ຮັບໃຊ້ພະເຢໂຫວາ ຢ່າຮັບໃຊ້ຊາຕານ
ພວກເຮົາທຸກຄົນຈະຕ້ອງເລືອກວ່າເຮົາຈະຮັບໃຊ້ພະເຢໂຫວາຫລືວ່າຈະຮັບໃຊ້ຊາຕານແລະຜີປີສາດຂອງມັນ. ເຮົາບໍ່ສາມາດເລືອກທັງສອງຢ່າງໄດ້. ເປັນການສະຫລາດສໍ່າໃດທີ່ຈະຮັບໃຊ້ພະເຢໂຫວາ!
ພະເຢໂຫວາອົງປະເສີດ
ດັ່ງທີ່ເຮົາເຂົ້າໃຈແລ້ວ ຜີປີສາດມັກຈະທຳຮ້າຍແລະຫລອກລວງຄົນເຮົາ. ພະເຢໂຫວາບໍ່ເປັນແນວນັ້ນ. ພະອົງຮັກເຮົາຄືກັບພໍ່ທີ່ຮັກລູກ. ພະອົງເປັນຜູ້ໃຫ້ “ຂອງປະທານອັນດີແລະພະຄຸນປະເສີດທີ່ສຸດທຸກຢ່າງ.” (ຢາໂກໂບ 1:17) ພະອົງບໍ່ໄດ້ຍັບຢັ້ງສິ່ງດີໄວ້ຈາກມະນຸດ ແມ່ນວ່າພະອົງເອງຈະຕ້ອງເສຍສະລະຫລາຍສໍ່າໃດກໍຕາມ.—ເອເຟດ 2:4-7.
ພະເຍຊູ ລູກຂອງພະເຈົ້າ ໄດ້ສະແດງຄວາມຮັກຕໍ່ປະຊາຊົນ ໂດຍການປິ່ນປົວຄວາມເຈັບປ່ວຍຂອງເຂົາເຈົ້າ
ຂໍໃຫ້ຄິດເຖິງສິ່ງຕ່າງໆທີ່ພະເຍຊູລູກຂອງພະເຈົ້າໄດ້ກະທຳຢູ່ເທິງແຜ່ນດິນໂລກ. ພະອົງເຮັດໃຫ້ຄົນປາກກືກເວົ້າໄດ້ແລະເຮັດໃຫ້ຄົນຕາບອດເຫັນຮຸ່ງ. ພະອົງປົວຄົນຂີ້ທູດແລະຄົນຂາເຄ. ພະອົງໄດ້ຂັບໄລ່ຜີປີສາດ ແລະປິ່ນປົວຄວາມເຈັບປ່ວຍທຸກຊະນິດ. ແລະດ້ວຍລິດເດດຈາກພະເຈົ້າ ພະເຍຊູຍັງໄດ້ປຸກຄົນຕາຍໃຫ້ຟື້ນຄືນມາ.—ມັດທາຍ 9:32-35; 15:30, 31; ລືກາ 7:11-15.
ແທນທີ່ຈະເວົ້າຕົວະເພື່ອຫລອກລວງພວກເຮົາ ພະເຈົ້າເວົ້າຄວາມຈິງສະເຫມີ. ພະອົງບໍ່ເຄີຍຫລອກລວງໃຜຈັກເທື່ອ.—ຈົດເຊັນບັນຊີ 23:19.
ຫລີກລ່ຽງກິດປະຕິບັດທີ່ບໍ່ສະອາດ
ຄືກັບແມງມຸມທີ່ຫ້າງໃຍຈັບເອົາແມງໄມ້ໄວ້ຢ່າງແຫນ້ນແນວໃດ ຫລາຍລ້ານຄົນກໍຖືກຄວາມເຊື່ອເລື່ອງຜີສາງ ເວດມົນແລະຄວາມຕົວະຈັບເອົາໄວ້ຢ່າງແຫນ້ນແນວນັ້ນ. ເຂົາເຈົ້າຢ້ານຄົນຕາຍ. ຢ້ານຜີປີສາດ. ມີໃຈກັງວົນເລື່ອງຄຳສາບ ໂຊກລາງ ສະເຫນແລະຄາຖາອາຄົມ. ເຂົາເຈົ້າຍຶດຕິດຢູ່ກັບຄວາມເຊື່ອສັດທາແລະຈາຮີດປະເພນີເຊິ່ງມາຈາກຄຳຕົວະຂອງຊາຕານພະຍາມານ. ຜູ້ຮັບໃຊ້ຂອງພະເຈົ້າບໍ່ຕິດບ້ວງແຮ້ວເຫລົ່ານີ້ເລີຍ.
ພະເຢໂຫວາມີລິດເດດຫລາຍກວ່າຊາຕານ. ຫາກເຈົ້າຮັບໃຊ້ພະເຢໂຫວາ ພະອົງຈະປ້ອງກັນເຈົ້າໄວ້ຈາກຜີປີສາດ. (ຢາໂກໂບ 4:7) ເວດມົນຄາຖາຈະເຮັດຫຍັງເຈົ້າບໍ່ໄດ້. ຕົວຢ່າງເຊັ່ນ ໃນປະເທດນີເຊເຣີຍ ຫມໍຜີທີ່ເກັ່ງກ້າສາມຄົນໄດ້ໃຊ້ຄາຖາອາຄົມເພື່ອຂ້າພະຍານຂອງພະເຢໂຫວາເຊິ່ງບໍ່ຍອມອອກຈາກເມືອງນັ້ນ ເມື່ອຄາຖາອາຄົມບໍ່ສາມາດທຳຮ້າຍພະຍານ ຫມໍຜີຄົນຫນຶ່ງຢ້ານຫລາຍຈົນໄດ້ໄປອ້ອນວອນຂໍຄວາມເມດຕາຈາກພະຍານ.
