ບົດທີ 55

ສະໜັບສະໜູນປະຊາຄົມຂອງເຈົ້າ

ເປີດ

ພະຍານພະເຢໂຫວາທົ່ວໂລກມີຄວາມສຸກທີ່ໄດ້ນະມັດສະການພະເຢໂຫວາໃນປະຊາຄົມຂອງເຂົາເຈົ້າ. ເຂົາເຈົ້າຮູ້ສຶກຂອບໃຈທີ່ໄດ້ຮັບການສອນແລະຄຳແນະນຳຕ່າງໆຜ່ານທາງປະຊາຄົມ ແລະເຂົາເຈົ້າກໍເຕັມໃຈສະໜັບສະໜູນປະຊາຄົມໃນຫຼາຍວິທີ. ແລ້ວເຈົ້າເດ ເຈົ້າຮູ້ສຶກແນວນັ້ນກັບປະຊາຄົມຂອງເຈົ້ານຳບໍ?

1. ເຮົາຈະໃຊ້ເວລາແລະກຳລັງຂອງເຮົາເພື່ອສະໜັບສະໜູນປະຊາຄົມໄດ້ແນວໃດແດ່?

ເຮົາທຸກຄົນສາມາດສະໜັບສະໜູນປະຊາຄົມໄດ້. ຕົວຢ່າງເຊັ່ນ ໃນປະຊາຄົມຂອງເຮົາມີພີ່ນ້ອງສູງອາຍຸຫຼືສຸຂະພາບບໍ່ດີບໍ? ເຮົາຊ່ວຍເຂົາເຈົ້າໄດ້ໂດຍໄປຮັບເຂົາເຈົ້າມາປະຊຸມ. ຫຼືອາດມີເລື່ອງອື່ນໆທີ່ເຮົາຊ່ວຍເຂົາເຈົ້າໄດ້ອີກ ເຊັ່ນ ໄປຊື້ເຄື່ອງຫຼືຊ່ວຍເຮັດຄວາມສະອາດເຮືອນໃຫ້ເຂົາເຈົ້າ. (ອ່ານຢາໂກໂບ 1:27) ນອກຈາກນັ້ນ ເຮົາຍັງຊ່ວຍເຮັດຄວາມສະອາດແລະເບິ່ງແຍງຮັກສາຫໍປະຊຸມໄດ້. ທີ່ເຮົາເຮັດແບບນີ້ບໍ່ແມ່ນຍ້ອນວ່າມີໃຜບັງຄັບເຮົາ. ແຕ່ເຮົາ “ເຕັມໃຈສະເໜີໂຕ” ສະໜັບສະໜູນປະຊາຄົມເພາະເຮົາຮັກພະເຢໂຫວາແລະຮັກພີ່ນ້ອງຂອງເຮົາ.—ຄຳເພງ 110:3, ລ.ມ.

ສ່ວນຄົນທີ່ຮັບບັບເຕມາແລ້ວກໍສະໜັບສະໜູນປະຊາຄົມໄດ້ອີກຫຼາຍວິທີ. ເຊັ່ນ ພີ່ນ້ອງຊາຍທີ່ມີຄຸນສົມບັດຄືກັບທີ່ຄຳພີໄບເບິນບອກໄວ້ກໍອາດຈະໄດ້ເປັນຜູ້ຊ່ວຍວຽກຮັບໃຊ້ ແລະໃນວັນຂ້າງໜ້າ ເຂົາເຈົ້າກໍອາດຈະເປັນຜູ້ດູແລໄດ້ນຳ. ສຳລັບພີ່ນ້ອງຊາຍແລະພີ່ນ້ອງຍິງທີ່ຢາກສະໜັບສະໜູນວຽກປະກາດຫຼາຍຂຶ້ນກໍສາມາດຮັບໃຊ້ເປັນໄພໂອເນຍໄດ້. ພີ່ນ້ອງບາງຄົນອາດຊ່ວຍວຽກກໍ່ສ້າງຫໍປະຊຸມຫຼືຍ້າຍໄປຮັບໃຊ້ໃນປະຊາຄົມທີ່ຕ້ອງການຜູ້ປະກາດ.

