ບົດທີ 4
ເປັນຫຍັງຄວນນັບຖືຜູ້ມີສິດອຳນາດ?
“ຈົ່ງນັບຖືຄົນທັງປວງ.”—1 ເປໂຕ 2:17.
1, 2. (ກ) ເປັນຫຍັງເຮົາຈຶ່ງຮູ້ສຶກວ່າຍາກທີ່ຈະສະແດງຄວາມນັບຖືຕໍ່ຜູ້ມີສິດອຳນາດ? (ຂ) ເຮົາຈະພິຈາລະນາຄຳຖາມຫຍັງ?
ເຈົ້າເຄີຍສັງເກດອາການຂອງເດັກນ້ອຍຄົນຫນຶ່ງທີ່ຖືກພໍ່ແມ່ສັ່ງໃຫ້ເຮັດບາງຢ່າງເຊິ່ງທີ່ຈິງແລ້ວລາວບໍ່ຢາກເຮັດບໍ? ເຈົ້າອາດເຫັນໄດ້ແຈ້ງເຖິງອາການຂັດແຍ່ງຈາກສີຫນ້າຂອງເດັກນ້ອຍ. ລາວໄດ້ຍິນຄຳສັ່ງຂອງພໍ່ແມ່ແລະລາວຮູ້ວ່າຄວນໃຫ້ຄວາມນັບຖືຕໍ່ສິດຂອງພໍ່ແມ່. ແຕ່ໃນກໍລະນີນີ້ ລາວພຽງແຕ່ບໍ່ຢາກ ເຊື່ອຟັງ. ເຫດການແບບນີ້ເກີດຂຶ້ນກັບເຮົາທຸກຄົນເປັນບາງຄັ້ງຄາວ.
2 ບໍ່ງ່າຍສະເຫມີໄປທີ່ເຮົາຈະສະແດງຄວາມນັບຖືຕໍ່ຜູ້ມີສິດອຳນາດ. ບາງຄັ້ງເຈົ້າຮູ້ສຶກວ່າຍາກບໍທີ່ຈະສະແດງຄວາມນັບຖືຕໍ່ຜູ້ມີສິດອຳນາດເຫນືອເຈົ້າໃນລະດັບໃດຫນຶ່ງ? ຖ້າເຊັ່ນນັ້ນ ເຈົ້າກໍບໍ່ແມ່ນຜູ້ດຽວທີ່ຮູ້ສຶກແບບນັ້ນ. ເຮົາມີຊີວິດຢູ່ໃນສະໄຫມທີ່ຄວາມນັບຖືຕໍ່ຜູ້ມີສິດອຳນາດຢູ່ໃນຂີດຕໍ່າສຸດເທົ່າທີ່ເຄີຍເປັນມາ. ເຖິງຢ່າງນັ້ນ ຄຳພີໄບເບິນກ່າວວ່າເຮົາຈຳເປັນຕ້ອງສະແດງຄວາມນັບຖືຕໍ່ຜູ້ທີ່ມີສິດອຳນາດເຫນືອເຮົາ. (ສຸພາສິດ 24:21) ທີ່ຈິງ ການເຮັດເຊັ່ນນັ້ນເປັນສິ່ງທີ່ຂາດບໍ່ໄດ້ຖ້າເຮົາຢາກຢູ່ໃນຄວາມຮັກຂອງພະເຈົ້າຕໍ່ໆໄປ. ດັ່ງນັ້ນ ເປັນທຳມະດາທີ່ເກີດຄຳຖາມບາງຢ່າງຂຶ້ນມາ. ເປັນຫຍັງຈຶ່ງຍາກແທ້ທີ່ເຮົາຈະສະແດງຄວາມນັບຖືຜູ້ມີສິດອຳນາດ? ເປັນຫຍັງພະເຢໂຫວາຮຽກຮ້ອງໃຫ້ເຮົານັບຖືຕໍ່ຜູ້ມີສິດອຳນາດ ແລະສິ່ງໃດຈະຊ່ວຍເຮົາໃຫ້ເຊື່ອຟັງຜູ້ມີສິດອຳນາດ? ສຸດທ້າຍ ໃນທາງໃດແດ່ທີ່ເຮົາສາມາດສະແດງຄວາມນັບຖືຕໍ່ຜູ້ມີສິດອຳນາດ?
ເຫດຜົນທີ່ເປັນເລື່ອງຍາກ
3, 4. ບາບແລະຄວາມບໍ່ສົມບູນແບບເກີດຂຶ້ນໄດ້ແນວໃດ ແລະເປັນຫຍັງບາບທີ່ມີມາແຕ່ເກີດຈຶ່ງເຮັດໃຫ້ເປັນເລື່ອງຍາກທີ່ເຮົາຈະສະແດງຄວາມນັບຖືຕໍ່ຜູ້ມີສິດອຳນາດ?
3 ຂໍໃຫ້ພິຈາລະນາສັ້ນໆເຖິງເຫດຜົນສອງຢ່າງທີ່ເຮັດໃຫ້ການສະແດງຄວາມນັບຖືຕໍ່ຜູ້ມີສິດອຳນາດເປັນເລື່ອງຍາກແທ້ໆສຳລັບເຮົາ. ເຫດຜົນທຳອິດ ເຮົາເປັນມະນຸດບໍ່ສົມບູນແບບ; ເຫດຜົນທີສອງ ຄົນທີ່ມີອຳນາດເຫນືອເຮົາກໍບໍ່ສົມບູນແບບ. ບາບແລະຄວາມບໍ່ສົມບູນແບບຂອງມະນຸດເລີ່ມຕົ້ນດົນນານມາແລ້ວ ຫວນຄືນໄປໃນສວນເອເດນເມື່ອອາດາມແລະເອວາໄດ້ກະບົດຂັດຂືນຕໍ່ສິດອຳນາດຂອງພະເຈົ້າ. ດັ່ງນັ້ນ ບາບຈຶ່ງເລີ່ມຕົ້ນດ້ວຍການກະບົດ. ນັບຕັ້ງແຕ່ນັ້ນເປັນຕົ້ນມາ ເຮົາຈຶ່ງມີທ່າອ່ຽງທີ່ຈະກະບົດຕັ້ງແຕ່ເກີດມາ.—ຕົ້ນເດີມ 2:15-17; 3:1-7; ຄຳເພງ 51:5; ໂລມ 5:12.
