ບົດທີ 8
ພະເຈົ້າຮັກຄົນທີ່ສະອາດ
“ພະອົງສຳແດງຕົວບໍລິສຸດ [“ສະອາດ,” ລ.ມ.] ແກ່ຄົນບໍລິສຸດ [ສະອາດ].”—ຄຳເພງ 18:26.
1-3. (ກ) ເປັນຫຍັງແມ່ຈຶ່ງໃສ່ໃຈໃຫ້ລູກຊາຍຂອງຕົນສະອາດແລະນຸ່ງເຄື່ອງທີ່ຮຽບຮ້ອຍ? (ຂ) ເປັນຫຍັງພະເຢໂຫວາຈຶ່ງຢາກໃຫ້ຜູ້ທີ່ນະມັດສະການພະອົງສະອາດ ແລະສິ່ງໃດກະຕຸ້ນເຮົາໃຫ້ຢາກຮັກສາຕົວໃຫ້ສະອາດ?
ແມ່ກຽມລູກຊາຍນ້ອຍເພື່ອຈະອອກໄປວຽກທາງນອກ. ແມ່ອາບນໍ້າໃຫ້ລູກຊາຍແລ້ວໃສ່ເຄື່ອງນຸ່ງທີ່ສະອາດຮຽບຮ້ອຍໃຫ້ລາວ. ແມ່ຮູ້ວ່າຄວາມສະອາດເປັນສິ່ງທີ່ສຳຄັນຫລາຍຕໍ່ສຸຂະພາບຂອງລູກ. ແມ່ຍັງສຳນຶກວ່າການແຕ່ງກາຍຂອງລູກອາດເຮັດໃຫ້ພໍ່ແມ່ໄດ້ຮັບຄຳຊົມເຊີຍຫລືຖືກຕຳຫນິ.
2 ພະເຢໂຫວາພໍ່ທີ່ຢູ່ໃນສະຫວັນຕ້ອງການໃຫ້ຜູ້ຮັບໃຊ້ຂອງພະອົງສະອາດ. ພະຄຳຂອງພະອົງກ່າວວ່າ “ພະອົງສຳແດງຕົວບໍລິສຸດ [“ສະອາດ,” ລ.ມ.] ແກ່ຄົນບໍລິສຸດ [ສະອາດ].” * (ຄຳເພງ 18:26) ພະເຢໂຫວາຮັກພວກເຮົາ ພະອົງຮູ້ວ່າການຮັກສາຕົວໃຫ້ສະອາດເປັນປະໂຫຍດຕໍ່ເຮົາຫລາຍທີ່ສຸດ. ພະອົງຍັງຄາດຫມາຍຈາກເຮົາໃນຖານະເປັນພະຍານຂອງພະອົງໃຫ້ສະທ້ອນເຖິງພະອົງໃນທາງທີ່ດີ. ທີ່ຈິງ ການແຕ່ງກາຍທີ່ສະອາດແລະການປະພຶດທີ່ດີຂອງເຮົາຈະນຳເອົາຄຳສັນລະເສີນ ບໍ່ແມ່ນຄຳຕຳຫນິມາສູ່ພະເຢໂຫວາແລະຊື່ທີ່ບໍລິສຸດຂອງພະອົງ.—ເອເຊກຽນ 36:22; 1 ເປໂຕ 2:12.
3 ການທີ່ຮູ້ວ່າພະເຈົ້າຮັກຄົນທີ່ສະອາດກະຕຸ້ນເຮົາຮັກສາຕົວໃຫ້ສະອາດ. ເຮົາຢາກໃຫ້ແນວທາງການດຳເນີນຊີວິດຂອງເຮົານຳກຽດຕິຍົດມາສູ່ພະອົງ ເພາະເຮົາຮັກພະອົງ. ນອກຈາກນັ້ນ ເຮົາຕ້ອງການຢັ້ງຢືນຢູ່ໃນຄວາມຮັກຂອງພະອົງຕໍ່ໆໄປ. ດັ່ງນັ້ນ ຂໍໃຫ້ເຮົາພິຈາລະນາເຫດຜົນທີ່ເຮົາຕ້ອງຮັກສາຕົວໃຫ້ສະອາດ ຄວາມຫມາຍຂອງການເປັນຄົນສະອາດ ແລະວິທີຮັກສາຕົວໃຫ້ສະອາດ. ການພິຈາລະນາເຊັ່ນນັ້ນຈະຊ່ວຍເຮົາໃຫ້ເຫັນຈຸດທີ່ຄວນປັບປຸງ.
ເປັນຫຍັງເຮົາຕ້ອງຮັກສາຕົວໃຫ້ສະອາດ?
4, 5. (ກ) ອັນໃດຄືເຫດຜົນຫລັກທີ່ເຮົາຕ້ອງຮັກສາຕົວໃຫ້ສະອາດ? (ຂ) ຄວາມສະອາດຂອງພະເຢໂຫວາປາກົດໃຫ້ເຫັນແນວໃດໃນສິ່ງເນລະມິດສ້າງຂອງພະອົງທີ່ເຫັນໄດ້?
4 ວິທີຫນຶ່ງທີ່ພະເຢໂຫວາຊີ້ນຳເຮົາຄືໂດຍການວາງຕົວຢ່າງ. ດັ່ງນັ້ນ ພະຄຳຂອງພະອົງຈຶ່ງກະຕຸ້ນເຮົາໃຫ້ “ເປັນຜູ້ກະທຳຕາມແບບຢ່າງພະເຈົ້າ.” (ເອເຟດ 5:1) ເຫດຜົນຫລັກທີ່ເຮົາຕ້ອງຮັກສາຕົວໃຫ້ສະອາດແມ່ນຍ້ອນວ່າພະເຢໂຫວາພະເຈົ້າທີ່ເຮົານະມັດສະການເປັນຜູ້ທີ່ສະອາດ ຜ່ອງໃສ ແລະບໍລິສຸດໃນທຸກດ້ານ.—ພວກເລວີ 11:44, 45.
