ຕອນ 3
ໜັງສືແຫ່ງການຊີ້ນຳທີ່ເຊື່ອຖືໄດ້
“ຄຳພີໄບເບິນແມ່ນການສັງຮອມອາລະຍະທຳແລະປະສົບການຊີວິດຂອງມະນຸດຊາດແລະຕ່າງຈາກໜັງສືອື່ນໆ” ນີ້ແມ່ນຄຳກ່າວໃນວາລະສານທີ່ຈັດພິມໂດຍມະຫາວິທະຍາໄລ ຈົງຊາງຢູ່ເມືອງກວາງໂຈ ປະເທດຈີນ. ມີການຍົກເອົາຄຳເວົ້າຂອງເອມານູເອນ ຄານ ນັກປັດຊະຍາທີ່ມີອິດທິພົນສູງໃນສະຕະວັດທີ 18 ມາກ່າວວ່າ “ຄວາມເປັນຢູ່ຂອງຄຳພີໄບເບິນໃນຖານະເປັນປຶ້ມເພື່ອປະຊາຊົນ ເປັນປະໂຫຍດອັນຍິ່ງໃຫຍ່ທີ່ສຸດເທົ່າທີ່ເຜົ່າພັນມະນຸດເຄີຍປະສົບມາ. ຄວາມພະຍາຍາມທຸກຢ່າງທີ່ຈະຖືເບົາຕໍ່ຄຳພີໄບເບິນ . . . ເປັນອາດຊະຍາກຳແກ່ມະນຸດ.” ສາລານຸກົມອາເມລິການາ ກ່າວວ່າ “ອິດທິພົນຂອງຄຳພີໄບເບິນບໍ່ໄດ້ມີຄວາມໝາຍຈຳກັດຕໍ່ຊາວຢິວແລະຊາວຄລິດສະຕຽນເທົ່ານັ້ນ. . . . ໃນປັດຈຸບັນຖືກັນວ່າເປັນສົມບັດອັນລໍ້າຄ່າທາງຈະລິຍະທຳແລະທາງສາສະໜາ ຂະນະທີ່ຄວາມຫວັງເລື່ອງຄວາມສິວິໄລຂອງໂລກເພີ່ມຂຶ້ນ ຄຳສອນທີ່ບໍ່ມີສິ້ນສຸດຂອງຄຳພີໄບເບິນແຮ່ງຈະມີຄຸນຄ່າຫຼາຍຂຶ້ນ.”
2 ບໍ່ວ່າເຮົານັບຖືສາສະໜາໃດ ເຮົາອາດສົນໃຈຢາກຮູ້ກ່ຽວກັບໜັງສືເຫຼັ້ມນີ້ບໍ່ແມ່ນບໍ? ໃນຕອນທ້າຍຂອງສະຕະວັດທີ 20 ຄຳພີໄບເບິນຖືກແປໝົດເຫຼັ້ມຫຼືບາງສ່ວນເປັນຫຼາຍກວ່າ 2.200 ພາສາ. ຄົນສ່ວນຫຼາຍສາມາດຊອກຄຳພີໄບເບິນໃນພາສາເຊິ່ງຕົນເອງອ່ານແລະເຂົ້າໃຈໄດ້. ນັບແຕ່ມີການປະດິດເຄື່ອງພິມຕົວລຽງ ໄດ້ກະປະມານວ່າຄຳພີໄບເບິນມີການຈຳໜ່າຍໄປແລ້ວເຖິງສີ່ພັນລ້ານເຫຼັ້ມທັງໝົດທົ່ວໂລກ.
