ບົດທີ 11
ເປັນຫຍັງຈຶ່ງມີຄວາມທຸກຫຼາຍແທ້?
1, 2. ຫຼາຍຄົນສົງໄສເລື່ອງຫຍັງ?
ທຸກໆມື້ເຮົາໄດ້ຍິນຂ່າວທີ່ເສົ້າສະຫຼົດໃຈເຊິ່ງກຳລັງເກີດຂຶ້ນຢູ່ທົ່ວໂລກ ເຊັ່ນ: ຄື້ນໃຫຍ່ຊຶນາມິພັດຖະຫຼົ່ມບ້ານໜຶ່ງ ພວກຜູ້ກໍ່ການຮ້າຍຍິງປືນກວາດໃສ່ຄົນຢູ່ໂຮງແຮມເຮັດໃຫ້ມີຄົນບາດເຈັບແລະຕາຍເປັນຈຳນວນຫຼາຍ. ຜູ້ຍິງຄົນໜຶ່ງເປັນມະເຮັງຕາຍແລະປະລູກ 5 ຄົນໄວ້ໃຫ້ປະເຊີນຊີວິດຕາມລຳພັງ.
2 ເມື່ອມີໄພພິບັດຫຼືເລື່ອງເສົ້າສະຫຼົດໃຈແບບນີ້ເກີດຂຶ້ນ ຫຼາຍຄົນຈຶ່ງສົງໄສວ່າ “ເປັນຫຍັງຈຶ່ງເປັນແບບນີ້?” ຫຼາຍຄົນຢາກຮູ້ວ່າເປັນຫຍັງໂລກຈຶ່ງມີແຕ່ຄວາມໂຫດຮ້າຍແລະຄວາມທຸກຫຼາຍແທ້? ເຈົ້າເຄີຍສົງໄສຄືກັນບໍ?
3, 4. (ກ) ຫາບາກຸກເຄີຍຖາມພະເຢໂຫວາເລື່ອງຫຍັງ? (ຂ) ພະອົງຕອບຫາບາກຸກແນວໃດ?
3 ເມື່ອອ່ານຄຳພີໄບເບິນ ເຮົາເຫັນວ່າຫຼາຍຄົນທີ່ເຊື່ອສັດທາໃນພະເຈົ້າກໍສົງໄສຄືກັບເຮົາ. ຕົວຢ່າງເຊັ່ນ: ຜູ້ພະຍາກອນຫາບາກຸກເຄີຍຖາມພະເຢໂຫວາວ່າ: “ເປັນຫຍັງພະອົງປ່ອຍໃຫ້ຂ້ອຍເຫັນຄົນເຮັດຊົ່ວ? ເປັນຫຍັງພະອົງຍອມໃຫ້ຄົນຂົ່ມເຫງກັນ? ເປັນຫຍັງຂ້ອຍຕ້ອງເຫັນຄວາມພິນາດແລະຄວາມຮຸນແຮງ? ເປັນຫຍັງມີແຕ່ຄົນຜິດຖຽງກັນແລະເປັນສັດຕູກັນ?”—ຫາບາກຸກ 1:3, ລ.ມ.
4 ໃນຫາບາກຸກ 2:2, 3 ພະເຈົ້າຕອບລາວໂດຍບອກກ່ຽວກັບຄຳສັນຍາຂອງພະອົງທີ່ຈະຈັດການກັບເລື່ອງທັງໝົດນີ້. ພະເຢໂຫວາຮັກມະນຸດຫຼາຍ. ຄຳພີໄບເບິນບອກວ່າ: “ພະອົງຫ່ວງໃຍພວກເຈົ້າ.” (1 ເປໂຕ 5:7) ທີ່ຈິງ ພະອົງແຮ່ງບໍ່ຢາກເຫັນຄວາມທຸກຫຼາຍກວ່າພວກເຮົາອີກ. (ເອຊາອີ 55:8, 9) ຖ້າເປັນແນວນັ້ນ ເປັນຫຍັງໂລກເຮົາຈຶ່ງມີຄວາມທຸກຫຼາຍແທ້?
ເປັນຫຍັງໂລກເຮົາຈຶ່ງມີຄວາມທຸກຫຼາຍແທ້?
