ຈົດໝາຍຈາກຄະນະກຳມະການປົກຄອງ
ຜູ້ປະກາດເລື່ອງການປົກຄອງຂອງພະເຈົ້າທີ່ຮັກ:
ລອງນຶກພາບວ່າເຈົ້າເປັນຄົນໜຶ່ງໃນອັກຄະສາວົກທີ່ຢືນຢູ່ເທິງພູເຂົາໝາກກອກ ແລ້ວພະເຢຊູມາປາກົດຕໍ່ໜ້າເຈົ້າຕອນທີ່ເພິ່ນກຳລັງຈະຂຶ້ນໄປສະຫວັນ. ພະເຢຊູບອກວ່າ: “ພວກເຈົ້າຈະໄດ້ຮັບພະລັງຈາກພະເຈົ້າ ພະລັງບໍລິສຸດນັ້ນຈະຢູ່ກັບພວກເຈົ້າ ແລະພວກເຈົ້າຈະເປັນພະຍານຂອງຂ້ອຍໃນເມືອງເຢຣູຊາເລັມແລະທົ່ວແຂວງຢູດາຍກັບແຂວງຊາມາເຣຍ ແລະຈົນຮອດສຸດຂອບໂລກ.” (ກຈກ. 1:8) ເມື່ອເຈົ້າໄດ້ຍິນຄຳເວົ້ານີ້ຂອງພະເຢຊູ ເຈົ້າຈະຮູ້ສຶກແນວໃດ?
ເຈົ້າອາດຮູ້ສຶກທໍ້ໃຈເພາະວຽກນີ້ເປັນວຽກໃຫຍ່ຫຼາຍ ເຈົ້າຄືຊິສົງໄສວ່າ: ‘ພວກເຮົາເຊິ່ງເປັນລູກສິດກຸ່ມນ້ອຍໆຈະປະກາດ “ຈົນຮອດສຸດຂອບໂລກ” ໄດ້ແນວໃດ?’ ແລ້ວເຈົ້າກໍອາດຈະຄິດເຖິງຄຳເຕືອນຂອງພະເຢຊູໃນຄືນກ່ອນທີ່ເພິ່ນຈະເສຍຊີວິດວ່າ: “ທາດບໍ່ໃຫຍ່ກວ່ານາຍ ຖ້າພວກເຂົາຂົ່ມເຫງຂ້ອຍ ພວກເຂົາຈະຂົ່ມເຫງພວກເຈົ້າຄືກັນ. ຖ້າພວກເຂົາເຮັດຕາມຄຳສອນຂອງຂ້ອຍ ພວກເຂົາກໍຈະເຮັດຕາມຄຳສອນຂອງພວກເຈົ້າຄືກັນ. ພວກເຂົາຈະເຮັດສິ່ງເຫຼົ່ານີ້ຕໍ່ພວກເຈົ້າ ຍ້ອນພວກເຈົ້າເປັນລູກສິດຂອງຂ້ອຍ ແລະຍ້ອນພວກເຂົາບໍ່ຮູ້ຈັກຜູ້ນັ້ນທີ່ໃຊ້ຂ້ອຍມາ.” (ຢຮ. 15:20, 21) ເມື່ອຄິດເຖິງຄຳເວົ້ານີ້ ເຈົ້າອາດສົງໄສວ່າ: ‘ຂ້ອຍຈະປະກາດຢ່າງລະອຽດຖີ່ຖ້ວນໄດ້ແນວໃດຖ້າຕ້ອງເຈິກັບການຕໍ່ຕ້ານແລະການຂົ່ມເຫງແບບນີ້?’
ໃນທຸກມື້ນີ້ ເຮົາກໍອາດຈະສົງໄສແບບດຽວກັນ. ພວກເຮົາທີ່ເປັນພະຍານພະເຢໂຫວາໄດ້ຮັບວຽກມອບໝາຍໃຫ້ປະກາດກັບ “ຄົນທຸກຊາດ” ຈົນຮອດ “ສຸດຂອບໂລກ.” (ມທ. 28:19, 20) ເມື່ອຄິດເຖິງການຕໍ່ຕ້ານທີ່ພະເຢຊູບອກໄວ້ລ່ວງໜ້າ ເຮົາກໍແຮ່ງສົງໄສວ່າເຮົາຈະເຮັດວຽກນີ້ໃຫ້ສຳເລັດໄດ້ແນວໃດ?
ປຶ້ມກິດຈະການຂອງອັກຄະສາວົກບອກໃຫ້ເຮົາຮູ້ເລື່ອງທີ່ໜ້າຕື່ນເຕັ້ນກ່ຽວກັບວິທີທີ່ພະເຢໂຫວາຊ່ວຍພວກອັກຄະສາວົກແລະຄລິດສະຕຽນຄົນອື່ນໆໃນສະຕະວັດທຳອິດໃຫ້ເຮັດວຽກມອບໝາຍໄດ້ສຳເລັດ. ປຶ້ມຫົວນີ້ຈະຊ່ວຍເຈົ້າໃຫ້ເຫັນເລື່ອງທີ່ໜ້າຕື່ນເຕັ້ນທີ່ຢູ່ໃນປຶ້ມກິດຈະການ ເຈົ້າຈະປະທັບໃຈທີ່ໄດ້ຮູ້ວ່າມີຫຼາຍຢ່າງທີ່ຄ້າຍຄືກັນລະຫວ່າງຜູ້ຮັບໃຊ້ໃນອະດີດແລະໃນປັດຈຸບັນບໍ່ວ່າຈະເປັນວຽກທີ່ເຮັດແລະການຈັດລະບຽບວຽກ. ການໄດ້ທົບທວນເລື່ອງນີ້ຈະຊ່ວຍໃຫ້ຄວາມເຊື່ອຂອງເຈົ້າເຂັ້ມແຂງແລະໝັ້ນໃຈວ່າພະເຢໂຫວາຍັງຊີ້ນຳອົງການຂອງເພິ່ນສ່ວນທີ່ຢູ່ໃນໂລກນີ້.
ເຮົາອະທິດຖານແລະຫວັງວ່າການທົບທວນເລື່ອງໃນປຶ້ມກິດຈະການຈະຊ່ວຍເຈົ້າໃຫ້ໝັ້ນໃຈຫຼາຍຂຶ້ນວ່າ ພະເຢໂຫວາຈະຊ່ວຍເຈົ້າໂດຍທາງພະລັງບໍລິສຸດ. ຂໍໃຫ້ເຈົ້າໄດ້ຮັບກຳລັງໃຈເພື່ອຈະ ‘ປະກາດເລື່ອງການປົກຄອງຂອງພະເຈົ້າ’ ຢ່າງລະອຽດຖີ່ຖ້ວນແລະຊ່ວຍຄົນອື່ນໃຫ້ໄດ້ຮັບຄວາມລອດ.—ກຈກ. 28:23; 1ຕມ. 4:16
ພີ່ນ້ອງຂອງເຈົ້າ
ຄະນະກຳມະການປົກຄອງຂອງພະຍານພະເຢໂຫວາ
