ບົດທີ 15
“ຊ່ວຍປະຊາຄົມຕ່າງໆໃຫ້ເຂັ້ມແຂງຂຶ້ນ”
ຜູ້ດູແລເດີນທາງຊ່ວຍປະຊາຄົມຕ່າງໆໃຫ້ມີຄວາມເຊື່ອໝັ້ນຄົງ
1-3. (ກ) ໃຜເປັນໝູ່ຮ່ວມເດີນທາງຄົນໃໝ່ຂອງໂປໂລ ແລະລາວເປັນຄົນແນວໃດ? (ຂ) ເຮົາຈະໄດ້ຮຽນຫຍັງໃນບົດນີ້?
ຕອນທີ່ເດີນທາງຜ່ານເມືອງຕ່າງໆອັກຄະສາວົກໂປໂລແນມເບິ່ງພີ່ນ້ອງຊາຍໜຸ່ມທີ່ຍ່າງຢູ່ຂ້າງໆລາວ ພີ່ນ້ອງຊາຍຄົນນີ້ແມ່ນຕີໂມທຽວ. ຕີໂມທຽວເປັນຄົນໜຸ່ມທີ່ມີກຳລັງວັງຊາ ລາວໜ້າຈະອາຍຸເກືອບ 20 ປີຫຼືບໍ່ກໍປະມານ 20 ປີຕົ້ນໆ. ແຕ່ລະກ້າວຂອງການເດີນທາງຄັ້ງໃໝ່ນີ້ ທັງສອງຄົນກໍແຮ່ງຫ່າງອອກຈາກເມືອງລີສະຕຣາກັບເມືອງອີໂກນີອົນອອກໄປເລື້ອຍໆ. ນີ້ໝາຍຄວາມວ່າຕີໂມທຽວກໍແຮ່ງຢູ່ໄກຈາກບ້ານຂອງລາວຫຼາຍຂຶ້ນເລື້ອຍໆ. ການເດີນທາງຄັ້ງນີ້ຈະເປັນແນວໃດ? ໂປໂລພໍຈະຮູ້ແນ່ແລ້ວ ເພາະນີ້ເປັນການເດີນທາງໄປປະກາດຢູ່ຕ່າງປະເທດຮອບທີສອງ. ລາວຮູ້ວ່າເຂົາເຈົ້າຄືຊິເຈິອັນຕະລາຍແລະບັນຫາຫຼາຍຢ່າງ. ແລ້ວຕີໂມທຽວທີ່ເດີນທາງມານຳລາວຈະຮັບມືໄດ້ບໍ?
2 ໂປໂລໝັ້ນໃຈໃນຕີໂມທຽວ ບາງທີຄວາມໝັ້ນໃຈນີ້ອາດຈະມີຫຼາຍກວ່າທີ່ຕີໂມທຽວໝັ້ນໃຈໃນໂຕເອງດ້ວຍຊ້ຳ. ເຫດການທີ່ເກີດຂຶ້ນກ່ອນໜ້ານີ້ເຮັດໃຫ້ໂປໂລຮູ້ວ່າລາວຕ້ອງມີໝູ່ຮ່ວມເດີນທາງທີ່ເໝາະສົມ. ໂປໂລຮູ້ວ່າລາວຕ້ອງໄປຢາມແລະໃຫ້ກຳລັງໃຈພີ່ນ້ອງໃນປະຊາຄົມຕ່າງໆ. ດັ່ງນັ້ນ ຄົນທີ່ເດີນທາງມານຳລາວຕ້ອງມີຄວາມຄິດແລະເປົ້າໝາຍດຽວກັນ. ເປັນຫຍັງໂປໂລອາດສົນໃຈເລື່ອງນີ້ເປັນພິເສດ? ເຫດຜົນໜຶ່ງອາດເປັນຍ້ອນລາວກັບບາຣະນາບາຫາກໍຂັດແຍ່ງກັນກ່ອນໜ້ານີ້ຈົນເຮັດໃຫ້ເຂົາເຈົ້າຕ້ອງແຍກກັນໄປຄົນລະທາງ.
3 ໃນບົດນີ້ ເຮົາຈະໄດ້ຮຽນວ່າເຮົາຕ້ອງເຮັດຫຍັງແດ່ເພື່ອຈະຈັດການກັບຄວາມຂັດແຍ້ງ. ນອກຈາກນັ້ນ ເຮົາຈະໄດ້ຮູ້ວ່າເປັນຫຍັງໂປໂລຈຶ່ງເລືອກຕີໂມທຽວໃຫ້ເປັນໝູ່ຮ່ວມເດີນທາງ ແລະເຮົາຈະເຂົ້າໃຈຫຼາຍຂຶ້ນວ່າຜູ້ດູແລໝວດໃນທຸກມື້ນີ້ກຳລັງເຮັດວຽກຫຍັງທີ່ສຳຄັນ.