5. ຫຼາຍຄົນເວົ້າແນວໃດກ່ຽວກັບຄວາມທຸກທີ່ເກີດຂຶ້ນ? ແຕ່ຄຳພີໄບເບິນບອກແນວໃດ?
5 ເມື່ອຕ້ອງເຈິກັບຄວາມທຸກ ບາງຄົນອາດເວົ້າວ່າເປັນຍ້ອນກຳເກົ່າທີ່ເຄີຍເຮັດມາຕັ້ງແຕ່ຊາດກ່ອນ ເຮົາຈຶ່ງຕ້ອງມາໃຊ້ກຳໃນຊາດນີ້. ສ່ວນບາງຄົນກໍເວົ້າວ່າທຸກຢ່າງທີ່ເກີດຂຶ້ນໃນຊີວິດເຮົາຖືກລິຂິດໄວ້ແລ້ວເຊິ່ງບໍ່ມີທາງທີ່ເຮົາຈະເຂົ້າໃຈໄດ້. ພວກຄູສອນສາສະໜາຫຼືຄຸນພໍ່ກໍມັກເວົ້າວ່າພະເຈົ້າຕ້ອງການໃຫ້ເປັນແນວນັ້ນ. ບາງຄົນເຖິງຂັ້ນເວົ້າວ່າການທີ່ເຮົາຫຼືແມ່ນແຕ່ເດັກນ້ອຍໆຕາຍກໍເພື່ອຈະໄປຢູ່ກັບພະເຈົ້າໃນສະຫວັນ. ຄວາມຄິດແບບນີ້ບໍ່ແມ່ນຄວາມຈິງ. ພະເຢໂຫວາບໍ່ເຄີຍເຮັດໃຫ້ສິ່ງທີ່ບໍ່ດີເກີດຂຶ້ນ. ຄຳພີໄບເບິນບອກວ່າ: “ຄວາມຮ້າຍຢູ່ຫ່າງໄກຈາກພະເຈົ້າແລະຄວາມອະທຳກໍຢູ່ຫ່າງໄກຈາກພະເຈົ້າອົງມີລິດເດດອັນໃຫຍ່ທີ່ສຸດ.”—ໂຢບ 34:10
6. ເມື່ອມີຄວາມທຸກເກີດຂຶ້ນ ເປັນຫຍັງຫຼາຍຄົນຈຶ່ງໂທດພະເຈົ້າ?
6 ເມື່ອມີຄວາມທຸກເກີດຂຶ້ນ ຫຼາຍຄົນໂທດພະເຈົ້າຍ້ອນພວກເຂົາຄິດວ່າພະອົງເປັນຜູ້ປົກຄອງໂລກ ດັ່ງນັ້ນ ຄວາມທຸກທັງໝົດຈຶ່ງຕ້ອງມາຈາກພະອົງ. ແຕ່ໃນບົດທີ 3 ເຮົາໄດ້ຮຽນແລ້ວວ່າທີ່ຈິງແລ້ວຊາຕານເປັນຜູ້ປົກຄອງໂລກນີ້.
7, 8. ມີສາເຫດຫຍັງແດ່ທີ່ເຮັດໃຫ້ມີຄວາມທຸກຫຼາຍຢ່າງໃນໂລກນີ້?
7 ຄຳພີໄບເບິນບອກວ່າ “ໂລກທັງໝົດຢູ່ໃນອຳນາດຊາຕານຕົວຊົ່ວຮ້າຍ.” (1 ໂຢຮັນ 5:19) ຜູ້ປົກຄອງໂລກແມ່ນຊາຕານ ມັນຊົ່ວຮ້າຍແລະອຳມະຫິດ. ມັນ “ລໍ້ລວງທົ່ວໂລກໃຫ້ຫຼົງຜິດ.” (ພະນິມິດ 12:9) ຜູ້ຄົນຈຳນວນຫຼາຍຮຽນແບບມັນ. ນີ້ເປັນສາເຫດໜຶ່ງທີ່ເຮັດໃຫ້ໂລກເຕັມໄປດ້ວຍຄວາມຫຼອກລວງ ຄວາມກຽດຊັງ ແລະຄວາມໂຫດຮ້າຍຮຸນແຮງ.