4 ເນື່ອງຈາກມີບາບຕັ້ງແຕ່ເກີດ ພວກເຮົາສ່ວນຫລາຍອາດກາຍເປັນຄົນຍິ່ງຈອງຫອງໄດ້ງ່າຍ ໃນຂະນະທີ່ຄວາມຖ່ອມເປັນຄຸນລັກສະນະທີ່ຫາຍາກເຊິ່ງເຮົາຕ້ອງພະຍາຍາມຢ່າງຫນັກທີ່ຈະປູກຝັງແລະຮັກສາໄວ້. ແມ່ນແຕ່ຫລັງຈາກຮັບໃຊ້ພະເຈົ້າຢ່າງສັດຊື່ມາເປັນເວລາຫລາຍປີ ເຮົາອາດຍອມແພ້ຕໍ່ຄວາມຍິ່ງແລະຄວາມຈອງຫອງ. ຕົວຢ່າງ ຂໍໃຫ້ພິຈາລະນາກ່ຽວກັບໂກເຣຜູ້ທີ່ຢືນຢັດຢ່າງສັດຊື່ຢູ່ກັບປະຊາຊົນຂອງພະເຢໂຫວາຕະຫລອດເວລາຫລາຍປີທີ່ຍາກລຳບາກ. ເຖິງຢ່າງນັ້ນກໍຕາມ ລາວກະຫາຍຢາກໄດ້ສິດອຳນາດຕື່ມແລະກໍ່ການກະບົດຢ່າງໄຮ້ຢາງອາຍຕໍ່ຕ້ານໂມເຊເຊິ່ງເປັນຄົນຖ່ອມທີ່ສຸດໃນຕອນນັ້ນ. (ຈົດເຊັນບັນຊີ 12:3; 16:1-3) ຂໍໃຫ້ຄິດເຖິງກະສັດໂອເຊຍເຊດ້ວຍເຊັ່ນກັນ ຄວາມຍິ່ງໄດ້ຊັກນຳລາວໃຫ້ເຂົ້າໄປໃນວິຫານຂອງພະເຢໂຫວາແລະປະຕິບັດຫນ້າທີ່ອັນສັກສິດເຊິ່ງສະຫງວນໄວ້ສະເພາະພວກປະໂລຫິດ. (2 ຂ່າວຄາວ 26:16-21) ບຸກຄົນດັ່ງກ່າວຖືກລົງໂທດຢ່າງຫນັກຫນ່ວງສຳລັບການກະບົດຂອງເຂົາເຈົ້າ. ແນວໃດກໍຕາມ ຕົວຢ່າງທີ່ບໍ່ດີຂອງເຂົາເຈົ້າເປັນສິ່ງເຕືອນໃຈທີ່ເປັນປະໂຫຍດຕໍ່ເຮົາທຸກຄົນ. ເຮົາຈຳເປັນຕ້ອງຕໍ່ສູ້ກັບຄວາມຍິ່ງເຊິ່ງເຮັດໃຫ້ຍາກໃນການສະແດງຄວາມນັບຖືຕໍ່ຜູ້ມີສິດອຳນາດ.
5. ມະນຸດທີ່ບໍ່ສົມບູນແບບໃຊ້ສິດອຳນາດຢ່າງຜິດໆແນວໃດ?
5 ອີກດ້ານຫນຶ່ງ ມະນຸດບໍ່ສົມບູນແບບເຊິ່ງຢູ່ໃນຕຳແຫນ່ງທີ່ມີສິດອຳນາດ ມີສ່ວນຢ່າງຍິ່ງໃນການເຮັດໃຫ້ຜູ້ຄົນຂາດຄວາມນັບຖືຕໍ່ຜູ້ມີສິດອຳນາດ. ຜູ້ມີສິດອຳນາດຫລາຍຄົນເປັນຄົນໂຫດຮ້າຍ ທຳຮ້າຍຜູ້ອື່ນທາງຮ່າງກາຍແລະໂດຍທາງຄຳເວົ້າ ຫລືເປັນຄົນກົດຂີ່. ທີ່ຈິງ ປະຫວັດສາດສ່ວນໃຫຍ່ຂອງມະນຸດເຜີຍໃຫ້ເຫັນການໃຊ້ສິດອຳນາດແບບຜິດໆ. (ຜູ້ເທສະໜາປ່າວປະກາດ 8:9) ຕົວຢ່າງ ຊາອຶລເປັນຄົນດີແລະຖ່ອມຕອນພະເຢໂຫວາເລືອກລາວໃຫ້ເປັນກະສັດ. ແຕ່ລາວຍອມຈຳນົນຕໍ່ຄວາມຍິ່ງແລະຄວາມອິດສາ ຈາກນັ້ນລາວໄດ້ຂົ່ມເຫັງດາວິດຊາຍຜູ້ສັດຊື່. (1 ຊາເມືອນ 9:20, 21; 10:20-22; 18:7-11) ຕໍ່ມາດາວິດໄດ້ກາຍເປັນກະສັດທີ່ດີທີ່ສຸດອົງຫນຶ່ງເຊິ່ງຊາດອິດສະລາແອນເຄີຍມີ ແຕ່ລາວໃຊ້ສິດອຳນາດແບບຜິດໆໂດຍລັກເອົາເມຍຂອງອຶລີຊາວເຫດມາເປັນເມຍຂອງຕົນ ແລະໄດ້ສົ່ງຊາຍຜູ້ນີ້ທີ່ໄຮ້ຄວາມຜິດໄປຢູ່ແນວຫນ້າເພື່ອຈະຖືກຂ້າໃນສະໜາມຮົບ. (2 ຊາເມືອນ 11:1-17) ທີ່ຈິງ ຄວາມບໍ່ສົມບູນແບບເຮັດໃຫ້ເປັນເລື່ອງຍາກທີ່ຜູ້ຄົນຈະຄວບຄຸມການໃຊ້ສິດອຳນາດຢ່າງທ່ຽງທຳ. ແລະຖ້າຜູ້ທີ່ມີສິດອຳນາດບໍ່ໄດ້ນັບຖືພະເຢໂຫວາ ເຂົາເຈົ້າແຮ່ງໃຊ້ສິດອຳນາດແບບຜິດໆຫລາຍຂຶ້ນ. ຫລັງຈາກທີ່ພັນລະນາວິທີທີ່ສັນຕະປາປາບາງຄົນຂອງກາໂຕລິກໄດ້ເຮັດໃຫ້ເກີດການຂົ່ມເຫັງຢ່າງແຜ່ຫລາຍ ລັດຖະບຸລຸດຄົນອັງກິດຂຽນວ່າ “ອຳນາດມັກຈະເຮັດໃຫ້ເສື່ອມເສຍ ແລະອຳນາດເບັດເສັດເຮັດໃຫ້ເສື່ອມຊາມຢ່າງສິ້ນເຊີງ.” ເມື່ອຄຳນຶງເຖິງປະຫວັດຂອງການໃຊ້ສິດອຳນາດແບບຜິດໆ ຂໍໃຫ້ພິຈາລະນາຄຳຖາມຕໍ່ໄປນີ້ ເປັນຫຍັງເຮົາຄວນນັບຖືຜູ້ມີສິດອຳນາດ?