5 ເຊັ່ນດຽວກັນກັບຄຸນລັກສະນະແລະແນວທາງຫລາຍຢ່າງຂອງພະເຢໂຫວາ ຄວາມສະອາດກໍປາກົດໃຫ້ເຫັນໃນສິ່ງເນລະມິດສ້າງຂອງພະອົງທີ່ສາມາດເຫັນໄດ້. (ໂລມ 1:20) ຫນ່ວຍໂລກຖືກອອກແບບມາເພື່ອເປັນບ້ານທີ່ສະອາດສຳລັບມະນຸດ. ພະເຢໂຫວາໄດ້ຕັ້ງລະບົບການຫມູນວຽນທາງທຳມະຊາດທີ່ເຮັດໃຫ້ອາກາດແລະນໍ້າສະອາດ. ຈຸລະຊີບບາງຊະນິດເຮັດຫນ້າທີ່ເປັນຄືກັບພະແນກອະນາໄມໂດຍປ່ຽນສິ່ງເສດເຫລືອໃຫ້ກາຍເປັນຜະລິດຕະພັນທີ່ບໍ່ກໍ່ຄວາມເສຍຫາຍ. ນັກວິທະຍາສາດໄດ້ໃຊ້ຈຸລະຊີບທີ່ຫິວເຫລົ່ານີ້ບາງຊະນິດໃຫ້ເປັນປະໂຫຍດເພື່ອກຳຈັດນໍ້າມັນທີ່ຮົ່ວໄຫລລົງທະເລແລະມົນລະພິດອື່ນໆທີ່ເກີດຈາກຄວາມເຫັນແກ່ຕົວແລະຄວາມໂລບຂອງມະນຸດ. ເຫັນໄດ້ແຈ້ງວ່າຄວາມສະອາດເປັນສິ່ງສຳຄັນຕໍ່ ‘ຜູ້ສ້າງແຜ່ນດິນໂລກ.’ (ເຢເຣມີ 10:12) ຄວາມສະອາດກໍຄວນເປັນເລື່ອງສຳຄັນຕໍ່ເຮົາເຊັ່ນກັນ.
6, 7. ພະບັນຍັດຂອງໂມເຊເນັ້ນແນວໃດວ່າຜູ້ນະມັດສະການພະເຢໂຫວາຕ້ອງເປັນຄົນສະອາດ?
6 ອີກເຫດຜົນຫນຶ່ງທີ່ເຮົາຕ້ອງຮັກສາຕົວໃຫ້ສະອາດແມ່ນຍ້ອນວ່າພະເຢໂຫວາຜູ້ປົກຄອງອົງສູງສຸດຮຽກຮ້ອງໃຫ້ຜູ້ນະມັດສະການພະອົງເປັນຄົນສະອາດ. ພາຍໃຕ້ພະບັນຍັດທີ່ພະເຢໂຫວາມອບໃຫ້ຊາດອິດສະລາແອນ ຄວາມສະອາດແລະການນະມັດສະການພົວພັນກັນຢ່າງໃກ້ຊິດ. ພະບັນຍັດກຳນົດວ່າໃນວັນໄຖ່ໂທດ ປະໂລຫິດໃຫຍ່ຕ້ອງອາບນໍ້າບໍ່ແມ່ນເທື່ອດຽວແຕ່ສອງເທື່ອ. (ພວກເລວີ 16:4, 23, 24) ປະໂລຫິດທີ່ປະຕິບັດຫນ້າທີ່ຕ້ອງລ້າງມືແລະຕີນກ່ອນຖວາຍເຄື່ອງບູຊາໃຫ້ພະເຢໂຫວາ. (ອົບພະຍົບ 30:17-21; 2 ຂ່າວຄາວ 4:6) ພະບັນຍັດກຳນົດສາເຫດ 70 ຢ່າງທີ່ເຮັດໃຫ້ບໍ່ສະອາດທາງຮ່າງກາຍແລະພິທີກຳ. ຂະນະທີ່ຢູ່ໃນສະພາບບໍ່ສະອາດ ຊາວອິດສະລາແອນບໍ່ສາມາດມີສ່ວນຮ່ວມໃດໆໃນການນະມັດສະການ ຖ້າຝ່າຝືນອາດມີໂທດເຖິງຕາຍ. (ພວກເລວີ 15:31) ໃຜທີ່ບໍ່ຍອມເຮັດຕາມຂັ້ນຕອນການຊຳຮະລ້າງຕາມທີ່ກຳນົດໄວ້ ລວມທັງການອາບນໍ້າແລະຊັກເຄື່ອງນຸ່ງຕ້ອງຖືກ “ຕັດເສຍຈາກພວກຊຸມນຸມ.”—ຈົດເຊັນບັນຊີ 19:17-20.
7 ເຖິງວ່າເຮົາບໍ່ໄດ້ຢູ່ພາຍໃຕ້ພະບັນຍັດຂອງໂມເຊ ແຕ່ພະບັນຍັດຊ່ວຍເຮົາໃຫ້ເຂົ້າໃຈຄວາມຄິດຂອງພະເຈົ້າໃນເລື່ອງຕ່າງໆ. ເຫັນໄດ້ແຈ້ງ ພະບັນຍັດເນັ້ນວ່າຜູ້ນະມັດສະການພະເຈົ້າຕ້ອງເປັນຄົນສະອາດ. ພະເຢໂຫວາບໍ່ເຄີຍປ່ຽນແປງ. (ມາລາກີ 3:6) ພະອົງຈະບໍ່ຍອມຮັບການນະມັດສະການຂອງເຮົານອກຈາກວ່າການນະມັດສະການນັ້ນ “ບໍລິສຸດ ແລະປາສະຈາກຖ່ອຍຮ້າຍ.” (ຢາໂກໂບ 1:27) ດັ່ງນັ້ນ ເຮົາຈຳເປັນຕ້ອງຮູ້ໃນສິ່ງທີ່ພະອົງຄາດຫມາຍຈາກເຮົາໃນເລື່ອງນີ້.
ສິ່ງທີ່ກ່ຽວຂ້ອງໃນການເປັນຄົນສະອາດໃນທັດສະນະຂອງພະເຈົ້າ
8. ພະເຢໂຫວາຄາດຫມາຍໃຫ້ເຮົາຮັກສາຕົວໃຫ້ສະອາດໃນແງ່ມຸມໃດແດ່?
