ບົດທີ 38
ເຫັນຄຸນຄ່າຊີວິດທີ່ເປັນຂອງຂວັນຈາກພະເຈົ້າ
ເຮົາມີຊີວິດຢູ່ ເຮົາກໍເລີຍສາມາດເຮັດຫຼາຍຢ່າງທີ່ເຮັດໃຫ້ມີຄວາມສຸກໄດ້. ແມ່ນແຕ່ຕອນທີ່ເຮົາຕ້ອງເຈິກັບບັນຫາ ກໍຍັງມີບາງຢ່າງໃນຊີວິດທີ່ເຮັດໃຫ້ເຮົາມີຄວາມສຸກ. ແລ້ວເຮົາຈະເຮັດແນວໃດເພື່ອສະແດງວ່າເຮົາເຫັນຄ່າຊີວິດ? ແລະອັນໃດເປັນເຫດຜົນສຳຄັນທີ່ສຸດທີ່ເຮົາຈະເຮັດແບບນັ້ນ?
1. ເປັນຫຍັງເຮົາຄວນເຫັນຄ່າຊີວິດ?
ເຮົາຄວນເຫັນຄ່າຊີວິດເພາະຊີວິດເປັນຂອງຂວັນທີ່ພະເຢໂຫວາໃຫ້ເຮົາທຸກຄົນ. ພະເຢໂຫວາສ້າງສິ່ງທີ່ມີຊີວິດທຸກຢ່າງ ຄຳພີໄບເບິນເລີຍບອກວ່າ “ພະອົງເປັນບໍ່ເກີດຂອງຊີວິດ.” (ຄຳເພງ 36:9, ລ.ມ.) “ພະອົງເປັນຜູ້ທີ່ໃຫ້ຊີວິດ ລົມຫາຍໃຈ ແລະທຸກສິ່ງທຸກຢ່າງແກ່ມະນຸດທຸກຄົນ.” (ກິດຈະການ 17:25, 28) ພະເຢໂຫວາໃຫ້ເຮົາມີທຸກຢ່າງທີ່ຈຳເປັນເພື່ອເຮົາຈະມີຊີວິດຢູ່ໄດ້. ບໍ່ແມ່ນແຕ່ເທົ່ານັ້ນ ເພິ່ນຍັງໃຫ້ອີກຫຼາຍຢ່າງເພື່ອເຮົາຈະມີຊີວິດທີ່ມີຄວາມສຸກນຳ.—ອ່ານກິດຈະການ 14:17
2. ເຮົາຈະເຮັດແນວໃດເພື່ອໃຫ້ພະເຢໂຫວາເຫັນວ່າເຮົາເຫັນຄ່າຊີວິດທີ່ເປັນຂອງຂວັນຈາກເພິ່ນ?
ພະເຢໂຫວາສົນໃຈເຈົ້າຕັ້ງແຕ່ຕອນທີ່ເຈົ້າຍັງຢູ່ໃນທ້ອງແມ່. ດາວິດທີ່ເປັນຜູ້ນະມັດສະການພະເຢໂຫວາອະທິດຖານເຖິງເພິ່ນວ່າ: “ພະອົງເຫັນຂ້ອຍຕອນທີ່ຍັງເປັນໂຕອ່ອນ.” (ຄຳເພງ 139:16, ລ.ມ.) ພະເຢໂຫວາເບິ່ງວ່າຊີວິດຂອງເຈົ້າມີຄ່າຫຼາຍແທ້ໆ. (ອ່ານມັດທາຍ 10:29-31) ພະເຢໂຫວາຈະເສຍໃຈຫຼາຍຖ້າມີໃຜເຮັດໃຫ້ຄົນອື່ນເສຍຊີວິດ ຫຼືຈົບຊີວິດໂຕເອງ. a (ອົບພະຍົບ 20:13) ແລະເພິ່ນກໍເສຍໃຈຄືກັນຖ້າເຮົາເຮັດໃຫ້ຊີວິດຂອງໂຕເອງຫຼືຊີວິດຂອງຄົນອື່ນຕົກຢູ່ໃນອັນຕະລາຍຍ້ອນເຮົາບໍ່ລະວັງ. ສະນັ້ນ ຖ້າເຮົາໃຊ້ຊີວິດຢ່າງລະມັດລະວັງແລະຄິດເຖິງຄວາມປອດໄພຂອງຄົນອື່ນ ກໍສະແດງວ່າເຮົາເຫັນຄ່າຊີວິດທີ່ເປັນຂອງຂວັນຈາກພະເຈົ້າ.
