ບົດທີ 3
“ເຕັມໄປດ້ວຍພະລັງບໍລິສຸດ”
ສິ່ງທີ່ເກີດຂຶ້ນເມື່ອມີການເທພະລັງບໍລິສຸດໃນວັນເພັນເຕກອດ
ຈາກກິດຈະການ 2:1-47
1. ໃຫ້ເວົ້າເຖິງບັນຍາກາດຂອງເທດສະການວັນເພັນເຕກອດ.
ຫຼາຍຄົນທີ່ຢູ່ຕາມຖະໜົນຫົນທາງຕ່າງໆໃນເມືອງເຢຣູຊາເລັມພາກັນຮູ້ສຶກຕື່ນເຕັ້ນ. a ຄວັນລອຍຂຶ້ນມາຈາກແທ່ນບູຊາໃນວິຫານຕອນທີ່ພວກເລວີຮ້ອງເພງຮັນເລ ເຊິ່ງຄືຊິເປັນການຮ້ອງໃນລັກສະນະໂຕ້ຕອບກັນ. (ຄຳເພງ 113 ເຖິງ 118) ຜູ້ຄົນຈຳນວນຫຼາຍທີ່ມາຢາມເມືອງນີ້ໄດ້ຍ່າງບຽດກັນຢູ່ຕາມຫົນທາງ. ເຂົາເຈົ້າມາຈາກບ່ອນທີ່ຫ່າງໄກເຊັ່ນ: ເອລາມ, ເມໂຊໂປຕາເມຍ, ກາປາໂດເກຍ, ປົນໂຕ, ເອຢິບ ແລະໂຣມ. b ນີ້ເປັນໂອກາດພິເສດຫຍັງ? ນີ້ເປັນວັນເພັນເຕກອດເຊິ່ງຍັງມີການເອີ້ນວ່າເປັນ ‘ມື້ທີ່ເກັບກ່ຽວໝາກໄມ້ຊຸດທຳອິດ.’ (ຈຊບ. 28:26) ເທດສະການສະຫຼອງປະຈຳປີນີ້ສະແດງເຖິງການສິ້ນສຸດຂອງການເກັບກ່ຽວເຂົ້າບາເລແລະການເລີ່ມຕົ້ນຂອງການເກັບກ່ຽວເຂົ້າວີດ. ນີ້ເປັນມື້ທີ່ໜ້າຍິນດີຫຼາຍແທ້ໆ!
2. ໃນວັນເພັນເຕກອດປີ 33 ມີເຫດການທີ່ໜ້າງຶດງໍ້ຫຍັງເກີດຂຶ້ນ?
2 ເຊົ້າມື້ໜຶ່ງໃນລະດູໃບໄມ້ປົ່ງທີ່ອາກາດອົບອຸ່ນໃນປີ 33 ຕອນປະມານເກົ້າໂມງເຊົ້າມີບາງຢ່າງທີ່ໜ້າງຶດງໍ້ເກີດຂຶ້ນເຊິ່ງເຮັດໃຫ້ຜູ້ຄົນປະຫຼາດໃຈມາຈົນຮອດທຸກມື້ນີ້. ມີສຽງດັງຈາກຟ້າ “ຄືກັບສຽງພາຍຸ.” (ກຈກ. 2:2) ສຽງນັ້ນດັງໄປທົ່ວເຮືອນທີ່ພວກລູກສິດຂອງພະເຢຊູທີ່ໄດ້ປະຊຸມກັນຢູ່ເຊິ່ງມີຄົນຢູ່ຫັ້ນປະມານ 120 ຄົນ. ຕໍ່ຈາກນັ້ນ ກໍມີເຫດການທີ່ໜ້າງຶດງໍ້ເກີດຂຶ້ນ ເຂົາເຈົ້າເຫັນບາງສິ່ງຄືກັບແປວໄຟຮູບຮ່າງຄ້າຍຄືລີ້ນລອຍຢູ່ເທິງເຂົາເຈົ້າແຕ່ລະຄົນ c ແລ້ວພວກລູກສິດກໍ “ເຕັມໄປດ້ວຍພະລັງບໍລິສຸດ” ແລະເລີ່ມເວົ້າເປັນພາສາຕ່າງໆ! ເມື່ອພວກລູກສິດອອກຈາກເຮືອນຫຼັງນັ້ນ ເຂົາເຈົ້າກໍໄດ້ເຈິຄົນທີ່ມາຈາກຫຼາຍບ່ອນເຊິ່ງຢູ່ຕາມຖະໜົນຫົນທາງໃນເມືອງເຢຣູຊາເລັມ. ຄົນເຫຼົ່ານັ້ນຮູ້ສຶກແປກໃຈຫຼາຍເພາະພວກລູກສິດສາມາດ “ເວົ້າພາສາຂອງເຂົາເຈົ້າ” ໄດ້.—ກຈກ. 2:1-6
3. (ກ) ເປັນຫຍັງຈຶ່ງເອີ້ນວັນເພັນເຕກອດປີ 33 ວ່າເປັນເຫດການສຳຄັນໃນປະຫວັດສາດຂອງການນະມັດສະການແທ້? (ຂ) ຄຳບັນຍາຍຂອງເປໂຕກ່ຽວຂ້ອງຫຍັງກັບການໃຊ້ “ລູກກະແຈຂອງການປົກຄອງທີ່ຢູ່ໃນສະຫວັນ”?
