ບົດຮຽນ 9
ເຢເຣມີບໍ່ເຄີຍເຊົາເວົ້າເລື່ອງພະເຢໂຫວາ
ເປັນຫຍັງຜູ້ຄົນຈຶ່ງໃຈຮ້າຍໃຫ້ເຢເຣມີ
ພະເຢໂຫວາຊ່ວຍຊີວິດຂອງເຢເຣມີ
ບາງເທື່ອຜູ້ຄົນເຍາະເຍີ້ຍຫຼືໃຈຮ້າຍໃສ່ ເມື່ອພວກເຮົາເວົ້າກ່ຽວກັບເລື່ອງຂອງພະເຢໂຫວາ. ເມື່ອເປັນແນວນັ້ນ ອາດຈະເຮັດໃຫ້ເຮົາບໍ່ຢາກເວົ້າເຖິງພະເຈົ້າອີກຕໍ່ໄປ. ລູກເຄີຍຮູ້ສຶກແບບນັ້ນບໍ?— ຄຳພີໄບເບິນບອກເຮົາກ່ຽວກັບຊາຍໜຸ່ມຜູ້ທີ່ຮັກພະເຢໂຫວາ ແຕ່ລາວເກືອບຈະເຊົາເວົ້າເລື່ອງພະເຢໂຫວາ ລາວຊື່ເຢເຣມີ ໃຫ້ເຮົາມາຮຽນເລື່ອງຂອງລາວຕື່ມອີກເນາະ.
ເມື່ອເຢເຣມີຍັງໜຸ່ມນ້ອຍພະເຢໂຫວາບອກລາວໃຫ້ເຕືອນຜູ້ຄົນວ່າ ໃຫ້ເຊົາເຮັດສິ່ງທີ່ຊົ່ວ. ວຽກນີ້ບໍ່ງ່າຍເລີຍສຳລັບເຢເຣມີແລະລາວກໍຮູ້ສຶກຢ້ານ. ລາວເວົ້າກັບພະເຢໂຫວາວ່າ: ‘ຂ້ານ້ອຍບໍ່ຮູ້ວ່າຈະເວົ້າຫຍັງ ຂ້ານ້ອຍຍັງນ້ອຍຢູ່’ ແຕ່ພະເຢໂຫວາບອກລາວວ່າ: ‘ຢ່າຊູ່ຢ້ານ ເຮົາຈະຊ່ວຍເຈົ້າ.’
ເມື່ອເປັນແນວນັ້ນເຢເຣມີຈຶ່ງເລີ່ມເຕືອນຜູ້ຄົນໃຫ້ຮູ້ວ່າເຂົາເຈົ້າຈະຖືກລົງໂທດຖ້າວ່າເຂົາເຈົ້າບໍ່ປ່ຽນແປງຕົວເອງ. ລູກຄິດວ່າຜູ້ຄົນຈະເຮັດຕາມທີ່ເຢເຣມີບອກບໍ?— ບໍ່ ບາງຄົນກໍຫົວຂວັນໃສ່ ຫຼືບໍ່ກໍຮ້າຍໃສ່ລາວຫຼາຍ. ບາງຄົນກໍຢາກຂ້າລາວ! ລູກຄິດວ່າເຢເຣມີຈະຮູ້ສຶກແນວໃດ?— ລາວຮູ້ສຶກຢ້ານແລະເວົ້າວ່າ: ‘ຂ້ານ້ອຍຈະບໍ່ເວົ້າເລື່ອງພະເຢໂຫວາອີກຕໍ່ໄປ.’ ແຕ່ລາວເຊົາເວົ້າແທ້ໆບໍ?—ບໍ່ ລາວບໍ່ເຊົາເວົ້າ. ລາວຮັກພະເຢໂຫວາຫຼາຍ ລາວຈຶ່ງບໍ່ເຊົາເວົ້າເລື່ອງຂອງພະອົງ. ເນື່ອງຈາກວ່າເຢເຣມີບໍ່ຍອມແພ້ ພະເຢໂຫວາຈຶ່ງຊ່ວຍລາວໃຫ້ລອດຊີວິດ.
ຕົວຢ່າງເຊັ່ນ ມີຄົນບໍ່ດີພວກໜຶ່ງໄດ້ຖິ້ມເຢເຣມີລົງໃນຂຸມໃຫຍ່ທີ່ເລິກໆເຊິ່ງມີແຕ່ຂີ້ຕົມ. ລາວບໍ່ມີອາຫານກິນແລະບໍ່ມີນໍ້າດື່ມ. ຄົນເຫຼົ່ານັ້ນຖິ້ມລາວລົງຫັ້ນກໍເພື່ອຈະຂ້າລາວໃຫ້ຕາຍ. ແຕ່ພະເຢໂຫວາໄດ້ຊ່ວຍລາວໃຫ້ໜີໄປໄດ້!
ລູກໄດ້ບົດຮຽນຫຍັງຈາກຕົວຢ່າງຂອງເຢເຣມີ?— ເຖິງວ່າບາງເທື່ອລາວຮູ້ສຶກຢ້ານ ແຕ່ລາວກໍບໍ່ເຄີຍເຊົາເວົ້າເລື່ອງຂອງພະເຢໂຫວາ. ເມື່ອລູກເວົ້າກ່ຽວກັບພະເຢໂຫວາ ຜູ້ຄົນອາດຈະຫົວຂວັນຫຼືອາດຈະໃຈຮ້າຍໃສ່ລູກ. ລູກອາດຈະຮູ້ສຶກອາຍຫຼືຢ້ານກໍໄດ້ ແຕ່ຂໍໃຫ້ລູກຢ່າເຊົາເວົ້າເລື່ອງພະເຢໂຫວາ. ເພາະພະອົງຈະຊ່ວຍລູກສະເໝີຄືກັບທີ່ເຄີຍຊ່ວຍເຢເຣມີ.