8 ໃນຄຳພີໄບເບິນ ແນວຄິດເລື່ອງການເປັນຄົນສະອາດບໍ່ໄດ້ຫມາຍເຖິງພຽງແຕ່ສະອາດທາງຮ່າງກາຍ. ການເປັນຄົນສະອາດໃນທັດສະນະຂອງພະເຈົ້າກ່ຽວຂ້ອງກັບທຸກແງ່ມຸມຂອງຊີວິດເຮົາ. ພະເຢໂຫວາຄາດຫມາຍໃຫ້ເຮົາຮັກສາຕົວໃຫ້ສະອາດໃນສີ່ຂອບເຂດຫລັກຄື ການນະມັດສະການ ສິນລະທຳ ຄວາມຄຶດ ແລະຮ່າງກາຍ. ຂໍໃຫ້ເຮົາພິຈາລະນາວ່າສິ່ງເຫລົ່ານີ້ກ່ຽວຂ້ອງກັບຫຍັງ.
9, 10. ການຮັກສາຄວາມສະອາດດ້ານການນະມັດສະການຫມາຍຄວາມວ່າແນວໃດ ແລະຄລິດສະຕຽນແທ້ຫລີກລ່ຽງສິ່ງໃດ?
9 ຄວາມສະອາດດ້ານການນະມັດສະການ. ອະທິບາຍໄດ້ງ່າຍໆ ການຮັກສາຄວາມສະອາດດ້ານການນະມັດສະການຫມາຍເຖິງການບໍ່ເອົາການນະມັດສະການແທ້ປົນກັບການນະມັດສະການປອມ. ເມື່ອຊາວອິດສະລາແອນອອກຈາກປະເທດບາບີໂລນເພື່ອກັບຄືນໄປເມືອງເຢຣຶຊາເລມ ເຂົາເຈົ້າຕ້ອງໃສ່ໃຈຟັງຄຳເຕືອນທີ່ຂຽນຂຶ້ນໂດຍການດົນໃຈທີ່ວ່າ “ຈົ່ງອອກໄປຈາກທີ່ນັ້ນ ຢ່າຊູ່ບາຍສິ່ງຂອງອັນຖ່ອຍຮ້າຍ . . . ຈົ່ງເປັນຄົນບໍລິສຸດ [“ສະອາດ,” ລ.ມ.] ເຖີ້ນ.” (ເອຊາອີ 52:11) ເຫດຜົນຕົ້ນຕໍທີ່ຊາວອິດສະລາແອນກັບເມືອບ້ານເກີດແມ່ນເພື່ອຟື້ນຟູການນະມັດສະການພະເຢໂຫວາ. ການນະມັດສະການນີ້ຕ້ອງສະອາດ ບໍ່ເປິເປື້ອນດ້ວຍຄຳສອນ ກິດປະຕິບັດ ແລະປະເພນີແບບສາສະໜາບາບີໂລນເຊິ່ງທຳລາຍກຽດພະເຈົ້າ.
10 ທຸກມື້ນີ້ ເຮົາໃນຖານະຄລິດສະຕຽນແທ້ຕ້ອງລະວັງທີ່ຈະບໍ່ເປິເປື້ອນດ້ວຍການນະມັດສະການປອມ. (1 ໂກລິນໂທ 10:21) ຈຳເປັນຕ້ອງລະວັງໃນເລື່ອງນີ້ ເພາະອິດທິພົນຂອງສາສະໜາປອມຢູ່ອ້ອມຮອບຕົວເຮົາ. ໃນຫລາຍດິນແດນ ປະເພນີ ກິດຈະກຳ ແລະພິທີກຳຕ່າງໆກ່ຽວຂ້ອງກັບຄຳສອນຂອງສາສະໜາປອມເຊັ່ນ ຄວາມຄິດທີ່ວ່າມີບາງສິ່ງທີ່ຢູ່ພາຍໃນຕົວເຮົາຍັງຢູ່ຕໍ່ໄປເມື່ອເຮົາຕາຍ. (ຜູ້ເທສະໜາປ່າວປະກາດ 9:5, 6, 10) ຄລິດສະຕຽນແທ້ຫລີກລ່ຽງປະເພນີຕ່າງໆທີ່ກ່ຽວຂ້ອງກັບຄວາມເຊື່ອຂອງສາສະໜາປອມ. * ເຮົາຈະບໍ່ຍອມໃຫ້ຄວາມກົດດັນຈາກຄົນອື່ນເປັນສາເຫດເຮັດໃຫ້ເຮົາຍອມອ່ອນຂໍ້ຕໍ່ມາດຕະຖານຂອງຄຳພີໄບເບິນໃນເລື່ອງການນະມັດສະການທີ່ສະອາດ.—ກິດຈະການ 5:29.
11. ຄວາມສະອາດດ້ານສິນລະທຳກ່ຽວຂ້ອງກັບຫຍັງແດ່ ແລະເປັນຫຍັງຈຶ່ງສຳຄັນທີ່ເຮົາຈະຮັກສາຕົວໃຫ້ສະອາດໃນດ້ານນີ້?
11 ຄວາມສະອາດດ້ານສິນລະທຳ. ການຮັກສາຄວາມສະອາດດ້ານສິນລະທຳຫມາຍລວມເຖິງການຫລີກລ່ຽງການເຮັດຜິດສິນລະທຳທາງເພດທຸກຮູບແບບ. (ເອເຟດ 5:5) ເປັນເລື່ອງສຳຄັນທີ່ເຮົາຕ້ອງຮັກສາຄວາມສະອາດດ້ານສິນລະທຳ. ດັ່ງທີ່ຈະໄດ້ເຫັນໃນບົດຕໍ່ໄປຂອງປຶ້ມນີ້ ເພື່ອຈະຮັກສາຕົວໃຫ້ຢູ່ໃນຄວາມຮັກຂອງພະເຈົ້າ ເຮົາຕ້ອງ “ປົບຫນີຈາກການຜິດຊາຍຍິງ [“ຜິດປະເວນີ,” ລ.ມ.].” ຄົນເຮັດຜິດປະເວນີທີ່ບໍ່ກັບໃຈ “ຈະບໍ່ຮັບແຜ່ນດິນຂອງພະເຈົ້າເປັນມູນ.” (1 ໂກລິນໂທ 6:9, 10, 18) ໃນທັດສະນະຂອງພະເຈົ້າ ຄົນເຊັ່ນນັ້ນຢູ່ໃນທ່າມກາງຄົນທີ່ “ກະທຳການຫນ້າກຽດຫນ້າຊັງ.” ຖ້າເຂົາເຈົ້າບໍ່ຊຳຮະຕົວໃຫ້ສະອາດດ້ານສິນລະທຳ “ສ່ວນມູນຂອງເຂົາ . . . ເປັນຄວາມຕາຍທີ 2.”—ຄຳປາກົດ 21:8.