“ໄປ໋ ໄປຢາມພີ່ນ້ອງ” (ກິດຈະການ 15:36)
4. ໂປໂລມີເປົ້າໝາຍຫຍັງຕອນທີ່ເດີນທາງໄປປະກາດຢູ່ຕ່າງປະເທດຮອບທີສອງ?
4 ໃນບົດກ່ອນ ເຮົາໄດ້ຮຽນກ່ຽວກັບວິທີທີ່ໂປໂລ ບາຣະນາບາ ຢູດາ ແລະຊີລາໃຫ້ກຳລັງໃຈພີ່ນ້ອງໃນປະຊາຄົມທີ່ຢູ່ເມືອງອັນຕີໂອເຂຍໂດຍການບອກຄຳຕັດສິນຂອງຄະນະກຳມະການປົກຄອງກ່ຽວກັບປະເດັນເລື່ອງການຮັບສິນຕັດ. ຫຼັງຈາກນັ້ນໂປໂລເຮັດຫຍັງ? ໂປໂລໄປບອກບາຣະນາບາເລື່ອງແຜນການເດີນທາງຄັ້ງໃໝ່ວ່າ: “ໄປ໋ ໄປຢາມພີ່ນ້ອງໃນທຸກເມືອງທີ່ພວກເຮົາເຄີຍປະກາດຄຳສອນຂອງພະເຢໂຫວາ ເພື່ອຈະຮູ້ວ່າພວກເຂົາເປັນແນວໃດແດ່.” (ກຈກ. 15:36) ໂປໂລບໍ່ໄດ້ເວົ້າເຖິງການໄປຢາມເພື່ອຈະໄປເຈິພີ່ນ້ອງໃໝ່ເທົ່ານັ້ນ. ປຶ້ມກິດຈະການຊ່ວຍເຮົາໃຫ້ຮູ້ເປົ້າໝາຍການເດີນທາງໄປປະກາດຢູ່ຕ່າງປະເທດຮອບທີສອງ ຂອງໂປໂລ. ເປົ້າໝາຍທຳອິດແມ່ນ ລາວຢາກບອກຄຳຕັດສິນຂອງຄະນະກຳມະການປົກຄອງຕາມເມືອງຕ່າງໆທີ່ລາວເດີນທາງໄປ. (ກຈກ. 16:4) ທີສອງ ເນື່ອງຈາກໂປໂລເປັນຜູ້ດູແລເດີນທາງ ລາວຈຶ່ງຕັ້ງໃຈໄປຊ່ວຍປະຊາຄົມຕ່າງໆໃຫ້ເຂັ້ມແຂງແລະຊ່ວຍເສີມຄວາມເຊື່ອຂອງພີ່ນ້ອງໃຫ້ເຂັ້ມແຂງຫຼາຍຂຶ້ນນຳ. (ຣມ. 1:11, 12) ອົງການຂອງພະຍານພະເຢໂຫວາໃນທຸກມື້ນີ້ເຮັດຕາມແບບຢ່າງຂອງພວກອັກຄະສາວົກແນວໃດ?
5. ຄະນະກຳມະການປົກຄອງໃນທຸກມື້ນີ້ໄດ້ຊີ້ນຳແລະໃຫ້ກຳລັງໃຈພີ່ນ້ອງໃນປະຊາຄົມຕ່າງໆແນວໃດ?
