ພາກຜະຫນວກ
ວິທີປະຕິບັດກັບຜູ້ທີ່ຖືກຕັດສຳພັນ
ມີບໍ່ເທົ່າໃດສິ່ງທີ່ສາມາດເຮັດໃຫ້ເຈັບປວດໄດ້ຫລາຍກວ່າການທີ່ຍາດພີ່ນ້ອງຫລືຫມູ່ສະຫນິດຖືກໄລ່ອອກຈາກປະຊາຄົມເນື່ອງຈາກບໍ່ກັບໃຈຈາກບາບທີ່ລາວໄດ້ເຮັດ. ວິທີທີ່ເຮົາຕອບສະຫນອງຕໍ່ຄຳແນະນຳໃນຄຳພີໄບເບິນກ່ຽວກັບເລື່ອງນີ້ອາດເຜີຍໃຫ້ເຫັນວ່າເຮົາມີຄວາມຮັກຢ່າງເລິກເຊິ່ງຕໍ່ພະເຈົ້າແລະພັກດີຕໍ່ການຈັດຕຽມຂອງພະອົງຫລາຍສໍ່າໃດ. * ຂໍໃຫ້ພິຈາລະນາຄຳຖາມບາງຂໍ້ກ່ຽວກັບເລື່ອງນີ້.
ເຮົາຄວນປະຕິບັດແນວໃດກັບຜູ້ທີ່ຖືກຕັດສຳພັນ? ຄຳພີໄບເບິນກ່າວວ່າ “ຖ້າມີຜູ້ຫນຶ່ງຜູ້ໃດທີ່ຊື່ວ່າເປັນພີ່ນ້ອງຍັງເປັນຄົນຜິດຊາຍຍິງຫລືເປັນຄົນໂລບ ຫລືເປັນຄົນນົບຮູບນົບຜີ ຫລືເປັນຄົນປາກຮ້າຍ ຫລືເປັນຄົນຂີ້ເຫລົ້າ ຫລືເປັນຄົນລັກ ຢ່າຄົບກັນກັບຄົນຢ່າງນັ້ນ ແມ່ນເຖິງກິນເຂົ້ານຳກັນກໍບໍ່ໃຫ້.” (1 ໂກລິນໂທ 5:11) ເມື່ອກ່າວເຖິງທຸກຄົນທີ່ “ບໍ່ຕັ້ງຢູ່ໃນຄຳໂອວາດແຫ່ງພະຄລິດ” ເຮົາອ່ານດັ່ງນີ້ “ຢ່າຮັບເພິ່ນໄວ້ໃນເຮືອນແລະຢ່າຄຳນັບເພິ່ນ. ເພາະວ່າຜູ້ທີ່ຄຳນັບເພິ່ນກໍເຂົ້າສ່ວນໃນການຊົ່ວແຫ່ງເພິ່ນ.” (2 ໂຢຮັນ 9-11) ເຮົາຕ້ອງບໍ່ຕິດຕໍ່ເວົ້າລົມເລື່ອງຝ່າຍວິນຍານແລະພົບປະກັບຜູ້ທີ່ຖືກຕັດສຳພັນ. ຫໍສັງເກດການ ສະບັບວັນທີ 15 ເດືອນມັງກອນ ປີ 1982 ຫນ້າ 22 (ພາສາໄທ) ກ່າວວ່າ “ຄຳເວົ້າງ່າຍໆທີ່ວ່າ ‘ສະບາຍດີ’ ຕໍ່ຜູ້ໃດຜູ້ຫນຶ່ງອາດເປັນບາດກ້າວທຳອິດທີ່ນຳໄປສູ່ການສົນທະນາຫລືບາງທີອາດເຮັດໃຫ້ເກີດມິດຕະພາບໄດ້ດ້ວຍຊໍ້າ. ເຮົາຍັງຢາກຈະເລີ່ມບາດກ້າວທຳອິດນັ້ນກັບບຸກຄົນທີ່ຖືກຕັດສຳພັນບໍ?”