ເປັນຫຍັງຈຶ່ງນັບຖືຜູ້ມີສິດອຳນາດ?
6, 7. (ກ) ຄວາມຮັກທີ່ມີຕໍ່ພະເຢໂຫວາກະຕຸ້ນເຮົາໃຫ້ເຮັດຫຍັງ ແລະເພາະເຫດໃດ? (ຂ) ການຍອມຢູ່ໃຕ້ສິດອຳນາດກ່ຽວຂ້ອງກັບທັດສະນະຄະຕິແບບໃດ ແລະເຮົາອາດສະແດງອອກໂດຍວິທີໃດ?
6 ເຫດຜົນທີ່ດີທີ່ສຸດທີ່ຈະສະແດງຄວາມນັບຖືຕໍ່ຜູ້ມີສິດອຳນາດນັ້ນແມ່ນມາຈາກຄວາມຮັກ ນັ້ນຄືຄວາມຮັກຕໍ່ພະເຢໂຫວາ ເພື່ອນມະນຸດ ແລະແມ່ນແຕ່ຕໍ່ເຮົາເອງ. ເນື່ອງຈາກເຮົາຮັກພະເຢໂຫວາເຫນືອສິ່ງອື່ນໃດ ເຮົາຢາກໃຫ້ໃຈຂອງພະອົງຍິນດີ. (ສຸພາສິດ 27:11; ມາລະໂກ 12:29, 30) ເຮົາຮູ້ວ່າສິດທິສູງສຸດໃນການປົກຄອງເອກະພົບຂອງພະອົງຖືກທ້າທາຍຢູ່ທີ່ແຜ່ນດິນໂລກນັບຕັ້ງແຕ່ການກະບົດຢູ່ສວນເອເດນ ແລະມະນຸດສ່ວນຫລາຍໄດ້ເຂົ້າຂ້າງຊາຕານແລະປະຕິເສດສິດທິໃນການປົກຄອງຂອງພະເຢໂຫວາ. ເຮົາຕື່ນເຕັ້ນຍິນດີທີ່ຈະຢືນຢັດຢູ່ຝ່າຍພະເຢໂຫວາ. ເມື່ອເຮົາອ່ານຖ້ອຍຄຳອັນສະຫງ່າງາມໃນຄຳປາກົດ 4:11 ຫົວໃຈເຮົາຖືກກະຕຸ້ນໃຫ້ຕອບຮັບຢ່າງກະຕືລືລົ້ນ. ເຮົາເຂົ້າໃຈຢ່າງຊັດເຈນພຽງໃດວ່າພະເຢໂຫວາເປັນຜູ້ປົກຄອງເອກະພົບທີ່ມີສິດທິໂດຍຊອບທຳ! ເຮົາສະຫນັບສະຫນູນສິດທິສູງສຸດໃນການປົກຄອງຂອງພະເຢໂຫວາ ແລະກໍຍອມຮັບການປົກຄອງຂອງພະອົງໃນການດຳເນີນຊີວິດຂອງເຮົາໃນແຕ່ລະວັນ.
7 ການຍອມຮັບເຊັ່ນນັ້ນຫມາຍເຖິງການເຊື່ອຟັງແລະເຮັດຫລາຍກວ່ານັ້ນອີກ. ເຮົາເຕັມໃຈເຊື່ອຟັງພະເຢໂຫວາເພາະເຮົາຮັກພະອົງ. ແນວໃດກໍຕາມ ຄົງຈະມີບາງຄັ້ງທີ່ການເຊື່ອຟັງເປັນເລື່ອງຍາກສຳລັບເຮົາ. ໃນຕອນນັ້ນ ເຊັ່ນດຽວກັບເດັກນ້ອຍທີ່ພັນລະນາໄວ້ໃນຕອນຕົ້ນ ເຮົາຕ້ອງຮຽນຮູ້ທີ່ຈະຍອມຢູ່ໃຕ້ສິດອຳນາດ. ເຮົາຈື່ໄດ້ວ່າພະເຍຊູຍອມເຮັດຕາມໃຈປະສົງຂອງພໍ່ເຖິງວ່າການເຮັດເຊັ່ນນັ້ນອາດເບິ່ງຄືວ່າຍາກແທ້ໆ. ພະອົງກ່າວກັບພໍ່ວ່າ “ຢ່າໃຫ້ເປັນຕາມນໍ້າໃຈຂອງຂ້າພະເຈົ້າ ແຕ່ວ່າຕາມນໍ້າໃຈຂອງພະເຈົ້າເຖີ້ນ.”—ລືກາ 22:42.
8. (ກ) ການຍອມຢູ່ໃຕ້ອຳນາດພະເຢໂຫວາໃນທຸກວັນນີ້ມັກກ່ຽວຂ້ອງກັບຫຍັງ ແລະອັນໃດເຜີຍໃຫ້ເຫັນຄວາມຮູ້ສຶກຂອງພະເຢໂຫວາໃນເລື່ອງນີ້? (ຂ) ສິ່ງໃດຈະຊ່ວຍເຮົາໃຫ້ຟັງຄຳແນະນຳແລະຍອມຮັບການຕີສອນ? (ເບິ່ງຂອບ “ຈົ່ງຟັງຄຳເຕືອນສະຕິແລະຈົ່ງຮັບຄຳສັ່ງສອນ”.)
