ຕອນ 9
ເພີດເພີນກັບຊີວິດທີ່ອີ່ມໃຈພໍໃຈ—ໃນເວລານີ້ແລະຕະຫຼອດໄປ!
ເຮົາສາມາດມີຊີວິດທີ່ອີ່ມໃຈພໍໃຈຫລາຍກວ່າຊີວິດຂອງທ່ານອັບລາຫາມໄດ້ບໍ?
ອັບລາຫາມ ຜູ້ທີ່ມີຄວາມເຊື່ອອັນເດັ່ນໃນປະຫວັດສາດທີ່ຄຳພີໄບເບິນກ່າວເຖິງ ໄດ້ປະຖິ້ມຊີວິດອັນສະດວກສະບາຍໃນເມືອງອູຣທີ່ຈະເລີນຮຸ່ງເຮືອງ. ຫຼັງຈາກອາໄສຢູ່ໃນເມືອງຄາຣານໄດ້ໄລຍະໜຶ່ງ ລາວໃຊ້ຊີວິດສ່ວນທີ່ເຫຼືອຄືຄົນພະເນຈອນ ໂດຍອາໄສຢູ່ໃນກະໂຈມ ບໍ່ມີບ່ອນຢູ່ອາໄສເປັນຫຼັກແຫຼ່ງ. (ຕົ້ນເດິມ 12:1-3; ກິດຈະການ 7:2-7; ເຫບເລິ 11:8-10) ເຖິງຢ່າງນັ້ນກໍຕາມ ມີບັນທຶກໄວ້ວ່າ “ອັບລາຫາມໄດ້ສິ້ນອາຍຸແລະຕາຍໃນໄວເຖົ້າຫຼາຍແລະມີຄວາມອີ່ມໃຈພໍໃຈ.” (ຕົ້ນເດິມ 25:8, ລ.ມ.) ສິ່ງໃດທີ່ເຮັດໃຫ້ຊີວິດອີ່ມໃຈພໍໃຈແບບນີ້? ລາວບໍ່ພຽງແຕ່ເປັນຊາຍເຖົ້າແກ່ທີ່ຮູ້ສຶກອີ່ມໃຈພໍໃຈຕອນຈະຕາຍເນື່ອງຈາກຄວາມສຳເລັດຕະຫຼອດໄລຍະຊີວິດຂອງລາວເອງ. ຕໍ່ມາອັບລາຫາມໄດ້ຖືກເອີ້ນວ່າ “ມິດສະຫາຍຂອງພະເຢໂຫວາ” ເນື່ອງຈາກລາວມີຄວາມເຊື່ອທີ່ເດັ່ນຕໍ່ພະເຈົ້າ. (ຍາໂກໂບ 2:23, ລ.ມ.; ເອຊາອີ 41:8) ສຳພັນທະພາບອັນມີຄວາມໝາຍທີ່ອັບລາຫາມໄດ້ພັດທະນາຂຶ້ນກັບພະຜູ້ສ້າງເຮັດໃຫ້ຊີວິດຂອງລາວອີ່ມໃຈພໍໃຈ.
ເຮົາສາມາດມີຊີວິດທີ່ອີ່ມໃຈພໍໃຈຫຼາຍກວ່າຊີວິດຂອງທ່ານອັບລາຫາມໄດ້ບໍ?
2 ເຊັ່ນດຽວກັນກັບອັບລາຫາມໄດ້ເຮັດປະມານ 4.000 ປີມາແລ້ວ ໃນປັດຈຸບັນ ເຮົາສາມາດດຳເນີນຊີວິດອັນມີຄວາມໝາຍແລະອີ່ມໃຈພໍໃຈໄດ້ ໃນເມື່ອເຮົາພັດທະນາມິດຕະພາບກັບພະເຈົ້າ. ເຮົາອາດງຶດງໍ້ກັບຄວາມຄຶດເລື່ອງການເປັນມິດຂອງພະຜູ້ສ້າງເອກະພົບ ແຕ່ນີ້ເປັນເລື່ອງທີ່ເປັນໄປໄດ້. ໂດຍວິທີໃດ? ເຮົາຕ້ອງຮູ້ຈັກພະອົງແລະຮັກພະອົງ. (1 ໂກລິນໂທ 8:3; ຄາລາຊີ 4:9) ການມີສຳພັນທະພາບແບບນີ້ກັບພະຜູ້ສ້າງຈະເຮັດໃຫ້ຊີວິດຂອງເຮົາມີຄວາມໝາຍແລະອີ່ມໃຈພໍໃຈ.