ສຳຄັນແທ້ໆບໍທີ່ຈະຫລີກລ່ຽງການຕິດຕໍ່ທຸກຢ່າງກັບຜູ້ທີ່ຖືກຕັດສຳພັນ? ສຳຄັນແທ້ ດ້ວຍເຫດຜົນຫລາຍຢ່າງ. ເຫດຜົນທຳອິດ ນັ້ນເປັນການສະແດງວ່າເຮົາພັກດີຕໍ່ພະເຈົ້າແລະພະຄຳຂອງພະອົງ. ເຮົາເຊື່ອຟັງພະເຢໂຫວາບໍ່ແມ່ນສະເພາະເມື່ອງ່າຍທີ່ຈະເຮັດຕາມເທົ່ານັ້ນ ແຕ່ເມື່ອຍາກທີ່ຈະເຮັດຕາມດ້ວຍ. ຄວາມຮັກທີ່ມີຕໍ່ພະເຈົ້າກະຕຸ້ນເຮົາໃຫ້ເຊື່ອຟັງຄຳສັ່ງທຸກຂໍ້ຂອງພະອົງ ຍອມຮັບວ່າພະອົງຍຸຕິທຳແລະເຕັມໄປດ້ວຍຄວາມຮັກ ແລະຄຳສັ່ງຂອງພະອົງສົ່ງເສີມຜົນປະໂຫຍດອັນດີທີ່ສຸດ. (ເອຊາອີ 48:17; 1 ໂຢຮັນ 5:3) ເຫດຜົນທີສອງ ການເຊົາຄົບຫາກັບຜູ້ເຮັດຜິດທີ່ບໍ່ກັບໃຈເປັນການປົກປ້ອງເຮົາແລະປະຊາຄົມຈາກມົນທິນທາງຝ່າຍວິນຍານແລະສິນລະທຳ ແລະສົ່ງເສີມຊື່ສຽງທີ່ດີຂອງປະຊາຄົມ. (1 ໂກລິນໂທ 5:6, 7) ເຫດຜົນທີສາມ ການທີ່ເຮົາຍຶດຫມັ້ນຕາມຫລັກການໃນຄຳພີໄບເບິນອາດເຖິງກັບເປັນປະໂຫຍດຕໍ່ຜູ້ທີ່ຖືກຕັດສຳພັນ. ໂດຍສະຫນັບສະຫນູນການຕັດສິນຂອງຄະນະກຳມະການຕັດສິນຄວາມເຮົາອາດກະຕຸ້ນຫົວໃຈຂອງຜູ້ທີ່ເຮັດຜິດເຊິ່ງຕອນນັ້ນຍັງບໍ່ທັນຕອບຮັບການຊ່ວຍເຫລືອຈາກຜູ້ເຖົ້າແກ່. ການສູນເສຍມິດຕະພາບອັນມີຄ່າກັບຄົນທີ່ລາວເຄີຍຮັກອາດຊ່ວຍລາວໃຫ້ “ຮູ້ເມື່ອ” ແລະເຫັນວ່າຄວາມຜິດຂອງລາວເປັນເລື່ອງຮ້າຍແຮງ ແລະດຳເນີນຕາມຂັ້ນຕອນຕ່າງໆເພື່ອກັບມາຫາພະເຢໂຫວາ.—ລືກາ 15:17.
ຈະວ່າແນວໃດຖ້າຍາດພີ່ນ້ອງຖືກຕັດສຳພັນ? ໃນກໍລະນີເຊັ່ນນີ້ ສາຍສຳພັນທີ່ໃກ້ຊິດລະຫວ່າງສະມາຊິກໃນຄອບຄົວອາດກໍ່ໃຫ້ເກີດການທົດສອບຢ່າງແທ້ຈິງໃນເລື່ອງຄວາມພັກດີຕໍ່ກົດຫມາຍຂອງພະເຢໂຫວາ. ເຮົາຈະປະຕິບັດແນວໃດກັບຍາດພີ່ນ້ອງທີ່ຖືກຕັດສຳພັນ? ເຮົາບໍ່ສາມາດກ່າວເຖິງທຸກສະຖານະການທີ່ອາດເກີດຂຶ້ນໄດ້ ແຕ່ໃຫ້ເຮົາພິຈາລະນາສະພາບການພື້ນຖານສອງຢ່າງ.
ໃນບາງກໍລະນີ ສະມາຊິກຄອບຄົວທີ່ຖືກຕັດສຳພັນອາດຍັງອາໄສຢູ່ໃນເຮືອນດຽວກັນຖານະເປັນສ່ວນຫນຶ່ງຂອງຄອບຄົວ ເນື່ອງຈາກການທີ່ລາວຖືກຕັດສຳພັນບໍ່ໄດ້ຍຸຕິສາຍສຳພັນໃນຄອບຄົວ. ກິດຈະວັດແລະການຕິດຕໍ່ພົວພັນກັບຄອບຄົວໃນຊີວິດປະຈຳວັນກໍອາດດຳເນີນຕໍ່ໄປ. ເຖິງຢ່າງນັ້ນ ເນື່ອງຈາກການເລືອກທາງຊີວິດຂອງລາວ ສະມາຊິກຄອບຄົວທີ່ມີຄວາມເຊື່ອຈຶ່ງຕັດສິນໃຈຍຸຕິສາຍສຳພັນທາງຝ່າຍວິນຍານກັບລາວ. ດັ່ງນັ້ນ ສະມາຊິກຄອບຄົວທີ່ພັກດີຕໍ່ພະເຈົ້າຈຶ່ງບໍ່ອາດມີກິດຈະກຳຕ່າງໆທາງຝ່າຍວິນຍານຮ່ວມກັບລາວໄດ້ອີກ. ຍົກຕົວຢ່າງ ຖ້າຜູ້ທີ່ຖືກຕັດສຳພັນຢູ່ເຮືອນ ລາວຈະບໍ່ເຂົ້າຮ່ວມເມື່ອຄອບຄົວສຶກສາພະຄຳພີນຳກັນ. ແນວໃດກໍຕາມ ຖ້າຜູ້ທີ່ຖືກຕັດສຳພັນເປັນຄົນທີ່ຍັງບໍ່ຮອດກະສຽນເປັນຜູ້ໃຫຍ່ ພໍ່ແມ່ຍັງມີຄວາມຮັບຜິດຊອບທີ່ຈະຝຶກອົບຮົມແລະຕີສອນລາວ. ດັ່ງນັ້ນ ພໍ່ແມ່ທີ່ມີຄວາມຮັກອາດຈັດໃຫ້ມີການສຶກສາພະຄຳພີກັບລູກຄົນນັ້ນ. *—ສຸພາສິດ 6:20-22; 29:17.