3 ເລື່ອງທີ່ໜ້າຕື່ນເຕັ້ນນີ້ກ່ຽວຂ້ອງກັບເຫດການທີ່ສຳຄັນຢ່າງໜຶ່ງໃນການນະມັດສະການແທ້ ນັ້ນຄືການກໍ່ຕັ້ງອິດສະຣາເອນຂອງພະເຈົ້າຫຼືປະຊາຄົມຄລິດສະຕຽນຜູ້ຖືກເຈີມ. (ຄລຕ. 6:16) ນອກຈາກນັ້ນ ຕອນທີ່ເປໂຕບັນຍາຍໃຫ້ຜູ້ຄົນຟັງໃນມື້ນັ້ນ ລາວໄດ້ໃຊ້ “ລູກກະແຈຂອງການປົກຄອງທີ່ຢູ່ໃນສະຫວັນ” ລູກທຳອິດ ລູກກະແຈທັງໝົດມີສາມລູກເຊິ່ງແຕ່ລະລູກຈະເປີດໂອກາດໃຫ້ຄົນແຕ່ລະກຸ່ມໄດ້ຮັບພອນພິເສດ. (ມທ. 16:18, 19) ລູກກະແຈລູກທຳອິດເຮັດໃຫ້ຄົນຢິວແລະຄົນທີ່ປ່ຽນມານັບຖືສາສະໜາຢິວມີໂອກາດໄດ້ຟັງຂ່າວດີແລະຖືກເຈີມດ້ວຍພະລັງບໍລິສຸດຂອງພະເຈົ້າ. d ເຂົາເຈົ້າໄດ້ມາເປັນສ່ວນໜຶ່ງຂອງອິດສະຣາເອນຂອງພະເຈົ້າ ນີ້ຈຶ່ງເຮັດໃຫ້ເຂົາເຈົ້າມີຄວາມຫວັງທີ່ຈະປົກຄອງເປັນກະສັດແລະປະໂລຫິດໃນການປົກຄອງຂອງເມຊີອາ. (ພນມ. 5:9, 10) ຕໍ່ມາຄົນຊາມາເຣຍກໍໄດ້ຮັບສິດທິພິເສດນັ້ນ ແລະຫຼັງຈາກນັ້ນກໍເປີດໂອກາດໃຫ້ກັບຄົນຊາດອື່ນໆນຳ. ຄລິດສະຕຽນໃນທຸກມື້ນີ້ສາມາດຮຽນຫຍັງໄດ້ຈາກເຫດການສຳຄັນໃນວັນເພັນເຕກອດປີ 33?
“ທັງໝົດກໍມາເຕົ້າໂຮມກັນຢູ່ບ່ອນດຽວ” (ກິດຈະການ 2:1-4)
4. ວຽກທີ່ປະຊາຄົມຄລິດສະຕຽນສະໄໝປັດຈຸບັນເຮັດເປັນວຽກທີ່ເຮັດຕໍ່ຈາກປະຊາຄົມເຊິ່ງຕັ້ງຂຶ້ນໃນປີ 33 ແນວໃດ?
4 ປະຊາຄົມຄລິດສະຕຽນເລີ່ມຕົ້ນໂດຍພວກລູກສິດປະມານ 120 ຄົນເຊິ່ງ “ທັງໝົດກໍມາເຕົ້າໂຮມກັນຢູ່ບ່ອນດຽວ” ຢູ່ຫ້ອງຊັ້ນເທິງແລະໄດ້ຮັບການເຈີມດ້ວຍພະລັງບໍລິສຸດ. (ກຈກ. 2:1) ເມື່ອຮອດຕອນແລງຂອງມື້ນັ້ນກໍມີອີກຫຼາຍພັນຄົນຮັບບັບເຕມາ. ນັ້ນເປັນພຽງການເລີ່ມຕົ້ນຂອງອົງການທີ່ເຕີບໃຫຍ່ຈົນຮອດທຸກມື້ນີ້! ປະຊາຄົມຄລິດສະຕຽນໃນສະໄໝປັດຈຸບັນທີ່ມີພີ່ນ້ອງຊາຍຍິງເຊິ່ງຢຳເກງພະເຈົ້າເປັນກຸ່ມຄົນທີ່ “ປະກາດຂ່າວດີເລື່ອງການປົກຄອງຂອງພະເຈົ້າໄປທົ່ວໂລກ ເພື່ອໃຫ້ຄົນທຸກຊາດມີໂອກາດໄດ້ຍິນ” ກ່ອນທີ່ຈຸດຈົບຈະມາເຖິງ.—ມທ. 24:14
5. ການຄົບຫາກັບພີ່ນ້ອງໃນປະຊາຄົມຄລິດສະຕຽນເຮັດໃຫ້ໄດ້ຮັບພອນຫຍັງແດ່ທັງໃນສະຕະວັດທຳອິດແລະໃນທຸກມື້ນີ້?
