ຕອນ 5
ການຮູ້ຈັກກັບພະເຈົ້າ
ເມື່ອເຮົາຢາກໄດ້ຄຳແນະນຳ ເຮົາຍ່ອມໄປຫາບຸກຄົນໃດບຸກຄົນໜຶ່ງເຊິ່ງເຊື່ອໃຈໄດ້ແມ່ນບໍ? ຖ້າຫາກຄຳແນະນຳນັ້ນມາຈາກແຫຼ່ງທີ່ເຊື່ອຖືໄດ້ ບໍ່ວ່າເຮົາຈະຮັບປະໂຫຍດຈາກຄຳແນະນຳນັ້ນທັນທີຫຼືບໍ່ກໍຕາມ ເຮົາຄົງຈະເຮັດຕາມຄຳແນະນຳນັ້ນ. ຖ້າເຮົາຢາກຮັບປະໂຫຍດແທ້ໆຈາກຄຳແນະນຳທີ່ໃຊ້ການໄດ້ເຊິ່ງພົບໃນຄຳພີໄບເບິນ ເຮົາຕ້ອງຮູ້ຈັກຄຸ້ນເຄີຍກັບຜູ້ປະພັນຄຳພີໄບເບິນ. ເຮົາອາດຈະກາຍເປັນ “ມິດສະຫາຍ” ຂອງພະອົງນຳອີກ!—ເອຊາອີ 41:8.
ນາມຊື່ຂອງພະເຈົ້າໃນພາສາເຫບເລີທີ່ປາກົດໂຕໃນພະທຳເອຊາອີ
2 ຖ້າເຮົາຢາກເປັນມິດກັບບຸກຄົນໃດບຸກຄົນໜຶ່ງ ແນ່ນອນເຮົາຕ້ອງຢາກຮູ້ຊື່ຂອງຄົນນັ້ນ. ພະເຈົ້າທີ່ຄຳພີໄບເບິນກ່າວເຖິງມີນາມຊື່ບໍ? ພະອົງປະກາດວ່າ “ເຮົາແມ່ນພະເຢໂຫວາອັນນີ້ແມ່ນນາມຊື່ຂອງເຮົາ ແລະເຮົາຈະບໍ່ຍົກລັດສະໝີຂອງເຮົາໃຫ້ຜູ້ອື່ນ ແລະຄວາມສັນລະເສີນຂອງເຮົາ ເຮົາຈະບໍ່ໃຫ້ແກ່ຮູບຄວັດທັງຫຼາຍ.” (ເອຊາອີ 42:8) “ເຢໂຫວາ” ໃນພາສາເຫບເລີຂຽນແບບນີ້ יהוה (ອ່ານຈາກຂວາໄປຫາຊ້າຍ) ແມ່ນນາມຊື່ຂອງພະອົງ. ນາມຊື່ນີ້ປາກົດເກືອບ 7.000 ເທື່ອໃນຄຳພີໄບເບິນພາກພາສາເຫບເລີ. ມີການເຂົ້າໃຈວ່າ ນາມຊື່ຂອງພະເຈົ້າມີຄວາມໝາຍ “ພະອົງຜູ້ບັນດານໃຫ້ເປັນ” ເຊິ່ງໝາຍຄວາມວ່າພະເຢໂຫວາສາມາດປັບປ່ຽນຕົນເອງ ກາຍເປັນສິ່ງໃດກໍໄດ້ຕາມທີ່ພະອົງຕ້ອງການຈະເປັນເພື່ອເຮັດໃຫ້ຈຸດປະສົງຕ່າງໆຂອງພະອົງສຳເລັດຫລືໃຊ້ສິ່ງທີ່ພະອົງສ້າງເພື່ອເຮັດໃຫ້ຈຸດປະສົງທຸກຢ່າງຂອງພະອົງເປັນຈິງໄດ້. ໃນພາສາເຫບເລີນາມຊື່ຂອງພະອົງຢູ່ໃນຮູບຕາມຫຼັກໄວຍະກອນທີ່ສະແດງເຖິງການກະທຳໃນຂັ້ນຕອນເຊິ່ງພວມບັນລຸຄວາມສຳເລັດ. ນັ້ນໝາຍເຖິງຫຍັງ? ນັ້ນບອກເຮົາວ່າພະເຢໂຫວາເຄີຍເຮັດແລະຍັງເຮັດໃຫ້ຈຸດປະສົງຂອງພະອົງສຳເລັດຢູ່ໃນຕອນນີ້. ພະອົງເປັນພະເຈົ້າທີ່ມີຊີວິດ ບໍ່ແມ່ນພະລັງເຊິ່ງບໍ່ມີຕົນບໍ່ມີໂຕ.
