ບົດຮຽນ 7
ລູກເຄີຍຮູ້ສຶກຢ້ານແລະໂດດດ່ຽວບໍ
ເບິ່ງຮູບຂອງເດັກຊາຍໃນໜ້ານີ້ແມ. ເບິ່ງຄືວ່າລາວຮູ້ສຶກຢ້ານແລະໂດດດ່ຽວແມ່ນບໍ? ລູກເຄີຍຮູ້ສຶກແບບນັ້ນບໍ?— ໃນບາງຄັ້ງ ທຸກໆຄົນຮູ້ສຶກແບບນັ້ນ. ຄຳພີໄບເບິນກ່າວເຖິງໝູ່ຂອງພະເຢໂຫວາບາງຄົນທີ່ເຄີຍຮູ້ສຶກຢ້ານແລະໂດດດ່ຽວ. ໜຶ່ງໃນນັ້ນກໍແມ່ນເອລີຢາ. ໃຫ້ເຮົາມາຮຽນເລື່ອງຂອງລາວຕື່ມອີກເນາະ.
ເຢຊາເບນຢາກຂ້າເອລີຢາ
ເອລີຢາອາໄສຢູ່ໃນປະເທດອິດສະລາແອນດົນກ່ອນທີ່ພະເຍຊູຈະເກີດ. ອາກາບເປັນກະສັດຂອງຊາວອິດສະລາແອນ ແຕ່ລາວບໍ່ໄດ້ນະມັດສະການພະເຢໂຫວາພະເຈົ້າອົງທ່ຽງແທ້. ອາກາບແລະເຢຊາເບນເມຍຂອງລາວໄດ້ນະມັດສະການພະບາອານທີ່ເປັນພະບໍ່ຈິງ. ດັ່ງນັ້ນ ຊາວອິດສະລາແອນສ່ວນຫຼາຍກໍເລີ່ມນະມັດສະການພະບາອານຄືກັນ. ລາຊີນີເຢຊາເບນຕ້ອງການຂ້າທຸກຄົນທີ່ນະມັດສະການພະເຢໂຫວາ ລວມທັງເອລີຢານຳ! ລູກຮູ້ບໍວ່າເອລີຢາໄດ້ເຮັດແນວໃດ?—
ເອລີຢາໄດ້ປົບໜີ! ລາວໄດ້ໜີໄປທີ່ທະເລຊາຍເຊິ່ງຢູ່ໄກໆແລະໄດ້ລີ້ໂຕຢູ່ໃນຖໍ້າ. ລູກຄິດວ່າເປັນຫຍັງລາວຈຶ່ງເຮັດແນວນັ້ນ?— ແມ່ນ ລາວຢ້ານ. ແຕ່ເອລີຢາບໍ່ຄວນຢ້ານ. ເປັນຫຍັງ? ເພາະລາວຮູ້ແລ້ວວ່າພະເຢໂຫວາສາມາດຊ່ວຍລາວໄດ້. ພະອົງໄດ້ສຳແດງລິດເດດໃຫ້ເອລີຢາເຫັນກ່ອນແລ້ວ. ມີຢູ່ເທື່ອໜຶ່ງພະເຢໂຫວາໄດ້ຕອບຄຳອະທິດຖານຂອງເອລີຢາໂດຍໃຫ້ໄຟຕົກມາຈາກຟ້າ. ດັ່ງນັ້ນ ພະເຢໂຫວາສາມາດຊ່ວຍເອລີຢາໄດ້ຢ່າງແນ່ນອນ!
ພະເຢໂຫວາຊ່ວຍເອລີຍາແນວໃດ?
ໃນຂະນະທີ່ເອລີຢາລີ້ຢູ່ໃນຖໍ້າ ພະເຢໂຫວາໄດ້ເວົ້າກັບລາວແລະຖາມວ່າ: ‘ເຈົ້າເຮັດຫຍັງຢູ່ທີ່ນີ້?’ ເອລີຢາຈຶ່ງຕອບວ່າ: ‘ມີແຕ່ຂ້ານ້ອຍຄົນດຽວທີ່ຍັງນະມັດສະການພະອົງ. ຂ້ານ້ອຍໂດດດ່ຽວທີ່ສຸດແລະຢ້ານວ່າ ຂ້ານ້ອຍຈະຖືກຂ້າ.’ ເອລີຢາຄິດວ່າຜູ້ທີ່ນະມັດສະການພະເຢໂຫວາຄົນອື່ນໆຖືກຂ້າຕາຍໝົດແລ້ວ. ແຕ່ພະເຢໂຫວາບອກເອລີຢາວ່າ ‘ບໍ່ ເລື່ອງນັ້ນບໍ່ແມ່ນຄວາມຈິງ ຍັງມີອີກ 7.000 ຄົນທີ່ນະມັດສະການເຮົາ. ຈົ່ງກ້າຫານ ເຮົາມີວຽກໃຫ້ເຈົ້າເຮັດຕື່ມອີກ!’ ລູກຄິດວ່າ ເມື່ອເອລີຢາໄດ້ຍິນແບບນັ້ນແລ້ວລາວຈະດີໃຈບໍ?—
ລູກໄດ້ບົດຮຽນຫຍັງຈາກສິ່ງທີ່ເກີດຂຶ້ນກັບເອລີຢາ?— ລູກເຄີຍຮູ້ສຶກຢ້ານແລະໂດດດ່ຽວບໍ? ຢ່າລືມວ່າລູກຍັງມີໝູ່ຄົນອື່ນໆທີ່ຮັກພະເຢໂຫວາແລະຮັກລູກ. ນອກຈາກນັ້ນ ພະເຢໂຫວາຍັງມີລິດເດດຫຼາຍແລະພະອົງຈະຊ່ວຍລູກສະເໝີ! ລູກດີໃຈບໍທີ່ຮູ້ວ່າລູກບໍ່ເຄີຍໂດດດ່ຽວເລີຍ?—