5 ໃນທຸກມື້ນີ້ ພະເຢຊູໃຊ້ຄະນະກຳມະການປົກຄອງຂອງພະຍານພະເຢໂຫວາເພື່ອຊີ້ນຳປະຊາຄົມຂອງເພິ່ນ. ຜູ້ຖືກເຈີມທີ່ສັດຊື່ເຫຼົ່ານີ້ໄດ້ໃຫ້ການຊີ້ນຳແລະໃຫ້ກຳລັງໃຈພີ່ນ້ອງທຸກປະຊາຄົມທີ່ຢູ່ທົ່ວໂລກໂດຍທາງຈົດໝາຍ ປຶ້ມແລະສິ່ງພິມຕ່າງໆທັງແບບເປັນຫົວແລະແບບອອນລາຍ ທາງການປະຊຸມ ແລະໂດຍທາງອື່ນໆ. ນອກຈາກນັ້ນ ຄະນະກຳມະການປົກຄອງຍັງພະຍາຍາມຕິດຕໍ່ກັບແຕ່ລະປະຊາຄົມໂດຍຈັດໃຫ້ມີຜູ້ດູແລເດີນທາງໄປຢາມພີ່ນ້ອງໃນປະຊາຄົມຕ່າງໆ. ຜູ້ດູແລທີ່ມີຄຸນສົມບັດເຫຼົ່ານີ້ມີຈຳນວນຫຼາຍພັນຄົນທົ່ວໂລກ ເຂົາເຈົ້າໄດ້ຮັບການແຕ່ງຕັ້ງໂດຍກົງຈາກຄະນະກຳມະການປົກຄອງໃຫ້ຮັບໃຊ້ເປັນຜູ້ດູແລໝວດ.
6, 7. ຜູ້ດູແລໝວດມີໜ້າທີ່ຮັບຜິດຊອບຫຍັງແດ່?
6 ຜູ້ດູແລໝວດສົນໃຈພີ່ນ້ອງແລະໃຫ້ກຳລັງທຸກຄົນໃນປະຊາຄົມໃຫ້ມີຄວາມເຊື່ອເຂັ້ມແຂງ. ເຂົາເຈົ້າເຮັດແນວໃດ? ຜູ້ດູແລໝວດເຮັດຕາມຕົວຢ່າງຂອງຜູ້ດູແລເດີນທາງໃນອະດີດ ເຊັ່ນ: ຕົວຢ່າງຂອງໂປໂລ. ໂປໂລໄດ້ບອກຕີໂມທຽວທີ່ເປັນຜູ້ດູແລເດີນທາງວ່າ: “ໃຫ້ປະກາດຖ້ອຍຄຳຂອງພະເຈົ້າຢ່າງຈິງຈັງ ທັງໃນຕອນທີ່ສະດວກແລະຕອນທີ່ລຳບາກ ໃຫ້ຕັກເຕືອນ ຕຳໜິ ແລະໂນ້ມນ້າວ ແຕ່ໃຫ້ເຮັດແບບນັ້ນດ້ວຍຄວາມອົດກັ້ນແລະດ້ວຍການສອນຢ່າງຊຳນິຊຳນານ.”—2ຕມ. 4:2, 5
7 ຈາກຄຳເວົ້າຂອງໂປໂລເຮົາເຫັນວ່າ ຖ້າຜູ້ດູແລໝວດແຕ່ງດອງແລ້ວ ລາວກັບເມຍຈະມີສ່ວນຮ່ວມກັບຜູ້ປະກາດທ້ອງຖິ່ນໃນວຽກປະກາດຫຼາຍຮູບແບບ. ຍ້ອນຜູ້ດູແລໝວດເປັນຜູ້ສອນທີ່ເກັ່ງແລະຮັກວຽກປະກາດ ຕົວຢ່າງຂອງເຂົາເຈົ້າຈຶ່ງກະຕຸ້ນພີ່ນ້ອງໃຫ້ຢາກເຮັດຕາມ. (ຣມ. 12:11; 2ຕມ. 2:15) ຜູ້ດູແລໝວດສະແດງຄວາມຮັກແບບບໍ່ເຫັນແກ່ໂຕ ເຂົາເຈົ້າເຕັມໃຈໃຫ້ເວລາແລະກຳລັງເພື່ອຮັບໃຊ້ຄົນອື່ນ. ເຂົາເຈົ້າເຕັມໃຈເດີນທາງທັງໆທີ່ສະພາບອາກາດບໍ່ດີຫຼືຢູ່ໃນເຂດທີ່ອັນຕະລາຍ. (ຟລປ. 2:3, 4) ນອກຈາກນັ້ນ ຜູ້ດູແລໝວດຍັງໃຫ້ກຳລັງໃຈ ສອນ ແລະໃຫ້ຄຳແນະນຳແຕ່ລະປະຊາຄົມໂດຍຄຳບັນລະຍາຍທີ່ອາໄສຄຳພີໄບເບິນເປັນຫຼັກ. ທຸກຄົນໃນປະຊາຄົມຈະໄດ້ຮັບປະໂຫຍດຖ້າສັງເກດເບິ່ງຕົວຢ່າງທີ່ດີຂອງຜູ້ດູແລໝວດແລະຮຽນແບບຄວາມເຊື່ອຂອງເຂົາເຈົ້າ.—ຮຣ. 13:7
“ຖຽງກັນ” (ກິດຈະການ 15:37-41)
8. ບາຣະນາບາຕອບຮັບແນວໃດຕອນທີ່ໂປໂລຊວນລາວໃຫ້ເດີນທາງໄປນຳກັນ?
