີປະໂຫຍດຫຍັງກັບເຮົາໃນທຸກມື້ນີ້?

ຍ້ອນເຮົາເປັນຄົນບາບ ເລີຍບໍ່ງ່າຍທີ່ເຮົາຈະເຮັດສິ່ງທີ່ຖືກຕ້ອງສະເໝີ ອາດມີຫຼາຍເທື່ອທີ່ເຮົາເຮັດໃຫ້ພະເຢໂຫວາເສຍໃຈ. ແຕ່ຖ້າເຮົາຮູ້ສຶກເສຍໃຈແທ້ໆໃນສິ່ງທີ່ເຮັດລົງໄປແລະອະທິດຖານຂໍການອະໄພຈາກພະເຢໂຫວາໃນນາມພະເຢຊູ ແລ້ວພະຍາຍາມເຕັມທີທີ່ຈະບໍ່ເຮັດຜິດຊ້ຳອີກ ເຮົາກໍຈະໄດ້ເປັນໝູ່ສະໜິດກັບພະເຢໂຫວາ. (1 ໂຢຮັນ 2:1) ຄຳພີໄບເບິນບອກວ່າ: “ພະຄລິດຕາຍເທື່ອດຽວເພື່ອໄຖ່ບາບ ເຊິ່ງເປັນການຕາຍຂອງຄົນດີເພື່ອຄົນຊົ່ວ ເພື່ອເພິ່ນຈະຊ່ວຍພວກເຈົ້າໃຫ້ໄປເຖິງພະເຈົ້າ.”—1 ເປໂຕ 3:18

2. ການເສຍຊີວິດຂອງພະເຢຊູມີປະໂຫຍດຫຍັງກັບເຮົາໃນອະນາຄົດ?

ພະເຢໂຫວາສົ່ງພະເຢຊູມາສະລະຊີວິດມະນຸດສົມບູນແບບ “ເພື່ອທຸກຄົນທີ່ສະແດງຄວາມເຊື່ອໃນ [ພະເຢຊູ] ຈະບໍ່ຖືກທຳລາຍ ແຕ່ຈະມີຊີວິດຕະຫຼອດໄປ.” (ໂຢຮັນ 3:16) ເຮົາຮູ້ສຶກຂອບໃຈໃນສິ່ງທີ່ພະເຢຊູເຮັດເພື່ອເຮົາ ອີກບໍ່ດົນພະເຢໂຫວາຈະເຮັດໃຫ້ຜົນເສຍຫາຍທຸກຢ່າງທີ່ເກີດຈາກການບໍ່ເຊື່ອຟັງຂອງອາດາມໝົດໄປ. ຖ້າເຮົາສະແດງຄວາມເຊື່ອໃນຄ່າໄຖ່ຂອງພະເຢຊູ ເຮົາກໍຈະໄດ້ມີຊີວິດທີ່ມີຄວາມສຸກຕະຫຼອດໄປເທິງໂລກທີ່ເປັນສວນອຸທິຍານ!—ເອຊາອີ 65:21-23

ຮຽນຮູ້ຫຼາຍຂຶ້ນ

ເປັນຫຍັງພະເຢຊູຈຶ່ງຕ້ອງມາເສຍຊີວິດ ແລະເຮົາຈະໄດ້ປະໂຫຍດຫຍັງຈາກການເສຍສະລະຂອງເພິ່ນ.

3. ການເສຍຊີວິດຂອງພະເຢຊູເຮັດໃຫ້ເຮົາພົ້ນຈາກບາບແລະຄວາມຕາຍ

ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ເປັນຫຍັງພະເຍຊູຈຶ່ງຕາຍ?—ຕອນທີ 1 (2:01)

ການບໍ່ເຊື່ອຟັງພະເຈົ້າເຮັດໃຫ້ອາດາມພາດໂອກາດຫຍັງ?

ອ່ານໂຣມ 5:12 ແລ້ວລົມກັນກ່ຽວກັບຄຳຖາມຕໍ່ໄປນີ້:

ການເຮັດບາບຂອງອາດາມສົ່ງຜົນແນວໃດກັບພວກເຮົາ?