3 ພະເຢໂຫວາກາຍເປັນພະຜູ້ສ້າງ. (ຕົ້ນເດິມ 1:1) ພະອົງເປັນ “ພະເຈົ້າອົງເປັນຊີວິດຢູ່ ທີ່ໄດ້ສ້າງຟ້າອາກາດ ແລະແຜ່ນດິນໂລກ ແລະນໍ້າທະເລ ແລະສັບພະທຸກສິ່ງທີ່ຢູ່ໃນທີ່ນັ້ນ.” (ກິດຈະການ 14:15) ພະເຢໂຫວາໄດ້ສ້າງສັບພະທຸກສິ່ງ ລວມທັງມະນຸດຄູ່ທຳອິດ ອາດາມແລະເອວາ. ດ້ວຍເຫດນີ້ພະເຈົ້າແມ່ນ “ບໍ່ເກີດແຫ່ງຊີວິດ.” (ຄຳເພງ 36:9 ລ.ມ.) ພະອົງຍັງກາຍເປັນຜູ້ຄໍ້າຈູນຊີວິດອີກດ້ວຍ. ດັ່ງນັ້ນ “ພະອົງບໍ່ໄດ້ປະພະອົງເອງໃຫ້ປາສະຈາກພິຍານ ເພາະພະອົງໄດ້ກະທຳການດີ ແລະໄດ້ໂຜດປະທານຍັງຫ່າຝົນ ມາແຕ່ຊັ້ນຟ້າໃຫ້ແກ່ທ່ານທັງຫຼາຍ ກັບທັງລະດູອັນເກີດໝາກບໍລິບູນ ແລະໄດ້ກະທຳໃຫ້ໃຈທ່ານທັງຫຼາຍເຕັມໄປດ້ວຍອາຫານ ແລະດ້ວຍຄວາມຍິນດີ.” (ກິດຈະການ 14:17) ໃນອາຝຼິກກາແລະອາຊີ ມີຫຼາຍຄົນບູຊາບັນພະບຸລຸດຂອງຕົນເນື່ອງຈາກເຂົາເຈົ້າໄດ້ຮັບຊີວິດຈາກບັນພະບຸລຸດ. ຍິ່ງກວ່ານັ້ນ ເຂົາເຈົ້າຈະບໍ່ຮູ້ສຶກເປັນໜີ້ບຸນຄຸນພະຜູ້ສ້າງ, ຜູ້ຄໍ້າຈູນຊີວິດ, ຜູ້ທີ່ໄດ້ສ້າງມະນຸດຄູ່ທຳອິດແລະປະທານຄວາມສາມາດໃນການສືບພັນໃຫ້ແກ່ເຂົາຫຼາຍກວ່ານັ້ນບໍ? ການຄຶດຕຶກຕອງຄວາມເປັນຈິງນີ້ອາດກະຕຸ້ນເຈົ້າໃຫ້ເຫັນດີກັບຖ້ອຍຄຳທີ່ວ່າ “ພະອົງເຈົ້າ ແລະພະເຈົ້າຂອງຂ້າພະເຈົ້າທັງຫຼາຍ ພະອົງເປັນຜູ້ສົມຄວນຈະຮັບລັດສະໝີ ແລະຍົດສັກແລະລິດເດດ ເພາະວ່າພະອົງເປັນຜູ້ທີ່ໄດ້ນິລະມິດສ້າງສັບພະທຸກສິ່ງ ແລະສັບພະທຸກສິ່ງເປັນຢູ່ ແລະຕ້ອງນິລະມິດສ້າງແລ້ວດ້ວຍນໍ້າໃຈຂອງພະອົງ.”—ຄຳປາກົດ 4:11.