2. ເຮົາຈະໃຊ້ຊັບສິນເງິນຄຳຂອງເຮົາເພື່ອສະໜັບສະໜູນປະຊາຄົມໄດ້ແນວໃດ?

ເຮົາສາມາດ “ຍົກຍ້ອງພະເຢໂຫວາໂດຍເອົາຂອງມີຄ່າ [ຂອງເຮົາ] ມາຖວາຍເພິ່ນ.” (ສຸພາສິດ 3:9, ລ.ມ.) ເຮົາມີຄວາມສຸກທີ່ໄດ້ບໍລິຈາກຊັບສິນເງິນຄຳເພື່ອສະໜັບສະໜູນປະຊາຄົມຂອງເຮົາແລະສະໜັບສະໜູນວຽກປະກາດທີ່ກຳລັງເຮັດຢູ່ທົ່ວໂລກ. (ອ່ານ 2 ໂກຣິນໂທ 9:7) ນອກຈາກນັ້ນ ເງິນທີ່ເຮົາບໍລິຈາກຍັງເອົາໄປໃຊ້ເພື່ອຊ່ວຍເຫຼືອພີ່ນ້ອງທີ່ກຳລັງລຳບາກຫຼືພີ່ນ້ອງທີ່ກຳລັງເຈິໄພພິບັດນຳ. ຫຼາຍຄົນເລືອກ “ແບ່ງເງິນໄວ້” ເພື່ອເຂົາເຈົ້າຈະບໍລິຈາກໄດ້ເປັນປະຈຳ. (ອ່ານ 1 ໂກຣິນໂທ 16:2) ຖ້າເຮົາຢາກບໍລິຈາກ ເຮົາກໍສາມາດເຮັດໄດ້ຫຼາຍວິທີ ເຊັ່ນ ໃສ່ເງິນໃນກ່ອງບໍລິຈາກຢູ່ຫໍປະຊຸມຫຼືບໍລິຈາກອອນລາຍຢູ່ເວັບໄຊ donate.pr418.com. ເຮົາຮູ້ສຶກຂອບໃຈທີ່ພະເຢໂຫວາໃຫ້ໂອກາດເຮົາສະແດງຄວາມຮັກຕໍ່ເພິ່ນໂດຍໃຊ້ຊັບສິນເງິນຄຳຂອງເຮົາ.

ຮຽນຮູ້ຫຼາຍຂຶ້ນ

ມາເບິ່ງວ່າເຈົ້າຈະເຮັດຫຍັງໄດ້ແດ່ເພື່ອສະໜັບສະໜູນປະຊາຄົມຂອງເຈົ້າ.

3. ສະໜັບສະໜູນໂດຍການບໍລິຈາກ

ພະເຢໂຫວາແລະພະເຢຊູຮັກຄົນທີ່ມີຄວາມສຸກກັບການໃຫ້. ຕົວຢ່າງເຊັ່ນ ພະເຢຊູຊົມເຊີຍແມ່ໝ້າຍຄົນໜຶ່ງທີ່ມີເງິນບໍ່ຫຼາຍແຕ່ກໍເຕັມໃຈບໍລິຈາກໃຫ້ກັບພະເຢໂຫວາ. ອ່ານລູກາ 21:1-4 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເພື່ອຈະເຮັດໃຫ້ພະເຢໂຫວາພໍໃຈ ເຮົາຕ້ອງບໍລິຈາກເງິນຫຼາຍໆບໍ?
ພະເຢໂຫວາແລະພະເຢຊູຮູ້ສຶກແນວໃດເມື່ອເຮົາບໍລິຈາກດ້ວຍຄວາມເຕັມໃຈ?

ມາເບິ່ງວ່າເງິນບໍລິຈາກຂອງເຮົາເອົາໄປໃຊ້ເຮັດຫຍັງແດ່ ເປີດວິດີໂອ. ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ‘ນຳຂອງມາຖວາຍພະເຢໂຫວາ’ (4:47)

ປະຊາຄົມຕ່າງໆທົ່ວໂລກໄດ້ຮັບປະໂຫຍດຈາກເງິນບໍລິຈາກແນວໃດແດ່?