5 ນອກຈາກນັ້ນ ປະຊາຄົມຄລິດສະຕຽນຍັງຊ່ວຍໃຫ້ພີ່ນ້ອງທຸກຄົນມີຄວາມເຊື່ອທີ່ເຂັ້ມແຂງນຳ ບໍ່ວ່າເຂົາເຈົ້າຈະເປັນຜູ້ຖືກເຈີມຫຼືເປັນ “ແກະອື່ນ.” (ຢຮ. 10:16) ໂປໂລເຫັນຄຸນຄ່າຫຼາຍແທ້ໆທີ່ພີ່ນ້ອງແຕ່ລະຄົນໃນປະຊາຄົມໃຫ້ກຳລັງໃຈກັນແລະກັນ ລາວໄດ້ຂຽນເຖິງຄລິດສະຕຽນໃນເມືອງໂຣມວ່າ: “ຂ້ອຍຢາກພົບພວກເຈົ້າຫຼາຍເພື່ອແບ່ງປັນກຳລັງໃຈຈາກພະເຈົ້າ ເຊິ່ງຈະຊ່ວຍພວກເຈົ້າໃຫ້ເຂັ້ມແຂງທາງຄວາມເຊື່ອ ຫຼືຖ້າຈະເວົ້າໃຫ້ຖືກແທ້ໆພວກເຮົາຈະໄດ້ໃຫ້ກຳລັງໃຈກັນແລະກັນໂດຍທາງຄວາມເຊື່ອທັງຂອງພວກເຈົ້າແລະຂອງຂ້ອຍ.”—ຣມ. 1:11, 12
6, 7. ປະຊາຄົມຄລິດສະຕຽນໃນທຸກມື້ນີ້ເຮັດວຽກມອບໝາຍຂອງພະເຢຊູທີ່ໃຫ້ປະກາດກັບຄົນທຸກຊາດແນວໃດ?
6 ປະຊາຄົມຄລິດສະຕຽນໃນທຸກມື້ນີ້ກໍມີເປົ້າໝາຍດຽວກັນກັບປະຊາຄົມໃນສະຕະວັດທຳອິດ. ພະເຢຊູມອບໝາຍໃຫ້ພວກລູກສິດເຮັດວຽກທີ່ທ້າທາຍແຕ່ກໍໜ້າຕື່ນເຕັ້ນ. ເພິ່ນບອກເຂົາເຈົ້າວ່າ: “ໄປຫາຄົນທຸກຊາດແລະສອນພວກເຂົາໃຫ້ເຂົ້າມາເປັນລູກສິດ ໃຫ້ພວກເຂົາຮັບບັບເຕມາໃນນາມພະເຈົ້າຜູ້ເປັນພໍ່ ໃນນາມລູກຂອງພະອົງ ແລະໃນນາມພະລັງບໍລິສຸດ ແລະສອນພວກເຂົາໃຫ້ເຮັດຕາມທຸກສິ່ງທີ່ຂ້ອຍສັ່ງພວກເຈົ້າໄວ້.”—ມທ. 28:19, 20
7 ປະຊາຄົມຄລິດສະຕຽນຂອງພະຍານພະເຢໂຫວາເປັນຕົວແທນທີ່ພະເຈົ້າໃຊ້ໃຫ້ເຮັດວຽກນີ້ຈົນສຳເລັດໃນສະໄໝຂອງເຮົາ. ເຖິງວ່າອາດຈະເປັນເລື່ອງຍາກທີ່ຈະເຂົ້າໄປເຖິງຜູ້ຄົນທີ່ເວົ້າພາສາຕ່າງໆ ແຕ່ພະຍານພະເຢໂຫວາກໍໄດ້ຜະລິດສິ່ງພິມແລະວິດີໂອທີ່ອະທິບາຍຄຳພີໄບເບິນຫຼາຍກວ່າ 1.000 ພາສາ. ຖ້າເຈົ້າເຂົ້າຮ່ວມກັບປະຊາຄົມຄລິດສະຕຽນເປັນປະຈຳແລະມີສ່ວນຮ່ວມໃນວຽກປະກາດແລະສອນຄົນໃຫ້ເປັນລູກສິດ ເຈົ້າກໍຈະມີຄວາມສຸກເພາະເຈົ້າເປັນສ່ວນໜຶ່ງຂອງຜູ້ຄົນຈຳນວນບໍ່ຫຼາຍໃນໂລກນີ້ທີ່ມີສິດທິພິເສດທີ່ໄດ້ປະກາດຊື່ຂອງພະເຢໂຫວາຢ່າງລະອຽດຖີ່ຖ້ວນ!
8. ພີ່ນ້ອງແຕ່ລະຄົນຈະໄດ້ຮັບປະໂຫຍດຫຍັງຈາກປະຊາຄົມຄລິດສະຕຽນ?