8 ບາຣະນາບາເຫັນດີກັບໂປໂລທີ່ຈະ “ໄປຢາມພີ່ນ້ອງ.” (ກຈກ. 15:36) ກ່ອນໜ້ານີ້ ເຂົາເຈົ້າເຮັດວຽກນຳກັນເປັນຢ່າງດີ ແລະຮູ້ຈັກພີ່ນ້ອງໃນປະຊາຄົມຕ່າງໆຢູ່ແລ້ວ. (ກຈກ. 13:2–14:28) ດັ່ງນັ້ນຈຶ່ງເປັນສິ່ງທີ່ດີທີ່ເຂົາເຈົ້າຈະເຮັດວຽກນຳກັນອີກເທື່ອໜຶ່ງ ແຕ່ພັດມີບັນຫາເກີດຂຶ້ນ. ກິດຈະການ 15:37 ບອກວ່າ: “ບາຣະນາບາຕັ້ງໃຈຈະພາໂຢຮັນເຊິ່ງມີອີກຊື່ໜຶ່ງວ່າມາຣະໂກໄປນຳ.” ບາຣະນາບາບໍ່ໄດ້ສະເໜີຄວາມຄິດເຫັນວ່າລາວຈະເຮັດແບບນັ້ນ ແຕ່ລາວ “ຕັ້ງໃຈ” ໃຫ້ມາຣະໂກເຊິ່ງເປັນລູກອ້າຍລູກນ້ອງຂອງລາວເດີນທາງໄປປະກາດຢູ່ຕ່າງປະເທດເທື່ອນີ້ນຳ.
9. ເປັນຫຍັງໂປໂລບໍ່ເຫັນດີກັບບາຣະນາບາ?
9 ເປັນຫຍັງໂປໂລບໍ່ເຫັນດີ? ຄຳພີໄບເບິນບອກວ່າ: “ໂປໂລບໍ່ຢາກໃຫ້ໄປ ຍ້ອນມາຣະໂກເຄີຍປະຖິ້ມພວກເຂົາຢູ່ແຂວງປຳຟີເລຍແລະບໍ່ໄດ້ໄປຊ່ວຍພວກເຂົາປະກາດ.” (ກຈກ. 15:38) ມາຣະໂກເຄີຍເດີນທາງໄປກັບໂປໂລແລະບາຣະນາບາໃນການປະກາດຢູ່ຕ່າງປະເທດຮອບທຳອິດ ແຕ່ລາວບໍ່ໄດ້ຢູ່ຈົນຈົບການເດີນທາງ. (ກຈກ. 12:25; 13:13) ໃນໄລຍະຕົ້ນໆຂອງການເດີນທາງທີ່ຢູ່ໃນແຂວງປຳຟີເລຍ ມາຣະໂກໄດ້ຖິ້ມວຽກມອບໝາຍແລະກັບເມືອບ້ານຢູ່ເຢຣູຊາເລັມ. ຄຳພີໄບເບິນບໍ່ໄດ້ບອກເຫດຜົນທີ່ລາວເຮັດແບບນັ້ນ ແຕ່ໂປໂລອາດຈະເບິ່ງວ່າສິ່ງທີ່ມາຣະໂກເຮັດເປັນການຂາດຄວາມຮັບຜິດຊອບ. ໂປໂລອາດບໍ່ແນ່ໃຈແລ້ວວ່າລາວຈະເພິ່ງມາຣະໂກໄດ້ຫຼືບໍ່.
10. ເກີດຫຍັງຂຶ້ນເມື່ອໂປໂລກັບບາຣະນາບາຂັດແຍ່ງກັນ?