ໃນອີກກໍລະນີຫນຶ່ງ ຍາດພີ່ນ້ອງທີ່ຖືກຕັດສຳພັນອາດອາໄສຢູ່ບ່ອນອື່ນ. ເຖິງແມ່ນວ່າຈຳເປັນຕ້ອງຕິດຕໍ່ກັນເປັນບາງຄັ້ງຄາວເພື່ອເອົາໃຈໃສ່ໃນເລື່ອງທີ່ຈຳເປັນຂອງຄອບຄົວ ການຕິດຕໍ່ໃດໆກໍຕາມແບບນັ້ນຄວນໃຫ້ມີຫນ້ອຍທີ່ສຸດ. ສະມາຊິກຄອບຄົວຄລິດສະຕຽນທີ່ພັກດີບໍ່ຊອກຫາຂໍ້ອ້າງເພື່ອຕິດຕໍ່ກັບຍາດພີ່ນ້ອງທີ່ຖືກຕັດສຳພັນເຊິ່ງອາໄສຢູ່ບ່ອນອື່ນ. ແທນທີ່ຈະເຮັດແນວນັ້ນ ຄວາມພັກດີຕໍ່ພະເຢໂຫວາແລະອົງການຂອງພະອົງກະຕຸ້ນເຂົາເຈົ້າໃຫ້ສະຫນັບສະຫນູນການຈັດຕຽມຕາມຫລັກການໃນພະຄຳພີກ່ຽວກັບການຕັດສຳພັນ. ແນວທາງທີ່ເຂົາເຈົ້າພັກດີກໍເພື່ອປະໂຫຍດອັນດີທີ່ສຸດສຳລັບຜູ້ເຮັດຜິດ ແລະອາດຊ່ວຍຜູ້ເຮັດຜິດໃຫ້ໄດ້ປະໂຫຍດຈາກການຕີສອນທີ່ໄດ້ຮັບ. *—ເຫບເລີ 12:11.
^ ຂໍ້ 1 ຫລັກການໃນຄຳພີໄບເບິນກ່ຽວກັບຜູ້ທີ່ຖືກຕັດສຳພັນນຳມາໃຊ້ໄດ້ເຊັ່ນດຽວກັນກັບຄົນທີ່ຕັດຕົວເອງຈາກປະຊາຄົມ.
^ ຂໍ້ 2 ຂໍ້ມູນເພີ່ມເຕີມກ່ຽວກັບຄົນທີ່ຍັງບໍ່ຮອດກະສຽນເປັນຜູ້ໃຫຍ່ເຊິ່ງຖືກຕັດສຳພັນແຕ່ຍັງອາໄສຢູ່ເຮືອນນຳພໍ່ແມ່ ຂໍໃຫ້ເບິ່ງຫໍສັງເກດການ ສະບັບວັນທີ 1 ເດືອນຕຸລາ ປີ 2001 ຫນ້າ 16-17 ແລະສະບັບວັນທີ 15 ເດືອນພະຈິກ ປີ 1988 ຫນ້າ 23-24 (ພາສາໄທ).
^ ຂໍ້ 3 ຂໍ້ມູນເພີ່ມເຕີມກ່ຽວກັບວິທີປະຕິບັດກັບຍາດພີ່ນ້ອງທີ່ຖືກຕັດສຳພັນ ຂໍໃຫ້ເບິ່ງຄຳແນະນຳຕາມຫລັກການຂອງພະຄຳພີໃນຫໍສັງເກດການ ສະບັບວັນທີ 15 ເດືອນເມສາ ປີ 1988 ຫນ້າ 26-31 ແລະສະບັບວັນທີ 15 ເດືອນມັງກອນ ປີ 1982 ຫນ້າ 24-32 (ພາສາໄທ).