8 ເພື່ອເຮົາຈະອົດທົນດ້ວຍຄວາມຍິນດີໄດ້ໃນຊ່ວງເວລາທີ່ຍາກລຳບາກນີ້ ພະເຢໂຫວາໄດ້ຈັດກຽມສັງຄົມພີ່ນ້ອງທົ່ວໂລກໄວ້ໃຫ້ເຮົາ. ໂປໂລຂຽນເຖິງຄລິດສະຕຽນຄົນເຮັບເຣີວ່າ: “ໃຫ້ພວກເຮົາສົນໃຈກັນ ເພື່ອພວກເຮົາຈະກະຕຸ້ນກັນໃຫ້ມີຄວາມຮັກແລະເຮັດຄວາມດີ. ຢ່າຂາດການປະຊຸມຄືກັບທີ່ຫຼາຍຄົນເຮັດເປັນນິດໄສ ແຕ່ໃຫ້ກຳລັງໃຈກັນ ແລະເຮັດສິ່ງເຫຼົ່ານີ້ໃຫ້ຫຼາຍຂຶ້ນເມື່ອເຫັນວ່າວັນນັ້ນໃກ້ຈະມາຮອດແລ້ວ.” (ຮຣ. 10:24, 25) ປະຊາຄົມຄລິດສະຕຽນເປັນຂອງຂວັນຈາກພະເຢໂຫວາທີ່ຊ່ວຍໃຫ້ເຈົ້າໄດ້ຮັບກຳລັງໃຈແລະເຈົ້າເອງກໍສາມາດໃຫ້ກຳລັງຄົນອື່ນນຳ. ດັ່ງນັ້ນ ຂໍໃຫ້ໃກ້ຊິດກັບພີ່ນ້ອງຄລິດສະຕຽນສະເໝີແລະຢ່າຂາດການປະຊຸມ!
‘ແຕ່ລະຄົນໄດ້ຍິນ . . . ພາສາຂອງເຂົາເຈົ້າ’ (ກິດຈະການ 2:5-13)
“ພວກເຮົາໄດ້ຍິນຄົນເຫຼົ່ານີ້ເວົ້າເຖິງສິ່ງມະຫັດສະຈັນຕ່າງໆຂອງພະເຈົ້າໃນພາສາຂອງພວກເຮົາ.”—ກິດຈະການ 2:11
9, 10. ບາງຄົນໄດ້ເຮັດແນວໃດເພື່ອຈະປະກາດກັບຄົນທີ່ເວົ້າພາສາອື່ນ?
9 ລອງນຶກພາບເບິ່ງວ່າຄົນຢິວແລະຄົນທີ່ປ່ຽນມານັບຖືສາສະໜາຢິວຈະຮູ້ສຶກຕື່ນເຕັ້ນຫຼາຍສ່ຳໃດໃນວັນເພັນເຕກອດປີ 33. ທີ່ຈິງຄົນສ່ວນໃຫຍ່ທີ່ຢູ່ຫັ້ນຄືຊິເວົ້າພາສາທີ່ຄົນທົ່ວໄປໃຊ້ເຊິ່ງອາດຈະເປັນພາສາກຣີກຫຼືພາສາເຮັບເຣີ ແຕ່ຕອນນີ້ເຂົາເຈົ້າ ‘ໄດ້ຍິນພວກລູກສິດເວົ້າພາສາຂອງເຂົາເຈົ້າ.’ (ກຈກ. 2:6) ເຂົາເຈົ້າຄືຊິຮູ້ສຶກປະທັບໃຈຫຼາຍທີ່ໄດ້ຍິນຂ່າວດີໃນພາສາຂອງຕົວເອງ. ແນ່ນອນວ່າພະເຈົ້າບໍ່ໄດ້ຊ່ວຍໃຫ້ຄລິດສະຕຽນໃນທຸກມື້ນີ້ສາມາດເວົ້າພາສາຕ່າງປະເທດໄດ້ຢ່າງອັດສະຈັນ ແຕ່ເຖິງຈະເປັນແບບນັ້ນເຂົາເຈົ້າຫຼາຍຄົນກໍພ້ອມທີ່ຈະປະກາດຂ່າວດີກັບຄົນທຸກຊາດ. ໂດຍວິທີໃດ? ບາງຄົນໄດ້ຮຽນພາສາໃໝ່ເພື່ອຈະຮັບໃຊ້ຮ່ວມກັບປະຊາຄົມທີ່ໃຊ້ພາສານັ້ນ ຫຼືບາງຄົນເຖິງຂັ້ນຍ້າຍໄປຮັບໃຊ້ຢູ່ຕ່າງປະເທດເລີຍ. ຜູ້ທີ່ໄດ້ຟັງເຂົາເຈົ້າປະກາດມັກຈະຮູ້ສຶກປະທັບໃຈຫຼາຍທີ່ໄດ້ເຫັນຄວາມພະຍາຍາມຂອງເຂົາເຈົ້າ.