8 ແນ່ນອນ ໃນທຸກມື້ນີ້ພະເຢໂຫວາບໍ່ໄດ້ເວົ້າກັບເຮົາໂດຍກົງ ພະອົງໃຊ້ພະຄຳຂອງພະອົງແລະມະນຸດເຊິ່ງເປັນຕົວແທນທີ່ຢູ່ແຜ່ນດິນໂລກ. ດັ່ງນັ້ນ ສ່ວນຫລາຍແລ້ວເຮົາສະແດງການຍອມຢູ່ໃຕ້ສິດອຳນາດຂອງພະເຢໂຫວາໂດຍສະແດງຄວາມນັບຖືຕໍ່ຜູ້ທີ່ພະອົງແຕ່ງຕັ້ງຫລືຜູ້ທີ່ພະອົງຍອມໃຫ້ຢູ່ໃນຕຳແຫນ່ງນັ້ນຕໍ່ໆໄປ ເຊິ່ງເປັນຕຳແຫນ່ງທີ່ມີສິດອຳນາດເຫນືອເຮົາ. ຖ້າເຮົາຂັດຂືນສິດອຳນາດຄົນເຫລົ່ານີ້—ຕົວຢ່າງເຊັ່ນ ໂດຍປະຕິເສດທີ່ຈະຮັບເອົາຄຳແນະນຳແລະການຕັກເຕືອນຕາມຫລັກພະຄຳພີຈາກເຂົາເຈົ້າ—ເຮົາກໍຈະເຮັດໃຫ້ພະເຈົ້າຂອງເຮົາບໍ່ພໍໃຈ. ເມື່ອຊາວອິດສະລາແອນຈົ່ມແລະກະບົດຄັດຄ້ານໂມເຊ ພະເຢໂຫວາຖືວ່າເຂົາເຈົ້າຄັດຄ້ານພະອົງໂດຍກົງ.—ຈົດເຊັນບັນຊີ 14:26, 27
9. ເປັນຫຍັງຄວາມຮັກທີ່ເຮົາມີຕໍ່ເພື່ອນມະນຸດຈຶ່ງກະຕຸ້ນເຮົາໃຫ້ນັບຖືຜູ້ມີສິດອຳນາດ? ຂໍໃຫ້ຍົກຕົວຢ່າງ.
9 ເຮົາຍັງສະແດງຄວາມນັບຖືຕໍ່ຜູ້ມີສິດອຳນາດເພາະເຮົາຮັກເພື່ອນມະນຸດ. ເປັນຫຍັງຈຶ່ງກ່າວເຊັ່ນນັ້ນ? ຂໍໃຫ້ນຶກພາບວ່າເຈົ້າເປັນທະຫານຄົນຫນຶ່ງໃນກອງທັບ. ຄວາມສຳເລັດ ແມ່ນແຕ່ຄວາມຢູ່ລອດຂອງກອງທັບຄົງຈະຂຶ້ນຢູ່ກັບການທີ່ທະຫານແຕ່ລະຄົນຮ່ວມມືກັນ ເຊື່ອຟັງ ແລະນັບຖືຜູ້ບັງຄັບບັນຊາຕາມລຳດັບຊັ້ນ. ຖ້າເຈົ້າບໍ່ເຊື່ອຟັງຄຳສັ່ງ ເພື່ອນທະຫານທັງຫມົດຂອງເຈົ້າອາດຕົກຢູ່ໃນອັນຕະລາຍ. ແມ່ນຢູ່ ກອງທັບຂອງມະນຸດກໍ່ຄວາມເສຍຫາຍຢ່າງຮ້າຍແຮງໃນໂລກທຸກມື້ນີ້. ແຕ່ພະເຢໂຫວາມີກອງທະຫານທີ່ກໍ່ແຕ່ຜົນດີເທົ່ານັ້ນ. ຄຳພີໄບເບິນກ່າວເຖິງພະເຈົ້າຫລາຍຮ້ອຍເທື່ອວ່າ “ພະເຢໂຫວາແຫ່ງກອງທັບທັງຫລາຍ.” (1 ຊາເມືອນ 1:11) ພະອົງເປັນຜູ້ບັນຊາການເຫລົ່າກາຍວິນຍານຈຳນວນມາກມາຍທີ່ມີລິດເດດ. ບາງຄັ້ງ ພະເຢໂຫວາສົມທຽບຜູ້ຮັບໃຊ້ຂອງພະອົງທີ່ຢູ່ແຜ່ນດິນໂລກເປັນຄືກອງທັບ. (ຄຳເພງ 68:11; ເອເຊກຽນ 37:1-10) ຖ້າເຮົາຂືນອຳນາດຜູ້ທີ່ພະເຢໂຫວາຕັ້ງໄວ້ໃຫ້ມີສິດອຳນາດເຫນືອເຮົາ ນັ້ນອາດເຮັດໃຫ້ເພື່ອນທະຫານຝ່າຍວິນຍານຂອງເຮົາຕົກຢູ່ໃນອັນຕະລາຍບໍ່ແມ່ນບໍ? ເມື່ອຄລິດສະຕຽນຄົນຫນຶ່ງຂືນອຳນາດຜູ້ເຖົ້າແກ່ທີ່ໄດ້ຮັບການແຕ່ງຕັ້ງ ຄົນອື່ນໆໃນປະຊາຄົມອາດໄດ້ຮັບຄວາມເສຍຫາຍເຊັ່ນກັນ. (1 ໂກລິນໂທ 12:14, 25, 26) ເມື່ອລູກຄົນຫນຶ່ງຂືນອຳນາດ ຫມົດຄອບຄົວອາດໄດ້ຮັບຄວາມເສຍຫາຍ. ດັ່ງນັ້ນ ເຮົາສະແດງຄວາມຮັກຕໍ່ເພື່ອນມະນຸດໂດຍສ້າງນໍ້າໃຈທີ່ສະແດງຄວາມນັບຖືແລະຮ່ວມມື.
10, 11. ຄວາມປາຖະຫນາອັນເຫມາະສົມທີ່ຈະເຮັດໃຫ້ຕົວເອງໄດ້ຮັບປະໂຫຍດກະຕຸ້ນເຮົາແນວໃດໃຫ້ເຊື່ອຟັງຜູ້ມີສິດອຳນາດ?
10 ນອກຈາກນັ້ນ ເຮົານັບຖືຜູ້ມີສິດອຳນາດເພາະການເຮັດແນວນັ້ນແມ່ນເພື່ອປະໂຫຍດຂອງເຮົາ. ເມື່ອພະເຢໂຫວາບອກໃຫ້ເຮົານັບຖືຜູ້ມີສິດອຳນາດ ພະອົງກ່າວຫລາຍເທື່ອເຖິງຜົນປະໂຫຍດທີ່ເຮົາຈະໄດ້ຮັບຈາກການເຮັດເຊັ່ນນັ້ນ. ຕົວຢ່າງ ພະອົງບອກຜູ້ເປັນລູກໃຫ້ເຊື່ອຟັງພໍ່ແມ່ເພື່ອຈະມີຊີວິດທີ່ຍືນຍາວແລະມີຄວາມສຸກ. (ພະບັນຍັດ 5:16; ເອເຟດ 6:2, 3) ພະອົງສັ່ງໃຫ້ເຮົານັບຖືຜູ້ເຖົ້າແກ່ໃນປະຊາຄົມ ເພາະການບໍ່ເຊື່ອຟັງຈະກໍ່ຜົນເສຍຫາຍຕໍ່ສາຍສຳພັນຂອງເຮົາກັບພະເຢໂຫວາພະເຈົ້າ. (ເຫບເລີ 13:7, 17) ແລະພະອົງບອກໃຫ້ເຮົາເຊື່ອຟັງອຳນາດບ້ານເມືອງເພື່ອເປັນການປົກປ້ອງເຮົາເອງ.—ໂລມ 13:4.