8 ຍັງມີສາເຫດອື່ນອີກທີ່ເຮັດໃຫ້ມີຄວາມທຸກຫຼາຍຢ່າງເກີດຂຶ້ນໃນໂລກ. ຫຼັງຈາກອາດາມກັບເອວາກະບົດຕໍ່ພະເຈົ້າ. ພວກເຂົາທັງສອງໄດ້ຖ່າຍທອດບາບເຊິ່ງເຮັດໃຫ້ລູກຫຼານກາຍເປັນມະນຸດທີ່ບໍ່ສົມບູນແບບ ດັ່ງນັ້ນ ມະນຸດຈຶ່ງເຮັດສິ່ງຕ່າງໆທີ່ເຮັດໃຫ້ຄົນອື່ນເປັນທຸກເດືອດຮ້ອນ. ພວກເຂົາຄິດວ່າຕົວເອງດີກວ່າຄົນອື່ນແລະຕ້ອງການມີອຳນາດເໜືອຄົນອື່ນ ພວກເຂົາຈຶ່ງກົດຂີ່ກັນ ຕໍ່ສູ້ກັນ ແລະເຮັດສົງຄາມ. (ຜູ້ເທສະໜາປ່າວປະກາດ 4:1; 8:9) ນອກຈາກນັ້ນ ອີກສາເຫດໜຶ່ງທີ່ຄົນເຮົາຕ້ອງເຈິກັບຄວາມທຸກກໍຍ້ອນ “ເຫດການທີ່ບໍ່ຄາດຄິດ.” (ຜູ້ເທສະໜາປ່າວປະກາດ 9:11, ລ.ມ.) ອຸບັດຕິເຫດແລະສິ່ງຕ່າງໆທີ່ບໍ່ດີອາດເກີດຂຶ້ນກັບພວກເຂົາຍ້ອນຢູ່ຜິດບ່ອນຜິດເວລາ.
9. ເປັນຫຍັງເຮົາໝັ້ນໃຈໄດ້ວ່າພະເຢໂຫວາຕ້ອງມີເຫດຜົນສຳຄັນທີ່ຍອມໃຫ້ມີຄວາມທຸກເກີດຂຶ້ນຕໍ່ໄປ?
9 ພະເຢໂຫວາບໍ່ໄດ້ເປັນຜູ້ທີ່ເຮັດໃຫ້ເກີດຄວາມທຸກ. ເມື່ອເກີດສົງຄາມ ອາດຊະຍາກຳ ຫຼືເຈິສິ່ງທີ່ບໍ່ດີເຮົາໂທດພະເຈົ້າບໍ່ໄດ້. ນອກຈາກນັ້ນ ພະອົງບໍ່ໄດ້ເຮັດໃຫ້ເກີດໄພພິບັດຕ່າງໆ ເຊັ່ນ: ແຜ່ນດິນໄຫວ ພາຍຸເຮີຣິເຄນ ແລະນ້ຳຖ້ວມ. ແຕ່ເຮົາອາດສົງໄສວ່າ: ‘ຖ້າພະເຈົ້າມີລິດເດດຫຼາຍທີ່ສຸດໃນເອກະພົບ ເປັນຫຍັງພະອົງຈຶ່ງບໍ່ເຮັດບາງຢ່າງເພື່ອຊ່ວຍເຮົາ?’ ຄຳພີໄບເບິນບອກໃຫ້ຮູ້ວ່າພະເຈົ້າຮັກແລະເປັນຫ່ວງເຮົາແທ້ໆ ດັ່ງນັ້ນ ພະອົງຕ້ອງມີເຫດຜົນສຳຄັນທີ່ຍອມໃຫ້ມີຄວາມທຸກເກີດຂຶ້ນຕໍ່ໄປ.—1 ໂຢຮັນ 4:8
ເປັນຫຍັງພະເຈົ້າຍອມໃຫ້ມີຄວາມທຸກ?
10. ຊາຕານໃສ່ຮ້າຍພະເຢໂຫວາແນວໃດ?