10 ໃຫ້ເຮົາມາເບິ່ງປະສົບການທີ່ໜ້າສົນໃຈຂອງຄລິດສະຕິນ. ຄລິດສະຕິນຮຽນພາສາຄຸຊາຣາຕີພ້ອມກັບພີ່ນ້ອງອີກເຈັດຄົນ. ເມື່ອລາວເຈິຜູ້ຍິງຄົນໜຶ່ງທີ່ເຮັດວຽກນຳກັນເຊິ່ງເວົ້າພາສາຄຸຊາຣາຕີ ລາວກໍທັກທາຍຜູ້ຍິງຄົນນັ້ນໃນພາສານີ້. ຜູ້ຍິງຄົນນັ້ນປະທັບໃຈຫຼາຍແລະຢາກຮູ້ວ່າເປັນຫຍັງຄລິດສະຕິນຈຶ່ງພະຍາຍາມຮຽນພາສາຄຸຊາຣາຕີເຊິ່ງເປັນພາສາທີ່ຍາກ. ຄລິດສະຕິນກໍເລີຍມີໂອກາດປະກາດກັບລາວ ຜູ້ຍິງຄົນນັ້ນບອກຄລິດສະຕິນວ່າ: “ເລື່ອງທີ່ເຈົ້າເວົ້າຕ້ອງສຳຄັນຫຼາຍແທ້ໆ.”
11. ເຮົາຈະກຽມຕົວແນວໃດເພື່ອປະກາດກັບຄົນທີ່ໃຊ້ພາສາອື່ນ?
11 ເຖິງວ່າຈະບໍ່ແມ່ນທຸກຄົນທີ່ຮຽນອີກພາສາໜຶ່ງໄດ້ ແຕ່ເຮົາກໍສາມາດກຽມຕົວເພື່ອປະກາດເລື່ອງການປົກຄອງຂອງພະເຈົ້າໃຫ້ກັບຄົນທີ່ເວົ້າພາສາອື່ນ. ເຮົາຈະເຮັດແບບນັ້ນໄດ້ແນວໃດ? ວິທີໜຶ່ງກໍຄືໃຊ້ແອັບ JW Language (ເຈ ດັບເບິນຢູ ແລັງເກັດ) ເພື່ອຮຽນຄຳທັກທາຍງ່າຍໆໃນພາສາຂອງຄົນທີ່ເຈົ້າມັກເຈິໃນເຂດ. ເຈົ້າອາດຈື່ບາງປະໂຫຍກໃນພາສານັ້ນທີ່ຈະກະຕຸ້ນຄວາມສົນໃຈເຂົາເຈົ້າແລະຊວນເຂົາເຈົ້າໃຫ້ເຂົ້າໄປເບິ່ງໃນເວັບໄຊ jw.org ເຊິ່ງອາດຈະມີວິດີໂອຫຼືປຶ້ມຕ່າງໆໃນພາສາທີ່ເຂົາເຈົ້າໃຊ້. ຖ້າເຮົາໃຊ້ເຄື່ອງມືເຫຼົ່ານີ້ ເຮົາກໍຈະມີຄວາມສຸກຄືກັບພີ່ນ້ອງໃນສະຕະວັດທຳອິດທີ່ໄດ້ປະກາດກັບຜູ້ຄົນໃນພາສາຕ່າງໆແລະເຮັດໃຫ້ເຂົາເຈົ້າແປກໃຈທີ່ໄດ້ຍິນຂ່າວດີໃນ ‘ພາສາຂອງເຂົາເຈົ້າ.’
“ເປໂຕກໍຢືນຂຶ້ນ” (ກິດຈະການ 2:14-37)
12. (ກ) ຄຳພະຍາກອນຂອງໂຢເອນກ່ຽວຂ້ອງກັບເຫດການທີ່ເກີດຂຶ້ນໃນວັນເພັນເຕກອດປີ 33 ແນວໃດ? (ຂ) ເປັນຫຍັງລູກສິດຂອງພະເຢຊູຈຶ່ງຄາດໝາຍວ່າຄຳພະຍາກອນຂອງໂຢເອນຈະເກີດຂຶ້ນແທ້ໃນສະໄໝຂອງເຂົາເຈົ້າ?
12 “ເປໂຕກໍຢືນຂຶ້ນ” ເພື່ອເວົ້າກັບຜູ້ຄົນຫຼາຍເຊື້ອຊາດ. (ກຈກ. 2:14) ລາວອະທິບາຍໃຫ້ທຸກຄົນຟັງວ່າ ຄວາມສາມາດໃນການເວົ້າພາສາຕ່າງໆຢ່າງອັດສະຈັນທີ່ພະເຈົ້າໃຫ້ນັ້ນເປັນໄປຕາມຄຳພະຍາກອນທີ່ໂຢເອນບອກໄວ້ວ່າ: “ເຮົາຈະເອົາພະລັງຂອງເຮົາໃຫ້ຄົນທຸກປະເພດ.” (ໂຢເອນ 2:28, ລ.ມ) ກ່ອນພະເຢຊູຈະຂຶ້ນໄປສະຫວັນ ເພິ່ນບອກພວກລູກສິດວ່າ: “ຂ້ອຍຈະຂໍພະເຈົ້າຜູ້ເປັນພໍ່ໃຫ້ສົ່ງຜູ້ຊ່ວຍອີກຜູ້ໜຶ່ງມາຢູ່ນຳພວກເຈົ້າ” ເພິ່ນບອກຕໍ່ໄປວ່າຜູ້ຊ່ວຍນັ້ນກໍຄື “ພະລັງຂອງພະເຈົ້າ.”—ຢຮ. 14:16, 17
13, 14. ເປໂຕໃຊ້ວິທີໃດເພື່ອເຂົ້າເຖິງຫົວໃຈຜູ້ຄົນ ແລະເຮົາຈະຮຽນແບບລາວໄດ້ແນວໃດ?
