ບົດຮຽນ 1
ຄວາມລັບທີ່ເຮົາຮູ້ແລ້ວມີຄວາມສຸກ
ມີໃຜເຄີຍບອກຄວາມລັບໃຫ້ລູກຟັງບໍ?— * ຄຳພີໄບເບິນເວົ້າເຖິງຄວາມລັບທີ່ພິເສດວ່າ “ຂໍ້ເລິກ [ຄວາມລັບອັນສັກສິດ]” ເຮົາເອີ້ນວ່າຄວາມລັບກໍເພາະວ່າຜູ້ຄົນບໍ່ຮູ້ກ່ຽວກັບເລື່ອງນີ້ ແລະຍັງສັກສິດນຳອີກຍ້ອນວ່າມາຈາກພະເຢໂຫວາພະເຈົ້າ. ແມ່ນແຕ່ທູດສະຫວັນກໍຢາກຮູ້ຕື່ມອີກໃນເລື່ອງນີ້. ລູກຢາກຮູ້ບໍວ່າແມ່ນຄວາມລັບເລື່ອງຫຍັງ?—
ລູກຄິດວ່າທູດສະຫວັນພາກັນຢາກຮູ້ຫຍັງ
ນານມາແລ້ວ ພະເຢໂຫວາໄດ້ສ້າງຊາຍຍິງຄູ່ທຳອິດ. ຜູ້ຊາຍຊື່ອາດາມແລະຜູ້ຍິງຊື່ເອວາ. ພະເຢໂຫວາໃຫ້ເຂົາເຈົ້າຢູ່ໃນສວນທີ່ສວຍງາມເຊິ່ງເອີ້ນວ່າສວນເອເດນ. ຖ້າອາດາມແລະເອວາຟັງຄວາມພະເຢໂຫວາ ເຂົາເຈົ້າກັບລູກຫຼານທີ່ຈະເກີດມາກໍຈະພາກັນເຮັດໃຫ້ແຜ່ນດິນໂລກທັງໝົດເປັນອຸທິຍານຄືກັບສວນເອເດນ ແລະທຸກຄົນກໍຈະມີຄວາມສຸກແລະມີຊີວິດຕະຫຼອດໄປໃນອຸທິຍານ. ແຕ່ລູກຈື່ໄດ້ບໍວ່າອາດາມກັບເອວາໄດ້ເຮັດຫຍັງ?—
ອາດາມແລະເອວາບໍ່ຟັງຄວາມພະເຢໂຫວາ ແລະຍ້ອນແນວນັ້ນໃນທຸກມື້ນີ້ພວກເຮົາຈຶ່ງບໍ່ມີຊີວິດຢູ່ໃນອຸທິຍານ. ແຕ່ພະອົງໄດ້ບອກແລ້ວວ່າຈະເຮັດໃຫ້ໂລກຂອງເຮົາສວຍງາມ ແລະທຸກຄົນຈະມີຊີວິດຕະຫຼອດໄປເຊິ່ງມີແຕ່ຄວາມສຸກ. ພະເຢໂຫວາຈະເຮັດແນວໃດ? ເປັນເວລາດົນນານແລ້ວທີ່ຜູ້ຄົນບໍ່ຮູ້ຈັກຄວາມລັບນີ້.
ຢູ່ເທິງໂລກ ພະເຍຊູເວົ້າຕື່ມອີກກ່ຽວກັບຄວາມລັບນີ້. ພະອົງບອກວ່າເລື່ອງນີ້ກ່ຽວຂ້ອງກັບລາຊະອານາຈັກຂອງພະເຈົ້າ. ພະເຍຊູສອນປະຊາຊົນໃຫ້ອະທິດຖານຂໍໃຫ້ລາຊະອານາຈັກນັ້ນມາປົກຄອງ. ລາຊະອານາຈັກຈະເຮັດໃຫ້ແຜ່ນດິນໂລກເປັນສວນອຸທິຍານທີ່ສວຍງາມ.
ລູກຕື່ນເຕັ້ນບໍທີ່ໄດ້ຮູ້ຈັກເລື່ອງນີ້?— ໃຫ້ລູກຈື່ເດີວ່າມີແຕ່ຄົນທີ່ຟັງຄວາມພະເຢໂຫວາເທົ່ານັ້ນຈຶ່ງຈະມີຊີວິດໃນສວນອຸທິຍານ. ໃນຄຳພີໄບເບິນມີບົດເລື່ອງຂອງຄົນທີ່ຟັງຄວາມພະເຢໂຫວາ ຄົນເຫຼົ່ານັ້ນມີຫຼາຍຄົນ ມີທັງຜູ້ຊາຍແລະຜູ້ຍິງ. ລູກຢາກຮຽນຮູ້ເລື່ອງຂອງເຂົາເຈົ້າບໍ?— ມາເບິ່ງວ່າມີໃຜແດ່ແລະເຮົາຈະຮຽນແບບເຂົາເຈົ້າໄດ້ແນວໃດ.
ມາອ່ານຄຳພີໄບເບິນນຳກັນ
^ ຂໍ້ 3 ໃນແຕ່ລະເລື່ອງ ທ່ານຈະເຫັນເຄື່ອງໝາຍນີ້ (—) ຢູ່ທ້າຍບາງຄຳຖາມ. ເມື່ອຮອດບ່ອນນີ້ທ່ານຄວນຢຸດບຶດໜຶ່ງເພື່ອໃຫ້ລູກຕອບ.