ຮຽນຮູ້ຫຼາຍຂຶ້ນ
ມາເບິ່ງວ່າເຮົາຈະເຮັດຫຍັງໄດ້ແດ່ເພື່ອສະແດງວ່າເຮົາເຫັນຄ່າຊີວິດທີ່ເປັນຂອງຂວັນຈາກພະເຈົ້າ.
3. ເບິ່ງແຍງສຸຂະພາບຂອງເຈົ້າ
ຄລິດສະຕຽນທີ່ອຸທິດຕົວແລ້ວຈະເຮັດທຸກຢ່າງທີ່ພະເຢໂຫວາຢາກໃຫ້ເຮັດແລະໃຊ້ທັງຊີວິດເພື່ອຮັບໃຊ້ເພິ່ນ. ຄືກັບວ່າເຂົາເຈົ້າຖວາຍຮ່າງກາຍເປັນເຄື່ອງບູຊາໃຫ້ກັບເພິ່ນ. ອ່ານໂຣມ 12:1, 2 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ຈາກຂໍ້ຄຳພີທີ່ອ່ານໄປ ອັນໃດເປັນເຫດຜົນທີ່ເຈົ້າຄວນເບິ່ງແຍງສຸຂະພາບໂຕເອງ?
-
ເຈົ້າຈະເຮັດຫຍັງໄດ້ແດ່ເພື່ອຈະເບິ່ງແຍງສຸຂະພາບຂອງໂຕເອງ?
4. ຄິດເຖິງຄວາມປອດໄພຂອງເຈົ້າເອງແລະຂອງຄົນອື່ນ
ຄຳພີໄບເບິນບອກເຮົາໃຫ້ລະວັງທີ່ຈະບໍ່ເຮັດໃຫ້ຄົນອື່ນຫຼືໂຕເຮົາເອງໄດ້ຮັບບາດເຈັບຫຼືເສຍຊີວິດ. ເປີດວິດີໂອເພື່ອເບິ່ງວ່າເຮົາຈະເຮັດສິ່ງຕ່າງໆຢ່າງປອດໄພໄດ້ແນວໃດ.
ອ່ານສຸພາສິດ 22:3 ແລ້ວລົມກັນວ່າເຈົ້າຈະເຮັດແນວໃດເພື່ອໂຕເຈົ້າເອງແລະຄົນອື່ນຈະປອດໄພ . . .
-
ເມື່ອຢູ່ເຮືອນ.
-
ເມື່ອຢູ່ບ່ອນເຮັດວຽກ.
-
ເມື່ອຫຼິ້ນກິລາ.
-
ເມື່ອເດີນທາງ ບໍ່ວ່າເຈົ້າຈະເປັນຄົນຂັບຫຼືບໍ່ກໍຕາມ.
5. ເບິ່ງວ່າຊີວິດຂອງເດັກນ້ອຍທີ່ຍັງບໍ່ທັນໄດ້ເກີດມາມີຄ່າ
ດາວິດບອກວ່າພະເຢໂຫວາສົນໃຈທຸກສິ່ງທຸກຢ່າງທີ່ເກີດຂຶ້ນກັບເດັກນ້ອຍທີ່ຍັງຢູ່ໃນທ້ອງຂອງແມ່. ອ່ານຄຳເພງ 139:13-17 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ພະເຢໂຫວາຖືວ່າຊີວິດຄົນເຮົາເລີ່ມຕົ້ນຕອນໃດ ຕັ້ງແຕ່ຕອນທີ່ເຮົາຍັງຢູ່ໃນທ້ອງຫຼືຕອນທີ່ເຮົາເກີດ?
ກົດໝາຍທີ່ພະເຢໂຫວາໃຫ້ກັບຄົນອິດສະຣາເອນໃນສະໄໝກ່ອນຊ່ວຍປົກປ້ອງຜູ້ຍິງທີ່ກຳລັງຖືພາແລະລູກທີ່ຍັງບໍ່ທັນໄດ້ເກີດມາ. ອ່ານອົບພະຍົບ 21:22, 23 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ຖ້າມີຄົນເຮັດໃຫ້ເດັກນ້ອຍທີ່ຢູ່ໃນທ້ອງຕາຍໂດຍບໍ່ໄດ້ຕັ້ງໃຈ ພະເຢໂຫວາຈະຮູ້ສຶກແນວໃດ?
-
ແລ້ວເຈົ້າຄິດວ່າພະເຢໂຫວາຈະຮູ້ສຶກແນວໃດຖ້າມີຄົນຕັ້ງໃຈເຮັດໃຫ້ເດັກນ້ອຍທີ່ຢູ່ໃນທ້ອງຕ້ອງຕາຍ? b
-
ຫຼັງຈາກທີ່ເຈົ້າໄດ້ຮຽນຮູ້ກ່ຽວກັບຄວາມຄິດຂອງພະເຈົ້າໃນເລື່ອງຊີວິດແລ້ວ ເຈົ້າຮູ້ສຶກແນວໃດ?
ເຖິງວ່າຜູ້ຍິງຄົນໜຶ່ງເບິ່ງວ່າຊີວິດມີຄ່າ ແຕ່ກໍອາດມີບາງຢ່າງທີ່ເຮັດໃຫ້ລາວຮູ້ສຶກວ່າບໍ່ມີທາງເລືອກອື່ນນອກຈາກເອົາລູກອອກ. ອ່ານເອຊາອີ 41:10 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ຖ້າຜູ້ຍິງຄົນໜຶ່ງຖືກກົດດັນໃຫ້ເອົາລູກອອກ ລາວໜ້າຈະຂໍຄວາມຊ່ວຍເຫຼືອຈາກໃຜ? ຍ້ອນຫຍັງ?
ບາງຄົນເວົ້າວ່າ: “ບາງຄັ້ງກໍມີເຫດຜົນບາງຢ່າງທີ່ເຮັດໃຫ້ຜູ້ຍິງຕ້ອງເອົາລູກອອກ.”
-
ອັນໃດເຮັດໃຫ້ເຈົ້າໝັ້ນໃຈວ່າພະເຢໂຫວາເບິ່ງວ່າຊີວິດຂອງທັງແມ່ແລະລູກທີ່ຢູ່ໃນທ້ອງມີຄ່າ?
ສະຫຼຸບ
ຊີວິດຂອງເຮົາແລະຊີວິດຂອງຄົນອື່ນເປັນສິ່ງທີ່ມີຄ່າ. ຄຳພີໄບເບິນບອກໃຫ້ເຮົາຮັກ ເຫັນຄ່າ ແລະເບິ່ງແຍງຊີວິດທີ່ເປັນຂອງຂວັນຈາກພະເຢໂຫວາ.
ຄຳຖາມທົບທວນ
-
ເປັນຫຍັງພະເຢໂຫວາຖືວ່າຊີວິດຂອງມະນຸດມີຄ່າຫຼາຍ?
-
ພະເຢໂຫວາຈະຮູ້ສຶກແນວໃດຖ້າມີໃຜຕັ້ງໃຈເຮັດໃຫ້ຄົນອື່ນເສຍຊີວິດ?
-
ເຈົ້າເຫັນຄ່າຊີວິດທີ່ເປັນຂອງຂວັນຈາກພະເຈົ້າບໍ? ຍ້ອນຫຍັງ?