12, 13. ຄວາມຄຶດແລະການກະທຳກ່ຽວຂ້ອງກັນແນວໃດ ແລະເຮົາຈະຮັກສາຄວາມຄຶດໃຫ້ສະອາດໄດ້ແນວໃດ?
12 ຄວາມສະອາດດ້ານຄວາມຄຶດ. ຄວາມຄຶດນຳໄປສູ່ການກະທຳ. ຖ້າເຮົາປ່ອຍໃຫ້ຄວາມຄຶດຜິດໆຝັງຮາກເລິກໃນຈິດໃຈແລະຫົວໃຈຂອງເຮົາ ບໍ່ຊ້າກໍໄວເຮົາຄົງຈະເຮັດສິ່ງທີ່ບໍ່ສະອາດ. (ມັດທາຍ 5:28, 15:18-20) ແຕ່ຖ້າເຮົາໃຫ້ຈິດໃຈເຕັມໄປດ້ວຍສິ່ງທີ່ປອດໃສ ຄວາມຄຶດທີ່ສະອາດ ເຮົາຈະໄດ້ຮັບແຮງກະຕຸ້ນໃຫ້ຮັກສາການປະພຶດທີ່ສະອາດ. (ຟີລິບ 4:8) ເຮົາຈະຮັກສາຄວາມຄຶດໃຫ້ສະອາດໄດ້ແນວໃດ? ປັດໄຈຫນຶ່ງທີ່ຄວນຄິດເຖິງກໍຄື ເຮົາຕ້ອງຫລີກລ່ຽງຄວາມບັນເທີງຮູບແບບໃດໆກໍຕາມທີ່ຈະເຮັດໃຫ້ຄວາມຄຶດຂອງເຮົາເປິເປື້ອນ. * ນອກຈາກນີ້ ເຮົາສາມາດເຮັດໃຫ້ຈິດໃຈເຕັມໄປດ້ວຍຄວາມຄຶດທີ່ສະອາດໂດຍການສຶກສາພະຄຳຂອງພະເຈົ້າເປັນປະຈຳ.—ຄຳເພງ 19:8, 9.
13 ເພື່ອຮັກສາຕົວໃຫ້ຢູ່ໃນຄວາມຮັກຂອງພະເຈົ້າ ເປັນເລື່ອງສຳຄັນທີ່ເຮົາຈະຮັກສາຕົວໃຫ້ສະອາດດ້ານການນະມັດສະການ ສິນລະທຳ ແລະຄວາມຄຶດ. ຈະມີການພິຈາລະນາຢ່າງລະອຽດກ່ຽວກັບແງ່ມຸມເຫລົ່ານີ້ໃນບົດຕໍ່ໆໄປຂອງປຶ້ມນີ້. ຕອນນີ້ຂໍໃຫ້ພິຈາລະນາແງ່ມຸມທີສີ່ ນັ້ນຄືຄວາມສະອາດດ້ານຮ່າງກາຍ.
ເຮົາຈະຮັກສາຮ່າງກາຍໃຫ້ສະອາດໄດ້ແນວໃດ?
14. ເປັນຫຍັງຄວາມສະອາດດ້ານຮ່າງກາຍຈຶ່ງບໍ່ເປັນພຽງເລື່ອງສ່ວນຕົວ?
14 ຄວາມສະອາດດ້ານຮ່າງກາຍກ່ຽວຂ້ອງກັບການຮັກສາຮ່າງກາຍແລະສິ່ງທີ່ຢູ່ອ້ອມແອ້ມຕົວເຮົາໃຫ້ສະອາດ. ຄວາມສະອາດເຊັ່ນນັ້ນເປັນເລື່ອງສ່ວນຕົວທີ່ຄົນອື່ນບໍ່ຄວນຈະກ່ຽວຂ້ອງບໍ? ມັນບໍ່ເປັນເຊັ່ນນັ້ນສຳລັບຜູ້ນະມັດສະການພະເຢໂຫວາ. ດັ່ງທີ່ກ່າວໄປແລ້ວ ພະເຢໂຫວາຖືວ່າຄວາມສະອາດດ້ານຮ່າງກາຍຂອງເຮົາເປັນເລື່ອງສຳຄັນ ບໍ່ແມ່ນຍ້ອນວ່າຄວາມສະອາດເປັນປະໂຫຍດທີ່ສຸດສຳລັບເຮົາ ແຕ່ຍ້ອນວ່າຄວາມສະອາດເປັນການສະທ້ອນເຖິງພະອົງ. ຂໍໃຫ້ຄຶດເຖິງຕົວຢ່າງທີ່ກ່າວໄປແລ້ວ. ເມື່ອເຫັນເດັກນ້ອຍຜູ້ຫນຶ່ງທີ່ເປິເປື້ອນຫລືນຸ່ງເຄື່ອງບໍ່ຮຽບຮ້ອຍຕະຫລອດ ເຈົ້າຄົງສົງໄສແມ່ນບໍວ່າພໍ່ແມ່ຂອງເດັກນ້ອຍນັ້ນເປັນຄົນແບບໃດ? ເຮົາຄົງບໍ່ຢາກໃຫ້ສິ່ງໃດໆໃນການແຕ່ງກາຍຫລືແນວທາງການດຳເນີນຊີວິດຂອງເຮົານຳເອົາຄຳຕຳຫນິມາສູ່ພໍ່ຂອງເຮົາທີ່ຢູ່ໃນສະຫວັນ ຫລືຫລຸດຄຸນຄ່າຂ່າວສານທີ່ເຮົາປະກາດ. ພະຄຳຂອງພະເຈົ້າກ່າວວ່າ “ພວກເຮົາບໍ່ໃຫ້ເຂົາມີເຫດສິ່ງຫນຶ່ງສິ່ງໃດເປັນທີ່ໃຫ້ຊູນສະດຸດໃຈໄດ້ ເພື່ອບໍ່ໃຫ້ການບົວລະບັດນັ້ນເປັນທີ່ຕິຕຽນໄດ້ ແຕ່ວ່າໃນສັບພະທຸກສິ່ງພວກເຮົາໄດ້ຍົກຍໍເຮົາເອງເຫມືອນເປັນຂ້າໃຊ້ຂອງພະເຈົ້າ.” (2 ໂກລິນໂທ 6:3, 4) ດັ່ງນັ້ນ ເຮົາຈະຮັກສາຄວາມສະອາດດ້ານຮ່າງກາຍໂດຍວິທີໃດ?