10 ເຖິງຈະເປັນແນວນັ້ນ ບາຣະນາບາກໍຍັງຢືນຢັນວ່າຈະພາມາຣະໂກໄປນຳ. ສ່ວນໂປໂລກໍຢືນຢັນວ່າຈະບໍ່ໃຫ້ໄປນຳ. ກິດຈະການ 15:39 ບອກວ່າ: “ໂປໂລກັບບາຣະນາບາຖຽງກັນແລະໃຈຮ້າຍໃຫ້ກັນຈົນຕ້ອງແຍກໄປຄົນລະທາງ.” ບາຣະນາບາພາມາຣະໂກຂຶ້ນເຮືອກັບໄປບ້ານຂອງລາວທີ່ຢູ່ເກາະໄຊປຣັດ. ໂປໂລກໍເຮັດວຽກຕໍ່ໄປຕາມແຜນທີ່ວາງໄວ້. ຄຳພີໄບເບິນບອກວ່າ: “ໂປໂລໄດ້ເລືອກຊີລາໃຫ້ໄປນຳ ເມື່ອພວກພີ່ນ້ອງອະທິດຖານຝາກພະເຢໂຫວາໃຫ້ຊ່ວຍເບິ່ງແຍງໂປໂລແລ້ວ ໂປໂລກໍອອກເດີນທາງ.” (ກຈກ. 15:40) ເຂົາເຈົ້າເດີນທາງ “ໄປທົ່ວແຂວງຊີເຣຍກັບແຂວງກີລີເກຍ ແລະຊ່ວຍປະຊາຄົມຕ່າງໆໃຫ້ເຂັ້ມແຂງຂຶ້ນ.”—ກຈກ. 15:41
11. ຖ້າມີຄວາມຂັດແຍ່ງເກີດຂຶ້ນລະຫວ່າງພີ່ນ້ອງ ສິ່ງໃດຈະຊ່ວຍເຮົາໃຫ້ກັບມາເປັນໝູ່ກັນຄືເກົ່າ?
11 ເລື່ອງນີ້ອາດເຕືອນເຮົາໃຫ້ນຶກເຖິງຄວາມບໍ່ສົມບູນແບບຂອງໂຕເຮົາເອງ. ໂປໂລກັບບາຣະນາບາໄດ້ຮັບການແຕ່ງຕັ້ງເປັນຕົວແທນພິເສດຂອງຄະນະກຳມະການປົກຄອງ ແລະເບິ່ງຄືວ່າໂປໂລກໍເປັນສະມາຊິກຄົນໜຶ່ງໃນຄະນະກຳມະການປົກຄອງໃນເວລາຕໍ່ມາ. ແຕ່ໃນເຫດການນີ້ ທັງໂປໂລແລະບາຣະນາບາເຮັດຕາມແນວໂນ້ມຂອງຄົນບໍ່ສົມບູນແບບ. ແລ້ວນີ້ເຮັດໃຫ້ເຂົາເຈົ້າບໍ່ກັບມາເປັນໝູ່ກັນອີກບໍ? ເຖິງຈະບໍ່ສົມບູນແບບ ແຕ່ໂປໂລກັບບາຣະນາບາກໍເປັນຄົນຖ່ອມແລະມີຈິດໃຈແບບພະຄລິດ. ໃນທີ່ສຸດ ເຂົາເຈົ້າກໍໃຫ້ອະໄພກັນແລະກັບມາເປັນໝູ່ກັນຄືເກົ່າ. (ອຟຊ. 4:1-3) ຕໍ່ມາ ໂປໂລກັບມາຣະໂກກໍໄດ້ເຮັດວຽກນຳກັນອີກ. a—ກລຊ. 4:10
12. ຜູ້ດູແລໃນທຸກມື້ນີ້ຄວນຮຽນແບບຕົວຢ່າງຂອງໂປໂລກັບບາຣະນາບາແນວໃດ?
12 ທີ່ຈິງປົກກະຕິແລ້ວໂປໂລກັບບາຣະນາບາບໍ່ໄດ້ເປັນຄົນອາລົມຮ້ອນແບບນັ້ນ. ບາຣະນາບາເປັນຄົນທີ່ມີຄວາມຮັກແລະເອື້ອເຟື້ອເພື່ອແຜ່ຈົນພວກພີ່ນ້ອງບໍ່ໄດ້ເອີ້ນລາວວ່າໂຢເຊັບເຊິ່ງເປັນຊື່ແທ້ຂອງລາວ ແຕ່ເອີ້ນລາວວ່າບາຣະນາບາເຊິ່ງໝາຍເຖິງ “ຜູ້ໃຫ້ກຳລັງໃຈ.” (ກຈກ. 4:36) ໂປໂລກໍຄືກັນ ລາວເປັນຄົນອ່ອນໂຍນແລະເປັນຫ່ວງຄົນອື່ນ. (1ທຊ. 2:7, 8) ທັງຜູ້ດູແລແລະຜູ້ດູແລໝວດໃນທຸກມື້ນີ້ກໍຄວນຮຽນແບບຕົວຢ່າງຂອງໂປໂລກັບບາຣະນາບາໂດຍເປັນຄົນຖ່ອມຕົວແລະປະຕິບັດກັບພີ່ນ້ອງໃນປະຊາຄົມດ້ວຍຄວາມຮັກແລະກະລຸນາ.—1ປຕ. 5:2, 3
“ເວົ້າເຖິງຕີໂມທຽວໃນແງ່ດີ” (ກິດຈະການ 16:1-3)
13, 14. (ກ) ຕີໂມທຽວແມ່ນໃຜ ແລະໂປໂລອາດເຈິລາວຕອນໃດ? (ຂ) ສິ່ງໃດເຮັດໃຫ້ໂປໂລສັງເກດເບິ່ງຕີໂມທຽວເປັນພິເສດ? (ຄ) ຕີໂມທຽວໄດ້ຮັບວຽກມອບໝາຍຫຍັງ?