3 ສຳລັບບຸກຄົນທີ່ເຕັມໃຈຍອມຮັບເອົາເຄື່ອງບູຊາໄຖ່ຂອງພະຄລິດ ພະເຢໂຫວາໄດ້ຈັດຕຽມແນວທາງສຳລັບການດຳເນີນຊີວິດອັນມີຄວາມສຸກໄວ້ໃຫ້. (ເອຊາອີ 48:17) ຈື່ໄວ້ວ່າອາດາມໄດ້ກະບົດຕໍ່ພະເຈົ້າໂດຍຕັດສິນໃຈດ້ວຍຕົນເອງວ່າສິ່ງໃດດີແລະສິ່ງໃດບໍ່ດີ. ພະເຢໂຫວາໄດ້ຊື້ຄອບຄົວມະນຸດດ້ວຍເຄື່ອງບູຊາໄຖ່ຂອງພະບຸດພະອົງ ເຊິ່ງເປີດທາງເພື່ອປົດປ່ອຍເຂົາເຈົ້າໃຫ້ພົ້ນຈາກການເປັນຂ້າທາດຂອງຄວາມບາບແລະຄວາມຕາຍ. ເຖິງແນວນັ້ນກໍຕາມ ເຮົາແຕ່ລະຄົນຕ້ອງຍອມຮັບເອົາຄ່າໄຖ່ນັ້ນແລະຍຸດຕິຈາກການຕັ້ງມາດຕະຖານດ້ວຍຕົນເອງໃນເລື່ອງຄວາມດີແລະຄວາມຊົ່ວ. ເຮົາຕ້ອງຍອມຢູ່ໃຕ້ກົດໝາຍແລະຫຼັກການທີ່ພະເຈົ້າຈັດຕຽມໄວ້ສຳລັບບຸກຄົນເຫຼົ່ານັ້ນທີ່ຍອມຮັບເຄື່ອງບູຊາໄຖ່ຂອງພະເຍຊູ.
“ຂໍເຊີນພະອົງໂຜດສຳແດງທາງຂອງພະອົງໃຫ້ຂ້ານ້ອຍເຫັນ”
4 ເມື່ອເຮົາສຶກສາຄຳພີໄບເບິນຕໍ່ໆໄປແລະເອົາຫຼັກການທີ່ມີໃນຄຳພີໄບເບິນມາໃຊ້ ໂດຍບໍ່ມີຂໍ້ສົງໄສ ເຮົາຈະຮູ້ຄຸນຄ່າມາດຕະຖານໃນເລື່ອງຄວາມດີແລະຄວາມຊົ່ວຂອງພະເຈົ້າ. (ຄຳເພງ 19:7-9) ເຮົາຈະຖືກກະຕຸ້ນໃຫ້ເວົ້າກັບພະເຈົ້າແບບດຽວກັນກັບທີ່ທ່ານໂມເຊຜູ້ພະຍາກອນຂອງພະເຢໂຫວາໄດ້ເວົ້າວ່າ “ດຽວນີ້ຖ້າຂ້ານ້ອຍໄດ້ພົບພະຄຸນຕໍ່ຕາພະອົງແລ້ວ ຂໍເຊີນພະອົງໂຜດສຳແດງທາງຂອງພະອົງໃຫ້ຂ້ານ້ອຍເຫັນ.” (ອຸປະຍົກໜີ 33:13; ຄຳເພງ 25:4) ຄຳພີໄບເບິນຈັດຕຽມຫຼັກການຕ່າງໆເພື່ອຊີ້ນຳເຮົາໃຫ້ຮັບມືກັບບັນຫາຕ່າງໆໃນສະໄໝປັດຈຸບັນເຊິ່ງເປັນ “ເວລາໜ້າກົວໜ້າຢ້ານ.” (2 ຕີໂມເຕ 3:1) ການຮູ້ຄຸນຄ່າຂອງເຮົາຈະເພີ່ມຂຶ້ນ ເຊິ່ງຈະຊີ້ນຳເຮົາໃຫ້ຮູ້ຈັກພະເຢໂຫວາຫຼາຍຂຶ້ນແລະຈະເຮັດໃຫ້ສາຍສຳພັນຂອງເຮົາກັບພະອົງແໜ້ນແຟ້ນຂຶ້ນ.