15, 16. ການມີສຸຂະອະນາໄມທີ່ດີຈົນເປັນນິດໄສລວມເຖິງຫຍັງແດ່ ແລະເຄື່ອງນຸ່ງຂອງເຮົາຄວນຢູ່ໃນສະພາບແບບໃດ?
15 ສຸຂະອະນາໄມສ່ວນຕົວແລະການແຕ່ງກາຍຂອງເຮົາ. ເຖິງວ່າວັດທະນະທຳແລະສະພາບຄວາມເປັນຢູ່ຈະແຕກຕ່າງກັນໃນແຕ່ລະປະເທດ ໂດຍທົ່ວໄປເຮົາສາມາດຊອກສະບູແລະນໍ້າພຽງພໍທີ່ຈະອາບເປັນປະຈຳແລະເຮັດໃຫ້ຕົວເຮົາແລະລູກສະອາດ. ການມີສຸຂະອະນາໄມທີ່ດີຈົນເປັນນິດໄສລວມເຖິງການລ້າງມືດ້ວຍສະບູແລະນໍ້າກ່ອນກິນອາຫານຫລືຈັບບາຍອາຫານ ພາຍຫລັງທີ່ໃຊ້ຫ້ອງນໍ້າ ແລະຫລັງຈາກລ້າງກົ້ນຫລືປ່ຽນຜ້າອ້ອມແອນ້ອຍ. ການລ້າງມືດ້ວຍສະບູແລະນໍ້າສາມາດປ້ອງກັນໂລກພະຍາດແລະຮັກສາຊີວິດໄດ້ຢ່າງແທ້ຈິງ. ການລ້າງມືສາມາດປ້ອງກັນການແພ່ລະບາດຂອງເຊື້ອວິລຸດແລະເຊື້ອຈຸລິນຊີ ດັ່ງນັ້ນຈຶ່ງຊ່ວຍປ້ອງກັນພະຍາດຖອກທ້ອງ. ໃນປະເທດທີ່ຕາມທຳມະດາແລ້ວເຮືອນຊານບໍ່ມີການຕໍ່ລະບົບກຳຈັດສິ່ງຂັບຖ່າຍ ບາງທີສາມາດກຳຈັດດ້ວຍການຝັງ ຄືກັບທີ່ເຮັດໃນອິດສະລາແອນບູຮານ.—ພະບັນຍັດ 23:12, 13.
16 ເຄື່ອງນຸ່ງຂອງເຮົາກໍເຊັ່ນກັນຕ້ອງຊັກໃຫ້ສະອາດແລະຮຽບຮ້ອຍຢູ່ສະເຫມີ. ເຄື່ອງນຸ່ງຂອງຄລິດສະຕຽນບໍ່ຈຳເປັນຕ້ອງລາຄາແພງຫລືກຳລັງເປັນທີ່ນິຍົມ ແຕ່ຄວນສະອາດ ຮຽບຮ້ອຍ ແລະສຸພາບ. (1 ຕີໂມເຕ 2:9, 10) ບໍ່ວ່າຈະຢູ່ໃສກໍຕາມ ເຮົາຢາກໃຫ້ການແຕ່ງກາຍຂອງເຮົາ “ປະດັບຄຳສັ່ງສອນຂອງພະເຈົ້າ ຜູ້ເປັນຜູ້ຊ່ອຍເຮົາທັງຫລາຍ.”—ຕິໂຕ 2:10.
17. ເປັນຫຍັງເຮືອນຊານແລະສິ່ງທີ່ຢູ່ອ້ອມແອ້ມຕົວເຮົາຈຶ່ງຄວນສະອາດແລະຮຽບຮ້ອຍ?
17 ເຮືອນຊານແລະສິ່ງທີ່ຢູ່ອ້ອມແອ້ມຕົວເຮົາ. ເຮືອນຊານຂອງເຮົາອາດບໍ່ໃຫຍ່ຫລູຫລາ ແຕ່ຄວນສະອາດແລະຮຽບຮ້ອຍຕາມທີ່ສະພາບການອຳນວຍໃຫ້. ເຊັ່ນດຽວກັນ ຖ້າເຮົາໃຊ້ລົດເພື່ອເດີນທາງໄປຫໍປະຊຸມແລະໃນວຽກຮັບໃຊ້ ເຮົາກໍພະຍາຍາມສຸດຄວາມສາມາດທີ່ຈະຮັກສາໃຫ້ມັນສະອາດພໍສົມຄວນທັງທາງໃນແລະທາງນອກ. ຂໍໃຫ້ຈື່ວ່າເຮືອນຊານແລະສິ່ງທີ່ຢູ່ອ້ອມແອ້ມຕົວເຮົາເຊິ່ງສະອາດເປັນພະຍານທີ່ດີກ່ຽວກັບພະເຈົ້າທີ່ເຮົານະມັດສະການ. ທີ່ຈິງ ເຮົາສອນຜູ້ຄົນວ່າພະເຢໂຫວາເປັນພະເຈົ້າທີ່ສະອາດ ເຊິ່ງຈະ “ທຳລາຍພວກທີ່ໄດ້ທຳລາຍແຜ່ນດິນໂລກ” ແລະອີກບໍ່ດົນລາຊະອານາຈັກຂອງພະອົງຈະປ່ຽນແຜ່ນດິນໂລກໃຫ້ເປັນອຸທິຍານ. (ຄຳປາກົດ 11:18, ທ.ປ.; ລືກາ 23:43) ແນ່ນອນ ເຮົາຢາກໃຫ້ເຮືອນຊານແລະເຄື່ອງຂອງຂອງເຮົາສະແດງໃຫ້ເຫັນວ່າແມ່ນແຕ່ໃນຕອນນີ້ເຮົາກໍກຳລັງປູກຝັງນິດໄສທີ່ມັກສະອາດເຊິ່ງຈະເຫມາະກັບໂລກໃຫມ່ທີ່ພວມໃກ້ເຂົ້າມາ.