11 ເຈົ້າເຫັນດີນຳແມ່ນບໍວ່າການຮູ້ເຫດຜົນທີ່ພະເຢໂຫວາຢາກໃຫ້ເຮົາເຊື່ອຟັງນັ້ນຊ່ວຍເຮົາໃຫ້ສະແດງຄວາມນັບຖືຕໍ່ຜູ້ມີສິດອຳນາດ? ດັ່ງນັ້ນ ຂໍໃຫ້ພິຈາລະນາວ່າເຮົາຈະສະແດງຄວາມນັບຖືຕໍ່ຜູ້ມີສິດອຳນາດໄດ້ແນວໃດໃນຂອບເຂດສຳຄັນສາມປະການໃນຊີວິດ.
ສະແດງຄວາມນັບຖືພາຍໃນຄອບຄົວ
12. ພະເຢໂຫວາມອບຫມາຍຫນ້າທີ່ອັນໃດໃຫ້ຜູ້ເປັນຜົວຫລືເປັນພໍ່ໃນຄອບຄົວ ແລະຜູ້ຊາຍຈະເຮັດຫນ້າທີ່ນັ້ນໃຫ້ສຳເລັດໂດຍວິທີໃດ?
12 ພະເຢໂຫວາເອງເປັນຜູ້ກໍ່ຕັ້ງຄອບຄົວ. ເນື່ອງຈາກເປັນພະເຈົ້າທີ່ມີລະບຽບສະເຫມີ ພະອົງໄດ້ຈັດລະບຽບຄອບຄົວເພື່ອໃຫ້ດຳເນີນໄປໄດ້ດ້ວຍດີ. (1 ໂກລິນໂທ 14:33) ພະອົງໃຫ້ຜູ້ເປັນຜົວຫລືເປັນພໍ່ມີສິດອຳນາດເພື່ອເຮັດຫນ້າທີ່ເປັນປະມຸກຄອບຄົວ. ຜູ້ເປັນຜົວສະແດງຄວາມນັບຖືຕໍ່ພະຄລິດເຍຊູປະມຸກຂອງຕົນ ໂດຍຮຽນແບບວິທີທີ່ພະເຍຊູໃຊ້ຄວາມເປັນປະມຸກເຫນືອປະຊາຄົມຄລິດສະຕຽນ. (ເອເຟດ 5:23) ດັ່ງນັ້ນ ຜູ້ເປັນຜົວບໍ່ຄວນປະຖິ້ມຫນ້າທີ່ຮັບຜິດຊອບຂອງຕົນ ແຕ່ຄວນແບກຄວາມຮັບຜິດຊອບນັ້ນແບບລູກຜູ້ຊາຍ; ທັງບໍ່ຄວນໃຊ້ສິດອຳນາດກົດຂີ່ຂົ່ມເຫັງຫລືໃຊ້ຄວາມຮຸນແຮງ ແຕ່ສະແດງຄວາມຮັກ ຄວາມມີເຫດຜົນ ແລະຄວາມກະລຸນາ. ລາວສຳນຶກສະເຫມີວ່າສິດອຳນາດຂອງລາວມີຂອບເຂດ ສິດອຳນາດຂອງລາວບໍ່ມີວັນເຫນືອກວ່າສິດອຳນາດຂອງພະເຢໂຫວາ.
ພໍ່ທີ່ເປັນຄລິດສະຕຽນຮຽນແບບວິທີທີ່ພະຄລິດປະຕິບັດໜ້າທີ່ປະມຸກ
13. ຜູ້ເປັນເມຍຫລືເປັນແມ່ຈະເຮັດຫນ້າທີ່ຂອງຕົນໃນຄອບຄົວໃຫ້ສຳເລັດໄດ້ແນວໃດເຊິ່ງເຮັດໃຫ້ພະເຢໂຫວາພໍໃຈ?
13 ຜູ້ເປັນເມຍຫລືເປັນແມ່ເຮັດຫນ້າທີ່ເປັນຜູ້ຊ່ວຍຫລືເປັນຄູ່ຄຽງຂອງຜົວ. ເມຍກໍໄດ້ຮັບມອບສິດອຳນາດໃນຄອບຄົວຄືກັນ ເພາະຄຳພີໄບເບິນກ່າວເຖິງ “ຄວາມສັ່ງສອນແຕ່ແມ່ຂອງເຈົ້າ.” (ສຸພາສິດ 1:8) ແນ່ນອນວ່າສິດອຳນາດຂອງເມຍແມ່ນຮອງຈາກຜົວ. ເມຍທີ່ເປັນຄລິດສະຕຽນສະແດງຄວາມນັບຖືຕໍ່ສິດອຳນາດຂອງຜົວໂດຍຊ່ວຍຜົວໃຫ້ເຮັດຫນ້າທີ່ປະມຸກຄອບຄົວຢ່າງສຳເລັດຜົນ. ລາວບໍ່ດູຖູກຜົວ ທັງບໍ່ໃຊ້ອຸບາຍຄວບຄຸມຜົວ ຫລືຍາດຊີງຕຳແຫນ່ງຂອງຜົວ. ແທນທີ່ຈະເຮັດເຊັ່ນນັ້ນ ເມຍຈະໃຫ້ການສະຫນັບສະຫນູນແລະການຮ່ວມມື. ເມື່ອການຕັດສິນໃຈຂອງຜົວຂັດແຍ່ງກັບການຕັດສິນໃຈຂອງລາວ ລາວອາດສະແດງຄວາມຄິດເຫັນດ້ວຍຄວາມນັບຖື ແຕ່ກໍຍັງຢູ່ໃຕ້ສິດອຳນາດຂອງຜົວ. ຖ້າຜົວບໍ່ໄດ້ເປັນຜູ້ທີ່ມີຄວາມເຊື່ອ ຜູ້ເປັນເມຍອາດປະເຊີນກັບສະຖານະການທີ່ບໍ່ງ່າຍ ແຕ່ການປະພຶດທີ່ສະແດງເຖິງການຍອມຢູ່ໃຕ້ສິດອຳນາດອາດກະຕຸ້ນຜູ້ເປັນຜົວໃຫ້ສະແຫວງຫາພະເຢໂຫວາ.—1 ເປໂຕ 3:1.