10 ໃນສວນເອເດນ ຊາຕານລໍ້ລວງອາດາມກັບເອວາ. ມັນໃສ່ຮ້າຍພະເຢໂຫວາວ່າພະອົງເປັນຜູ້ປົກຄອງທີ່ບໍ່ດີ. ມັນບອກວ່າພະອົງກີດກັນບໍ່ໃຫ້ອາດາມກັບເອວາໄດ້ຮັບສິ່ງດີໆ. ມັນຢາກໃຫ້ພວກເຂົາເຊື່ອວ່າມັນປົກຄອງໄດ້ດີກວ່າພະເຢໂຫວາ ແລະພວກເຂົາບໍ່ຈຳເປັນຕ້ອງເພິ່ງພະເຈົ້າກໍໄດ້.—ຕົ້ນເດີມ 3:2-5; ເບິ່ງຄຳອະທິບາຍເພີ່ມເຕີມ 27
11. ມີຄຳຖາມຫຍັງແດ່ທີ່ຕ້ອງໄດ້ຮັບຄຳຕອບ?
11 ອາດາມກັບເອວາບໍ່ເຊື່ອຟັງພະເຢໂຫວາແລະກະບົດຕໍ່ພະອົງ. ພວກເຂົາຄິດວ່າຕົວເອງມີສິດຕັດສິນໃຈເອງວ່າສິ່ງໃດດີສິ່ງໃດຊົ່ວ. ພະເຢໂຫວາຈະເຮັດແນວໃດເພື່ອພິສູດວ່າອາດາມກັບເອວາຄິດຜິດ? ແລະພະເຢໂຫວາຈະພິສູດແນວໃດວ່າພະອົງເປັນຜູ້ດຽວທີ່ຮູ້ວ່າສິ່ງໃດດີທີ່ສຸດສຳລັບເຮົາ?
12, 13. (ກ) ເປັນຫຍັງພະເຢໂຫວາບໍ່ໄດ້ທຳລາຍອາດາມກັບເອວາທັນທີ? (ຂ) ເປັນຫຍັງພະເຢໂຫວາຍອມໃຫ້ຊາຕານປົກຄອງໂລກແລະຍອມໃຫ້ມະນຸດປົກຄອງຕົວເອງ?
12 ພະເຢໂຫວາບໍ່ໄດ້ທຳລາຍອາດາມກັບເອວາທັນທີ ຍ້ອນພະອົງຕັ້ງໃຈໃນຕອນທຳອິດແລ້ວວ່າຈະໃຫ້ໂລກເຕັມໄປດ້ວຍລູກຫຼານຂອງອາດາມກັບເອວາເຊິ່ງເປັນມະນຸດທີ່ສົມບູນແບບ ບໍ່ເຖົ້າລົງ ບໍ່ເຈັບປ່ວຍ ແລະບໍ່ຕາຍ. ທຸກຢ່າງຈະຕ້ອງເກີດຂຶ້ນຕາມທີ່ພະອົງຕັ້ງໃຈໄວ້ ບໍ່ວ່າຊາຕານຈະພະຍາຍາມຂັດຂວາງຫຼາຍສ່ຳໃດກໍຕາມ. ດັ່ງນັ້ນ ພະອົງຈຶ່ງຍອມໃຫ້ອາດາມກັບເອວາມີລູກມີຫຼານເພື່ອໃຫ້ລູກຫຼານຂອງພວກເຂົາມີໂອກາດເລືອກເອງວ່າຢາກໃຫ້ຜູ້ໃດປົກຄອງພວກເຂົາ.—ຕົ້ນເດີມ 1:28; ເອຊາອີ 55:10, 11
13 ເນື່ອງຈາກຊາຕານທ້າທາຍພະເຢໂຫວາຕໍ່ໜ້າທູດສະຫວັນຫຼາຍລ້ານອົງ. (ໂຢບ 38:7; ດານຽນ 7:10) ດັ່ງນັ້ນ ພະເຢໂຫວາຈຶ່ງໃຫ້ເວລາຊາຕານພິສູດວ່າມັນຈະປົກຄອງໄດ້ດີກວ່າພະອົງຫຼືບໍ່. ນອກຈາກນັ້ນ ພະອົງຍັງຍອມໃຫ້ມະນຸດມີເວລາຕັ້ງການປົກຄອງຕ່າງໆຂອງຕົວເອງຂຶ້ນມາໂດຍມີຊາຕານໜູນຫຼັງຢູ່. ການທີ່ພະເຈົ້າເຮັດແບບນີ້ກໍເພື່ອພິສູດວ່າພວກເຂົາຈະເຮັດສຳເລັດຫຼືບໍ່ຖ້າບໍ່ໃຫ້ພະອົງຊ່ວຍເຫຼືອ.