ຄວາມສະອາດດ້ານຮ່າງກາຍກ່ຽວຂ້ອງກັບການຮັກສາຮ່າງກາຍແລະສິ່ງທີ່ຢູ່ອ້ອມແອ້ມຕົວເຮົາໃຫ້ສະອາດ
18. ເຮົາຈະສະແດງຄວາມນັບຖືຕໍ່ຫໍປະຊຸມລາຊະອານາຈັກໄດ້ໂດຍວິທີໃດ?
18 ສະຖານທີ່ນະມັດສະການຂອງເຮົາ. ຄວາມຮັກທີ່ມີຕໍ່ພະເຢໂຫວາກະຕຸ້ນເຮົາໃຫ້ສະແດງຄວາມນັບຖືຕໍ່ຫໍປະຊຸມລາຊະອານາຈັກ ເຊິ່ງເປັນສູນກາງຂອງການນະມັດສະການແທ້ໃນທ້ອງຖິ່ນ. ເມື່ອມີຄົນໃຫມ່ມາຫໍປະຊຸມ ເຮົາຢາກໃຫ້ເຂົາເຈົ້າມີຄວາມປະທັບໃຈໃນທາງທີ່ດີຕໍ່ສະຖານທີ່ນະມັດສະການຂອງເຮົາ. ຈຳເປັນຕ້ອງມີການອະນາໄມແລະເບິ່ງແຍງຮັກສາເປັນປະຈຳເພື່ອໃຫ້ຫໍປະຊຸມເປັນສະຖານທີ່ທີ່ຫນ້າດຶງດູດໃຈຢູ່ສະເຫມີ. ເຮົາສະແດງຄວາມນັບຖືຕໍ່ຫໍປະຊຸມລາຊະອານາຈັກໂດຍເຮັດໃນສິ່ງທີ່ເຮົາເຮັດໄດ້ເພື່ອຮັກສາຫໍປະຊຸມໃຫ້ຢູ່ໃນສະພາບທີ່ດີ. ຖືເປັນສິດທິພິເສດທີ່ຈະສະລະເວລາເພື່ອຊ່ວຍອະນາໄມແລະ “ສ້ອມແຊມ” ສະຖານທີ່ນະມັດສະການຂອງເຮົາ. (2 ຂ່າວຄາວ 34:10) ມີການໃຊ້ຫລັກການດຽວກັນນີ້ເມື່ອເຮົາປະຊຸມກັນຢູ່ຫ້ອງປະຊຸມໃຫຍ່ຫລືສະຖານທີ່ສຳລັບການປະຊຸມພາກແລະການປະຊຸມຫມວດ.
ຊຳຮະຕົວໃຫ້ພົ້ນຈາກນິດໄສແລະກິດປະຕິບັດທີ່ເປິເປື້ອນ
19. ເພື່ອຈະຮັກສາຮ່າງກາຍໃຫ້ສະອາດ ເຮົາຕ້ອງຫລີກລ່ຽງສິ່ງໃດແດ່ ແລະຄຳພີໄບເບິນຊ່ວຍເຮົາແນວໃດໃນເລື່ອງນີ້?
19 ເພື່ອຈະຮັກສາຮ່າງກາຍໃຫ້ສະອາດ ເຮົາຕ້ອງຫລີກລ່ຽງນິດໄສແລະກິດປະຕິບັດທີ່ເປິເປື້ອນເຊັ່ນ ການສູບຢາ ການດື່ມເຄື່ອງດື່ມປະເພດເຫລົ້າເກີນກຳນົດ ແລະການໃຊ້ສານເສບຕິດຫລືສານທີ່ອອກລິດຕໍ່ຈິດປະສາດທີ່ບໍ່ກ່ຽວຂ້ອງກັບການຮັກສາທາງການແພດ. ຄຳພີໄບເບິນບໍ່ໄດ້ລະບຸລາຍການນິດໄສແລະກິດປະຕິບັດທີ່ບໍ່ສະອາດແລະຫນ້າລັງກຽດທຸກຢ່າງທີ່ມີແຜ່ຫລາຍໃນທຸກມື້ນີ້ ແຕ່ຄຳພີໄບເບິນມີຫລັກການຕ່າງໆທີ່ສາມາດຊ່ວຍເຮົາໃຫ້ເບິ່ງເຫັນວິທີທີ່ພະເຢໂຫວາຮູ້ສຶກຕໍ່ສິ່ງດັ່ງກ່າວນີ້. ເນື່ອງຈາກເຮົາຮູ້ທັດສະນະຂອງພະເຢໂຫວາຕໍ່ເລື່ອງຕ່າງໆ ຄວາມຮັກທີ່ເຮົາມີຕໍ່ພະອົງກະຕຸ້ນເຮົາໃຫ້ປະຕິບັດໃນແບບທີ່ພະອົງພໍໃຈ. ຂໍໃຫ້ພິຈາລະນາຫລັກການຫ້າຂໍ້ໃນພະຄຳພີ.
20, 21. ພະເຢໂຫວາຕ້ອງການໃຫ້ເຮົາພົ້ນຈາກກິດປະຕິບັດແບບໃດ ແລະເຮົາມີເຫດຜົນຫນັກແຫນ້ນອັນໃດທີ່ຈະເຮັດຕາມ?
20 “ພວກພີ່ນ້ອງຜູ້ເປັນທີ່ຮັກເອີຍ ເພາະເຫດພວກເຮົາມີຄຳປະຕິຍານ [“ຄຳສັນຍາ,” ລ.ມ.] ທັງຫລາຍນີ້ແລ້ວ ເຮົາທັງຫລາຍຕ້ອງຊຳຮະຕົວໃຫ້ປາສະຈາກການຖ່ອຍຮ້າຍແຫ່ງເນື້ອຫນັງແລະຈິດວິນຍານ [“ຈິດໃຈ,” ລ.ມ.] ທຸກຢ່າງ ແລະກະທຳຄວາມບໍລິສຸດໃຫ້ສຳເລັດໃນຄວາມຢ້ານຢຳພະເຈົ້າ.” (2 ໂກລິນໂທ 7:1) ພະເຢໂຫວາຢາກໃຫ້ເຮົາພົ້ນຈາກກິດປະຕິບັດຕ່າງໆທີ່ເຮັດໃຫ້ຮ່າງກາຍຂອງເຮົາເປິເປື້ອນແລະສ້າງຄວາມເສຍຫາຍຕໍ່ຈິດໃຈ ຫລືທ່າອ່ຽງທີ່ຄວບຄຸມດ້ານຄວາມຄຶດ. ດັ່ງນັ້ນ ເຮົາຕ້ອງຫລີກລ່ຽງການຕິດພຶດຕິກຳເຊິ່ງເປັນທີ່ຮູ້ຈັກກັນວ່າກໍ່ຄວາມເສຍຫາຍຕໍ່ສຸຂະພາບທາງຮ່າງກາຍແລະທາງຈິດໃຈ.
