ບົດຮຽນ 7
ຄຳເຕືອນຈາກເຫດການໃນອະດີດ
ພະເຢໂຫວາຈະບໍ່ອະນຸຍາດໃຫ້ຄົນຊົ່ວທຳລາຍອຸທິຍານ. ສະເພາະແຕ່ເພື່ອນຂອງພະອົງເທົ່ານັ້ນທີ່ຈະມີຊີວິດຢູ່ໃນອຸທິຍານ. ຈະມີຫຍັງເກີດຂຶ້ນກັບຄົນບໍ່ດີ? ເພື່ອຈະຮູ້ກ່ຽວກັບຄຳຕອບ ຂໍໃຫ້ພິຈາລະນາເລື່ອງຈິງຂອງໂນເອ. ໂນເອມີຊີວິດຢູ່ຫຼາຍພັນປີກ່ອນໜ້ານີ້. ທ່ານເປັນຄົນດີແລະເປັນຜູ້ທີ່ພະຍາຍາມຢ່າງໜັກທີ່ຈະເຮັດຕາມພະປະສົງຂອງພະເຢໂຫວາສະເໝີ. ແຕ່ຄົນອື່ນໆທີ່ຢູ່ເທິງແຜ່ນດິນໂລກເຮັດສິ່ງຊົ່ວຮ້າຍ. ດັ່ງນັ້ນ ພະເຢໂຫວາບອກໃຫ້ໂນເອຮູ້ວ່າພະອົງຈະເຮັດນໍ້າຖ້ວມເພື່ອທຳລາຍບັນດາຄົນເຫຼົ່ານັ້ນທີ່ຊົ່ວຮ້າຍ. ພະອົງບອກໃຫ້ໂນເອສ້າງນາວາຫຼືເຮືອໃຫຍ່ ເພື່ອທ່ານແລະຄອບຄົວຂອງທ່ານຈະບໍ່ຕາຍເມື່ອເກີດນໍ້າຖ້ວມ.—ຕົ້ນເດິມ 6:9-18.
ໂນເອແລະຄອບຄົວຂອງທ່ານສ້າງນາວາ. ໂນເອເຕືອນປະຊາຊົນກ່ຽວກັບນໍ້າຖ້ວມທີ່ພວມຈະເກີດຂຶ້ນ ແຕ່ພວກເຂົາບໍ່ຟັງທ່ານ. ພວກເຂົາເຮັດສິ່ງທີ່ບໍ່ດີຕໍ່ໄປ. ຫຼັງຈາກນາວາໄດ້ຖືກສ້າງສຳເລັດແລ້ວ ໂນເອໄດ້ນຳເອົາສັດຕ່າງໆເຂົ້າໄປໃນນາວາ ແລະທ່ານກັບຄອບຄົວກໍເຂົ້າໄປທາງໃນເຊັ່ນດຽວກັນ. ຈາກນັ້ນ ພະເຢໂຫວາເຮັດໃຫ້ເກີດພາຍຸແຮງ. ຝົນຕົກເປັນເວລາ 40 ມື້ແລະ 40 ຄືນ. ນໍ້າໄດ້ຖ້ວມທົ່ວທັງແຜ່ນດິນໂລກ.—ຕົ້ນເດິມ 7:7-12.
ຄົນຊົ່ວຮ້າຍສູນເສຍຊີວິດ ແຕ່ໂນເອແລະຄອບຄົວໄດ້ຮັບການຊ່ວຍຊີວິດໃຫ້ລອດ. ພະເຢໂຫວາໄດ້ຊ່ວຍພວກເຂົາລອດຜ່ານນໍ້າຖ້ວມເຂົ້າສູ່ແຜ່ນດິນທີ່ປາສະຈາກຄວາມຊົ່ວຮ້າຍ. (ຕົ້ນເດິມ 7:22, 23) ຄຳພີໄບເບິນກ່າວວ່າ ຍັງມີອີກເວລາໜຶ່ງທີ່ຈະມາເມື່ອພະເຢໂຫວາຈະທຳລາຍຄົນເຫຼົ່ານັ້ນທີ່ບໍ່ຍອມເຮັດສິ່ງທີ່ຖືກຕ້ອງ. ຄົນດີຈະບໍ່ຖືກທຳລາຍ. ພວກເຂົາຈະມີຊີວິດຕະຫຼອດໄປເທິງແຜ່ນດິນໂລກທີ່ເປັນອຸທິຍານ.—2 ເປໂຕ 2:5, 6, 9.
ໃນປັດຈຸບັນນີ້ຫຼາຍຄົນເຮັດສິ່ງບໍ່ດີ. ໂລກເຕັມໄປດ້ວຍຄວາມຫຍຸ້ງຍາກ. ພະເຢໂຫວາສົ່ງເຫຼົ່າພະຍານຂອງພະອົງເພື່ອເຕືອນຜູ້ຄົນເທື່ອແລ້ວເທື່ອອີກ ແຕ່ຫຼາຍຄົນບໍ່ຕ້ອງການຟັງຄຳຂອງພະເຢໂຫວາ. ພວກເຂົາບໍ່ຕ້ອງການປ່ຽນແນວທາງຂອງຕົນ. ພວກເຂົາບໍ່ຕ້ອງການຍອມຮັບສິ່ງທີ່ພະເຈົ້າກ່າວກ່ຽວກັບສິ່ງທີ່ຖືກຕ້ອງແລະສິ່ງທີ່ຜິດ. ຈະມີຫຍັງເກີດຂຶ້ນກັບຄົນເຫຼົ່ານີ້? ພວກເຂົາຈະປ່ຽນແປງໃນມື້ໜ້າບໍ? ຫຼາຍຄົນຈະບໍ່ປ່ຽນແປງເລີຍ. ໃກ້ຈະຮອດເວລາແລ້ວເມື່ອຄົນຊົ່ວຈະຖືກທຳລາຍແລະພວກເຂົາຈະບໍ່ມີຊີວິດອີກເລີຍ.—ຄຳເພງ 92:7.
ແຜ່ນດິນໂລກຈະບໍ່ຖືກທຳລາຍ; ຈະມີການເຮັດໃຫ້ໂລກເປັນອຸທິຍານ. ຄົນເຫຼົ່ານັ້ນຊຶ່ງເຂົ້າມາເປັນເພື່ອນຂອງພະເຈົ້າຈະມີຊີວິດຕະຫຼອດໄປຢູ່ໃນອຸທິຍານເທິງແຜ່ນດິນໂລກ.—ຄຳເພງ 37:29.