13 ເປໂຕເວົ້າຄຳລົງທ້າຍທີ່ໜັກແໜ້ນກັບຜູ້ຄົນວ່າ: “ຂໍໃຫ້ຄົນອິດສະຣາເອນທຸກຄົນຮູ້ໄວ້ວ່າ ພະເຢຊູຜູ້ນີ້ແຫຼະທີ່ພວກເຈົ້າໄດ້ປະຫານເທິງເສົາ ແມ່ນຜູ້ທີ່ພະເຈົ້າແຕ່ງຕັ້ງໃຫ້ເປັນທັງຜູ້ເປັນນາຍແລະພະຄລິດ.” (ກຈກ. 2:36) ເຖິງວ່າຄົນທີ່ຟັງເປໂຕສ່ວນໃຫຍ່ບໍ່ໄດ້ຢູ່ນຳຕອນທີ່ພະເຢຊູຖືກປະຫານເທິງເສົາ ແຕ່ໃນຖານະທີ່ເປັນຄົນຢິວ ເຂົາເຈົ້າຕ້ອງຮັບຜິດຊອບຮ່ວມກັນໃນການກະທຳເທື່ອນັ້ນ. ແຕ່ຂໍສັງເກດວ່າເປໂຕເວົ້າກັບຄົນຢິວດ້ວຍຄວາມນັບຖືແລະເຂົ້າເຖິງຫົວໃຈເຂົາເຈົ້າ. ເປົ້າໝາຍຂອງເປໂຕຄືເພື່ອກະຕຸ້ນເຂົາເຈົ້າໃຫ້ກັບໃຈບໍ່ແມ່ນເພື່ອຈະຕຳໜິ. ແລ້ວເຂົາເຈົ້າຮູ້ສຶກໃຈຮ້າຍບໍເມື່ອໄດ້ຍິນເປໂຕເວົ້າ? ບໍ່ເລີຍ. ແທນທີ່ຈະເປັນແນວນັ້ນ ເຂົາເຈົ້າ “ຮູ້ສຶກຄືກັບຖືກແທງທີ່ຫົວໃຈ.” ເຂົາເຈົ້າຖາມວ່າ: “ພວກເຮົາຈະເຮັດແນວໃດດີ?” ການທີ່ເປໂຕເວົ້າດ້ວຍຄວາມນັບຖືໜ້າຈະຊ່ວຍໃຫ້ເຂົ້າເຖິງຫົວໃຈຂອງຫຼາຍຄົນແທ້ໆຈົນກະຕຸ້ນເຂົາເຈົ້າໃຫ້ກັບໃຈ.—ກຈກ. 2:37
14 ເຮົາສາມາດຮຽນແບບວິທີທີ່ເປໂຕໃຊ້ເພື່ອຈະເຂົ້າເຖິງຫົວໃຈຂອງຜູ້ຄົນ. ຕອນທີ່ປະກາດ ເຮົາບໍ່ຈຳເປັນຕ້ອງເວົ້າເຖິງທຸກເລື່ອງທີ່ເຂົາເຈົ້າຄິດເຊິ່ງບໍ່ກົງກັບຫຼັກການໃນຄຳພີໄບເບິນ. ແທນທີ່ຈະເຮັດແບບນັ້ນ ເຮົາໜ້າຈະເວົ້າເຖິງຈຸດຕ່າງໆທີ່ເຫັນດີນຳກັນ. ຖ້າເຮົາລົມເລື່ອງທີ່ເຂົາເຈົ້າເຫັນດີກັບເຮົາກ່ອນ ເຮົາກໍສາມາດໃຊ້ຄຳພີໄບເບິນຫາເຫດຜົນກັບເຂົາເຈົ້າໃນເລື່ອງອື່ນໆໄດ້ງ່າຍຂຶ້ນ. ຖ້າເຮົາໃຊ້ວິທີນີ້ ຄົນທີ່ມັກສິ່ງທີ່ດີກໍມີໂອກາດຕອບຮັບຄວາມຈິງໄດ້ຫຼາຍກວ່າ.
“ພວກເຈົ້າຕ້ອງ . . . ຮັບບັບເຕມາ” (ກິດຈະການ 2:38-47)
15. (ກ) ເປໂຕເວົ້າຫຍັງແລະມີການຕອບຮັບແນວໃດ? (ຂ) ເປັນຫຍັງຫຼາຍພັນຄົນທີ່ໄດ້ຍິນຂ່າວດີໃນວັນເພັນເຕກອດຈຶ່ງມີຄຸນສົມບັດທີ່ຈະຮັບບັບເຕມາໃນມື້ນັ້ນ?