4. ສະໜັບສະໜູນໂດຍການຊ່ວຍເບິ່ງແຍງຫໍປະຊຸມ

ຄຳພີໄບເບິນເວົ້າເຖິງຜູ້ນະມັດສະການພະເຢໂຫວາໃນສະໄໝກ່ອນວ່າເຂົາເຈົ້າເຕັມໃຈບໍລິຈາກເງິນແລະເບິ່ງແຍງວິຫານຂອງພະເຈົ້າໃຫ້ຢູ່ໃນສະພາບດີສະເໝີ. ອ່ານ 2 ຂ່າວຄາວ 34:9-11 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຄົນອິດສະຣາເອນທຸກຄົນມີສ່ວນຮ່ວມໃນການເບິ່ງແຍງວິຫານຂອງພະເຢໂຫວາແນວໃດ?

ໃຫ້ເຮົາມາເບິ່ງວ່າພະຍານພະເຢໂຫວາເຮັດຕາມຕົວຢ່າງໃນສະໄໝຄຳພີໄບເບິນແນວໃດ ເປີດວິດີໂອ. ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ວິທີທີ່ເຮົາທຸກຄົນຊ່ວຍກັນເບິ່ງແຍງສະຖານທີ່ນະມັດສະການຂອງເຮົາ (3:31)

ເປັນຫຍັງຈຶ່ງສຳຄັນທີ່ຫໍປະຊຸມຈະຕ້ອງສະອາດແລະມີສະພາບດີສະເໝີ?
ເຈົ້າຄິດວ່າເຈົ້າຈະຊ່ວຍເຮັດຫຍັງໄດ້ແດ່?

5. ພີ່ນ້ອງຊາຍສາມາດຊ່ວຍວຽກໃນປະຊາຄົມຫຼາຍຂຶ້ນໄດ້

ຄຳພີໄບເບິນສະໜັບສະໜູນໃຫ້ພີ່ນ້ອງຊາຍເຮັດສຸດຄວາມສາມາດເພື່ອຊ່ວຍວຽກໃນປະຊາຄົມ. ໃຫ້ເຮົາມາເບິ່ງຕົວຢ່າງຂອງພີ່ນ້ອງຄົນໜຶ່ງນຳກັນ ເປີດວິດີໂອ. ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ພີ່ນ້ອງຊາຍ—ຂໍໃຫ້ເຈົ້າພະຍາຍາມຈະໄດ້ເຮັດໜ້າທີ່ (5:19)

ໃນວິດີໂອ ໄຣອັນເຮັດຫຍັງເພື່ອຈະໄດ້ຊ່ວຍວຽກໃນປະຊາຄົມຫຼາຍຂຶ້ນ?

ຄຳພີໄບເບິນບອກວ່າພີ່ນ້ອງຊາຍທີ່ຈະເປັນຜູ້ຊ່ວຍວຽກຮັບໃຊ້ຫຼືຜູ້ດູແລຕ້ອງມີຄຸນສົມບັດຫຍັງແດ່. ອ່ານ 1 ຕີໂມທຽວ 3:1-13 ແລ້ວລົມກັນກ່ຽວກັບຄຳຖາມຕໍ່ໄປນີ້:

ພີ່ນ້ອງຊາຍທີ່ຢາກເປັນຜູ້ຊ່ວຍວຽກຮັບໃຊ້ຫຼືຜູ້ດູແລຕ້ອງມີຄຸນສົມບັດຫຍັງແດ່?
ແລ້ວຄົນໃນຄອບຄົວຂອງເຂົາເຈົ້າຕ້ອງເປັນແນວໃດ?—ເບິ່ງຂໍ້ 4 ແລະ 11
ຖ້າພີ່ນ້ອງຊາຍພະຍາຍາມທີ່ຈະມີຄຸນສົມບັດເຫຼົ່ານີ້ ທຸກຄົນໃນປະຊາຄົມຈະໄດ້ຮັບປະໂຫຍດແນວໃດ?