21 ຄຳພີໄບເບິນໃຫ້ເຫດຜົນທີ່ຫນັກແຫນ້ນເພື່ອເຮົາຈະ ‘ປາສະຈາກການຖ່ອຍຮ້າຍທຸກຢ່າງ.’ ຂໍໃຫ້ສັງເກດ 2 ໂກລິນໂທ 7:1 ເລີ່ມຕົ້ນໂດຍກ່າວວ່າ “ເພາະເຫດພວກເຮົາມີຄຳປະຕິຍານ [“ຄຳສັນຍາ,” ລ.ມ.] ທັງຫລາຍນີ້.” ຄຳສັນຍາຫຍັງ? ດັ່ງທີ່ກ່າວໄວ້ໃນຂໍ້ກ່ອນຫນ້ານັ້ນ ພະເຢໂຫວາສັນຍາວ່າ “ເຮົາຈະຮັບທ່ານທັງຫລາຍໄວ້. ແລະເຮົາຈະເປັນພະບິດາຂອງທ່ານທັງຫລາຍ.” (2 ໂກລິນໂທ 6:17, 18) ຄິດເບິ່ງ ພະເຢໂຫວາສັນຍາວ່າຈະໃຫ້ເຈົ້າຢູ່ພາຍໃຕ້ການປົກປ້ອງດູແລຂອງພະອົງແລະຮັກເຈົ້າຄືກັບທີ່ພໍ່ຮັກລູກສາວຫລືລູກຊາຍ. ແຕ່ພະເຢໂຫວາຈະເຮັດໃຫ້ຄຳສັນຍາເຫລົ່ານີ້ເປັນຈິງກໍຕໍ່ເມື່ອເຈົ້າຫລີກຫນີຈາກການເຮັດໃຫ້ “ເນື້ອຫນັງແລະຈິດໃຈ” ເປິເປື້ອນ. ດັ່ງນັ້ນ ຖືວ່າເປັນເລື່ອງໂງ່ແທ້ໆທີ່ຈະປ່ອຍໃຫ້ນິດໄສຫລືກິດປະຕິບັດທີ່ຫນ້າລັງກຽດເຮັດໃຫ້ເຈົ້າສູນເສຍສາຍສຳພັນອັນລໍ້າຄ່າແລະຄວາມໃກ້ຊິດກັບພະເຢໂຫວາ!
22-25. ຫລັກການໃນພະຄຳພີຂໍ້ໃດທີ່ສາມາດຊ່ວຍເຮົາໃຫ້ຫລີກລ່ຽງນິດໄສແລະກິດປະຕິບັດທີ່ບໍ່ສະອາດ?
22 “ເຈົ້າຈົ່ງຮັກພະເຢໂຫວາຜູ້ເປັນພະເຈົ້າຂອງເຈົ້າ ເຈົ້າຈົ່ງຮັກດ້ວຍສຸດໃຈແລະດ້ວຍສຸດຈິດແລະດ້ວຍສຸດຄວາມຄຶດຂອງເຈົ້າ.” (ມັດທາຍ 22:37) ພະເຍຊູເລືອກຄຳສັ່ງນີ້ເປັນຂໍ້ສຳຄັນທີ່ສຸດໃນບັນດາຄຳສັ່ງທັງປວງ. (ມັດທາຍ 22:38) ພະເຢໂຫວາສົມຄວນໄດ້ຮັບຄວາມຮັກເຊັ່ນນັ້ນຈາກເຮົາ. ເພື່ອທີ່ຈະຮັກພະອົງດ້ວຍສຸດໃຈ ສຸດຈິດ ແລະສຸດຄວາມຄຶດ ເຮົາຕ້ອງຫລີກລ່ຽງກິດປະຕິບັດທີ່ອາດເຮັດໃຫ້ຊີວິດຂອງເຮົາສັ້ນລົງຫລືເຮັດໃຫ້ຄວາມສາມາດໃນການຄຶດທີ່ພະເຈົ້າປະທານໃຫ້ນັ້ນຕາຍດ້ານ.
23 “[ພະເຢໂຫວາ] ປະທານຊີວິດແລະລົມຫັນໃຈແລະສັບພະທຸກສິ່ງໃຫ້ແກ່ຄົນທັງປວງ.” (ກິດຈະການ 17:24, 25) ຊີວິດເປັນຂອງປະທານມາຈາກພະເຈົ້າ. ເຮົາຮັກຜູ້ປະທານຊີວິດ ດັ່ງນັ້ນເຮົາຈຶ່ງຢາກສະແດງຄວາມນັບຖືຕໍ່ຂອງປະທານນັ້ນ. ເຮົາຫລີກລ່ຽງນິດໄສຫລືກິດປະຕິບັດໃດໆກໍຕາມທີ່ກໍ່ຄວາມເສຍຫາຍຕໍ່ສຸຂະພາບຂອງເຮົາ ເນື່ອງຈາກເຮົາສຳນຶກວ່າກິດປະຕິບັດເຊັ່ນນັ້ນສະແດງເຖິງການຂາດຄວາມນັບຖືຢ່າງຮ້າຍແຮງຕໍ່ຂອງປະທານກ່ຽວກັບຊີວິດ.—ຄຳເພງ 36:9.