5 ອັບລາຫາມຕາຍເມື່ອ “ເຖົ້າຫຼາຍແລະມີຄວາມອີ່ມໃຈພໍໃຈ” ແຕ່ເມື່ອໃດກໍຕາມທີ່ຄົນເຮົາຍັງຕ້ອງຕາຍ ຊີວິດກໍຍັງສັ້ນເກີນໄປແນ່ນອນ. ເຖິງແມ່ນວ່າເຮົາອາຍຸຫຼາຍເທົ່າໃດກໍຕາມ ຄວາມປາຖະໜາຢາກມີຊີວິດຢູ່ຕໍ່ໄປແມ່ນມີຢູ່ໃນຕົວມະນຸດໝົດທຸກຄົນ. ນີ້ຍ້ອນວ່າ “[ພະເຈົ້າ] ໄດ້ໃສ່ນິລັນດອນການໃນຫົວໃຈມະນຸດ; ເຖິງຢ່າງນັ້ນກໍດີ ມະນຸດບໍ່ເຂົ້າໃຈໃນສິ່ງທີ່ພະເຈົ້າໄດ້ເຮັດຕັ້ງແຕ່ຕົ້ນເດີມຈົນເຖິງທີ່ສຸດ.” (ຜູ້ເທສະໜາປ່າວປະກາດ 3:11, ນິວ ອິນເຕີເນຊັນແນວ ເວີຊັນ [ພາສາອັງກິດ]) ເຖິງແມ່ນຈະມີຊີວິດນິລັນດອນ ເຮົາຈະບໍ່ສາມາດເຂົ້າໃຈໃນທຸກສິ່ງທີ່ພະເຢໂຫວາສ້າງ. ສິ່ງທີ່ເຮົາອາດສັງເກດເຫັນ, ຮຽນແລະເພີດເພີນກ່ຽວກັບຜົນງານອັນດີເລີດຂອງພະເຢໂຫວານັ້ນ ແມ່ນຈະບໍ່ມີວັນສິ້ນສຸດເລີຍ!—ຄຳເພງ 19:1-4; 104:24; 139:14.