14. ຜູ້ເປັນລູກຈະເຮັດໃຫ້ພໍ່ແມ່ແລະພະເຢໂຫວາຍິນດີໄດ້ແນວໃດ?
14 ຜູ້ເປັນລູກເຮັດໃຫ້ໃຈຂອງພະເຢໂຫວາຍິນດີເມື່ອເຂົາເຈົ້າເຊື່ອຟັງພໍ່ແມ່. ເຂົາເຈົ້າຍັງເຮັດໃຫ້ພໍ່ແມ່ໄດ້ຮັບກຽດແລະຄວາມຍິນດີນຳອີກ. (ສຸພາສິດ 10:1) ຫລັກການແບບດຽວກັນນີ້ກ່ຽວກັບການເຊື່ອຟັງກໍນຳມາໃຊ້ກັບຄອບຄົວທີ່ມີແຕ່ພໍ່ຫລືແມ່ ຜູ້ເປັນລູກຄວນສຳນຶກວ່າພໍ່ຫລືແມ່ອາດຈຳເປັນຕ້ອງໄດ້ຮັບການສະຫນັບສະຫນູນແລະການຮ່ວມມືຈາກເຂົາເຈົ້າຫລາຍຂຶ້ນ. ໃນຄອບຄົວທີ່ສະມາຊິກຫມົດທຸກຄົນເຮັດຕາມຫນ້າທີ່ທີ່ພະເຈົ້າກຳນົດໃຫ້ ກໍຈະພາໃຫ້ເກີດສັນຕິສຸກແລະຄວາມຍິນດີຢ່າງຍິ່ງ. ສິ່ງນີ້ນຳຄຳສັນລະເສີນມາສູ່ພະເຢໂຫວາພະເຈົ້າ ຜູ້ກໍ່ຕັ້ງທຸກຄອບຄົວ.—ເອເຟດ 3:14, 15.
ສະແດງຄວາມນັບຖືພາຍໃນປະຊາຄົມ
15. (ກ) ໃນປະຊາຄົມເຮົາຈະສະແດງໃຫ້ເຫັນແນວໃດວ່າເຮົານັບຖືສິດອຳນາດຂອງພະເຢໂຫວາ? (ຂ) ຫລັກການອັນໃດຈະຊ່ວຍເຮົາໃຫ້ເຊື່ອຟັງຜູ້ທີ່ນຳຫນ້າ? (ເບິ່ງຂອບ ‘ຈົ່ງຟັງຄວາມພີ່ນ້ອງທີ່ບັງຄັບ [“ນຳຫນ້າ,” ລ.ມ.] ພວກທ່ານ’.)
15 ພະເຢໂຫວາໄດ້ແຕ່ງຕັ້ງລູກຊາຍຂອງພະອົງເປັນຜູ້ປົກຄອງຂອງປະຊາຄົມຄລິດສະຕຽນ. (ໂກໂລດ 1:13) ພະເຍຊູໄດ້ມອບຫມາຍໃຫ້ “ຂ້າໃຊ້ຜູ້ສັດຊື່ແລະສະຫລາດ” ຄອຍຊ່ວຍເຫລືອປະຊາຊົນຂອງພະເຈົ້າທີ່ຢູ່ແຜ່ນດິນໂລກໃນເລື່ອງການນະມັດສະການພະເຈົ້າ. (ມັດທາຍ 24:45-47) ຄະນະກຳມະການປົກຄອງຂອງພະຍານພະເຢໂຫວາເປັນຕົວແທນຂອງຂ້າໃຊ້ກຸ່ມນີ້. ເຊັ່ນດຽວກັບປະຊາຄົມຄລິດສະຕຽນໃນສະຕະວັດທຳອິດ ໃນທຸກມື້ນີ້ຜູ້ເຖົ້າແກ່ໄດ້ຮັບຄຳສັ່ງແລະຄຳແນະນຳຈາກຄະນະກຳມະການປົກຄອງ ທັງໂດຍທາງກົງຫລືໂດຍທາງຕົວແທນຕ່າງໆເຊັ່ນ ຜູ້ດູແລເດີນທາງ. ເມື່ອເຮົາແຕ່ລະຄົນສະແດງຄວາມນັບຖືຕໍ່ສິດອຳນາດຂອງຄລິດສະຕຽນຜູ້ເຖົ້າແກ່ ເຮົາກຳລັງເຊື່ອຟັງພະເຢໂຫວາ.—ເຫບເລີ 13:17.
16. ຜູ້ເຖົ້າແກ່ໄດ້ຮັບການແຕ່ງຕັ້ງໂດຍທາງພະວິນຍານບໍລິສຸດໃນແງ່ໃດແດ່?
16 ຜູ້ເຖົ້າແກ່ແລະຜູ້ຊ່ວຍງານຮັບໃຊ້ເປັນຄົນບໍ່ສົມບູນແບບ. ເຂົາເຈົ້າມີຂໍ້ບົກພ່ອງແບບດຽວກັບເຮົາ. ແນວໃດກໍຕາມ ຜູ້ເຖົ້າແກ່ເປັນ “ຂອງປະທານໃນລັກສະນະມະນຸດ” ເຊິ່ງຈັດຕຽມໄວ້ເພື່ອຊ່ວຍປະຊາຄົມໃຫ້ມີສາຍສຳພັນທີ່ແຫນ້ນແຟ້ນກັບພະເຢໂຫວາ. (ເອເຟດ 4:8, ລ.ມ.) ຜູ້ເຖົ້າແກ່ໄດ້ຮັບການແຕ່ງຕັ້ງໂດຍພະວິນຍານບໍລິສຸດ. (ກິດຈະການ 20:28) ເປັນເຊັ່ນນັ້ນໄດ້ແນວໃດ? ກ່ອນອື່ນບຸກຄົນດັ່ງກ່າວຕ້ອງບັນລຸເງື່ອນໄຂຕາມທີ່ບັນທຶກໄວ້ໃນພະຄຳຂອງພະເຈົ້າທີ່ຂຽນຂຶ້ນໂດຍການດົນໃຈຈາກພະວິນຍານ. (1 ຕີໂມເຕ 3:1-7, 12; ຕິໂຕ 1:5-9) ນອກຈາກນັ້ນ ຜູ້ເຖົ້າແກ່ທີ່ປະເມີນຄຸນວຸທິຂອງພີ່ນ້ອງຊາຍຄົນຫນຶ່ງຈະອະທິດຖານຢ່າງຈິງຈັງເພື່ອຂໍການຊີ້ນຳຈາກພະວິນຍານບໍລິສຸດຂອງພະເຢໂຫວາ.