3 ຕອນນີ້ ຖ້າເຈົ້າມີຄຳພີໄບເບິນສະບັບໜຶ່ງ ຂໍໃຫ້ເປີດແລະກວດເບິ່ງສາລະບານ. ເຈົ້າຈະສັງເກດເຫັນຊື່ຂອງພະທຳ (ໜັງສື) ຕ່າງໆເຊິ່ງເລີ່ມຕົ້ນດ້ວຍພະທໍາຕົ້ນເດິມແລະລົງທ້າຍດ້ວຍພະທຳຄຳປາກົດ. ແທ້ຈິງແລ້ວ ຄຳພີໄບເບິນປຽບເໝືອນຫ້ອງສະຫມຸດທີ່ມີໜັງສື 66 ເຫຼັ້ມເຊິ່ງຂຽນຂຶ້ນໂດຍມະນຸດປະມານ 40 ຄົນ. ພາກທຳອິດປະກອບດ້ວຍພະທຳ 39 ເຫຼັ້ມທີ່ຫຼາຍຄົນເອີ້ນວ່າພະຄຳພີພາກພັນທະສັນຍາເດີມນັ້ນ ເອີ້ນຢ່າງຖືກຕ້ອງວ່າພະຄຳພີພາກພາສາເຫບເລີ ເພາະສ່ວນຫຼາຍຖືກຂຽນເປັນພາສາເຫບເລີ. ພາກທີສອງປະກອບດ້ວຍພະທໍາ 27 ເຫຼັ້ມທີ່ຫຼາຍຄົນເອີ້ນວ່າພະຄຳພີພາກພັນທະສັນຍາໃໝ່ນັ້ນ ເອີ້ນ
ຢ່າງຖືກຕ້ອງວ່າພະຄຳພີຄລິດສະຕຽນພາກພາສາເກັຣກ ເພາະພາກນີ້ຖືກຂຽນເປັນພາສາເກຣັກໂດຍຄົນຂຽນທີ່ເປັນຄລິດສະຕຽນ. ການຂຽນຄຳພີໄບເບິນໃຊ້ເວລາຫຼາຍກວ່າ 1.600 ປີ ຈາກປີ 1513 ກ່ອນສາກົນສັກກະຫຼາດເຖິງປີສາກົນສັກກະຫຼາດ 98 ຈຶ່ງແລ້ວສົມບູນ. ຄົນຂຽນບໍ່ເຄີຍປະຊຸມປຶກສາກັນກ່ຽວກັບບົດຂຽນ ແລະພະທຳບາງເຫຼັ້ມຖືກຂຽນເວລາດຽວກັນໃນສະຖານທີ່ຕ່າງໆເຊິ່ງຫ່າງໄກກັນຫຼາຍພັນກິໂລແມັດ. ເຖິງແນວນັ້ນກໍຕາມ ເນື້ອໃນຂອງຄຳພີໄບເບິນມີໃຈຄວາມສຳຄັນອັນດຽວ; ບໍ່ໄດ້ຂັດແຍ່ງໃນຕົວເອງ. ເຮົາຄົງຈະສົງໄສວ່າ ‘ເປັນໄປໄດ້ແນວໃດທີ່ມະນຸດຫຼາຍກວ່າ 40 ຄົນເຊິ່ງມີຊີວິດຢູ່ໃນໄລຍະ 16 ສະຕະວັດຮິບໂຮມໜັງສືທີ່ສອດຄ່ອງກັນແບບນີ້?’4 ເຖິງແມ່ນວ່າການຂຽນຄຳພີໄບເບິນໄດ້ແລ້ວສົມບູນ 1.900 ປີມາແລ້ວ ແຕ່ເນື້ອໃນຂອງຄຳພີໄບເບິນກໍສ້າງຄວາມສົນໃຈໃຫ້ແກ່ຊາຍຍິງຫຼາຍຄົນໃນສະໄໝປັດຈຸບັນ. ຕົວຢ່າງ ຂໍໃຫ້ເປີດຄຳພີໄບເບິນແລະເບິ່ງໂຢບ 26:6 (ສະບັບແປເກົ່າ). ຈົ່ງຈື່ໄວ້ວ່າຂໍ້ຄວາມນີ້ຖືກຂຽນຂຶ້ນໃນສະຕະວັດທີ 15 ກ່ອນສາກົນສັກກະຫຼາດ. ຂໍ້ນີ້ອ່ານວ່າ “ພະອົງເອົາທິດອຸດອນປູໄວ້ເທິງວ່າງເປົ່າ ພະອົງຫ້ອຍແຜ່ນດິນໂລກໄວ້ບ່ອນເປົ່າ.” ຈາກນັ້ນໃຫ້ເປີດເອຊາອີ 40:22 ສັງເກດວ່າພະທຳເອຊາອີຖືກຂຽນຂຶ້ນໃນສະຕະວັດທີແປດກ່ອນສາກົນສັກກະຫຼາດ. ຂໍ້ນີ້ອ່ານວ່າ “ພະອົງນັ່ງທັງເທິງວົງຮອບແຜ່ນດິນໂລກ ແລະຊາວຊົນເປັນຄືຕັກແຕນ ພະອົງໄດ້ເອົາທ້ອງຟ້າທັງຫຼາຍປູໄວ້ຄືແພບາງໆ ແລະພະອົງແພນຟ້ານັ້ນຄືທັບອາໄສຈຶ່ງຢູ່ພາຍໃນ.” ເຈົ້າຄິດເຖິງຫຍັງເມື່ອອ່ານຄຳພັນລະນາສອງຂໍ້ນີ້? ກໍຄືຮູບວັດຖຸທີ່ເປັນວົງມົນ “ຫ້ອຍ” ຢູ່ໃນອະວະກາດ. ເຮົາອາດເຄີຍເຫັນຮູບພາບແບບນີ້ໃນຮູບຖ່າຍທີ່ສົ່ງມາຈາກຍານອະວະກາດສະໄໝປັດຈຸບັນ. ເຮົາອາດສົງໄສວ່າ ‘ຄົນທີ່ເຄີຍມີຊີວິດແຕ່ດົນນານນັ້ນຈະສາມາດເວົ້າໃນສິ່ງທີ່ຖືກຕ້ອງກັບວິທະຍາສາດໄດ້ແນວໃດ?’
5 ຂໍໃຫ້ພິຈາລະນາອີກຄຳຖາມໜຶ່ງເຊິ່ງກ່ຽວພັນກັບຄຳພີໄບເບິນ. ຄຳພີໄບເບິນຖືກຕ້ອງຕາມປະຫວັດສາດບໍ? ບາງຄົນຄິດວ່າຄຳພີໄບເບິນເປັນພຽງການໂຮມເອົາຕຳນານເຊິ່ງບໍ່ມີຫຼັກຖານທາງປະຫວັດສາດ. ເພື່ອເປັນຕົວຢ່າງ ໃຫ້ເບິ່ງເລື່ອງກະສັດດາວິດຊາວອິດສະລາເອນຜູ້ມີຊື່ສຽງ. ເມື່ອບໍ່ດົນມານີ້ ຫຼັກຖານພຽງອັນດຽວເທົ່ານັ້ນທີ່ໃຫ້ຮູ້ວ່າທ່ານເຄີຍມີຊີວິດຢູ່ແທ້ ນັ້ນຄືຄຳພີໄບເບິນ. ເຖິງແມ່ນວ່າ ນັກປະຫວັດສາດຄົນທີ່ສຳຄັນຫຼາຍຄົນຍອມຮັບວ່າທ່ານເປັນບຸກຄົນແທ້ໆ ແຕ່ຄົນມັກສົງໄສບາງຄົນພະຍາຍາມຕັດທ່ານອອກໄປໂດຍຖືວ່າທ່ານເປັນຕຳນານແຕ່ງຂຶ້ນໂດຍນັກໂຄສະນາຊວນເຊື່ອຊາວຢິວ. ຄວາມຈິງເປີດເຜີຍໃຫ້ເຫັນອັນໃດ?