4 ໂດຍທາງຄຳພີໄບເບິນ ເຮົາສາມາດຮູ້ຈັກພະຜູ້ສ້າງຂອງເຮົາຄືພະເຢໂຫວາ ແລະຮຽນຮູ້ວ່າພະອົງເປັນພະເຈົ້າແບບໃດ. ຄຳພີໄບເບິນເປີດເຜີຍວ່າ “ພະເຈົ້າເປັນຄວາມຮັກ.” (1 ໂຍຮັນ 4:16; ອຸປະຍົກໜີ 34:6, 7) ເມື່ອເຮົາອ່ານຄຳພີໄບເບິນຈາກພະທຳຕົ້ນເດີມເຖິງພະທຳຄຳປາກົດເຮົາຈະພົບວ່າ ມີບັນທຶກຈຳນວນຫຼວງຫຼາຍທີ່ສະແດງວ່າ ພະອົງເປັນພະເຈົ້າຜູ້ເຕັມໄປດ້ວຍຄວາມຮັກຢ່າງແທ້ຈິງ. ເປັນຫຍັງບໍ່ເຮັດໃຫ້ການອ່ານຄຳພີໄບເບິນເປັນນິດໄສປະຈຳວັນ ເພື່ອຮູ້ຈັກກັບພະຜູ້ສ້າງຂອງເຮົາ? ຈົ່ງສຶກສາຄຳພີໄບເບິນຢ່າງລະອຽດພ້ອມທັງຮັບເອົາຄວາມຊ່ວຍເຫຼືອຈາກບຸກຄົນທີ່ມີຄວາມຄຸ້ນເຄີຍກັບເນື້ອໃນຂອງຄຳພີໄບເບິນ. (ກິດຈະການ 8:26-35) ດ້ວຍການເຮັດແນວນີ້ ເຮົາຈະພົບວ່າພະອົງເປັນພະເຈົ້າແຫ່ງຄວາມຍຸຕິທຳ ຜູ້ເຊິ່ງຈະບໍ່ປ່ອຍໃຫ້ຄວາມຊົ່ວຮ້າຍມີຢູ່ຕະຫຼອດໄປ. (ພະບັນຍັດຕິທີ2 32:4) ບໍ່ແມ່ນເລື່ອງງ່າຍສຳລັບມະນຸດທີ່ຈະຮັກສາຄວາມດຸນດ່ຽງລະຫວ່າງຄວາມຮັກແລະຄວາມຍຸຕິທຳ ແຕ່ດ້ວຍສະຕິປັນຍາຂອງພະອົງພະເຢໂຫວາຮັກສາຄວາມດຸນດ່ຽງນີ້ໄດ້ຢ່າງສົມບູນ. (ໂລມ 11:33; 16:27) ເນື່ອງຈາກເປັນພະເຈົ້າອົງຍິ່ງໃຫຍ່ ພະອົງມີອຳນາດທີ່ຈະເຮັດສິ່ງໃດກໍໄດ້ຕາມທີ່ພະອົງຕ້ອງການເພື່ອເຮັດໃຫ້ຈຸດປະສົງຂອງພະອົງສຳເລັດ. (ຕົ້ນເດີມ 17:1) ຈົ່ງພະຍາຍາມປະຕິບັດຕາມຄຳແນະນຳອັນສະຫຼາດສຸຂຸມເຊິ່ງເຮົາພົບໃນຄຳພີໄບເບິນ ເພາະໂດຍການເຮັດແນວນີ້ເຮົາຈະຮູ້ຄຸນຄ່າພະຜູ້ສ້າງຂອງເຮົາຫຼາຍຂຶ້ນເມື່ອສັງເກດວ່າຄຳແນະນຳຂອງພະອົງກໍເພື່ອປະໂຫຍດຂອງເຮົາສະເໝີ.
ເປັນຫຍັງບໍ່ເຂົ້າໃກ້ພະເຢໂຫວາໃນຄຳອະທິດຖານ?
5 ຍັງມີອີກວິທີໜຶ່ງເພື່ອຈະເຂົ້າໃກ້ພະເຈົ້າໄດ້ ນັ້ນຄືໂດຍຜ່ານທາງການອະທິດຖານ. ພະເຢໂຫວາເປັນ “ຜູ້ຟັງຄວາມອ້ອນວອນ.” (ຄຳເພງ 65:2) ພະອົງສາມາດ “ກະທຳໄດ້ມາກຫຼາຍກວ່າເຫຼືອເກີນສັບພະທຸກສິ່ງທີ່ເຮົາທັງຫຼາຍຂໍຫຼືຄຶດ.” (ເອເຟດ 3:20) ຢ່າງໃດກໍຕາມ ເຮົາຈະຄຶດແນວໃດກັບ “ມິດສະຫາຍ” ຜູ້ທີ່ມາຫາເຮົາເມື່ອເຂົາເຈົ້າຕ້ອງການໃຫ້ເຮົາຊ່ວຍເທົ່ານັ້ນ? ເຮົາອາດບໍ່ມັກເຂົາເຈົ້າຫຼາຍປານໃດ. ສະນັ້ນ ໂດຍບໍ່ຕ້ອງສົງໄສ ເຮົາຄົງຈະຢາກໃຊ້ສິດທິພິເສດຂອງການອະທິດຖານບໍ່ພຽງເພື່ອຂໍພະເຈົ້າສຳລັບສິ່ງທີ່ເຮົາຕ້ອງການເທົ່ານັ້ນ ແຕ່ຫາກເພື່ອຂອບຄຸນແລະສັນລະເສີນພະອົງນຳອີກ.—ຟີລິບ 4:6, 7; 1 ເທຊະໂລນີກ 5:17, 18.
ເລື່ອງທີ່ເຈົ້າອາດຈະມັກ
ຄຳສອນ
ພະເຈົ້າມີຊື່ບໍ?
ພະເຈົ້າມີຫຼາຍຕຳແໜ່ງ ເຊັ່ນ: ອົງສູງສຸດ ພະຜູ້ສ້າງ ແລະພະອົງເຈົ້າ. ແຕ່ພະເຈົ້າມີຊື່ສະເພາະເຊິ່ງໃຊ້ໃນຄຳພີໄບເບິນປະມານ 7.000 ເທື່ອ.