ຊາວເມືອງເອເຟດເຜົາປຶ້ມເວດມົນຄາຖາທັງຫມົດຂອງເຂົາເຈົ້າ
ຖ້າຜີປີສາດມາກວນເຈົ້າ ເຈົ້າສາມາດຮ້ອງອອກຊື່ພະເຢໂຫວາແລະພະອົງກໍຈະປ້ອງກັນເຈົ້າ. (ສຸພາສິດ 18:10) ແຕ່ເພື່ອຈະຮັບການປ້ອງກັນຈາກພະເຈົ້າ ເຈົ້າຕ້ອງກຳຈັດທຸກສິ່ງທີ່ກ່ຽວຂ້ອງກັບລັດທິຜີປີສາດແລະການບູຊາຜີປີສາດໃຫ້ຫລຸດອອກ. ຜູ້ນະມັດສະການພະເຈົ້າໃນເມືອງເອເຟດສະໄຫມບູຮານເຄີຍເຮັດແບບນັ້ນ. ເຂົາເຈົ້າເກັບໂຮມເອົາປຶ້ມທີ່ກ່ຽວຂ້ອງກັບເວດມົນຄາຖາມາເຜົາຖິ້ມຈົນຫມົດ. (ກິດຈະການ 19:19, 20) ໃນທຸກມື້ນີ້ ຜູ້ຮັບໃຊ້ພະເຈົ້າຕ້ອງເຮັດແບບນີ້ຄືກັນ. ເຈົ້າຕ້ອງກຳຈັດເຄື່ອງລາງຂອງດີ ຜ້າຍັນ ສາຍສິນ ປຶ້ມເວດມົນແລະສິ່ງອື່ນໆອີກທີ່ກ່ຽວຂ້ອງກັບກິດປະຕິບັດທາງໄສຍະສາດ.
ປະຕິບັດສາສະຫນາແທ້
ຖ້າເຈົ້າຕ້ອງການເຮັດໃຫ້ພະເຈົ້າພໍໃຈ ພຽງແຕ່ລະຖິ້ມການນະມັດສະການປອມແລະເຊົາເຮັດຊົ່ວເທົ່ານັ້ນຍັງບໍ່ພໍ. ເຈົ້າຈະຕ້ອງເຂົ້າຮ່ວມໃນການນະມັດສະການທີ່ບໍລິສຸດຢ່າງຈິງຈັງ. ຄຳພີໄບເບິນຊີ້ເຖິງຂໍ້ຮຽກຮ້ອງວ່າ:
ເຂົ້າຮ່ວມການປະຊຸມຂອງຄລິດສະຕຽນ.—ເຫບເລີ 10:24, 25
ສຶກສາຄຳພີໄບເບິນ.—ໂຢຮັນ 17:3
ປະກາດສັ່ງສອນຄົນອື່ນ.—ມັດທາຍ 24:14
ອະທິດຖານເຖິງພະເຢໂຫວາ.—ຟີລິບ 4:6, 7
ຮັບບັບເຕມາ.—ກິດຈະການ 2:41
ຄົບຫາສະມາຄົມກັບພະຍານພະເຢໂຫວາ
ຊາຕານແລະຜີປີສາດມີພັກພວກທີ່ເປັນມະນຸດຢູ່ໃນໂລກນີ້ເຊິ່ງສອນແລະປະຕິບັດສິ່ງຜິດໆ. ພະເຢໂຫວາກໍມີຜູ້ຮັບໃຊ້ຂອງພະອົງຄືກັນ. ເຂົາເຈົ້າແມ່ນພະຍານພະເຢໂຫວາ. (ເອຊາອີ 43:10) ທົ່ວແຜ່ນດິນໂລກມີພະຍານຫລາຍກວ່າຫົກລ້ານຄົນ. ພະຍານທຸກຄົນພະຍາຍາມເຮັດແຕ່ການດີແລະສອນຄວາມຈິງໃຫ້ຄົນອື່ນ. ໃນຫລາຍປະເທດເຈົ້າຈະພົບເຂົາເຈົ້າຢູ່ທີ່ຫໍປະຊຸມລາຊະອານາຈັກ ເຊິ່ງເຂົາເຈົ້າຍິນດີຕ້ອນຮັບເຈົ້າຢ່າງອົບອຸ່ນ.
ວຽກຂອງເຂົາເຈົ້າແມ່ນການຊ່ວຍຄົນອື່ນໃຫ້ເຂົ້າມາຮັບໃຊ້ພະເຈົ້າ. ເຂົາເຈົ້າຍິນດີສຶກສາຄຳພີໄບເບິນນຳເຈົ້າຢູ່ບ້ານ ເພື່ອຊ່ວຍເຈົ້າໃຫ້ຮູ້ຈັກວິທີນະມັດສະການພະເຢໂຫວາໃນວິທີທີ່ຖືກຕ້ອງ. ເຈົ້າບໍ່ຕ້ອງເສຍຄ່າຮຽນ. ພະຍານພະເຢໂຫວາຍິນດີສອນຄວາມຈິງ ເພາະວ່າເຂົາເຈົ້າຮັກປະຊາຊົນແລະຮັກພະເຢໂຫວາພະເຈົ້າ.
ພະຍານພະເຢໂຫວາຈະຊ່ວຍເຈົ້າໃຫ້ຮັບໃຊ້ພະເຈົ້າ