ອ່ານໂຢຮັນ 3:16 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງພະເຢໂຫວາຈຶ່ງສົ່ງລູກຊາຍຂອງເພິ່ນລົງມາເທິງໂລກ?

ກ. ອາດາມເປັນມະນຸດສົມບູນແບບແຕ່ລາວບໍ່ເຊື່ອຟັງພະເຈົ້າ ລາວເລີຍເຮັດໃຫ້ເຮົາທຸກຄົນເກີດມາເປັນຄົນບາບແລະຕ້ອງຕາຍ
ຂ. ພະເຢຊູເປັນມະນຸດສົມບູນແບບທີ່ເຊື່ອຟັງພະເຈົ້າແລະເພິ່ນເຮັດໃຫ້ເຮົາທຸກຄົນມີໂອກາດທີ່ຈະເປັນມະນຸດສົມບູນແບບແລະມີຊີວິດຕະຫຼອດໄປ

4. ການເສຍຊີວິດຂອງພະເຢຊູຈະເປັນປະໂຫຍດກັບຄົນທັງໂລກ

ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ເປັນຫຍັງພະເຍຊູຈຶ່ງຕາຍ?—ຕອນທີ 2 (2:00)

ການຕາຍຂອງຄົນຜູ້ດຽວຈະຊ່ວຍຄົນທັງໂລກໄດ້ແນວໃດ?

ອ່ານ 1 ຕີໂມທຽວ 2:5, 6 ແລ້ວລົມກັນກ່ຽວກັບຄຳຖາມຕໍ່ໄປນີ້:

ອາດາມເປັນມະນຸດສົມບູນແບບ ເມື່ອລາວເຮັດບາບເຮົາທຸກຄົນທີ່ເກີດມາກໍເລີຍເປັນຄົນບາບແລະຕ້ອງຕາຍ. ພະເຢຊູກໍເປັນມະນຸດສົມບູນແບບຄືອາດາມ. ດັ່ງນັ້ນ ເພິ່ນສາມາດເຮັດຫຍັງເພື່ອເຮົາໄດ້?

5. ຄ່າໄຖ່ເປັນຂອງຂວັນທີ່ພະເຢໂຫວາໃຫ້ເຈົ້າ

ຄົນທີ່ເປັນໝູ່ກັບພະເຢໂຫວາເບິ່ງວ່າຄ່າໄຖ່ເປັນຂອງຂວັນທີ່ພະເຢໂຫວາຕັ້ງໃຈໃຫ້ກັບລາວ. ໃຫ້ເຮົາມາເບິ່ງຕົວຢ່າງໜຶ່ງນຳກັນ ອ່ານຄາລາເຕຍ 2:20 ແລ້ວລົມກັນກ່ຽວກັບຄຳຖາມຕໍ່ໄປນີ້:

ອັກຄະສາວົກໂປໂລເວົ້າຫຍັງທີ່ເຮັດໃຫ້ຮູ້ວ່າລາວເບິ່ງວ່າຄ່າໄຖ່ເປັນຂອງຂວັນທີ່ພະເຢໂຫວາໃຫ້ລາວເປັນສ່ວນໂຕ?

ອາດາມເຮັດບາບລາວເລີຍຕ້ອງຕາຍ ແລະທີ່ຈິງລູກຫຼານຂອງລາວທຸກຄົນກໍຕ້ອງຕາຍນຳ. ແຕ່ພະເຢໂຫວາສົ່ງລູກຊາຍຂອງເພິ່ນມາສະລະຊີວິດເພື່ອເຮັດໃຫ້ເຈົ້າມີໂອກາດທີ່ຈະໄດ້ຊີວິດຕະຫຼອດໄປ.

ຕອນທີ່ເຈົ້າອ່ານຂໍ້ຄຳພີຕໍ່ໄປນີ້ ໃຫ້ລອງຄິດເບິ່ງວ່າພະເຢໂຫວາຈະຮູ້ສຶກແນວໃດທີ່ເຫັນລູກຊາຍຂອງເພິ່ນຕ້ອງທຸກທໍລະມານ. ອ່ານໂຢຮັນ 19:1-7, 16-18 ແລ້ວລົມກັນກ່ຽວກັບຄຳຖາມຕໍ່ໄປນີ້: