ບົດທີ 44

ພະເຈົ້າພໍໃຈການສະຫຼອງທຸກຢ່າງບໍ?

ເປີດ

ພະເຢໂຫວາຢາກໃຫ້ເຮົາມີຄວາມສຸກແລະກໍຢາກໃຫ້ເຮົາລ້ຽງສະຫຼອງກັນເປັນບາງເທື່ອ. ແຕ່ເພິ່ນພໍໃຈການສະຫຼອງທຸກຢ່າງບໍ? ແລະເຮົາຈະສະແດງໃຫ້ເຫັນແນວໃດວ່າເຮົາຮັກເພິ່ນເມື່ອຕ້ອງຕັດສິນໃຈກ່ຽວກັບການສະຫຼອງຕ່າງໆ?

1. ເປັນຫຍັງຈຶ່ງມີການສະຫຼອງຫຼາຍຢ່າງທີ່ເຮັດໃຫ້ພະເຢໂຫວາບໍ່ພໍໃຈ?

ເຈົ້າອາດຈະແປກໃຈກໍໄດ້ຖ້າຮູ້ວ່າການສະຫຼອງຫຼາຍຢ່າງມາຈາກຄຳສອນທີ່ຂັດແຍ່ງກັບຄຳພີໄບເບິນ ແລະມາຈາກສາສະໜາທີ່ສອນຜິດໆ. ການສະຫຼອງເຫຼົ່ານັ້ນອາດກ່ຽວຂ້ອງກັບເລື່ອງໄສຍະສາດຫຼືເລື່ອງວິນຍານຄົນຕາຍ. ແລະທີ່ມາຂອງການສະຫຼອງບາງຢ່າງກໍກ່ຽວຂ້ອງກັບຄວາມເຊື່ອເລື່ອງໂຊກລາບ. (ເອຊາອີ 65:11) ພະເຢໂຫວາເຕືອນຄົນທີ່ນະມັດສະການເພິ່ນໃຫ້ ‘ແຍກຢູ່ຕ່າງຫາກ ແລະເຊົາແຕະຕ້ອງສິ່ງທີ່ບໍ່ສະອາດ.’—2 ໂກຣິນໂທ 6:17 a

2. ພະເຢໂຫວາຮູ້ສຶກແນວໃດກັບການສະຫຼອງທີ່ຍົກຍ້ອງມະນຸດ?

ພະເຢໂຫວາເຕືອນເຮົາບໍ່ໃຫ້ “ໄວ້ໃຈມະນຸດ.” (ອ່ານເຢເຣມີ 17:5, ລ.ມ.) ການສະຫຼອງບາງຢ່າງກ່ຽວຂ້ອງກັບການຍົກຍ້ອງຜູ້ນຳ ບຸກຄົນສຳຄັນ ສັນຍະລັກຂອງຊາດ ຫຼືສະຫຼອງມື້ທີ່ໄດ້ຮັບເອກະລາດ. (1 ໂຢຮັນ 5:21) ສ່ວນການສະຫຼອງບາງຢ່າງກໍກ່ຽວຂ້ອງກັບເຫດການສຳຄັນທາງການເມືອງຫຼືທາງສັງຄົມ. ລອງຄິດເບິ່ງວ່າພະເຢໂຫວາຈະຮູ້ສຶກແນວໃດຖ້າເຮົາຍົກຍ້ອງບຸກຄົນຫຼືອົງກອນຕ່າງໆຫຼາຍເກີນໄປ ໂດຍສະເພາະຖ້າເຂົາເຈົ້າສົ່ງເສີມໃຫ້ເຮັດສິ່ງທີ່ພະເຢໂຫວາບໍ່ມັກ.

3. ພະເຈົ້າບໍ່ຍອມຮັບການສະຫຼອງທີ່ມີການເຮັດສິ່ງທີ່ບໍ່ດີຫຍັງແດ່?

ຄຳພີໄບເບິນບອກວ່າຜິດທີ່ຈະ “ດື່ມເຫຼົ້າຫຼາຍເກີນໄປ ກິນລ້ຽງເຮຮາຈົນສຸດຂີດ [ແລະ] ແຂ່ງຂັນກັນດື່ມເຫຼົ້າ.” (1 ເປໂຕ 4:3) ໃນການສະຫຼອງບາງຢ່າງຜູ້ຄົນບໍ່ຄວບຄຸມໂຕເອງແລະເຮັດຜິດສິນລະທຳ. ຖ້າເຮົາຢາກເປັນໝູ່ກັບພະເຢໂຫວາ ເຮົາຕ້ອງບໍ່ເຂົ້າໄປຫຍຸ້ງກັບການກະທຳທີ່ບໍ່ສະອາດທາງດ້ານສິນລະທຳ.

ຮຽນຮູ້ຫຼາຍຂຶ້ນ

ຖ້າເຈົ້າຕ້ອງຕັດສິນໃຈກ່ຽວກັບເທດສະການແລະການສະຫຼອງຕ່າງໆ ເຈົ້າຈະຕັດສິນໃຈໃນແບບທີ່ພະເຢໂຫວາພໍໃຈໄດ້ແນວໃດ.

4. ບໍ່ເຂົ້າຮ່ວມການສະຫຼອງທີ່ພະເຢໂຫວາບໍ່ພໍໃຈ

ອ່ານເອເຟໂຊ 5:10 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຖ້າເຮົາກຳລັງຕັດສິນໃຈວ່າຈະເຂົ້າຮ່ວມການສະຫຼອງບາງຢ່າງຫຼືບໍ່ ເຮົາຕ້ອງແນ່ໃຈເລື່ອງຫຍັງ?
ໃນປະເທດທີ່ເຮົາຢູ່ມີເທດສະການແລະການສະຫຼອງຫຍັງແດ່?
ເຈົ້າຄິດວ່າພະເຢໂຫວາພໍໃຈເທດສະການແລະການສະຫຼອງເຫຼົ່ານັ້ນບໍ?

ໃຫ້ເຮົາມາເບິ່ງນຳກັນວ່າພະເຢໂຫວາຄິດແນວໃດກັບການສະຫຼອງວັນເກີດ. ໃນຄຳພີໄບເບິນບໍ່ໄດ້ບອກເລີຍວ່າຄົນທີ່ນະມັດສະການພະເຢໂຫວາຈັດງານວັນເກີດ ແຕ່ເວົ້າເຖິງງານວັນເກີດຂອງ 2 ຄົນທີ່ບໍ່ໄດ້ນະມັດສະການເພິ່ນ. ອ່ານປະຖົມມະການ 40:20-22 ແລະມັດທາຍ 14:6-10. ແລ້ວລົມກັນກ່ຽວກັບຄຳຖາມຕໍ່ໄປນີ້:

ມີເລື່ອງບໍ່ດີຫຍັງທີ່ເກີດຂຶ້ນໃນງານວັນເກີດທັງ 2 ງານ?
ຈາກ 2 ເລື່ອງທີ່ຄຳພີໄບເບິນບອກ ເຈົ້າຄິດວ່າພະເຢໂຫວາຮູ້ສຶກແນວໃດກັບການສະຫຼອງວັນເກີດ?

ເຈົ້າອາດຈະຍັງສົງໄສວ່າ ‘ພະເຢໂຫວາຈະສົນໃຈແທ້ໆບໍວ່າຂ້ອຍຈະເຂົ້າຮ່ວມຫຼືບໍ່ເຂົ້າຮ່ວມງານສະຫຼອງວັນເກີດ ຫຼືງານສະຫຼອງຕ່າງໆທີ່ຂັດກັບສິ່ງທີ່ຄຳພີໄບເບິນບອກ?’ ອ່ານອົບພະຍົບ 32:1-8. ແລ້ວ ເປີດວິດີໂອແລະລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ວັນພັກແລະການສະຫຼອງທີ່ພະເຈົ້າບໍ່ພໍໃຈ (5:07)

ເຮົາຕ້ອງແນ່ໃຈວ່າພະເຢໂຫວາພໍໃຈໃນສິ່ງທີ່ເຮົາເຮັດ ເຈົ້າຄິດວ່ານີ້ເປັນເລື່ອງສຳຄັນບໍ? ຍ້ອນຫຍັງເຈົ້າຈຶ່ງຄິດແບບນັ້ນ?
ແລ້ວເຮົາຈະເຮັດແບບນັ້ນໄດ້ແນວໃດ?

ຄຳຖາມທີ່ຊ່ວຍໃຫ້ຮູ້ວ່າການສະຫຼອງແບບໃດທີ່ພະເຈົ້າບໍ່ພໍໃຈ

ການສະຫຼອງນີ້ກ່ຽວຂ້ອງກັບຄວາມເຊື່ອທີ່ຂັດແຍ່ງກັບຄຳສອນໃນຄຳພີໄບເບິນບໍ? ເຮົາຈະຮູ້ໄດ້ ຖ້າເຮົາເບິ່ງວ່າການສະຫຼອງນັ້ນມີທີ່ມາແນວໃດ.
ເປັນການສະຫຼອງທີ່ຍົກຍ້ອງບຸກຄົນ ອົງກອນ ຫຼືສັນຍະລັກຂອງຊາດບໍ? ເຮົາຍົກຍ້ອງພະເຢໂຫວາຜູ້ດຽວແລະໄວ້ໃຈວ່າເພິ່ນເທົ່ານັ້ນທີ່ຈະມາແກ້ໄຂບັນຫາທຸກຢ່າງຂອງໂລກໃຫ້ໝົດໄປ.
ການສະຫຼອງນີ້ມີທຳນຽມແລະການກະທຳທີ່ຂັດກັບສິ່ງທີ່ຄຳພີໄບເບິນສອນບໍ? ເຮົາຕ້ອງສະອາດທາງດ້ານສິນລະທຳຢູ່ສະເໝີ.

5. ຊ່ວຍຄົນອື່ນໃຫ້ເຂົ້າໃຈໃນສິ່ງທີ່ເຈົ້າເຊື່ອ

ອາດບໍ່ແມ່ນເລື່ອງງ່າຍຖ້າເຈົ້າຖືກກົດດັນໃຫ້ເຂົ້າຮ່ວມການສະຫຼອງທີ່ພະເຢໂຫວາບໍ່ພໍໃຈ. ແຕ່ເຈົ້າຈະອະທິບາຍໄດ້ວ່າເປັນຫຍັງເຈົ້າຈຶ່ງບໍ່ເຂົ້າຮ່ວມ ໃຫ້ຄິດດີໆວ່າຈະເວົ້າຕອນໃດ ຈະເວົ້າແນວໃດ ແລະໃຫ້ຄ່ອຍໆອະທິບາຍ. ແຕ່ເຈົ້າຈະເຮັດແບບນັ້ນໄດ້ແນວໃດ ໃຫ້ເຮົາມາເບິ່ງຕົວຢ່າງນຳກັນ ເປີດວິດີໂອ.

ວິດີໂອ: ອະທິບາຍຄວາມເຊື່ອຂອງເຈົ້າຢ່າງສຸພາບ (2:01)

ອ່ານມັດທາຍ 7:12 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຈາກຂໍ້ຄຳພີທີ່ອ່ານໄປ ຖ້າຄົນໃນຄອບຄົວຂອງເຈົ້າບໍ່ໄດ້ນະມັດສະການພະເຢໂຫວາ ເຈົ້າຄວນຫ້າມບໍ່ໃຫ້ເຂົາເຈົ້າສະຫຼອງເທດສະການຕ່າງໆບໍ?
ເຖິງເຈົ້າຈະບໍ່ໄດ້ເຂົ້າຮ່ວມການສະຫຼອງບາງຢ່າງກັບຄົນໃນຄອບຄົວ ແຕ່ເຈົ້າຈະເຮັດຫຍັງໄດ້ແດ່ເພື່ອໃຫ້ເຂົາເຈົ້າໝັ້ນໃຈວ່າເຈົ້າຍັງຮັກແລະຫ່ວງໃຍເຂົາເຈົ້າ?

6. ພະເຢໂຫວາຢາກໃຫ້ເຮົາມີຄວາມສຸກ

ພະເຢໂຫວາຢາກໃຫ້ເຮົາໃຊ້ເວລາກັບຄອບຄົວແລະໝູ່ຄູ່ ແລະເພິ່ນຢາກໃຫ້ເຮົາມີຄວາມສຸກກັບເຂົາເຈົ້າ. ອ່ານຜູ້ເທສະໜາປ່າວປະກາດ 8:15 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຈາກຂໍ້ຄຳພີນີ້ ເຮົາຮູ້ໄດ້ແນວໃດວ່າພະເຢໂຫວາຢາກໃຫ້ເຮົາມີຄວາມສຸກ?