14. ເວລາຊ່ວຍພິສູດເລື່ອງຫຍັງ?
14 ຫຼາຍພັນປີທີ່ຜ່ານມາ ມະນຸດພະຍາຍາມປົກຄອງຕົວເອງໂດຍໃຊ້ວິທີການປົກຄອງຫຼາຍຮູບແບບ ແຕ່ກໍບໍ່ປະສົບຜົນສຳເລັດ. ເລື່ອງນີ້ພິສູດໃຫ້ເຫັນວ່າຊາຕານເວົ້າຕົວະ. ມະນຸດບໍ່ສາມາດປົກຄອງຕົວເອງໄດ້ ພວກເຂົາຈຳເປັນຕ້ອງເພິ່ງພະເຈົ້າ. ຜູ້ພະຍາກອນເຢເຣມີເວົ້າໄວ້ຢ່າງຖືກຕ້ອງທີ່ວ່າ: “ພະເຢໂຫວາ ຂ້ອຍຮູ້ວ່າມະນຸດກຳນົດແນວທາງຊີວິດຂອງຕົວເອງບໍ່ໄດ້ ແຕ່ລະບາດກ້າວຂອງຊີວິດ ເຂົາຍັງກຳນົດບໍ່ໄດ້ດ້ວຍຊ້ຳ.”—ເຢເຣມີ 10:23, ລ.ມ.
ເປັນຫຍັງພະເຢໂຫວາຈຶ່ງໃຊ້ເວລາພິສູດດົນແທ້?
15, 16. (ກ) ເປັນຫຍັງພະເຢໂຫວາຍອມໃຫ້ຄວາມທຸກເກີດຂຶ້ນດົນປານນີ້? (ຂ) ເປັນຫຍັງພະເຢໂຫວາບໍ່ແກ້ໄຂບັນຫາຕ່າງໆທີ່ຊາຕານເຮັດໃຫ້ເກີດຂຶ້ນ?
15 ເປັນຫຍັງພະເຢໂຫວາຍອມໃຫ້ຄວາມທຸກເກີດຂຶ້ນກັບມະນຸດດົນປານນີ້? ເປັນຫຍັງພະເຢໂຫວາບໍ່ແກ້ໄຂບັນຫາຕ່າງໆທີ່ຊາຕານເຮັດໃຫ້ເກີດຂຶ້ນ? ເພື່ອຈະພິສູດວ່າການປົກຄອງຂອງຊາຕານບໍ່ປະສົບຜົນສຳເລັດກໍຕ້ອງໃຊ້ເວລາ. ເຖິງວ່າມະນຸດໄດ້ໃຊ້ການປົກຄອງຫຼາຍຮູບແບບມາແລ້ວ ແຕ່ກໍຍັງບໍ່ສາມາດເຮັດໃຫ້ສິ່ງໃດດີຂຶ້ນ. ທັງໆທີ່ມີຄວາມກ້າວໜ້າທາງວິທະຍາສາດແລະເຕັກໂນໂລຊີ ແຕ່ຄວາມບໍ່ຍຸຕິທຳໃນສັງຄົມ ຄວາມທຸກຍາກ ອາດຊະຍາກຳ ແລະສົງຄາມພັດມີຫຼາຍກວ່າແຕ່ກ່ອນ. ທັງໝົດນີ້ສະແດງໃຫ້ເຫັນວ່າເຮົາບໍ່ສາມາດປົກຄອງຕົວເອງໄດ້ຢ່າງປະສົບຜົນສຳເລັດໂດຍທີ່ບໍ່ເພິ່ງພະເຈົ້າ.