17. ໃນວຽກງານຂອງປະຊາຄົມ ເປັນຫຍັງບາງຄັ້ງຜູ້ຍິງຄລິດສະຕຽນຈຶ່ງໃຊ້ຜ້າປົກຫົວ?
17 ໃນປະຊາຄົມ ບາງຄັ້ງອາດບໍ່ມີຜູ້ເຖົ້າແກ່ແລະຜູ້ຊ່ວຍງານຮັບໃຊ້ຢູ່ເພື່ອເຮັດການມອບຫມາຍທີ່ຕາມປົກກະຕິແລ້ວຈະເປັນຫນ້າທີ່ຂອງເຂົາເຈົ້າເຊັ່ນ ນຳການປະຊຸມເພື່ອການປະກາດ. ໃນກໍລະນີດັ່ງກ່າວ ພີ່ນ້ອງຊາຍຄົນອື່ນທີ່ຮັບບັບເຕມາແລ້ວອາດເຮັດຫນ້າທີ່ນັ້ນ. ຖ້າຊອກພີ່ນ້ອງຊາຍບໍ່ໄດ້ແທ້ໆ ກໍອາດໃຫ້ພີ່ນ້ອງຍິງທີ່ມີຄຸນວຸທິເຮັດຫນ້າທີ່ນັ້ນແທນ. ແນວໃດກໍຕາມ ເມື່ອຜູ້ຍິງເຮັດຫນ້າທີ່ເຊິ່ງຕາມປົກກະຕິແລ້ວມອບຫມາຍໃຫ້ຜູ້ຊາຍທີ່ຮັບບັບເຕມາແລ້ວເຮັດ ລາວຕ້ອງເອົາຜ້າປົກຫົວ. * (1 ໂກລິນໂທ 11:3-10) ຂໍ້ຮຽກຮ້ອງນີ້ບໍ່ໄດ້ລົດກຽດຜູ້ຍິງ. ກົງກັນຂ້າມ ມັນເປັນໂອກາດທີ່ຈະສະແດງຄວາມນັບຖືຕໍ່ການຈັດຕຽມຂອງພະເຢໂຫວາກ່ຽວກັບຕຳແຫນ່ງປະມຸກ ທັງໃນຄອບຄົວແລະໃນປະຊາຄົມ.
ສະແດງຄວາມນັບຖືຕໍ່ອຳນາດບ້ານເມືອງ
18, 19. (ກ) ເຈົ້າຈະອະທິບາຍຫລັກການທີ່ກ່າວໄວ້ໃນໂລມ 13:1-7 ແນວໃດ? (ຂ) ເຮົາຈະສະແດງຄວາມນັບຖືຕໍ່ຜູ້ມີສິດອຳນາດໃນບ້ານເມືອງແນວໃດ?
18 ຄລິດສະຕຽນແທ້ເອົາໃຈໃສ່ຍຶດຫມັ້ນກັບຫລັກການທີ່ກ່າວໄວ້ໃນໂລມ 13:1-7. ຂະນະທີ່ອ່ານຂໍ້ຄວາມຕອນນັ້ນ ເຈົ້າຈະເຂົ້າໃຈວ່າ “ຜູ້ມີອຳນາດ” ທີ່ກ່າວເຖິງໃນຂໍ້ນັ້ນຫມາຍເຖິງລັດຖະບານຕ່າງໆຂອງໂລກ. ຕາບໃດທີ່ພະເຢໂຫວາຍອມໃຫ້ມະນຸດມີສິດອຳນາດຢູ່ຕໍ່ໆໄປ ເຂົາເຈົ້າໄດ້ປະຕິບັດຫນ້າທີ່ສຳຄັນ ຮັກສາຄວາມເປັນລະບຽບຮຽບຮ້ອຍໃນລະດັບໃດຫນຶ່ງແລະຈັດໃຫ້ມີການບໍລິການຕ່າງໆທີ່ຈຳເປັນ. ເຮົາສະແດງຄວາມນັບຖືຕໍ່ຄົນເຫລົ່ານີ້ທີ່ມີສິດອຳນາດໂດຍການເຊື່ອຟັງກົດຫມາຍ. ເຮົາຕ້ອງເຮັດໃຫ້ແນ່ໃຈວ່າເຮົາເສຍພາສີຕາມທີ່ເຮົາຕ້ອງເສຍບໍ່ວ່າປະເພດໃດກໍຕາມ ຂຽນຄຳຮ້ອງຫລືເອກະສານຕ່າງໆຢ່າງຖືກຕ້ອງຕາມທີ່ລັດຖະບານຮຽກຮ້ອງ ແລະປະຕິບັດຕາມກົດຫມາຍອັນໃດກໍຕາມທີ່ກ່ຽວຂ້ອງກັບເຮົາ ຄອບຄົວ ທຸລະກິດ ຫລືຊັບສິນຂອງເຮົາ. ແນວໃດກໍຕາມ ເຮົາບໍ່ຍອມເຮັດຕາມຜູ້ມີສິດອຳນາດໃນບ້ານເມືອງຖ້າເຂົາເຈົ້າຮຽກຮ້ອງໃຫ້ເຮົາບໍ່ເຊື່ອຟັງພະເຈົ້າ. ແທນທີ່ຈະຍອມເຮັດຕາມ ເຮົາຕອບແບບດຽວກັບອັກຄະສາວົກໃນສະໄຫມກ່ອນທີ່ວ່າ “ພວກຂ້າພະເຈົ້າຈຳຕ້ອງຟັງພະເຈົ້າຫລາຍກວ່າຟັງມະນຸດ.”—ກິດຈະການ 5:28, 29; ເບິ່ງຂອບ “ ຂ້ອຍຄວນເຊື່ອຟັງສິດອຳນາດຂອງຜູ້ໃດ?”.