24 “ຈົ່ງຮັກເພື່ອນບ້ານເຫມືອນຮັກຕົວເອງ.” (ມັດທາຍ 22:39) ຫລາຍຄັ້ງນິດໄສແລະກິດປະຕິບັດທີ່ບໍ່ສະອາດບໍ່ພຽງແຕ່ກະທົບໃສ່ຜູ້ກະທຳເທົ່ານັ້ນ ແຕ່ຍັງກະທົບໃສ່ຜູ້ຄົນທີ່ຢູ່ອ້ອມຂ້າງນຳອີກ. ຕົວຢ່າງ ການຫັນໃຈເອົາຄວັນຢາສູບທີ່ຄົນອື່ນປ່ອຍອອກມາອາດກໍ່ຜົນເສຍຫາຍຕໍ່ຜູ້ທີ່ບໍ່ໄດ້ສູບຢາ. ຜູ້ທີ່ກໍ່ຄວາມເສຍຫາຍຕໍ່ຄົນທີ່ຢູ່ອ້ອມຂ້າງຕົນລະເມີດຄຳສັ່ງຂອງພະເຈົ້າທີ່ໃຫ້ຮັກເພື່ອນບ້ານ. ບຸກຄົນນັ້ນຍັງສະແດງໃຫ້ເຫັນໂດຍການກະທຳວ່າ ທີ່ແທ້ແລ້ວລາວບໍ່ໄດ້ຮັກພະເຈົ້າແບບທີ່ລາວເວົ້າ.—1 ໂຢຮັນ 4:20, 21.
25 “ຈົ່ງ . . . ນ້ອມຟັງ [“ຍອມຢູ່ໃຕ້ອຳນາດ,” ລ.ມ.] ພວກອາດຍາເຈົ້ານາຍແລະຜູ້ມີອຳນາດ.” (ຕິໂຕ 3:1) ໃນຫລາຍປະເທດ ການມີຫລືການໃຊ້ຢາບາງຊະນິດຖືເປັນການລະເມີດກົດຫມາຍ. ໃນຖານະເປັນຄລິດສະຕຽນແທ້ ເຮົາບໍ່ມີຢານັ້ນໄວ້ໃນການຄອບຄອງຫລືໃຊ້ຢານັ້ນ.—ໂລມ 13:1.
26. (ກ) ເພື່ອຈະຮັກສາຕົວໃຫ້ຢູ່ໃນຄວາມຮັກຂອງພະເຈົ້າຕໍ່ໆໄປ ເຮົາຕ້ອງເຮັດຫຍັງ? (ຂ) ເປັນຫຍັງການຮັກສາຕົວໃຫ້ສະອາດໃນທັດສະນະຂອງພະເຈົ້າຈຶ່ງເປັນແນວທາງການດຳເນີນຊີວິດທີ່ດີທີ່ສຸດ?
26 ເພື່ອຈະຮັກສາຕົວໃຫ້ຢູ່ໃນຄວາມຮັກຂອງພະເຈົ້າຕໍ່ໆໄປ ເຮົາຕ້ອງຮັກສາຄວາມສະອາດບໍ່ແມ່ນພຽງແຕ່ບາງດ້ານ ແຕ່ໃນທຸກໆດ້ານ. ການປະຖິ້ມລວມທັງການຫລີກລ່ຽງນິດໄສແລະກິດປະຕິບັດທີ່ເຮັດໃຫ້ເປິເປື້ອນອາດບໍ່ແມ່ນເລື່ອງງ່າຍ ແຕ່ເປັນສິ່ງທີ່ເປັນໄປໄດ້. * ທີ່ຈິງແລ້ວ ນີ້ເປັນແນວທາງທີ່ດີທີ່ສຸດ ເນື່ອງຈາກພະເຢໂຫວາສັ່ງສອນເຮົາເພື່ອປະໂຫຍດຂອງເຮົາເອງສະເຫມີ. (ເອຊາອີ 48:17) ສຳຄັນທີ່ສຸດ ໂດຍການຮັກສາຕົວໃຫ້ສະອາດເຮົາສາມາດມີຄວາມອີ່ມໃຈທີ່ຮູ້ວ່າເຮົາກຳລັງສະທ້ອນເຖິງພະເຈົ້າທີ່ເຮົາຮັກໃນທາງທີ່ດີ ດ້ວຍວິທີນີ້ ເຮົາຈຶ່ງຢູ່ໃນຄວາມຮັກຂອງພະເຈົ້າຕໍ່ໆໄປ.
^ ຂໍ້ 2 ຄຳພາສາເຫບເລີທີ່ແປວ່າ “ສະອາດ” ບໍ່ແມ່ນພຽງແຕ່ພັນລະນາເຖິງຄວາມສະອາດທາງຮ່າງກາຍເທົ່ານັ້ນ ແຕ່ຍັງລວມເຖິງຄວາມສະອາດທາງສິນລະທຳແລະການນະມັດສະການອີກດ້ວຍ.
^ ຂໍ້ 10 ເບິ່ງບົດທີ 13 ຂອງປຶ້ມນີ້ສຳລັບການພິຈາລະນາການສະຫລອງແລະປະເພນີບາງຢ່າງສະເພາະທີ່ຄລິດສະຕຽນແທ້ຄວນຫລີກລ່ຽງ.
^ ຂໍ້ 12 ໃນບົດທີ 6 ຂອງປຶ້ມນີ້ມີການພິຈາລະນາວິທີເລືອກຄວາມບັນເທີງທີ່ດີງາມ.
^ ຂໍ້ 67 ຊື່ສົມມຸດ.
ເລື່ອງທີ່ເຈົ້າອາດຈະມັກ
ລາຊະອານາຈັກຂອງພະເຈົ້າປົກຄອງແລ້ວ!
ການຊຳຮະດ້ານສິນລະທຳ—ສະແດງເຖິງຄວາມບໍລິສຸດຂອງພະເຈົ້າ
ຫ້ອງຍາມແລະທາງເຂົ້າວິຫານໃນນິມິດຂອງເອເຊກຽນມີຄວາມໝາຍພິເສດສຳລັບປະຊາຊົນຂອງພະເຈົ້າຕັ້ງແຕ່ປີ 1914.
ລາຊະອານາຈັກຂອງພະເຈົ້າປົກຄອງແລ້ວ!
ກະສັດຫຼໍ່ຫຼອມປະຊາຊົນໃຫ້ນະມັດສະການພະເຈົ້າຢ່າງຖືກຕ້ອງ
ຕົ້ນກຳເນີດຂອງຄລິດສະມາດກັບໄມ້ກາງເຂນຄືກັນແນວໃດ?