16 ພະເຢໂຫວາຍັງບໍ່ແກ້ໄຂບັນຫາຕ່າງໆທີ່ຊາຕານເຮັດໃຫ້ເກີດຂຶ້ນ. ເພາະຖ້າພະອົງເຮັດແບບນັ້ນກໍເທົ່າກັບວ່າພະອົງຊ່ວຍມັນໃຫ້ປົກຄອງໄດ້ສຳເລັດ. ເນື່ອງຈາກມະນຸດເຊື່ອທີ່ຊາຕານຕົວະວ່າພວກເຂົາສາມາດປົກຄອງຕົວເອງໄດ້ ພະເຢໂຫວາຈຶ່ງບໍ່ເຮັດສິ່ງໃດກໍຕາມທີ່ເປັນການສະໜັບສະໜູນຄຳຕົວະນີ້ ເພາະພະອົງບໍ່ມີທາງເວົ້າຕົວະ.—ເຮັບເຣີ 6:18
17, 18. ພະເຢໂຫວາຈະເຮັດຫຍັງກັບຄວາມເສຍຫາຍທຸກຢ່າງທີ່ຊາຕານເຮັດໃຫ້ເກີດຂຶ້ນ?
17 ພະເຢໂຫວາສາມາດແກ້ໄຂແລະຟື້ນຟູຄວາມເສຍຫາຍທຸກຢ່າງທີ່ເກີດຂຶ້ນຈາກການກະບົດຂອງຊາຕານແລະມະນຸດໄດ້ບໍ? ໄດ້ແນ່ນອນ. ບໍ່ມີສິ່ງໃດທີ່ພະເຢໂຫວາເຮັດບໍ່ໄດ້ ແລະພະອົງຮູ້ວ່າຕ້ອງໃຊ້ເວລາດົນສ່ຳໃດຈຶ່ງຈະໄດ້ຂໍ້ພິສູດຢ່າງຄົບຖ້ວນວ່າຄຳກ່າວຫາຂອງຊາຕານທີ່ໃສ່ຮ້າຍພະອົງນັ້ນບໍ່ເປັນຄວາມຈິງ. ຈາກນັ້ນ ພະອົງກໍຈະເຮັດໃຫ້ໂລກກາຍເປັນສວນທີ່ສວຍງາມແບບທີ່ຄວນຈະເປັນຕັ້ງແຕ່ຕອນທຳອິດ. ທຸກຄົນທີ່ຢູ່ໃນ “ອຸໂມງຝັງສົບ” ຈະຖືກປຸກໃຫ້ຄືນມາມີຊີວິດອີກ. (ໂຢຮັນ 5:28, 29) ບໍ່ມີໃຜຕ້ອງເຈັບປ່ວຍແລະຕາຍ. ພະເຢຊູຈະແກ້ໄຂຄວາມເສຍຫາຍທຸກຢ່າງທີ່ຊາຕານໄດ້ກໍ່ຂຶ້ນໃຫ້ໝົດໄປຈົນຄືກັບວ່າສິ່ງເຫຼົ່ານັ້ນບໍ່ເຄີຍເກີດຂຶ້ນເລີຍ. ພະເຢໂຫວາຈະໃຫ້ພະເຢຊູ “ທຳລາຍຜົນງານຂອງມານຮ້າຍ.”—1 ໂຢຮັນ 3:8
18 ເຮົາຂອບໃຈພະເຢໂຫວາທີ່ອົດທົນເພື່ອພວກເຮົາ ເພາະການເຮັດແບບນີ້ເຮັດໃຫ້ເຮົາມີໂອກາດໄດ້ມາຮູ້ຈັກກັບພະອົງແລະຕັດສິນໃຈວ່າເຮົາຢາກໃຫ້ພະອົງປົກຄອງເຮົາແທ້ໆ. (ອ່ານ 2 ເປໂຕ 3:9, 10) ເຖິງວ່າຕອນນີ້ເຮົາຕ້ອງເຈິກັບຄວາມທຸກ ແຕ່ພະອົງຈະຊ່ວຍເຮົາໃຫ້ອົດທົນໄດ້.—ໂຢຮັນ 4:23; ອ່ານ 1 ໂກຣິນໂທ 10:13
ພະເຈົ້າໃຫ້ເຮົາມີສິດຄິດແລະເລືອກ ເຈົ້າໃຊ້ສິດນັ້ນແນວໃດ?