13 ໃນການເດີນທາງໄປປະກາດຢູ່ຕ່າງປະເທດຮອບທີສອງ ໂປໂລໄປຢາມແຂວງຄາລາເຕຍຂອງໂຣມ. ຢູ່ຫັ້ນມີການກໍ່ຕັ້ງບາງປະຊາຄົມແລ້ວ ໃນທີ່ສຸດ “ໂປໂລເດີນທາງໄປຮອດເມືອງເດຣະເບແລະເມືອງລີສະຕຣາ.” ຄຳພີໄບເບິນບອກວ່າ: “ຢູ່ຫັ້ນມີລູກສິດຄົນໜຶ່ງຊື່ຕີໂມທຽວ ແມ່ຂອງລາວເປັນຄົນຢິວທີ່ມີຄວາມເຊື່ອ ແຕ່ພໍ່ເປັນຄົນກຣີກ.”—ກຈກ. 16:1 b
14 ເບິ່ງຄືວ່າໂປໂລໄດ້ເຈິກັບຄອບຄົວຂອງຕີໂມທຽວຕອນທີ່ເດີນທາງໄປເຂດນັ້ນເທື່ອທຳອິດປະມານປີ 47. ສອງສາມປີຕໍ່ມາໃນ ລະຫວ່າງການຢາມເທື່ອທີສອງ ໂປໂລໄດ້ສັງເກດເບິ່ງຕີໂມທຽວເປັນພິເສດ. ຍ້ອນຫຍັງ? ຍ້ອນ “ພີ່ນ້ອງ . . . ເວົ້າເຖິງຕີໂມທຽວໃນແງ່ດີ.” ຕີໂມທຽວມີຊື່ສຽງໃນປະຊາຄົມຂອງລາວແລະປະຊາຄົມທີ່ຢູ່ໃກ້ໆນຳ. ໃນປຶ້ມກິດຈະການບອກວ່າພີ່ນ້ອງທັງໃນເມືອງລີສະຕຣາແລະເມືອງອີໂກນີອົນເຊິ່ງຢູ່ຫ່າງອອກໄປປະມານ 10 ກິໂລແມັດໄດ້ເວົ້າເຖິງຕີໂມທຽວໃນທາງທີ່ດີ. (ກຈກ. 16:2) ໂດຍການຊີ້ນຳຈາກພະລັງບໍລິສຸດ ຜູ້ດູແລໄດ້ມອບໝາຍໃຫ້ຕີໂມທຽວເຮັດໜ້າທີ່ທີ່ສຳຄັນ ນັ້ນກໍຄືການເປັນຜູ້ດູແລເດີນທາງ ແລະຮ່ວມເດີນທາງໄປກັບໂປໂລແລະຊີລາ.—ກຈກ. 16:3
15, 16. ສິ່ງໃດເຮັດໃຫ້ຕີໂມທຽວມີຊື່ສຽງທີ່ດີ?
