ບົດນຳ
ເຖິງຜູ້ອ່ານທີ່ຮັກ
“ຕາມເຮົາໄປເຖີ້ນ.” (ມາລະໂກ 10:21) ທີ່ແທ້ແລ້ວ ດ້ວຍຖ້ອຍຄຳດັ່ງກ່າວພະເຍຊູຄລິດເຊີນເຮົາໃຫ້ຕິດຕາມພະອົງ. ເຈົ້າກຳລັງຕອບຮັບຄຳເຊີນຂອງພະອົງບໍ? ການເຮັດເຊັ່ນນັ້ນຈະມີຜົນກະທົບຢ່າງເລິກເຊິ່ງຕໍ່ຊີວິດຂອງເຈົ້າ? ເພາະເຫດໃດ?
ພະເຢໂຫວາສົ່ງລູກຊາຍຜູ້ດຽວທີ່ພະອົງໄດ້ສ້າງໂດຍກົງໃຫ້ມາແຜ່ນດິນໂລກເພື່ອສະລະຊີວິດເປັນຄ່າໄຖ່. (ໂຢຮັນ 3:16) ນອກຈາກສິ້ນຊີວິດເພື່ອເຮົາແລ້ວ ລູກຊາຍຜູ້ນີ້ຍັງໄດ້ສະແດງໃຫ້ເຮົາເຫັນວິທີດຳເນີນຊີວິດ. ໃນທຸກສິ່ງທີ່ພະອົງເຮັດ ພະອົງຮັກສາຄວາມຊື່ສັດໝັ້ນຄົງແລະນຳຄວາມຍິນດີມາສູ່ໃຈຂອງພໍ່. ພະເຍຊູຍັງສະແດງໃຫ້ເຫັນວິທີທີ່ຈະເປັນຄືກັບພໍ່ພະອົງ. ມີການສະທ້ອນໃຫ້ເຫັນແນວທາງແລະໃຈປະສົງຂອງຜູ້ເປັນພໍ່ຢ່າງຄົບຖ້ວນໃນຄຳເວົ້າແລະການກະທຳຂອງລູກຊາຍ.—ໂຢຮັນ 14:9.
ຄຳພີໄບເບິນກ່າວວ່າ ພະເຍຊູເປັນ “ແບບຢ່າງ . . . ເພື່ອພວກທ່ານຈະໄດ້ຕິດຕາມຮອຍຕີນຂອງພະອົງ.” (1 ເປໂຕ 2:21) ຖ້າເຮົາຢາກຫຍັບເຂົ້າໃກ້ພະເຢໂຫວາຫຼາຍຂຶ້ນ ຖ້າເຮົາຢາກດຳເນີນຊີວິດຢ່າງມີຄວາມໝາຍຢ່າງແທ້ຈິງໃນຕອນນີ້ ແລະຖ້າເຮົາດຳເນີນຕໍ່ໄປໃນຫົນທາງສູ່ຊີວິດຕະຫຼອດໄປ ເຮົາຕ້ອງດຳເນີນຕາມຮອຍຕີນຂອງພະຄລິດຢ່າງໃກ້ຊິດ.
ເພື່ອເລີ່ມຕົ້ນການເດີນທາງນີ້ ເຮົາຕ້ອງຄຸ້ນເຄີຍກັບຊີວິດຂອງພະເຍຊູຕອນຢູ່ແຜ່ນດິນໂລກ. ດັ່ງນັ້ນ ຄຳພັນລະນາກ່ຽວກັບພະເຍຊູທີ່ເກັບຮັກສາໄວ້ໃນຄຳພີໄບເບິນຈຶ່ງເປັນສິ່ງທີ່ເຮົາຄວນສຶກສາຢ່າງຖີ່ຖ້ວນ. ການຄິດຕຶກຕອງສິ່ງທີ່ພະເຍຊູເວົ້າແລະເຮັດ ແລະພິຈາລະນາວິທີທີ່ເຮົາສາມາດຮຽນແບບພະອົງທັງໃນຄຳເວົ້າແລະການກະທຳຈະຊ່ວຍເຮົາໃຫ້ເຫັນຊັດຫຼາຍຂຶ້ນໃນວິທີຕິດຕາມພະອົງ.
ຂໍໃຫ້ປຶ້ມນີ້ຊ່ວຍເຈົ້າພັດທະນາຄວາມຮັກທີ່ເຈົ້າມີຕໍ່ພະເຍຊູແລະພະເຢໂຫວາ. ແລະຂໍໃຫ້ຄວາມຮັກນີ້ກະຕຸ້ນເຈົ້າໃຫ້ດຳເນີນຕາມຮອຍຕີນຂອງພະເຍຊູຢ່າງໃກ້ຊິດ ເພື່ອເຈົ້າຈະນຳຄວາມຍິນດີມາສູ່ໃຈຂອງພະເຢໂຫວາທັງໃນເວລານີ້ແລະຕະຫຼອດໄປ.
ຜູ້ຈັດພິມ