19. ພະເຢໂຫວາໃຫ້ຂອງຂວັນຫຍັງທີ່ພິເສດ? ເປັນຫຍັງເຮົາຄວນຂອບໃຈສຳລັບຂອງຂວັນນີ້?
19 ພະເຢໂຫວາບໍ່ໄດ້ບັງຄັບເຮົາໃຫ້ເລືອກພະອົງເປັນຜູ້ປົກຄອງ. ແຕ່ພະອົງໃຫ້ເຮົາມີສິດເລືອກເອງ. ການທີ່ພະເຈົ້າໃຫ້ເຮົາມີສິດຄິດແລະເລືອກເອງເປັນຄືກັບຂອງຂວັນທີ່ດີເລີດຈາກພະອົງທີ່ເຮັດໃຫ້ເຮົາແຕກຕ່າງຈາກສັດ. ສັດໃຊ້ຊີວິດຕາມສັນຊາດຕະຍານ ແຕ່ມະນຸດເລືອກໄດ້ເອງວ່າຈະໃຊ້ຊີວິດແບບໃດ ແລະຕັດສິນໃຈໄດ້ເອງວ່າຢາກຈະເຮັດໃຫ້ພະເຢໂຫວາພໍໃຈຫຼືບໍ່. (ສຸພາສິດ 30:24) ນອກຈາກນັ້ນ ມະນຸດບໍ່ຄືກັບຫຸ່ນຍົນຫຼືເຄື່ອງຈັກທີ່ເຮັດວຽກຕາມຄຳສັ່ງ. ເຮົາເລືອກໄດ້ເອງວ່າຢາກເປັນຄົນແບບໃດ ຢາກເປັນໝູ່ກັບໃຜ ແລະຈະໃຊ້ຊີວິດແບບໃດ. ນີ້ສະແດງວ່າພະເຢໂຫວາຢາກໃຫ້ເຮົາມີຄວາມສຸກກັບຊີວິດ.
20, 21. ການເລືອກທີ່ດີທີ່ສຸດເຊິ່ງເຈົ້າສາມາດເລືອກໄດ້ຕັ້ງແຕ່ຕອນນີ້ແມ່ນຫຍັງ?
20 ພະເຢໂຫວາຢາກໃຫ້ເຮົາຮັກພະອົງ. (ມັດທາຍ 22:37, 38) ພະອົງມີຄວາມສຸກຄືກັບພໍ່ທີ່ໄດ້ຍິນລູກເວົ້າອອກມາຈາກໃຈວ່າ “ລູກຮັກພໍ່” ໂດຍທີ່ບໍ່ມີຜູ້ໃດບັງຄັບ. ພະເຢໂຫວາໃຫ້ອິດສະຫຼະເຮົາເລືອກໄດ້ວ່າຈະຮັບໃຊ້ພະອົງຫຼືບໍ່. ຊາຕານ ອາດາມ ແລະເອວາເລືອກບໍ່ຮັບໃຊ້ພະເຢໂຫວາ. ແລ້ວເຈົ້າເດ ເຈົ້າເລືອກຫຍັງ?
21 ຂໍໃຫ້ເຈົ້າເລືອກທີ່ຈະຮັບໃຊ້ພະເຢໂຫວາ. ມີຫຼາຍລ້ານຄົນຕັດສິນໃຈເລືອກເຮັດໃຫ້ພະເຈົ້າພໍໃຈ ແລະບໍ່ຢູ່ຝ່າຍຊາຕານ. (ສຸພາສິດ 27:11) ແຕ່ຕອນນີ້ເຈົ້າຕ້ອງເຮັດຫຍັງເພື່ອຈະໄດ້ຢູ່ໃນໂລກໃໝ່ຂອງພະເຈົ້າເຊິ່ງຈະບໍ່ມີຄວາມທຸກອີກເລີຍ? ບົດຕໍ່ໄປຈະຕອບຄຳຖາມນີ້.