15 ເປັນຫຍັງຕີໂມທຽວຈຶ່ງມີຊື່ສຽງດີແບບນັ້ນທັງໆທີ່ອາຍຸໜ້ອຍ? ເປັນຍ້ອນລາວສະຫຼາດ ໜ້າຕາດີແລະມີຄວາມສາມາດພິເສດບາງຢ່າງບໍ? ຄົນເຮົາມັກຈະປະທັບໃຈກັບຄຸນລັກສະນະເຫຼົ່ານີ້. ມີເທື່ອໜຶ່ງ ແມ່ນແຕ່ຜູ້ພະຍາກອນຊາມູເອນກໍຍັງຄິດຜິດ ລາວເບິ່ງແຕ່ຮູບຮ່າງໜ້າຕາພາຍນອກ ແຕ່ພະເຢໂຫວາເຕືອນຊາມູເອນວ່າ: “ເຮົາບໍ່ໄດ້ເບິ່ງຄືກັບທີ່ມະນຸດເບິ່ງ. ມະນຸດເບິ່ງໜ້າຕາພາຍນອກ ແຕ່ພະເຢໂຫວາເບິ່ງຫົວໃຈ.” (1ຊມ. 16:7, ລ.ມ) ດັ່ງນັ້ນ ການທີ່ພີ່ນ້ອງເບິ່ງຕີໂມທຽວໃນແງ່ດີບໍ່ໄດ້ເປັນຍ້ອນສິ່ງທີ່ເຫັນໃນພາຍນອກ ແຕ່ເປັນຄຸນລັກສະນະທີ່ດີຂອງລາວທີ່ຢູ່ພາຍໃນ.
16 ຫຼາຍປີຕໍ່ມາ ອັກຄະສາວົກໂປໂລໄດ້ເວົ້າເຖິງຄຸນລັກສະນະທີ່ດີຂອງຕີໂມທຽວ. ໂປໂລບອກວ່າຕີໂມທຽວມີນ້ຳໃຈທີ່ດີ ມີຄວາມຮັກແບບເສຍສະລະ ແລະດຸໝັ່ນເຮັດວຽກເພື່ອພີ່ນ້ອງໃນປະຊາຄົມ. (ຟລປ. 2:20-22) ນອກຈາກນັ້ນ ຕີໂມທຽວຍັງເປັນທີ່ຮູ້ຈັກວ່າມີ “ຄວາມເຊື່ອທີ່ມາຈາກໃຈຈິງ.”—2ຕມ. 1:5
17. ໄວລຸ້ນໃນທຸກມື້ນີ້ຈະຮຽນແບບຕີໂມທຽວໄດ້ແນວໃດ?
17 ໃນທຸກມື້ນີ້ ພີ່ນ້ອງໄວລຸ້ນຫຼາຍຄົນຮຽນແບບຕີໂມທຽວ ເຂົາເຈົ້າພັດທະນາຄຸນລັກສະນະຕ່າງໆທີ່ພະເຈົ້າພໍໃຈ. ເມື່ອເຮັດແບບນີ້ ເຂົາເຈົ້າກໍກຳລັງສ້າງຊື່ສຽງທີ່ດີກັບພະເຢໂຫວາແລະກັບຄົນຂອງເພິ່ນເຖິງວ່າເຂົາເຈົ້າຈະອາຍຸໜ້ອຍກໍຕາມ. (ສຸພາ. 22:1; 1ຕມ. 4:15) ເຂົາເຈົ້າສະແດງຄວາມເຊື່ອຈາກໃຈຈິງ ແລະບໍ່ໄດ້ໃຊ້ຊີວິດແບບໜຶ່ງຕອນທີ່ຢູ່ກັບພີ່ນ້ອງແລະໃນອີກແບບໜຶ່ງຕອນທີ່ຢູ່ກັບຄົນອື່ນ. (ເພງ. 26:4) ຜົນກໍຄື ພີ່ນ້ອງໄວລຸ້ນຫຼາຍຄົນເປັນຄືກັບຕີໂມທຽວ ເຂົາເຈົ້າມີຄ່າ ສຳລັບພີ່ນ້ອງໃນປະຊາຄົມ. ພີ່ນ້ອງຫຼາຍຄົນໄດ້ກຳລັງໃຈຫຼາຍເມື່ອເຫັນພີ່ນ້ອງເຫຼົ່ານີ້ມີຄຸນສົມບັດເປັນຜູ້ປະກາດ ຈາກນັ້ນກໍອຸທິດຕົວແລະຮັບບັບເຕມາ!
“ມີຄວາມເຊື່ອເຂັ້ມແຂງຂຶ້ນ” (ກິດຈະການ 16:4, 5)
18. (ກ) ໂປໂລກັບຕີໂມທຽວໄດ້ຮັບສິດທິພິເສດຫຍັງຕອນທີ່ເຮັດວຽກເປັນຜູ້ດູແລເດີນທາງ? (ຂ) ປະຊາຄົມຕ່າງໆໄດ້ຮັບປະໂຫຍດຫຍັງ?
