ຕອນ 6
ການສະໜັບສະໜູນລາຊະອານາຈັກ—ການສ້າງສະຖານທີ່ນະມັດສະການພະເຈົ້າແລະວຽກບັນເທົາທຸກ
ເຈົ້າຍ່າງເຂົ້າໄປໃນຫໍປະຊຸມແລະຮູ້ສຶກບໍ່ຄຸ້ນເຄີຍກັບບ່ອນນີ້ເລີຍ. ເຈົ້າຍັງຈື່ໄດ້ຕອນທີ່ມາຊ່ວຍກໍ່ສ້າງຫໍປະຊຸມຫຼັງນີ້ເມື່ອຫຼາຍປີກ່ອນ. ຕອນນັ້ນເຈົ້າມີຄວາມສຸກຫຼາຍ ແລະຕອນນີ້ເຈົ້າກໍແຮ່ງມີຄວາມສຸກທີ່ໄດ້ເຫັນວ່າຫໍປະຊຸມຂອງເຈົ້າມີປະໂຫຍດແທ້ໆ ເພາະວ່າທີ່ນີ້ກາຍເປັນສູນບັນເທົາທຸກຊົ່ວຄາວໄປແລ້ວ. ຍ້ອນຫຍັງ? ຫຼັງຈາກທີ່ພາຍຸຖະຫຼົ່ມຢ່າງໜັກນ້ຳກໍຖ້ວມ ເຮືອນຊານໃນເຂດທີ່ເຈົ້າອາໄສຢູ່ກໍໄດ້ຮັບຄວາມເສຍຫາຍ ຄະນະກຳມະການສາຂາຈຶ່ງຕັ້ງສູນບັນເທົາທຸກຂຶ້ນມາທັນທີເພື່ອຜູ້ປະສົບໄພຈະໄດ້ຮັບອາຫານ ນ້ຳດື່ມທີ່ສະອາດ ເສື້ອຜ້າ ແລະຄວາມຊ່ວຍເຫຼືອອື່ນໆ. ສິ່ງຂອງບໍລິຈາກທີ່ຖືກສົ່ງເຂົ້າມາກໍວາງໄວ້ຢ່າງເປັນລະບຽບ ພີ່ນ້ອງຍ່າງລຽນແຖວເຂົ້າມາຮັບສິ່ງຈຳເປັນແລ້ວນ້ຳຕາແຫ່ງຄວາມຍິນດີກໍໄຫຼອອກມາຈົນອາບແກ້ມຂອງເຂົາເຈົ້າ.
ພະເຍຊູບອກວ່າປະຊາຊົນຂອງເພິ່ນຈະມີສັນຍະລັກຢ່າງໜຶ່ງທີ່ໂດດເດັ່ນ ນັ້ນກໍຄືຄວາມຮັກທີ່ເຂົາເຈົ້າມີໃຫ້ກັນແລະກັນ. (ໂຢ. 13:34, 35) ໃນຕອນ 6 ນີ້ ເຮົາຈະມາເບິ່ງວ່າພະຍານພະເຢໂຫວາສະແດງຄວາມຮັກແບບຄລິດສະຕຽນໃນໂຄງການກໍ່ສ້າງແລະວຽກບັນເທົາທຸກແນວໃດ. ຄວາມຮັກທັງໝົດນີ້ເປັນຫຼັກຖານທີ່ຊັດເຈນວ່າ ລາຊະອານາຈັກຂອງກະສັດເຍຊູກຳລັງປົກຄອງເຮົາຢູ່.
ໃນ
ບົດທີ 18
ວຽກງານຂອງລາຊະອານາຈັກໄດ້ຮັບການສະໜັບສະໜູນທາງການເງິນແນວໃດ?
ໄດ້ເງິນມາແນວໃດ? ມີການໃຊ້ເງິນບໍລິຈາກແນວໃດ?
ບົດທີ 19
ວຽກກໍ່ສ້າງທີ່ເຮັດໃຫ້ພະເຢໂຫວາໄດ້ຮັບກຽດ
ສະຖານທີ່ນະມັດສະການເຮັດໃຫ້ພະເຢໂຫວາໄດ້ຮັບກຽດ ແຕ່ພະອົງເຫັນຄຸນຄ່າຫຼາຍກວ່ານັ້ນອີກ
ບົດທີ 20
ວຽກຮັບໃຊ້ເພື່ອບັນເທົາທຸກ
ເຮົາຮູ້ໄດ້ແນວໃດວ່າວຽກບັນເທົາທຸກເປັນສ່ວນໜຶ່ງຂອງວຽກຮັບໃຊ້ສັກສິດທີ່ເຮົາເຮັດເພື່ອພະເຢໂຫວາ?