6 ໃນປີ 1993 ຄຳຈາລຶກເຊິ່ງກ່າວເຖິງ “ລາຊະວົງຂອງດາວິດ” ແມ່ນຖືກຄົ້ນພົບໃນຊາກເມືອງດານຂອງຊາວອິດສະລາເອນບູຮານ. ຄຳຈາລຶກແມ່ນພາກສ່ວນໜຶ່ງຂອງອະນຸສາວະລີທີ່ແຕກທະລາຍຈາກສະຕະວັດທີເກົ້າກ່ອນສາກົນສັກກະຫຼາດ ເຊິ່ງເປັນອະນຸສອນເຖິງໄຊຊະນະຂອງພວກສັດຕູທີ່ມີເໜືອຊາວອິດສະລາເອນ. ໂດຍບໍ່ຄາດຫວັງ ຈຶ່ງມີຂໍ້ອ້າງອີງສະໄໝບູຮານຈາກນອກຄຳພີໄບເບິນທີ່ກ່າວເຖິງດາວິດ ເລື່ອງນີ້ສຳຄັນບໍ? ກ່ຽວກັບສິ່ງທີ່ຄົ້ນພົບ ທ່ານອິດສະລາເອນ ຟິນເກີສະໄຕນ ແຫ່ງມະຫາວິທະຍາໄລແຕນອາວິວ ໃຫ້ຂໍ້ສັງເກດວ່າ “ການປະຕິເສດຄວາມຈິງທີ່ມີຢູ່ໃນຄຳພີໄບເບິນໄດ້ພັງທະລາຍລົງໃນເວລາຂ້າມຄືນເນື່ອງດ້ວຍການຄົ້ນພົບຄຳຈາລຶກກ່ຽວກັບດາວິດ.” ເປັນຕາໜ້າສົນໃຈ ສາດສະດາຈານວິນລຽມ ເອັຟ. ອັນໄບທ ນັກບູຮານຄະດີເຊິ່ງໃຊ້ເວລາຫຼາຍສິບປີຂຸດຄົ້ນຢູ່ປາແລັດສະຕິນ ຄັ້ງໜຶ່ງກ່າວວ່າ “ການຄົ້ນພົບເທື່ອແລ້ວເທື່ອອີກໄດ້ຢືນຢັນຄວາມຖືກຕ້ອງຂອງລາຍລະອຽດເຊິ່ງນັບບໍ່ຖ້ວນ ແລະເຮັດໃຫ້ມີການຍອມຮັບຄຸນຄ່າຂອງຄຳພີໄບເບິນເພີ່ມຂຶ້ນວ່າເປັນແຫຼ່ງຂໍ້ມູນທາງປະຫວັດສາດ.” ໃນອີກທາງໜຶ່ງເຮົາອາດຖາມວ່າ ‘ບໍ່ຄືກັນກັບບົດເລື່ອງວີລະກຳຫຼືຕຳນານ ເປັນໄປໄດ້ແນວໃດທີ່ໜັງສືເກົ່າແກ່ເຫຼັ້ມນີ້ມີຄວາມຖືກຕ້ອງທາງປະຫວັດສາດ?’ ບໍ່ໝົດເທົ່ານີ້ ແຕ່ຍັງມີຕື່ມອີກ.