18 ໂປໂລກັບຕີໂມທຽວເຮັດວຽກຮ່ວມກັນເປັນເວລາຫຼາຍປີ. ທັງສອງຄົນເປັນຜູ້ດູແລເດີນທາງແລະເຮັດໜ້າທີ່ຕ່າງໆທີ່ຄະນະກຳມະການປົກຄອງມອບໝາຍ. ຄຳພີໄບເບິນບອກວ່າ: “ໂປໂລກັບພວກໝູ່ເດີນທາງໄປເມືອງຕ່າງໆເພື່ອແຈ້ງຄຳຕັດສິນຂອງພວກອັກຄະສາວົກແລະພວກຜູ້ດູແລໃນເມືອງເຢຣູຊາເລັມໃຫ້ພີ່ນ້ອງທີ່ຢູ່ຫັ້ນຮູ້ເພື່ອພວກເຂົາຈະເຮັດຕາມ.” (ກຈກ. 16:4) ເຫັນໄດ້ແຈ້ງວ່າປະຊາຄົມຕ່າງໆໄດ້ເຮັດຕາມການຊີ້ນຳຈາກພວກອັກຄະສາວົກແລະພວກຜູ້ດູແລໃນເມືອງເຢຣູຊາເລັມ. ການເຊື່ອຟັງແບບນີ້ເຮັດໃຫ້ ‘ປະຊາຄົມຕ່າງໆມີຄວາມເຊື່ອເຂັ້ມແຂງຂຶ້ນແລະມີຄົນເຂົ້າມາເຊື່ອເພີ່ມຂຶ້ນທຸກມື້.’—ກຈກ. 16:5
19, 20. ເປັນຫຍັງຄລິດສະຕຽນຄວນເຊື່ອຟັງ “ຄົນທີ່ນຳໜ້າ”?
19 ຄ້າຍກັນໃນທຸກມື້ນີ້ ຖ້າເຮົາເຕັມໃຈເຊື່ອຟັງການຊີ້ນຳທີ່ໄດ້ຮັບຈາກ “ຄົນທີ່ນຳໜ້າ” ພະເຢໂຫວາກໍຈະອວຍພອນປະຊາຄົມ. (ຮຣ. 13:17) ເນື່ອງຈາກໂລກນີ້ປ່ຽນສາກໄປເລື້ອຍໆຈຶ່ງເປັນເລື່ອງສຳຄັນທີ່ເຮົາຈະສົນໃຈແລະເຮັດຕາມການຊີ້ນຳທີ່ມາຈາກ “ທາດທີ່ສັດຊື່ແລະສຸຂຸມ.” (ມທ. 24:45; 1ກຣ. 7:29-31) ການເຮັດແບບນີ້ຈະຊ່ວຍໃຫ້ເຮົາມີຄວາມເຊື່ອເຂັ້ມແຂງຢູ່ສະເໝີ ແລະຊ່ວຍເຮົາໃຫ້ຮັກສາຕົວຈາກສິ່ງທີ່ບໍ່ດີຂອງໂລກນີ້.—ຢກບ. 1:27
20 ທີ່ຈິງ ຜູ້ດູແລທຸກຄົນໃນທຸກມື້ນີ້ແລະຄະນະກຳມະການປົກຄອງເປັນຄົນບໍ່ສົມບູນແບບຄືກັບໂປໂລ ບາຣະນາບາ ມາຣະໂກແລະຜູ້ດູແລທີ່ຖືກເຈີມຄົນອື່ນໆໃນສະຕະວັດທຳອິດ. (ຣມ. 5:12; ຢກບ. 3:2) ແຕ່ເນື່ອງຈາກຄະນະກຳມະການປົກຄອງເຮັດຕາມຄຳແນະນຳໃນຄຳພີໄບເບິນຢ່າງໃກ້ຊິດ ແລະເຮັດຕາມຕົວຢ່າງຂອງອັກຄະສາວົກໃນສະຕະວັດທຳອິດ ເຮົາຈຶ່ງໄວ້ໃຈເຂົາເຈົ້າໄດ້ແນ່ນອນ. (2ຕມ. 1:13, 14) ການທີ່ເຂົາເຈົ້າເຮັດແບບນັ້ນເຮັດໃຫ້ປະຊາຄົມຕ່າງໆເຂັ້ມແຂງຂຶ້ນແລະມີຄວາມເຊື່ອທີ່ໝັ້ນຄົງ.
a ເບິ່ງຂອບ “ ມາຣະໂກມີສິດທິພິເສດຫຼາຍຢ່າງ”
b ເບິ່ງຂອບ “ ຕີໂມທຽວເຮັດວຽກໜັກ ‘ໃນການປະກາດຂ່າວດີ’”