ເບິ່ງເພີ່ມເຕີມ
ພະເຢໂຫວາໃຫ້ຊີວິດທີ່ເປັນຂອງຂວັນກັບເຮົາ ເຮົາຈະຂອບໃຈເພິ່ນໄດ້ແນວໃດ?
ພະເຈົ້າຈະໃຫ້ອະໄພຜູ້ຍິງທີ່ເຄີຍເອົາລູກອອກບໍ?
“ຄຳພີໄບເບິນບອກແນວໃດກ່ຽວກັບການເອົາລູກອອກ?” (ບົດຄວາມໃນເວັບໄຊ)
ຄວາມຄິດຂອງພະເຈົ້າໃນເລື່ອງຊີວິດຄວນມີຜົນຕໍ່ເຮົາໃນການເລືອກຫຼິ້ນກິລາບາງຢ່າງ.
“‘ກິລາທີ່ສ່ຽງຊີວິດ’ ເຈົ້າຄວນສ່ຽງບໍ?” (ຕື່ນເຖີດ! 8 ຕຸລາ 2000)
ຄຳພີໄບເບິນຈະຊ່ວຍຄົນທີ່ຄິດຈະຂ້າໂຕຕາຍໄດ້ແນວໃດ?
“ຂ້ອຍຢາກຕາຍ—ຄຳພີໄບເບິນຊ່ວຍໃຫ້ເຊົາຄິດຢາກຂ້າໂຕຕາຍໄດ້ບໍ?” (ບົດຄວາມໃນເວັບໄຊ)
a ບາງຄົນຮູ້ສຶກໂສກເສົ້າເສຍໃຈຈົນຄືກັບຫົວໃຈແຕກສະຫຼາຍ ພະເຢໂຫວາເປັນຫ່ວງເຂົາເຈົ້າຫຼາຍ. (ຄຳເພງ 34:18) ເພິ່ນເຂົ້າໃຈວ່າຄວາມຮູ້ສຶກເຈັບປວດແບບນັ້ນອາດເຮັດໃຫ້ບາງຄົນຢາກຕາຍ ແຕ່ເພິ່ນເປັນຫ່ວງແລະຢາກຊ່ວຍເຂົາເຈົ້າແທ້ໆ. ເພື່ອເບິ່ງວ່າພະເຢໂຫວາຊ່ວຍບາງຄົນແນວໃດ ຂໍໃຫ້ອ່ານບົດຄວາມ “ຂ້ອຍຢາກຕາຍ—ຄຳພີໄບເບິນຊ່ວຍໃຫ້ເຊົາຄິດຢາກຂ້າໂຕຕາຍໄດ້ບໍ?” ທີ່ຢູ່ໃນສ່ວນເບິ່ງເພີ່ມເຕີມຂອງບົດນີ້.
b ຄົນທີ່ເຄີຍເອົາລູກອອກບໍ່ຕ້ອງຮູ້ສຶກຜິດຢູ່ຕະຫຼອດ ເພາະພະເຢໂຫວາໃຫ້ອະໄພເຂົາເຈົ້າໄດ້. ເບິ່ງບົດຄວາມ “ຄຳພີໄບເບິນບອກແນວໃດກ່ຽວກັບການເອົາລູກອອກ?” ທີ່ຢູ່ໃນສ່ວນເບິ່ງເພີ່ມເຕີມຂອງບົດນີ້.
ເລື່ອງທີ່ເຈົ້າອາດຈະມັກ
ຄຳຖາມທີ່ພົບເລື້ອຍໆ
ເລື່ອງທີ່ໜ້າຮູ້ກ່ຽວກັບການຮຽນຄຳພີໄບເບິນກັບພະຍານພະເຢໂຫວາ
ເມື່ອຮຽນຄຳພີໄບເບິນກັບພະຍານພະເຢໂຫວາ ເຈົ້າຢາກໃຊ້ຄຳພີໄບເບິນສະບັບໃດກໍໄດ້. ເຈົ້າຢາກຊວນຄອບຄົວຫຼືໝູ່ມາຮຽນນຳກໍໄດ້.