6 ເຮົາອາດຈະບໍ່ຖືກດຶງດູດໃຈໃຫ້ມີຊີວິດຕະຫຼອດໄປ ໃນເມື່ອແຜ່ນດິນໂລກເຕັມໄປດ້ວຍບັນຫາຕ່າງໆດັ່ງທີ່ເຮົາເຫັນໃນທຸກມື້ນີ້. ເຖິງແນວໃດກໍຕາມ ເລື່ອງນັ້ນບໍ່ຄວນເປັນສາເຫດພາໃຫ້ກັງວົນ. ຄຳພີໄບເບິນສັນຍາວ່າ “ຕາມຄຳປະຕິຍານຂອງພະອົງ ເຮົາທັງຫຼາຍຄອຍຖ້າຟ້າອາກາດໃໝ່ ແລະແຜ່ນດິນໂລກໃໝ່ ຢູ່ທີ່ນັ້ນຄວາມຊອບທຳຕັ້ງຢູ່.” (2 ເປໂຕ 3:13) ຄຳວ່າ “ຟ້າອາກາດໃໝ່” ໝາຍເຖິງລັດຖະບານໃໝ່ທາງພາກສະຫວັນ ຄືລາຊະອານາຈັກຂອງພະເຈົ້າ ເຊິ່ງຈະປົກຄອງເໜືອແຜ່ນດິນໂລກທັງໝົດ. “ແຜ່ນດິນໂລກໃໝ່” ແມ່ນສັງຄົມມະນຸດໃໝ່ເຊິ່ງປະກອບດ້ວຍມະນຸດທີ່ເຊື່ອຟັງການປົກຄອງຂອງລາຊະອານາຈັກນັ້ນ. ເພື່ອເຮັດໃຫ້ສິ່ງນີ້ເປັນຄວາມຈິງ ພະເຢໂຫວາຈະກຳຈັດບຸກຄົນເຊິ່ງ “ທຳລາຍແຜ່ນດິນໂລກ.”—ຄຳປາກົດ 11:18, ລ.ມ.; 2 ເປໂຕ 3:10.
7 ພະອົງຈະເຮັດສິ່ງເຫຼົ່ານີ້ເມື່ອໃດ? ພະເຍຊູຄລິດໄດ້ລວມເອົາສົງຄາມເຊິ່ງພົວພັນກັບຊາດຕ່າງໆເຂົ້າກັບ “ຄວາມອຶດຢາກ . . . ແລະແຜ່ນດິນຫວັ່ນໄຫວຢູ່ບ່ອນຕ່າງໆ,” “ໂລກລະບາດ,” ແລະ “ການຊົ່ວຮ້າຍຈະມາກຂຶ້ນຫຼາຍ” ໃຫ້ເປັນ ‘ສຳຄັນຂອງທີ່ສຸດແຫ່ງໂລກນີ້.’ (ມັດທາຽ 24:3-13; ລຶກາ 21:10, 11, ລ.ມ.; 2 ຕີໂມເຕ 3:1-5) ຈາກນັ້ນພະອົງໄດ້ພະຍາກອນວ່າ “ເມື່ອທ່ານທັງຫຼາຍຈະເຫັນສິ່ງທັງຫຼາຍນັ້ນພວມບັງເກີດມາ ຈົ່ງຮູ້ຈັກວ່າແຜ່ນດິນຂອງພະເຈົ້າມາໃກ້ແລ້ວ.” (ລຶກາ 21:31) ໝາຍຄວາມວ່າເວລາທີ່ພະເຢໂຫວາຈະທຳລາຍຄົນຊົ່ວນັ້ນພວມໃກ້ເຂົ້າມາໄວໆ. *
8 ຫຼັງຈາກພະເຢໂຫວາກວາດລ້າງຄວາມຊົ່ວຮ້າຍໃຫ້ໝົດໄປຈາກແຜ່ນດິນໂລກໃນ “ວັນອັນໃຫຍ່ຂອງພະເຈົ້າຜູ້ມີລິດເດດອັນໃຫຍ່ທີ່ສຸດ” ໂລກຂອງເຮົາຈະໄດ້ຮັບການປ່ຽນແປງໃຫ້ເປັນອຸທິຍານ. (ຄຳປາກົດ 16:14, 16; ເອຊາອີ 51:3) ຈາກນັ້ນ “ຄົນຊອບທຳທັງຫຼາຍຈະມີແຜ່ນດິນໄວ້ ແລະເຂົາຈະຕັ້ງຢູ່ທີ່ນັ້ນສືບໆໄປເປັນນິດ.” (ຄຳເພງ 37:29) ສ່ວນຄົນທີ່ຕາຍແລ້ວຈະເປັນແນວໃດ? ພະເຍຊູກ່າວວ່າ “ຢ່າປະຫຼາດໃຈດ້ວຍສິ່ງນັ້ນ ເພາະວ່າຄາວມາໃກ້ແລ້ວ ເວລາຄົນທັງປວງທີ່ຢູ່ໃນບ່ອນຝັງສົບກໍຈະຍິນສຽງປາກຂອງພະບຸດ. ແລະເຂົາຈະອອກມາທັງຄົນທັງຫຼາຍທີ່ໄດ້ກະທຳການດີຈະຄືນມາສຳລັບຊີວິດ ທັງຄົນທັງຫຼາຍທີ່ໄດ້ກະທຳການຊົ່ວຈະຄືນມາສຳລັບຕັດສິນ.” (ໂຍຮັນ 5:28, 29) ພະເຢໂຫວາສົນໃຈຕໍ່ມະນຸດເປັນສ່ວນບຸກຄົນ ປາຖະໜາຈະເຮັດໃຫ້ບຸກຄົນທີ່ພວມນອນຫຼັບຢູ່ໃນຄວາມຕາຍນັ້ນໃຫ້ຄືນມາມີຊີວິດອີກ. ນັກວິທະຍາສາດຫຼາຍຄົນອາດພະຍາຍາມສ້າງຄົນໃໝ່ໂດຍການລອກແບບທາງພັນທຸກຳ ແຕ່ພະຜູ້ສ້າງບໍ່ອາໄສວິທີການສ້າງມະນຸດຄືນໃໝ່ແບບນັ້ນ. ມະນຸດແຕ່ລະຄົນທີ່ສາມາດໄຖ່ຄືນໄດ້ ພະອົງສາມາດຈະຈື່ຈຳລາຍລະອຽດທຸກຢ່າງ ແລະເຮັດໃຫ້ເຂົາເຈົ້າກັບຄືນມາມີຊີວິດອີກ. ແນ່ນອນ ໃນອຸທິຍານເທິງແຜ່ນດິນໂລກເຮົາມີຄວາມຫວັງທີ່ຈະພົບກັບບຸກຄົນທີ່ເຮົາຮັກເຊິ່ງເສຍຊີວິດໄປແລ້ວ!
9 ຊີວິດໃນອຸທິຍານຈະເປັນແບບໃດ? ແຜ່ນດິນໂລກຈະເຕັມໄປດ້ວຍຊາຍຍິງທີ່ມີຄວາມສຸກເຊິ່ງມີນໍ້າໜຶ່ງໃຈດຽວກັນໃນການສັນລະເສີນພະຜູ້ສ້າງ. “ຊາວຊົນຈະບໍ່ກ່າວວ່າ ‘ຂ້ອຍບໍ່ສຳບາຍ.’” (ເອຊາອີ 33:24; 54:13) ຈະບໍ່ມີໃຜມີຄວາມເຄັ່ງຕຶງເຊິ່ງເຮັດໃຫ້ເສຍສຸຂະພາບຫຼືເກີດຄວາມຜິດປົກກະຕິທາງດ້ານອາລົມແລະທາງດ້ານຈິດໃຈ. ທຸກຄົນຈະມີອາຫານກິນຢ່າງອຸດົມບໍລິບູນແລະຈະປະສົບຄວາມຍິນດີໃນວຽກງານອັນມີຄວາມໝາຍເຊິ່ງປະສານກັບຈຸດປະສົງຂອງພະເຈົ້າ. (ຄຳເພງ 72:16; ເອຊາອີ 65:23) ເຂົາຈະຢູ່ຢ່າງມີສັນຕິສຸກກັບສັດປະເພດຕ່າງໆ, ມີສັນຕິສຸກກັບເພື່ອນມະນຸດ ແລະສຳຄັນທີ່ສຸດນັ້ນຄືມີ “ສຸກສຳລານກັບພະເຈົ້າ.”—ໂລມ 5:1; ຄຳເພງ 37:11; 72:7; ເອຊາອີ 11:6-9.