ຕອນທີ່ຄົນຂອງພະເຢໂຫວາຢູ່ນຳກັນ ເພິ່ນກໍຢາກໃຫ້ເຂົາເຈົ້າມີຄວາມສຸກ. ເປີດວິດີໂອເພື່ອເບິ່ງວ່າເລື່ອງນີ້ເປັນຈິງແນວໃດໃນການປະຊຸມນານາຊາດຂອງພະຍານພະເຢໂຫວາ.

ວິດີໂອ: ສະແດງນ້ຳໃຈຕ້ອນຮັບແຂກໃນການປະຊຸມນານາຊາດ (5:40)

ອ່ານຄາລາເຕຍ 6:10 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຖ້າເຮົາບໍ່ໄປເຂົ້າຮ່ວມສະຫຼອງເທດສະການກັບຄົນອື່ນ ສະແດງວ່າເຮົາບໍ່ໄດ້ “ເຮັດດີ” ກັບເຂົາເຈົ້າບໍ?
ລະຫວ່າງການໃຫ້ຂອງຂວັນໃນຊ່ວງເທດສະການເທົ່ານັ້ນກັບການໃຫ້ຂອງຂວັນຕອນໃດກໍໄດ້ທີ່ເຮົາຢາກໃຫ້ ແບບໃດຈະເຮັດໃຫ້ເຮົາມີຄວາມສຸກຫຼາຍກວ່າ?
ບາງເທື່ອພະຍານພະເຢໂຫວາກໍເຮັດບາງຢ່າງທີ່ພິເສດໃຫ້ລູກແລະໃຫ້ຂອງຂວັນລູກ. ຖ້າເຈົ້າມີລູກ ເຈົ້າຈະເຮັດຫຍັງທີ່ພິເສດໃຫ້ເຂົາເຈົ້າໄດ້ແດ່?

ບາງຄົນເວົ້າວ່າ: “ບໍ່ຕ້ອງໄປສົນໃຈດອກວ່າທີ່ໄປທີ່ມາຂອງເທດສະການເປັນແນວໃດ. ໄດ້ຢູ່ກັບຄອບຄົວແລະໝູ່ຄູ່ກໍດີແລ້ວ.”

ເຈົ້າຈະຕອບແນວໃດ?

ສະຫຼຸບ

ພະເຢໂຫວາຢາກໃຫ້ເຮົາໃຊ້ເວລາກັບຄອບຄົວແລະໝູ່ຄູ່ ແລະເພິ່ນຢາກໃຫ້ເຮົາມີຄວາມສຸກກັບເຂົາເຈົ້າ. ແຕ່ເພິ່ນບໍ່ຢາກໃຫ້ເຮົາໄປເຂົ້າຮ່ວມການສະຫຼອງຕ່າງໆທີ່ເພິ່ນບໍ່ພໍໃຈ.

ຄຳຖາມທົບທວນ

ມີຄຳຖາມຫຍັງແດ່ທີ່ຈະຊ່ວຍໃຫ້ຮູ້ວ່າການສະຫຼອງແບບໃດທີ່ພະເຈົ້າບໍ່ພໍໃຈ?
ເຈົ້າຈະຊ່ວຍຄອບຄົວແລະໝູ່ຄູ່ໃຫ້ເຂົ້າໃຈການຕັດສິນໃຈຂອງເຈົ້າກ່ຽວກັບການສະຫຼອງຕ່າງໆໄດ້ແນວໃດ?
ເຮົາຮູ້ໄດ້ແນວໃດວ່າພະເຢໂຫວາຢາກໃຫ້ເຮົາມີຄວາມສຸກ?

ມື້ທີ່ຮຽນຈົບບົດນີ້:

ສິ່ງທີ່ເຈົ້າເຮັດໄດ້

ເອົາສິ່ງທີ່ໄດ້ຮຽນໃນບົດນີ້ໄປຄິດເບິ່ງວ່າການສະຫຼອງຕ່າງໆເປັນການສະຫຼອງທີ່ພະເຈົ້າພໍໃຈບໍ.

ອື່ນໆ:

ສິ່ງທີ່ເຈົ້າເຮັດໄດ້