19 ນອກຈາກນັ້ນ ເຮົາສະແດງຄວາມນັບຖືຕໍ່ຜູ້ມີສິດອຳນາດໃນບ້ານເມືອງໂດຍກິລິຍາທ່າທາງທີ່ເຮົາປະຕິບັດກັບເຂົາເຈົ້າ. ບາງຄັ້ງ ເຮົາອາດຕິດຕໍ່ພົວພັນໂດຍກົງກັບເຈົ້າຫນ້າທີ່ຂອງລັດ. ອັກຄະສາວົກໂປໂລເຄີຍຕິດຕໍ່ພົວພັນກັບຜູ້ປົກຄອງດັ່ງກ່າວເຊັ່ນ ກະສັດເຫໂລດອັກລີປາ ແລະເຈົ້າແຂວງເຝດຕຶດ. ຄົນເຫລົ່ານີ້ມີຂໍ້ບົກພ່ອງຮ້າຍແຮງ ແຕ່ໂປໂລເວົ້າກັບເຂົາເຈົ້າດ້ວຍຄວາມນັບຖື. (ກິດຈະການ 26:2, 25) ເຮົາຕິດຕາມຕົວຢ່າງຂອງໂປໂລ ບໍ່ວ່າເຮົາເວົ້າກັບເຈົ້າຫນ້າທີ່ຂັ້ນສູງຫລືເວົ້າກັບຕຳຫລວດທ້ອງຖິ່ນ. ຢູ່ໂຮງຮຽນ ຫນຸ່ມສາວຄລິດສະຕຽນພະຍາຍາມສະແດງຄວາມນັບຖືແບບດຽວກັນຕໍ່ນາຍຄູແລະພະນັກງານຂອງໂຮງຮຽນລວມທັງລູກຈ້າງຂອງໂຮງຮຽນ. ແນ່ນອນ ເຮົາສະແດງຄວາມນັບຖືບໍ່ພຽງແຕ່ກັບຄົນທີ່ເຫັນດີກັບຄວາມເຊື່ອຂອງເຮົາເທົ່ານັ້ນ ແຕ່ຍັງສະແດງຄວາມນັບຖືເມື່ອຕິດຕໍ່ພົວພັນກັບຄົນທີ່ຕໍ່ຕ້ານພະຍານພະເຢໂຫວາ. ທີ່ຈິງ ຄົນທົ່ວໄປທີ່ບໍ່ມີຄວາມເຊື່ອຄວນສັງເກດເຫັນວ່າເຮົາເປັນຜູ້ທີ່ນັບຖືຄົນອື່ນ.—ໂລມ 12:17, 18; 1 ເປໂຕ 3:15.
20, 21. ມີຜົນປະໂຫຍດອັນໃດແດ່ທີ່ເກີດຈາກການສະແດງຄວາມນັບຖືທີ່ເຫມາະສົມຕໍ່ຜູ້ມີສິດອຳນາດ?
20 ຂໍໃຫ້ເຮົາບໍ່ເລືອກຫນ້າຄົນໃນການສະແດງຄວາມນັບຖື. ອັກຄະສາວົກເປໂຕຂຽນວ່າ “ຈົ່ງນັບຖືຄົນທັງປວງ.” (1 ເປໂຕ 2:17) ເມື່ອຜູ້ຄົນສັງເກດເຫັນວ່າເຮົາມີທ່າທີທີ່ນັບຖືເຂົາເຈົ້າຢ່າງແທ້ຈິງ ເຂົາເຈົ້າອາດປະທັບໃຈຫລາຍ. ຂໍໃຫ້ຈື່ວ່າຄຸນລັກສະນະນີ້ຫາໄດ້ຍາກຫລາຍໃນທຸກມື້ນີ້. ດັ່ງນັ້ນ ການສະແດງຄວາມນັບຖືເປັນວິທີຫນຶ່ງທີ່ເຮົາເຊື່ອຟັງຄຳສັ່ງຂອງພະເຍຊູທີ່ວ່າ “ໃຫ້ແຈ້ງຂອງທ່ານທັງຫລາຍສ່ອງໄປຕໍ່ຫນ້າຄົນທັງຫລາຍ ເພື່ອເຂົາຈະໄດ້ເຫັນການດີທັງຫລາຍຂອງທ່ານທັງຫລາຍ ແລະຈະໄດ້ສັນລະເສີນພະບິດາຂອງພວກທ່ານຜູ້ຢູ່ໃນສະຫວັນ.”—ມັດທາຍ 5:16.
21 ໃນໂລກທີ່ມືດມົນນີ້ ຄົນທີ່ມີຫົວໃຈດີງາມຖືກດຶງດູດໃຫ້ເຂົ້າຫາຄວາມສະຫວ່າງຝ່າຍວິນຍານ. ສະນັ້ນ ການສະແດງຄວາມນັບຖືຂອງເຮົາໃນຄອບຄົວ ໃນປະຊາຄົມ ແລະໃນໂອກາດອື່ນໆທີ່ຕ້ອງຕິດຕໍ່ພົວພັນກັບຄົນທົ່ວໄປ ອາດປະທັບໃຈບາງຄົນແລະກະຕຸ້ນເຂົາເຈົ້າໃຫ້ດຳເນີນໃນຄວາມສະຫວ່າງນຳກັນກັບເຮົາ. ເປັນຄວາມຄາດຫວັງທີ່ຫນ້າຍິນດີແທ້ໆ! ແຕ່ເຖິງວ່າບໍ່ໄດ້ເກີດຂຶ້ນແບບນັ້ນ ກໍຍັງມີສິ່ງຫນຶ່ງທີ່ຫມັ້ນໃຈໄດ້. ການທີ່ເຮົາສະແດງຄວາມນັບຖືຄົນອື່ນເຮັດໃຫ້ພະເຢໂຫວາພະເຈົ້າພໍໃຈ ແລະຍັງຊ່ວຍເຮົາໃຫ້ຢູ່ໃນຄວາມຮັກຂອງພະເຈົ້າຕໍ່ໆໄປ. ຈະມີລາງວັນອັນໃດທີ່ຍິ່ງໃຫຍ່ກວ່ານີ້ບໍ?
^ ຂໍ້ 17 “ການປົກຫົວ—ເມື່ອໃດແລະເພາະເຫດໃດ?” ພາກຜະຫນວກພິຈາລະນາວິທີທີ່ໃຊ້ໄດ້ຈິງບາງວິທີເພື່ອນຳໃຊ້ຫລັກການນີ້.
ເລື່ອງທີ່ເຈົ້າອາດຈະມັກ
ໃຫ້ໃກ້ຊິດກັບພະເຢໂຫວາ
“ໃຫ້ພວກເຈົ້າຮຽນແບບພະເຈົ້າ” ໃນການໃຊ້ອຳນາດ
ເຈົ້າອາດມີອຳນາດຫຼາຍກວ່າທີ່ເຈົ້າຄິດ. ເຈົ້າຈະໃຊ້ມັນຢ່າງເໝາະສົມແນວໃດ?