7 ຄຳພີໄບເບິນຍັງແມ່ນໜັງສືແຫ່ງຄຳພະຍາກອນອີກດ້ວຍ. (2 ເປໂຕ 1:20, 21) ຄຳວ່າ “ຄຳພະຍາກອນ” ອາດເຮັດໃຫ້ເຮົາຄິດໄດ້ທັນທີເຖິງຖ້ອຍຄຳຕ່າງໆທີ່ບໍ່ສຳເລັດເປັນຈິງຂອງຄົນທີ່ປະກາດຕົນເອງວ່າເປັນຜູ້ພະຍາກອນ. ຕອນນີ້ ຂໍໃຫ້ປະຄວາມຄິດນັ້ນໄວ້ກ່ອນ ເປີດຄຳພີໄບເບິນແລະເບິ່ງດານຽນບົດ 8. ໃນບົດນີ້ດານຽນພັນລະນາເຖິງນິມິດການຕໍ່ສູ້ລະຫວ່າງແພະ (ແກະ) ເຖິກທີ່ມີເຂົາສອງເຫຼັ້ມກັບແບ້ເຖິກຂົນຫຼາຍທີ່ມີ ‘ເຂົາໃຫຍ່ເຫຼັ້ມໜຶ່ງ.’ ແບ້ເຖິກນັ້ນຊະນະແຕ່ວ່າເຂົາໃຫຍ່ນັ້ນໄດ້ຫັກ. ມີເຂົາສີ່ເຫຼັ້ມໄດ້ຂຶ້ນມາແທນ. ນິມິດນີ້ໝາຍຄວາມວ່າແນວໃດ? ບັນທຶກຂອງດານຽນບອກຕໍ່ໄປວ່າ “ແພະ (ແກະ) ເຖິກທີ່ເຈົ້າໄດ້ເຫັນທີ່ມີເຂົາສອງເຫຼັ້ມແມ່ນພວກກະສັດປະເທດແມດກັບເປເຣເຊ. ແບ້ເຖິກທີ່ມີຂົນຫຼາຍແມ່ນກະສັດປະເທດຢາວານ (ເກັຣກ) ແລະເຂົາເຫຼັ້ມໃຫຍ່ທີ່ຢູ່ຫວ່າງກາງຕາມັນແມ່ນກະສັດທີຕົ້ນ. ເຂົານັ້ນຫັກເສຍແລະມີສີ່ເຫຼັ້ມອື່ນຂຶ້ນຕາງມັນແມ່ນນະຄອນສີ່ຕອນທີ່ຈະຂຶ້ນມາຈາກຊາວປະເທດນັ້ນ ແຕ່ວ່າບໍ່ໃຊ່ດ້ວຍອຳນາດມັນ.”—ດານຽນ 8:3-22.
“ການຄົ້ນພົບເທື່ອແລ້ວເທື່ອອີກໄດ້ຢືນຢັນຄວາມຖືກຕ້ອງຂອງລາຍລະອຽດທີ່ນັບບໍ່ຖ້ວນ ແລະເຮັດໃຫ້ມີການຍອມຮັບຄຸນຄ່າຂອງຄຳພີໄບເບິນເພີ່ມຂຶ້ນວ່າເປັນແຫຼ່ງຂໍ້ມູນທາງປະຫວັດສາດ”—ສາດສະດາຈານວິນລຽມ ເອັຟ. ອັນໄບທ
8 ຄຳພະຍາກອນນີ້ໄດ້ສຳເລັດບໍ? ການຂຽນພະທຳດານຽນໄດ້ແລ້ວສົມບູນປະມານປີ 536 ກ່ອນສາກົນສັກກະຫຼາດ. ອາເລັກຊານເດີມະຫາລາດກະສັດມາເຊໂດນຽຍທີ່ກຳເນີດ 180 ປີຕໍ່ມາ ໃນປີ 356 ກ່ອນສາກົນສັກກະຫຼາດ