15 ໃນວັນເພັນເຕກອດປີ 33 ທີ່ໜ້າຕື່ນເຕັ້ນ ເປໂຕເວົ້າກັບຄົນຢິວແລະຄົນທີ່ປ່ຽນມານັບຖືສາສະໜາຢິວວ່າ: “ພວກເຈົ້າຕ້ອງກັບໃຈແລະຮັບບັບເຕມາ.” (ກຈກ. 2:38) ຜົນກໍຄືມີປະມານ 3.000 ຄົນຮັບບັບເຕມາ ເຂົາເຈົ້າຄືຊິຮັບບັບເຕມາໃນສະນ້ຳທົ່ວເມືອງເຢຣູຊາເລັມຫຼືຢູ່ໃກ້ໆເມືອງນັ້ນ. e ເຂົາເຈົ້າຟ້າວຮັບບັບເຕມາທັງໆທີ່ຍັງບໍ່ພ້ອມບໍ? ນີ້ໝາຍຄວາມວ່ານັກສຶກສາຄຳພີໄບເບິນແລະເດັກນ້ອຍທີ່ມີພໍ່ແມ່ເປັນຄລິດສະຕຽນຕ້ອງຟ້າວຮັບບັບເຕມາທັງໆທີ່ເຂົາເຈົ້າບໍ່ພ້ອມບໍ? ບໍ່. ຂໍໃຫ້ຈື່ໄວ້ວ່າຄົນຢິວເຫຼົ່ານັ້ນແລະຄົນທີ່ປ່ຽນມານັບຖືສາສະໜາຢິວເຊິ່ງໄດ້ຮັບບັບເຕມາໃນວັນເພັນເຕກອດປີ 33 ເປັນຄົນທີ່ສຶກສາຖ້ອຍຄຳຂອງພະເຈົ້າຢ່າງດຸໝັ່ນແລະຍັງໄດ້ເປັນສ່ວນໜຶ່ງຂອງຊາດທີ່ໄດ້ອຸທິດໃຫ້ພະເຢໂຫວາ. ຫຼາຍກວ່ານັ້ນ ເຂົາເຈົ້າໄດ້ສະແດງຄວາມກະຕືລືລົ້ນ ບາງຄົນໄດ້ເດີນທາງມາໄກເພື່ອເຂົ້າຮ່ວມເທດສະການສະຫຼອງປະຈຳປີນີ້. ດັ່ງນັ້ນ ຫຼັງຈາກທີ່ໄດ້ຮັບຄວາມຈິງທີ່ສຳຄັນກ່ຽວກັບບົດບາດຂອງພະເຢຊູຄລິດໃນການເຮັດໃຫ້ຄວາມຕ້ອງການຂອງພະເຈົ້າສຳເລັດ ເຂົາເຈົ້າກໍເລີຍພ້ອມທີ່ຈະຮັບໃຊ້ພະເຈົ້າຕໍ່ໄປໃນຖານະລູກສິດຂອງພະຄລິດທີ່ໄດ້ຮັບບັບເຕມາແລ້ວ.
16. ຄລິດສະຕຽນໃນສະຕະວັດທຳອິດສະແດງນ້ຳໃຈເສຍສະລະແນວໃດ?
16 ພະເຢໂຫວາຄືຊິອວຍພອນຄົນກຸ່ມນີ້ແນ່ນອນ ເພາະໃນກິດຈະການບອກຕໍ່ໄປວ່າ: “ຜູ້ທີ່ເຂົ້າມາເປັນລູກສິດກໍມາຢູ່ນຳກັນແລະເອົາສິ່ງຂອງທີ່ພວກເຂົາມີມາລວມກັນເປັນກອງກາງ. ພວກເຂົາຂາຍວັດຖຸສິ່ງຂອງແລະດິນ ແລ້ວແບ່ງໃຫ້ທຸກຄົນຕາມຄວາມຈຳເປັນ.” f (ກຈກ. 2:44, 45) ແນ່ນອນວ່າ ຄລິດສະຕຽນແທ້ທຸກຄົນຢາກຮຽນແບບນ້ຳໃຈເສຍສະລະດ້ວຍຄວາມຮັກແບບນັ້ນ.
17. ເພື່ອຄົນໜຶ່ງຈະຮັບບັບເຕມາໄດ້ ລາວຕ້ອງເຮັດຕາມຂັ້ນຕອນຫຍັງແດ່ທີ່ຈຳເປັນ?