10 ເຮົາຕ້ອງເຮັດແນວໃດເພື່ອຈະຢູ່ໃນອຸທິຍານແລະມີຊີວິດອັນເພີດເພີນແບບອີ່ມໃຈພໍໃຈຢ່າງບໍລິບູນ? ພະເຍຊູກ່າວວ່າ “ອັນນີ້ເປັນຊີວິດອັນຕະຫຼອດໄປເປັນນິດຄືວ່າໃຫ້ເຂົາຮູ້ຈັກພະເຈົ້າອົງດຽວທ່ຽງແທ້ແລະພະເຍຊູຄລິດທີ່ພະເຈົ້າໄດ້ໃຊ້ມາ.” (ໂຍຮັນ 17:3) ສະນັ້ນ ຈົ່ງຮັບເອົາຄວາມຮູ້ກ່ຽວກັບພະເຢໂຫວາແລະພະເຍຊູຄລິດຕໍ່ໆໄປໂດຍການຮຽນຮູ້ວ່າພະເຈົ້າຮຽກຮ້ອງສິ່ງໃດຈາກເຮົາ. ຈາກນັ້ນ ເຮົາຈະສາມາດເຮັດໃຫ້ພະເຢໂຫວາພະເຈົ້າພໍໃຈແລະສິ່ງນີ້ຈະເຮັດໃຫ້ເຮົາເປັນບຸກຄົນໜຶ່ງທີ່ມີຊີວິດທີ່ອີ່ມໃຈພໍໃຈ.
^ ຂໍ້ 7 ທ່ານສາມາດຮຽນຮູ້ຫລາຍຂຶ້ນກ່ຽວກັບຄຳພະຍາກອນໃນບົດ 9 ຂອງປຶ້ມຄຳພີໄບເບິນສອນແນວໃດແທ້ໆ? ຈັດພິມໂດຍພະຍານພະເຢໂຫວາ.
ເລື່ອງທີ່ເຈົ້າອາດຈະມັກ
ໂຄງການພິເສດ
ເປັນຫຍັງຈຶ່ງສຶກສາຄຳພີໄບເບິນ?
ຄຳພີໄບເບິນໄດ້ຊ່ວຍຫຼາຍລ້ານຄົນທົ່ວໂລກໃຫ້ໄດ້ຮັບຄຳຕອບທີ່ສຳຄັນໃນຊີວິດ. ທ່ານຢາກເປັນຜູ້ໜຶ່ງໃນນັ້ນບໍ?
ຄຳສອນ
ລາຊະອານາຈັກຂອງພະເຈົ້າແມ່ນຫຍັງ?
ຕະຫຼອດການຮັບໃຊ້ຂອງພະເຍຊູ ເພິ່ນສອນເລື່ອງລາຊະອານາຈັກຂອງພະເຈົ້າຫຼາຍກວ່າເລື່ອງອື່ນໆ. ເປັນເວລາຫຼາຍສະຕະວັດທີ່ລູກສິດຂອງເພິ່ນອະທິຖານຂໍໃຫ້ລາຊະອານາຈັກມາ.
ຄຳຖາມທີ່ພົບເລື້ອຍໆ
ເລື່ອງທີ່ໜ້າຮູ້ກ່ຽວກັບການຮຽນຄຳພີໄບເບິນກັບພະຍານພະເຢໂຫວາ
ເມື່ອຮຽນຄຳພີໄບເບິນກັບພະຍານພະເຢໂຫວາ ເຈົ້າຢາກໃຊ້ຄຳພີໄບເບິນສະບັບໃດກໍໄດ້. ເຈົ້າຢາກຊວນຄອບຄົວຫຼືໝູ່ມາຮຽນນຳກໍໄດ້.
ກ່ຽວກັບເຮົາ
ຂໍໃຫ້ມີຄົນມາສອນ
ເບິ່ງວ່າຄຳພີໄບເບິນສອນຫຍັງ ຫຼືມາຮູ້ຈັກພະຍານພະເຢໂຫວາຫຼາຍຂຶ້ນ.