ເອົາຊະນະຈັກກະພັດເປີເຊຍ. ລາວຄື “ເຂົາເຫຼັ້ມໃຫຍ່” ຢູ່ຫວ່າງກາງຕາຂອງ “ແບ້ເຖິກທີ່ມີຂົນຫຼາຍ.” ຕາມທີ່ໂຢເຊຟຸດສ ນັກປະຫວັດສາດຊາວຢິວກ່າວ ໃນຕອນເຂົ້າສູ່ເມືອງເຢຣຶຊາເລມກ່ອນໄດ້ໄຊຊະນະເໜືອປະເທດເປີເຊຍ ມີການນຳເອົາພະທຳດານຽນມາໃຫ້ອາເລັກຊານເດີເບິ່ງ. ລາວໄດ້ສະຫລຸບວ່າ ຖ້ອຍຄຳທີ່ກ່າວໃນຄຳພະຍາກອນຂອງດານຽນແມ່ນໝາຍເຖິງການປະຕິບັດການທາງທະຫານຂອງກອງທັບຕົນກັບປະເທດເປີເຊຍ. ຍິ່ງກວ່ານັ້ນ ໃນຕຳລາປະຫວັດສາດໂລກ ເຮົາສາມາດອ່ານກ່ຽວກັບແນວທາງທີ່ຈັກກະພັດຂອງອາເລັກຊານເດີດຳເນີນຕໍ່ໄປພາຍຫຼັງການເສຍຊີວິດຂອງລາວໃນປີ 323 ກ່ອນສາກົນສັກກະຫຼາດ. ໃນທີ່ສຸດນາຍພົນສີ່ຄົນໄດ້ສືບຕໍ່ການປົກຄອງຂອງຈັກກະພັດນີ້ ແລະເມື່ອຮອດປີ 301 ກ່ອນສາກົນສັກກະຫຼາດ “ເຂົາສີ່ເຫຼັ້ມ” ເຊິ່ງຂຶ້ນມາແທນ “ເຂົາເຫຼັ້ມໃຫຍ່” ໄດ້ແບ່ງແຍກເຂດປົກຄອງອອກເປັນສີ່ສ່ວນ. ອີກຄັ້ງໜຶ່ງ ເຮົາມີເຫດຜົນທີ່ຈະຖາມກ່ຽວກັບບັນຫາທີ່ວ່າ ‘ເປັນໄປໄດ້ແນວໃດທີ່ປຶ້ມເຫຼັ້ມໜຶ່ງຈະບອກລ່ວງໜ້າຢ່າງຊັດເຈນ ແລະຖືກຕ້ອງວ່າອັນໃດຈະເກີດຂຶ້ນໃນອີກ 200 ປີຕໍ່ຈາກນັ້ນ?’9 ຄຳພີໄບເບິນເອງໃຫ້ຄຳຕອບສຳລັບຄຳຖາມເຫຼົ່ານີ້: “ພະຄຳພີໝົດສິ້ນເປັນດ້ວຍພະວິນຍານຂອງພະເຈົ້າແລະເປັນປະໂຫຍດ.” (2 ຕີໂມເຕ 3:16) ຄຳພາສາເກັຣກທີ່ແປວ່າ “ດ້ວຍພະວິນຍານຂອງພະເຈົ້າ” ມີຄວາມໝາຍຕາມຕົວອັກສອນວ່າ “ພະເຈົ້າເປົ່າ.” ພະເຈົ້າ “ເປົ່າ” ຂໍ້ມູນເຊິ່ງປັດຈຸບັນເຮົາພົບໃນພະທຳເຫຼັ້ມຕ່າງໆຂອງຄຳພີໄບເບິນເຂົ້າໄປໃນຈິດໃຈຂອງຜູ້ຂຽນປະມານ 40 ຄົນ. ບາງຕົວຢ່າງທີ່ເຮົາໄດ້ພິຈາລະນາແລ້ວດ້ານວິທະຍາສາດ, ດ້ານປະຫວັດສາດ, ແລະກ່ຽວກັບຄຳພະຍາກອນຊີ້ໃຫ້ເຫັນເຖິງຂໍ້ສະຫລຸບພຽງຂໍ້ດຽວ. ຄຳພີໄບເບິນໜັງສືອັນລໍ້າຄ່າ ບໍ່ແມ່ນໝາກຜົນຈາກສະຕິປັນຍາຂອງມະນຸດ ແຕ່ມີຕົ້ນກຳເນີດມາຈາກພະເຈົ້າ. ເຖິງຢ່າງນັ້ນກໍດີ ໃນປັດຈຸບັນ ມີຫຼາຍຄົນສົງໄສກ່ຽວກັບເລື່ອງການມີຊີວິດຢູ່ຂອງພະເຈົ້າ ຜູ້ປະພັນຄຳພີໄບເບິນ. ເຈົ້າເດ ຄິດວ່າແນວໃດ?