17 ກ່ອນທີ່ຄົນໜຶ່ງຈະອຸທິດຕົວແລະຮັບບັບເຕມາ ລາວຕ້ອງເຮັດຕາມຂັ້ນຕອນທີ່ຈຳເປັນຫຼາຍຢ່າງທີ່ຄຳພີໄບເບິນບອກໄວ້ ເຊັ່ນ ລາວຕ້ອງຮັບຄວາມຮູ້ຕໍ່ໆໄປກ່ຽວກັບຖ້ອຍຄຳຂອງພະເຈົ້າ. (ຢຮ. 17:3) ລາວຕ້ອງສະແດງຄວາມເຊື່ອແລະກັບໃຈຈາກສິ່ງທີ່ບໍ່ດີຕ່າງໆທີ່ລາວເຄີຍເຮັດໃນອະດີດ. ນີ້ໝາຍຄວາມວ່າລາວຕ້ອງສະແດງຄວາມເສຍໃຈແທ້ໆຕໍ່ເລື່ອງນັ້ນ. (ກຈກ. 3:19) ນອກຈາກນັ້ນ ລາວຕ້ອງປ່ຽນແປງຊີວິດໃໝ່ເຊິ່ງກໍຄືເລີ່ມໃຊ້ຊີວິດໃຫ້ຖືກຕ້ອງຕາມຄວາມຕ້ອງການຂອງພະເຈົ້າ. (ຣມ. 12:2; ອຟຊ. 4:23, 24) ຫຼັງຈາກທີ່ເຮັດຂັ້ນຕອນເຫຼົ່ານີ້ແລ້ວ ລາວຈຶ່ງຈະອຸທິດຕົວໂດຍການອະທິດຖານແລະຮັບບັບເຕມາໄດ້.—ມທ. 16:24; 1ປຕ. 3:21
18. ລູກສິດຂອງພະເຢຊູທີ່ໄດ້ຮັບບັບເຕມາແລ້ວຈະໄດ້ຮັບສິດທິພິເສດຫຍັງ?
18 ເຈົ້າເປັນລູກສິດຂອງພະເຢຊູທີ່ອຸທິດຕົວແລະຮັບບັບເຕມາແລ້ວບໍ? ຖ້າແມ່ນ ເຈົ້າກໍໜ້າຈະຂອບໃຈສຳລັບສິດທິພິເສດນີ້. ຄືກັບພວກລູກສິດໃນສະຕະວັດທຳອິດທີ່ໄດ້ຮັບພະລັງບໍລິສຸດຂອງພະເຈົ້າ ເຈົ້າກໍຈະໄດ້ຮັບພະລັງແບບນັ້ນແລະຖືກໃຊ້ໃຫ້ປະກາດຢ່າງລະອຽດຖີ່ຖ້ວນແລະເຮັດຕາມຄວາມຕ້ອງການຂອງພະເຢໂຫວາ!
a ເບິ່ງຂອບ “ ເຢຣູຊາເລັມ—ສູນກາງຂອງສາສະໜາຢິວ”
b ເບິ່ງຂອບ “ ໂຣມ—ເມືອງຫຼວງຂອງຈັກກະພັດ”; “ ຄົນຢິວໃນເມໂຊໂປຕາເມຍແລະເອຢິບ”; ແລະ “ ສາສະໜາຄລິດສະຕຽນໃນປົນໂຕ”
c “ລີ້ນ” ນັ້ນບໍ່ແມ່ນໄຟແທ້ໆແຕ່ເປັນ “ບາງສິ່ງທີ່ເປັນກັບຄືແປວໄຟ” ນີ້ເຮັດໃຫ້ຄົນອື່ນເຫັນເປັນແປວໄຟລອຍຢູ່ເທິງພວກລູກສິດ.
d ເບິ່ງຂອບ “ ໃຜຄືຄົນທີ່ປ່ຽນມານັບຖືສາສະໜາຢິວ?”
e ເພື່ອໃຫ້ເຫັນພາບຫຼາຍຂຶ້ນ ໃນວັນທີ 7 ສິງຫາ 1993 ຢູ່ການປະຊຸມນານາຊາດຂອງພະຍານພະເຢໂຫວາໃນເມືອງຄຽບ ປະເທດອູແກຣນ ມີ 7.402 ຄົນຮັບບັບເຕມາໃນສະນ້ຳຫົກສະ. ການຮັບບັບເຕມາທັງໝົດໃຊ້ເວລາຮອດ 2 ຊົ່ວໂມງ 15 ນາທີຈຶ່ງຈະແລ້ວ.
f ການຈັດກຽມຊົ່ວຄາວນີ້ຊ່ວຍໃຫ້ຄົນທີ່ເດີນທາງມາເມືອງເຢຣູຊາເລັມສາມາດຢູ່ຕໍ່ໄປໄດ້ເພື່ອຈະຮຽນຮູ້ຫຼາຍຂຶ້ນກ່ຽວກັບຄວາມເຊື່ອໃໝ່ຂອງເຂົາເຈົ້າ ນີ້ເປັນການແບ່ງປັນກັນດ້ວຍຄວາມສະໝັກໃຈແລະບໍ່ໄດ້ຖືກບັງຄັບ. ດັ່ງນັ້ນ ນີ້ຈຶ່ງບໍ່ແມ່ນຮູບແບບຂອງລັດທິຄອມມູນິດຄືທີ່ບາງຄົນບອກໄວ້.—ກຈກ. 5:1-4
